Saide omen sowtu Beibel de?

PEE

Saide omen sowtu Beibel de aini a ten ya? Yu e fusutan den nyun Beibel moo bun efuso den moo taanga gi i? Yu o man sabi efu den o tyai wini gi i efi i sabi pe den komoto.

A fosi sani di u wani sabi na: ’Sama sikiifi a fosi Beibel? On ten a sikiifi en?

A FOSI BEIBEL

A Beibel paati a tu pisi. A fosi pisi abi 39 buku. Na a „santa wowtu” fu Gadu sikiifi aini (Romesama 3:2). Gadu meke sama di be e dini en sikiifi den buku ya aini wan sani fu 1100 yali. Dati na a ten fu 1513 F.K. te anga den ten fu 443 F.K. Gaanse fu den be sikiifi aini Hebrewtongo, neen meke wi e kai a pisi ya den Hebrew buku, efuso a Gaandi Testamenti.

Du fu tu pisi abi 27 buku. Na a „wowtu fu Gadu” sikiifi aini tu (1 Tesalonikasama 2:13). Gadu be meke den disipel fu Yesesi sikiifi den buku ya aini wan sani fu 60 yali. Dati na a pisiten fu 41 B.K. te anga 98 B.K. Gaanse fu den be sikiifi aini Giikitongo, neen meke wi e kai a pisi ya den Kelesten Giiki buku, efuso a Nyun Testamenti.

A Beibel na ala den 66 buku di Gadu meke sama sikiifi. Na a bosikopu di Gadu gi libisama de aini a Beibel. Ma saide sama poti en aini omen tongo? Dii sani meke den du a sani ya.

Den be wani sama leisi a Beibel aini den mamabee tongo.
Den be wani puu den fowtu di sama meke di den be e meke kopi fu a Beibel, da a be o de enke a fosi Beibel.
Den wani poti en aini den tongo di sama e taki aini a ten ya.

Luku fa den wooko anga den sani ya di den poti Beibel aini tu tongo fu fositen.

A GIIKI SEPTUAGINTA

Wan sani fu 300 yali fosi Yesesi, den Dyu sabiman be bigin poti den Hebrew buku fu Beibel aini Giikitongo. Sama sabi a buku ya enke a Giiki Septuaginta. Saide den be meke en? Den be wani yeepi den Dyu fu den á feegete san sikiifi aini den „santa buku fu Gadu”, bika a ten de gaanse fu den Dyu be e moo taki Giikitongo. Den á be gwenti taki Hebrewtongo moo.—2 Timotiyesi 3:15.

A Septuaginta yeepi omen taa kondee sama tu di be e taki Giikitongo fu fusutan a Beibel. Fa so? Wan sabiman di den e kai Professor W. F. Howard taki: „Fanafu a pisiten fu a yali 50, anga a Beibel ya den Kelesten keliki be e wooko. Na a Beibel ya den zendeling fu den Kelesten keliki be e leisi te den be e waka a den Keliki osu fu den Dyu, fu soi sama taki a Yesesi na a Mesiyas enke fa Beibel be taki a fesi” (Toli 17:3, 4; 20:20). A sabiman di den e kai F. F. Bruce taki na a sani ya meke omen Dyu á be lobi a Beibel ya moo.

Di den disipel fu Yesesi fende den Giiki buku fu Beibel, den poti den anga a Giiki Septuaginta kon a wan. A dati toon a Beibel di u sabi aini a ten ya.

A LATEINITONGO VULGAAT BEIBEL

Wan sani fu 300 yali baka di a Beibel be kaba sikiifi, wan keliki sabiman di den e kai Jerome sikiifi a Beibel aini Lateinitongo. Sama sabi a Beibel ya enke a Vulgaat Beibel. Sama be sikiifi Beibel aini Lateinitongo kaba. Da saide ete wan be de fanowdu? A buku di den e kai The International Standard Bible Encyclopedia taki, Jerome be wani seeka den fowtu di sama be meke di den meke kopi fu a Beibel.

Jerome be poi seeka omen fu den fowtu ya. Ma baka wan pisiten, neen den fesiman fu den keliki du wan gaan ogii. Den be taki anga a Vulgaat Beibel wawan sama mu wooko. A omen ondoo yali den á be e wani sama wooko anga taa Beibel. A sani ya be e tapu sama fu sabi san sikiifi aini Beibel, bika a ten de sama á be e taki Lateinitongo moo.

DEN POTI A BEIBEL AINI MOO TONGO

Tokuso taa sama be e meke moiti fu sikiifi taa Beibel. Wan fu den na a Beibel di sama sabi enke a Syriac Peshitta. Den be sikiifi en na a pisiten fu a yali 500. Aini den yali 1400 fosi sama meke moiti fu poti a Beibel aini a tongo di gaanse sama e fusutan.

