Nawan sama abi fowtow fu Yesesi. Noiti a sidon gi sama fu den teken en. Tokuso a omen sama teken Yesesi aini den yali di pasa.

Ma den sama ya á be si Yesesi wanten. Son leisi na a fasi fa den kiya anga den sani di den be e biibi, meke den be e teken Yesesi enke fa den denki. Son leisi a den sama di be wani wan fowtow fu Yesesi be e taigi den fa den mu teken en. Na a fasi fa son sama teken Yesesi, meke sama bigin denki taa fasi fi en anga den sani di a be e leli.

Son sama teken Yesesi enke wan mangii man anga langa uwii anga wan pikin tyukii baiba. Den be teken Yesesi enke a be e tyali. Son sama be e teken Yesesi enke wan engel di gei enke a nai booko en ede anga sama. Ma a so Yesesi be de tuutuu? Fa wi o du sabi fa a be de? Wan sani di o yeepi u, a te wi e luku san Beibel taki. A sani ya o yeepi u tu fu si Yesesi enke fa a be de tuutuu.

A Yesesi taki den sani ya di a begi na a ten di a dopu (Hebrewsama 10:5; Mateyesi 3:13-17). Fa a sikin fi en be tan? Wan sani fu 30 yali fosi a sani ya pasa, a engel Gabiliyeli be taigi Maliya taki: „Yu o de anga bee da yu o meke wan manpikin, . . . Gadu Manpikin” (Lukasi 1:31, 35). A sani ya e soi taki Yesesi á be abi sondu, leti enke fa Adan á be abi sondu (Lukasi 3:38; 1 Korentesama 15:45). Yesesi be musu sitampu. Kande a be e gei en mma Maliya tu.

Yesesi be abi baiba enke fa den Dyu aini a ten de be gwenti. Den á be de enke den Romesama di á be e kweki baiba. A ten de den Dyu be e lesipeki i te i be abi baiba. Den be e si yu enke bunbun manengee. Ma den baiba ya á be langa. Den á be tyobo tu. Yesesi seefi be musu e seeka en baiba anga en uwii. A den Nasireisama, á be e koti den uwii. Sama enke Simson.​—Numeri 6:5; Kuutubakaa 13:5.

Gaanse fu den moo enke 30 yali di Yesesi de a goontapu, a tembee wooko a be e du. A á be abi den wooko sani fu a ten ya (Malikisi 6:3). Neen meke a be musu taanga. Wan leisi di a bigin paati a Kownukondee bosikopu, a „yaki ala den sama anga ala den sikapu anga den kaw fu den puu aini a tempel. A towe a moni fu den sama di be e booko moni a doti, neen a daai ala den tafaa tapu” (Yohanisi 2:14-17). A di Yesesi be taanga meke a be poi du a sani ya. Yesesi koboloiki a sikin di Gadu gi en fu du a wooko di Gadu be sende en. A be taki: „Mi mu paati a bun nyunsu fu a Kownukondee fu Gadu a taa foto tu, bika a fu dati ede Gadu be sende mi kon a goontapu” (Lukasi 4:43). I be mu abi bunbun kaakiti fu waka anga futu lontu Palestina fu paati a bosikopu ya.

A fasi fa Yesesi be e kai sama fu kon neen, be musu switi gi den sama „di e wooko taanga anga den sama di e tyotyo” (Mateyesi 11:28-30). Den bun manii fi en, be e gi den sama di be wani aliki den leli fi en taanga-sikin. Pikinengee seefi á be e  feele fu go a Yesesi, bika Beibel taki: „A baasa den pikin.”​—Malikisi 10:13-16.

Winsi fa sama pina Yesesi fosi a dede, a á be de wan sama di be e tyali hii dei. Wan leisi Yesesi be go a wan toow a Kana, neen a meke wataa toon win. A sani ya be meke den sama piisii (Yohanisi 2:1-11). Te sama be kai Yesesi kon nyan a den osu, da a be e leli den omen pelensipali sani.​—Mateyesi 9:9-13; Yohanisi 12:1-8.

Ma san moo pelensipali na a bun nyunsu di Yesesi be e paati. A be e gi den sama di be e aliki en a howpu fu libi fu teego (Yohanisi 11:25, 26; 17:3). Di 70 disipel fi en kon taigi en fa den peleiki, neen Yesesi „be e piisii gaan piisii”. A taigi den taki: „U mu piisii fu di u nen sikiifi a hemel.”​—Lukasi 10:20, 21.

Den keliki fesiman aini a ten fu Yesesi be e du sani fu sama poti pakisei a den. Den be e wani sama si taki den pelensipali (Numeri 15:38-40; Mateyesi 23:5-7). Ma Yesesi be de taa fasi. A be e leli den disipel fi en taki den á mu pee „basi” gi taawan (Lukasi 22:25, 26). Yesesi be wasikoi den taki: „U mu luku bun anga den leliman fu a Dyu weiti. Den lobi wei gaan langa koosi e waka e lontu fu sama mu si den. Den lobi te sama e gi den odi a wowoyo.”​—Malikisi 12:38.

Ma Yesesi be de taa fasi. A be lobi mosoo anga sama. Son leisi sama á be e sabi seefi taki neen a Yesesi (Yohanisi 7:10, 11). Winsi a be de anga den 11 apostel fi en, yu á be e si taki a de taa fasi. A bosi Yudasi be abi fu bosi Yesesi fu meke den sama di be kon fu kisi Yesesi sabi sama den be mu kisi.​—Malikisi 14:44, 45.

Winsi fa wi á sabi ala sani finifini, den sani di u luku te anga now e soi taki Yesesi á be de enke fa den e teken en. Ma san moo pelensipali, a ná fa en fesi be de, ma na a fasi fa wi e denki fi en.

A dei baka di Yesesi taki den sani ya, a dede neen den beli en (Yohanisi 14:19). A „gi a libi fi en enke wan paiman fu fii somen sama” (Mateyesi 20:28). Du fu dii dei, Gadu weki en baka „enke wan yeye” neen ’a meke wantu disipel fi en si en’ (1 Peitilisi 3:18; Toli 10:40). Fa Yesesi be de di den disipel fi en si en? A á be e gei a Yesesi di den be sabi, bika den sama di be e waka ala dei anga en seefi á be sabi taki neen. Maliya Makidaleina be denki en na a man di e kiin den geebi. Den tu disipel fi en di be e waka go a Emayesi foto be denki en a wan sama fu wan taa foto.​—Lukasi 24:13-18; Yohanisi 20:1, 14, 15.

Fa u mu si Yesesi aini a ten ya? Wan sani fu 60 yali baka di Yesesi dede, apostel Yohanisi be si fisyun fu Yesesi. A á be si Yesesi e dede a wan koloisi. Ma a be si Yesesi enke „Kownu fu den kownu anga Masaa fu den masaa”. A be si en enke a Kownu fu Gadu Kownukondee, a sama di o wini ala den feyanti fu Gadu. Neen o meke sani waka bun gi libisama fu teego.​—Openbaring 19:16; 21:3, 4.