Gadu be paamisi a polofeiti Abalaham taki a wan fu den bakapikin fi en be ‘o meke ala den foluku a goontapu fende belesi’ (Genesesi 22:18). Sama a be a pikin ya?

Wan sani fu 2000 yali pasa Gadu be gi Yesesi, wan bakapikin fu Abalaham a makiti fu du omen wonduu. Den wonduu ya e soi taki a Yesesi Gadu be o koboloiki fu du den sani di a be paamisi Abalaham.​—Galasiyasama 3:14.

Den wonduu di Yesesi be du e soi taki neen na a sama di Gadu o koboloiki fu belesi libisama. Den wonduu ya e soi tu san Gadu o meke Yesesi du gi libisama. Meke u luku fa den wonduu di Yesesi du e soi sowtu manii a abi.

A be abi safu-ati​—Yesesi be e deesi sama di be siki.

Wan leisi wan kokobeman begi Yesesi fu a deesi en. Yesesi langa ana holi a kokobeman, neen a taki: ‘Mi wani!’ Faisi a holi a man, a so a man betee.​—Malikisi 1:40-42.

A be lobi gi sama sani​—Yesesi be e gi sama nyanyan.

Yesesi á be e wani sama de anga angii. A moo enke wan leisi a gi omen dunsu sama nyanyan anga wantu beele anga wantu fisi namo (Mateyesi 14:17-21; 15:32-38). Den sama ya bee be fuu te neen nyanyan fika a tapu.

Tyali fu sama be e kisi en​—Yesesi be e weki dedesama.

Di Yesesi si fa wan uman di man be dede kaba be e kee fu di a wan kodo boi fi en be dede, ‘tyali kisi en te’ neen a weki a boi fu a uman ya baka.​—Lukasi 7:12-15.