A omen sama a hii goontapu denki na a dei di Yesesi meke den e membee te den e fii bedaki. Ma yu akisi iseefi wan dei efu den fosi Kelesten efuso den sama di be e waka anga Yesesi be e fii bedaki? I sabi san Beibel e taki fu fuuyali? Efi i sabi den piki, yu o sabi efu Kelesten mu fii bedaki.

A á sikiifi aini Beibel taki Yesesi efuso den sama di be e dini Gadu be e fii fuuyali. Beibel e taki fu tu sama namo di be fii fuuyali. Den sama ya á be e dini Yehofa, a Gadu di sikiifi a Beibel. Den man ya du ogii na a dei di den fuuyali (Genesesi 40:20; Malikisi 6:21). Enke fa a buku Encyclopædia Britannica taki, den fosi Kelesten á be e fii fuuyali, bika a sama di á be e dini Gadu be e fii fuuyali.

A fosi sani, a á sikiifi aini Beibel on ten Yesesi meke. Wan buku di den e kai McClintock and Strong’s Cyclopedia, taki a á sikiifi aini a Nyun Testamenti efuso a wan taa peesi on ten Yesesi meke. Efu Yesesi be wani den bakaman fi en fii en fuuyali dei, a be o taigi den sowtu dei a meke.

Du fu tu sani, a á sikiifi aini Beibel taki Yesesi efuso den disipel fi en be e fii bedaki. A buku di den e kai New Catholic Encyclopedia, taki a fosi leisi di sama yee fu bedaki, a di a sikiifi aini wan buku fu den Romesama di den e kai Chronograph of Philocalus. A buku ya sikiifi na a pisiten fu 336 B.K. A ten de a Beibel be sikiifi langa ten kaba. Boiti dati a omen ondoo yali be pasa di Yesesi be kon a goontapu. Neen meke a buku di den e kai McClintock and Strong’s Cyclopedia taki a ná Gadu sende sama fu fii bedaki. A á sikiifi aini a Nyun testamenti tu. *

Yesesi a be a moo bun leliman di be de. A be soi den bakaman fi en kiin san a wani den du. Den sani ya sikiifi aini Beibel. Nawan peesi aini Beibel a taigi den fu fii bedaki. Leti enke fa wan muneli wani den pikin di ai leli aliki en, a so Yesesi á wani den bakaman fi en „du sani di á sikiifi aini den Santa Buku”.​—1 Korentesama 4:6.

Ma wan pelensipali fesa de di den fosi Kelesten be gwenti holi. Dati na a membee di den be e membee a dede fu Yesesi. Yesesi seefi be taigi den disipel fi en taki den mu membee a dede fi en. A be soi den tu fa den mu membee a dede fi en. A dei anga a fasi fa den mu holi en sikiifi aini Beibel.​—Lukasi 22:19; 1 Korentesama 11:25.

Enke fa u si, bedaki a wan fuuyali dei di sama di nai dini Gadu e fii. Den fosi Kelesten á be e fii bedaki. A á sikiifi aini Beibel taki Yesesi efuso wan taa sama be e fii bedaki. Neen meke a omen miliyun Kelesten a hii goontapu kon si taki kelesten á mu fii bedaki.