A á makiliki fu fende wan bun kado gi wan sama, bika yu á sabi efu a o lobi en. Boiti dati, a ná ala sama lobi aseefi sani.

Kande wan yonkuuwan o piisii efi i gi en wan nyun telefon efuso wan tablet. Ma kande wan gaansama o piisii te i gi en wan sani di be de fu den gaansama fi en. Aini son kondee yonkuuwan anga gaanwan moo lobi te i gi den moni enke kado, bika denseefi sa bai san den wani.

Winsi fa a á makiliki fu fende wan bun kado, tokuso a omen sama e meke moiti fu suku wan kado di den si o fiti a sama di den o bai en gi. A ná ala yuu yu o poi fende wan bun kado gi wan sama, ma tokuso i sa du wantu sani di o yeepi i. Wi o luku fo sani di o yeepi i fu man gi sama wan bun kado.

Den sani di a sama lobi. Wan man di e tan a Belfast wan peesi a Ierland taki, a baisigii di den be gi en di a be abi 10 efuso 11 yali, na a moo bun kado di sama gi en. Saide? A taki: „Na á tide mi be wani a baisigii de.” A sani ya e soi kiin taki te wan sama fende wan sani di a be wani senten, ai bigi en. Neen meke a bun fu denki a sama di i wani gi a kado. Bika a san a lobi a o wani. Gaanmma anga gaandda lobi te den de anga den famii. Kande den wani si den pikin anga den galanpikin ala yuu. Neen meke ai moo switi gi den te den e go koi anga den famii. Kande a sani ya na a moo bun sani di i sa du gi den.

Efi i wani sabi san wan sama lobi, i mu e aliki bun te ai taki. Beibel taki: „I mu gaw fu aliki, ma yu á mu gaw fu taki” (Yakowbesi 1:19). Te yu e taki anga i famii efuso i mati, i mu e aliki  bun, da yu o yee san den lobi anga san den á lobi. A sani ya o yeepi i fu gi den wan kado di den lobi.

Den sani di a sama abi fanowdu. Winsi wan kado á dii, wan sama o teke en fu bigi efu a wan sani di a be abi fanowdu. Ma fa yu o sabi san wan sama abi fanowdu?

Omen sama e si enke a moo makiliki fu akisi a sama seefi san a abi fanowdu efuso san a wani. Ma taawan e si enke a ná o switi efu den akisi a sama san a abi fanowdu. Den wani gi a sama san a abi fanowdu sondee fu a sabi. Boiti dati, winsi son sama lobi taigi taawan san den lobi anga san den á lobi, den nai taigi taawan san den abi fanowdu tuutuu.

Neen meke i mu e luku fa a sama de. A yonkuu, a toow, a booko toow, en toowpaa dede? Ai wooko efuso a nai wooko moo? I mu sidon pakisei den sani di den sama ya be o abi fanowdu.

Efi i wani sabi san a sama abi fanowdu, i sa taki anga taawan di be miti denseefi sani di miti a sama. Kande den o taigi i son sani di ná ala sama sabi. Te i sabi a sani ya, da kande yu o man gi a sama wan sani di a abi fanowdu. Kande a wan sani di taawan á be denki seefi.

A ten di yu e gi a sama a kado. Beibel taki: „Ná pikin switi a switi te wan sama taki wan sani na a yuu di a de fanowdu!” (Odo 15:23) A sani ya e soi taki i mu luku bun fosi i taki wan sani. A so a de anga den sani di wi e du. Leti enke fa wan sama e fii bun te u taigi en wan bun sani na a yuu di a de fanowdu, a leti so wan sama e fii bun tu te u gi en wan kado na a yuu di a abi en fanowdu.

A omen okasi de fu gi sama kado. Kande wan mati fu wi e toow. Kande wan yonkuuwan abaa go a wan taa kalasi efuso wan mma meke. Son sama e sikiifi ala den dei ya a pampila. A so den e man teke seeka a fesi fu suku wan bun kado gi a sama te a dei doo. *

A ná pelensipali dei wawan i sa gi taawan kado, ma na iniiwan yuu. Ma tokuso u mu luku bun. Kon u taki wan man gi wan uman wan kado sondee wan sani pasa na a dei de. Kande a uman o denki taa sani. Kande a o si enke a fu di a man wani en meke a gi en a kado. A sani ya sa tyai buuya, efu a ná dati a man abi a pakisei. A sani ya e soi taki a de fanowdu fu sabi saide wan sama gi i wan sani.

Saide i wani gi a sama a kado. Enke fa u be taki a fesi, a bun fu holi a pakisei taki son leisi a sama di wi gi a kado á sabi saide u gi en a kado. Boiti dati fosi i gi wan sama wan kado, i mu akisi iseefi saide i wani gi a sama a kado. Omen sama e si enke den e gi taawan kado anga den hii ati. Ma yu abi sama di e gi taawan kado bika den e si enke a wan sani di den musu fu du. Kande fu di wan fesadei e doo. Taawan e gi taawan kado anga a denki taki a sama o gi den kado baka.

San i mu du efi i wani gi wan sama wan kado anga i hii ati? Beibel taki: „U mu du ala sani anga lobi” (1 Korentesama 16:14). Efu yu e gi sama sani fu di i lobi den tuutuu efuso fu di yu e booko yu ede anga den, da den o piisii tuutuu. Iseefi o fii bun te yu e gi sama sani na a fasi ya. Te yu e gi sama sani anga i hii ati, i Dda a hemel e piisii tu. Den Kelesten fu Korente be  de kabakaba fu yeepi den Kelesten fu Yudeya di den be de a nowtu. Neen meke Pawlesi be gafa den. A be taigi den taki: „Gadu lobi wan sama di e gi sani anga piisii.”​—2 Korentesama 9:7.

Efu yu e meke moiti fu du den sani di u taki ya, yu o man gi taawan kado di den lobi. A den sani ya anga wantu taa sani, Gadu be holi a pakisei di a gi libisama a moo bun kado di de. Meke u leisi a taa artikel fu si san na a kado ya.