Don anga Margaret * be piisii di a umanpikin fu den anga en osufamii kon luku den. Den be o nyan makandii fosi den gwe, neen meke Margaret boli makaroni anga kasi. Margaret be sabi boli. A be sabi taki den tu galanpikin fi en lobi a nyanyan ya.

Di ala sama sidon, neen Margaret tyai a nyanyan kon poti na a tafaa. Di a opo a patu, a sumutu kasi namo be de aini. Margaret be feegete fu poti makaroni aini a patu!

Ala wi e meke fowtu, winsi omen ondoofeni efuso omen yali wi abi. Son leisi a wan sani di u taki, wan sani di u du, efuso wan sani di u feegete fu du. Saide wi e meke fowtu? Fa u mu si den fowtu di wi e meke? Wi o man de te da u nai meke fowtu? A fasi fa wi e si den fowtu fu wi anga den fowtu di taawan e meke, o yeepi u fu piki den akisi ya.

Te u du wan sani bun, wi e fii bun te sama e gafa u. Te u meke wan fowtu, u mu man soi tu taki u meke wan fowtu, winsi a ná fu seefi. U mu abi sakafasi fu man du a sani ya.

Efu wi abi heimembee wi o si enke den fowtu di u meke á bigi so. Wi o wani gi taawan a fowtu. Kande wi o sitee seefi taki wi á meke fowtu. Ma sani ná o waka bun efu a so wi e du. A polobelema ná o losi. Kande a taa sama o tyai a faantiwowtu fu a sani di u du. Winsi u koli sama taki a ná wi meke a fowtu, wi á mu feegete taki „Gadu o kuutu ala sama fu den sani di den du”.​—Romesama 14:12.

Gadu nai si fowtu enke fa wi e si den. Aini a Beibel buku Psalm, a sikiifi taki Gadu „e fii gi sama. A abi tyali-ati tu”. A nai „suku fowtu a wi naamo. A nai holi u na ati fu teego tu”. A sabi taki wi a sondu sama. A sabi den swakifasi di wi abi, bika ai „holi a pakisei taki anga doti u meke”.​—Psalm 103:8, 9, 14.

Leti enke wan dda di e fii gi en pikin, a so Gadu wani u si den fowtu di wi e meke enke fa ai si den (Psalm 130:3). A soi wi aini en Wowtu san u mu du te u meke wan fowtu efuso te taa sama meke wan fowtu.

Son leisi te u meke wan fowtu, wi e lasi omen ten fu soi saide u taki efuso du wan sani. Son leisi wi e gi taawan a fowtu tu. Ma te u taki wan sani di hati wan taawan, a moo bun fu akisi paadon, da u meke en bun anga a sama baka. I du wan sani di meke taawan á fii bun? Yu ati á mu boon a iseefi. Yu á mu gi taawan a fowtu tu, ma meke moiti fu seeka a toli. Efu yu e gi taa sama a fowtu, den ati o boon a yu. A polobelema o kon moo bigi tu. I mu leli wan sani fu a fowtu di  i meke da yu á du en moo. I mu feegete a toli tu.

Te wan sama meke wan fowtu, kande wi o wani ligei. Ma a moo bun fu du san Yesesi taki. A taki: „A den sani di i wani taawan du gi, i mu du gi den tu” (Mateyesi 7:12). Te i meke wan fowtu, yu e wani sama gi i paadon. Neen meke a bun fu meke moiti fu du aseefi sani te sama du wan sani anga i.​—Efeisesama 4:32.

Wan buku taki, son leisi sama e meke fowtu te den á denki bun fosi den taki efuso du wan sani. Son leisi den á fusutan wan toli bun. Boiti dati, kande den á poti pakisei na a sani di den be e du. Ala wi e meke den fowtu ya son leisi. Ma den fowtu di wi o meke ná o ipi tumisi efu wi e wooko anga san Beibel taki.

Wan fu den sani ya sikiifi a Odo 18:13. Ape sikiifi taki: „Te wan sama e piki aini wan toli sondee a yee a fini fi en, da a wan don sani ai du de.” Te wi e teke ten fu yee a fini fu wan toli anga te wi e denki fosi u taki wan sani, wi o du sani anga koni. U mu sabi a fini fu wan toli efu wi á wani meke fowtu.

Beibel e leli wi ete wan sani. A taki: „Du ala san i poi fu libi bun anga ala sama” (Romesama 12:18). Du ala san i poi fu du san sikiifi ya. Te yu e wooko anga taawan, i mu e soi taki yu e lesipeki den. I mu e gafa den te den du wan bun sani. I mu e gi den taanga-sikin tu. Te wi e du den sani ya wi o go e meke fowtu ete, ma a ná o taanga fu sama gi u paadon. A ná o taanga gi u fu gi den paadon tu. Te wan sama meke wan fowtu, a lesipeki di wi e lesipeki useefi o yeepi u fu losi a polobelema.

Meke moiti fu leli wan sani fu a fowtu di i meke. Ná suku fu soi saide i meke wan fowtu, ma suku fu toon wan moo bun sama. Kande a fowtu di i meke, e soi taki i mu meke moiti fu abi moo pasensi anga switifasi. Kande i mu meke moo moiti fu holi iseefi efuso taki moo bun anga taawan. Kande i mu meke moiti fu libi moo bun anga taawan efuso soi den taki i lobi den (Galasiyasama 5:22, 23). Winsi fa, meke moiti fu si san i mu du fu yu á meke a fowtu de moo. Te i meke wan fowtu i mu poi meke sipowtu pikinso tu. A sani ya o yeepi i fu yu á teke a sani bigi tumisi.

Te wi e si fowtu enke fa Gadu e si den, da wi ati ná o boon tumisi te wan sama meke wan fowtu. Wi o gi useefi paadon. Wi o gi taawan paadon tu. Te wi e meke moiti fu leli wan sani fu a fowtu di u meke, wi o abi ondoofeni. Sama o moo lobi u tu. U ná o fii booko-saka tumisi efuso si enke wi á bun. Te wi e fusutan taki taawan seefi e meke moiti fu den á meke fowtu, wi anga den o toon bun mati. Ma a moo gaan wini di wi o fende, a taki wi o lobi taa sama winsi fa den e meke fowtu. Wi o gi taawan paadon anga u hii ati, leti enke fa Gadu e gi sama paadon.​—Kolosesama 3:13.

A fowtu di Margaret be meke be poli a dei fu den taawan? Nono. Ala sama be e lafu. Margaret seefi be e lafu. Den nyan a nyanyan sondee a makaroni! Omen yali baka dati, den tu galanpikin gi den pikin fu den a toli. Den taigi den fa a dei de be switi, bika te i luku en bun, a sani de a ná be wan gaan sani!