I sabi ete di i be nyoni? Kande i be kai pii i kini efuso yu ana. I sabi ete fa i mma be toosutu i? Kande a be kiin a soo fi i, neen a tei deesi neen. Kande i be e kee, ma di a taki anga i, di a baasa i neen i fii moo bun. Di i be yonkuu na ala yuu sama be e toosutu i.

Ma o moo wi e bigi o moo a libi e taanga. Den polobelema fu wi e kon moo ipi. Ai moo taanga fu fende toosutu tu. A tyali taki te u kon bigi, den polobelema fu wi e ipi te, winsi u mma baasa u, a nai sai fu toosutu u. Meke u luku wantu fu den polobelema ya.

• A miti i wan leisi kaba taki den puu yu a wooko? Julian taki di a lasi en wooko, a be buuya te a á be sabi san a mu du. A be e akisi enseefi taki: ’Fa mi o solugu mi osufamii? A wan yali langa mi wooko taanga gi a bodeleifi ya, da saide den puu mi?’

• Kande i buuya fu di i toow booko. Raquel taki: „A wan yali anga sigisi mun kaba di mi man fika mi. A sani ya meke mi fii booko-saka. A du mi ogii te. Mi á be poi tyai a pen ya. A be moo mi ati.”

• Kande yu abi wan siki di e moo yu, ma taawan nai si taki a so i siki. Son leisi a kan taki yu e fii enke a famii edeman Yopu. A be taki: „A libi ya e moo mi. Moo betee mi dede” (Yopu 7:16). Efuso kande yu e fii enke Luis di abi 80 yali. A taki: „Son leisi mi e si enke a be o moo bun fu mi dede.”

• Ma a kan tu taki yu e suku toosutu fu di wan sama di i lobi dede. Robert taki: „Di mi boi dede di a kai anga opolani, mi á be poi biibi. Mi fii a pen di Beibel taki de enke den sutu yu anga wan langa feti-how.”​—Lukasi 2:35.

Robert, Luis, Raquel, anga Julian fende toosutu, winsi fa den polobelema ya be e moo den. Den fende a sama di sabi toosutu sama. A sama de na a taanga Gadu. Fa ai toosutu sama? A o gi yu a toosutu di yu abi fanowdu?