A pisiten fu a yali 1400, wan man fu Ingiisikondee di den be e kai John Wycliffe be bigin poti a Beibel aini Ingiisitongo, a tongo di den sama fi en kondee be e fusutan. Baka dati, a man di den e kai Johannes Gutenberg be meke wan masini di e doloki buku. Na a masini ya yeepi omen sabiman fu poti a Beibel aini taa tongo di sama be e taki a Europa.

A omen Beibel be kon de aini Ingiisitongo, neen meke sama be e akisi denseefi efu a de fanowdu taki omen sowtu Beibel de aini aseefi tongo. Wan fesiman fu keliki di den e kai John Lewis, be sikiifi na a pisiten fu a yali 1800 taki: „Wan tongo e kon gaandi. Sama e taki sani taa fasi baka wan pisiten. Neen meke a de fanowdu fu meke taa Beibel fu den sama fu a ten de sa fusutan en.”

Aini a ten ya, a moo makiliki gi Beibel ondoosukuman fu ondoosuku den Beibel di den puu poti aini taa tongo fu luku efu son sani mu kengi aini. Den e moo fusutan den tongo di sama be e taki aini Beibel ten. Boiti dati, den fende omen bukulolo tu. Den sani ya e yeepi den fu sabi san be sikiifi aini a fosi Beibel.

Neen meke a de fanowdu taki nyun Beibel e meke. Ma u mu koni anga son wan fu den Beibel di sama poti aini taa tongo. * Efu den sama di meke wan nyun Beibel lobi Gadu anga den hii ati, wi o fende wini te u leisi a Beibel di den meke.

^ paragraaf 24 Leisi a artikel di den e kai „Fa yu kan sabi san na wan bun Bijbelvertaling?” aini a Saanantongo Wakititolen fu 1 mei 2008.

A SANTA NEN FU GADU AINI BEIBEL

A nen fu Gadu aini a Septuaginta di sama be sikiifi aini a ten fu Yesesi

A Nyun-Grontapuvertaling sikiifi a santa nen fu Gadu aini den Hebrew anga den Giiki buku fu Beibel. A nen fu Gadu a Yehofa. A omen Ingiisi Beibel puu a nen ya a den peesi pe a be de fosi. Den sikiifi „Masaa” a den peesi de. Son wan fu den sama di puu a Beibel poti aini taa tongo taki, a fu di a nen fu Gadu di den be e sikiifi fosi anga a Tetragrammaton (YHWH), á be sikiifi aini a Giiki Septuaginta. Ma a sani ya a tuu?

Aini den yali 1900, den fende wantu gaandi pisi fu a Septuaginta di den be sikiifi na a ten fu Yesesi. A santa nen fu Gadu sikiifi aini anga Hebrew letter. A gei enke den sama di be meke kopi fu a Beibel baka a ten de, puu a nen ya, neen den poti Kyʹri·os neen peesi. Dati na a Giiki wowtu gi „Masaa”. A Nyun-Grontapuvertaling poti Gadu nen baka a den peesi pe sama be puu en.

SAMA KENGI A BOSIKOPU FU A BEIBEL?

Wan bukulolo fu Yesaya di sama fende na a Dede Se. A bukulolo ya gaandi 2000 yali. Beina sani á kengi te i maiki en anga a Beibel fu a ten ya

Den sama di be e meke kopi fu a Beibel be e meke fowtu. Ma nawan fu den fowtu ya kengi a bosikopu fu a Beibel. „Nawan sama á poi taki den nai fusutan den leli fu a Kelesten biibi te den e leisi a Beibel.”—Our Bible and the Ancient Manuscripts.

Den Dyu di be e meke kopi fu a Beibel á be e meke tyaipi fowtu. „Den Dyu aini a ten fu den fosi Kelesten be e sikiifi ala sani fu a Hebrew Beibel finifini. Beina den á be e meke fowtu.”—Second Thoughts on the Dead Sea Scrolls.

Den fende wan bukulolo fu Yesaya aini den bukulolo fu a Dede Se. A bukulolo fu Yesaya gaandi 1000 yali moo den bukulolo di den be abi kaba. San wi e si te u maiki en anga den Beibel fu a ten ya? „A wantu peesi namo den puu efuso poti wan wowtu di be de aini a bukulolo fu Yesaya.”—The Book. A History of the Bible.

Son sama di á be e luku sani fini be e poti wowtu a peesi pe den á mu de. Nownow i man fende den fowtu de makiliki fu seeka den. „A omen sani de di e soi taki nawan fositen buku de di sikiifi soifili enke a nyun Testamenti.”—The Books and the Parchments.

„Sama di e dini Gadu ná abi fu feele. Beina sani á kengi te i maiki den gaandi bukulolo di sama be sikiifi a den Papirus fu Egepte, anga den Beibel di sama e doloki nownow a Europa.”—The Book. A History of the Bible.

A bosikopu fu Beibel kengi? Nono!

A WAKITITOLEN