Den polofeiti e yeepi u fu sabi Gadu
Aini a ten di pasa, Gadu be meke wantu polofeiti fi en tyai pelensipali bosikopu gi libisama. San den sani di Gadu be taigi den polofeiti ya e leli u fu Gadu? Meke u luku san u sa leli fu dii fu den polofeiti ya.
ABALAHAM
Gadu nai paati bee, a wani du bun gi ala sama.
Gadu be paamisi a polofeiti Abalaham taki ‘a o meke ala famii a hii goontapu fende belesi’.—Genesesi 12:3.
San a sani ya e leli u? Ai leli u taki Gadu lobi ala sama. A wani du bun gi ala sama di e aliki en, winsi a man, uman efuso pikinnengee.
MOSESI
Gadu abi tyali-ati, ai belesi ala den sama di e meke moiti fu sabi en.
A Moo Taanga Gadu be gi a polofeiti Mosesi a kaakiti fu du omen wonduu. Tokuso Mosesi be begi en taki: ‘Gaantangi meke mi kon sabi den pasi fi i fu mi sa sabi i, fu mi sa meke i piisii ala yuu’ (Ekisodesi 33:13). Gadu be lobi a sani di Mosesi be akisi en, neen meke a be meke a kon sabi en moo bun. A be soi Mosesi den manii fi en tu. A taigi Mosesi taki en a wan Gadu di ‘abi switifasi. En ati nai boon gaw’.—Ekisodesi 34:6, 7.
San a sani ya e leli u? Ai leli u taki Gadu wani belesi ala sama. A wani du bun gi man, uman anga pikinnengee di e meke moiti fu kon sabi en moo bun. Ai soi wi aini Beibel fa u mu dini en. Ai soi u tu taki efu u dini en enke fa a wani a o belesi u.
YESESI
Yesesi deesi ala sowtu siki fu di tyali fu den sama be e kisi en
Efu u leli sabi Yesesi anga den sani di a be e leli sama di a be de a goontapu, Gadu o belesi u fu teego.
A Wowtu fu Gadu e leli u fa a libi fu Yesesi be de, anga den sani di a be e leli sama. Gadu be gi Yesesi a makiti fu du omen wonduu. A be meke beendisama si, a be meke dofusama yee, a be meke sama di lan waka. Boiti dati, a be meke dedesama kon a libi baka. Den sani di Yesesi du ya, e soi san Gadu o du gi libisama aini a ten di e kon. Yesesi be taigi u san u mu du fu fende den belesi ya. A taki: ‘Efu wan sama wani libi fu teego, da a mu sabi yu, a tuutuu Gadu, anga Yesesi Kelestesi, a sama di i sende kon a goontapu.’—Yohanisi 17:3.
Yesesi be abi bun manii. A be abi tyali-ati, anga safu-ati. Ala sama be lobi en, mannengee, umansama, gaansama anga pikinnengee. A be taigi den taki: ‘U du enke mi, bika mi abi safu-ati, mi abi sakafasi, da wi o fende kaakiti baka’ (Mateyesi 11:29). Den sama fu a ten fu Yesesi á be e libi bun anga umanpikin, ma Yesesi be e libi switi anga den. A be e lesipeki den.
San a sani ya e leli u? Ai leli u taki Yesesi be lobi sama. A soi u tu fa u mu libi anga taawan.
YESESI A NÁ GADU
Beibel e leli u taki ‘a wan Gadu namo de’. Ai leli u tu taki Yesesi Kelestesi a be wan bosikopuman fu Gadu (1 Korentesama 8:6). Yesesi seefi taigi wi aini Beibel taki Gadu bigi moo en. A taigi u tu taki a Gadu sende en kon a goontapu.—Yohanisi 11:41, 42; 14:28. *
^ paragraaf 17 Efi i wani sabi moo fu Yesesi, i sa luku Pisi 4 fu a bolosilo Gadu abi bun nyunsu gi u! a www.pr418.com/djk.
