A polofeiti Mosesi be taki Gadu o belesi wi efu wi e wooko anga den weiti fi en (Deitolonomi 10:13; 11:27). A ná di wi e feele taki Gadu o sitaafu u meke u mu wooko anga den weiti fi en. Ma u mu du a sani ya fu di u lobi en. ‘Te u lobi Gadu, da wi o wooko anga den weiti fi en.’​—1 Yohanisi 5:3.

Sowtu wini wi e fende te wi e du sani enke fa Gadu wani? Wi o luku tu fu den wini di wi e fende.

‘Mi a Yehofa, a mi ai Gadu. A mi na a sama di e leli i san i mu du fu sani waka i bun. A mi na a sama di e soi yu a pasi di i mu waka.’​—YESAYA 48:17.

Yehofa a Gadu di meke ala sani sabi u, a sabi san wi abi fanowdu tu. Neen meke neen na a moo bun sama di sa leli u fa u mu libi. Efu u wani fende wini fu den sani di ai leli u, u mu sutudeli a Wowtu fi en, da u du san u leli.

‘A den sama di e yee a wowtu fu Gadu, da den du san a wowtu e taki o de koloku!’​—LUKASI 11:28.

Aini a ten ya a miliyunmiliyun sama e du san a Wowtu fu Gadu e taki, neen meke den libi e waka bun. Luku a toli fu wan man di e tan a Sipanyookondee. A man ya ati be e boon gaw. A be lobi ligei anga taawan, a be e ligei anga en uman tu. Ma wan dei a leisi wan sani di a polofeiti Mosesi be taki fu Yowsefu, wan fu den boi fu Yakopu. A pisi ya be e soi taki Yowsefu be abi safu-ati, en ati á be e boon gaw. Den baala fu Yowsefu be seli en enke saafu, bakaten sama lei gi en neen den poti en a sitaafu-osu. Tokuso Yowsefu á be holi den na ati (Genesesi kapitel 37-45). A man fu Sipanyookondee taki: ‘A toli fu Yowsefu yeepi mi fu meke moiti fu abi safu-ati. A yeepi mi fu dwengi miseefi tu. Nownow mi e moo piisii.’

Taa sani de aini Beibel di e leli u fa u mu libi anga taawan. Wi o luku wantu fu den sani ya aini a taa artikel.