Apostel Pawlesi kai Yehofa * „a Gadu di e toosutu u te u de aini ala sowtu banowtu” (2 Korentesama 1:3, 4). Beibel e leli u taki nawan sama á poi toosutu u enke fa Gadu e toosutu u. Nowtu á de di sa miti u te, da u Dda a hemel á poi toosutu u.

Ma efu u wani Gadu toosutu u, u mu du wan sani. Efu u wani wan dataa yeepi u, u mu go a dataa. Efu wi á go, a ná o poi yeepi u. Polofeiti Amos be taki: „Efu wan sama á meke mofu fu waka anga wan taawan, a ná o man waka anga en. Ná so noh?” (Amos 3:3) Neen meke Beibel e taigi u taki: U mu „kon koosube a Gadu, da enseefi o kon koosube a” wi.​—Yakowbesi 4:8.

Fa u du sabi taki Gadu o kon koosube a wi? A fosi sani a fu di ai taigi u ala yuu taki, a wani yeepi u. (Luku a faki di den e kai „ Fa u du sabi taki Gadu wani toosutu u?”) A omen sama fu a ten di pasa anga a ten ya, Gadu toosutu.

Leti enke fa omen sama abi nowtu aini a ten  ya, a so kownu David be lai nowtu. Neen meke wan leisi a be begi Yehofa taki: „Aliki mi te mi e kai i baa. Aliki mi te mi e begi i fi i yeepi mi.” Gadu be aliki en? Eeye. David taki: „Mi e piisii bika a yeepi mi.”​—Psalm 28:2, 7.

Gadu gi Yesesi a wooko fu toosutu sama. Wan fu den sani di a be mu du di Gadu sende en kon a goontapu, a be mu „deesi den soo fu den sama di booko-saka”. A be mu „toosutu ala den sama di e tyali”tu (Yesaya 61:1, 2). Yesesi be e poti pakisei na „ala den sama di e wooko taanga anga den sama di e tyotyo” enke fa Beibel be taki.​—Mateyesi 11:28-30.

Yesesi be e toosutu sama a omen fasi. A be e leli den bun sani. A be e libi bun anga den. Son leisi a be e deesi den tu. Wan dei, wan man di be abi kokobe begi Yesesi taki: „A wani namo fi i wani baa, da yu o meke mi kon kiin.” Tyali kisi Yesesi, neen a taigi a man taki: „Mi wani, kon bun” (Malikisi 1:40, 41). A so a man betee.

Ma aini a ten ya, a manpikin fu Gadu á de a goontapu fu toosutu u. Ma en Dda Yehofa a „Gadu di e toosutu u te u de aini banowtu” e yeepi sama aini a ten ya ete (2 Korentesama 1:3). Wi o taki fu fo fasi fa Gadu e toosutu sama.

• A Beibel. „Ala sani di sama be sikiifi fositen, be sikiifi fu leli u wan sani. Den sani ya e yeepi u fu holidoo, den e meke u fende toosutu aini a Wowtu fu Gadu tu. Na a sani de o meke wi abi howpu.”​—Romensama15:4.

• A santa yeye fu Gadu. Di Yesesi dede, ogii á be e miti a Kelesten kemeente. Saide? A fu di a „kemeente be e lesipeki Yehofa. A santa yeye be e gi den kaakiti” (Toli 9:31). A santa yeye na a kaakiti fu Gadu di taanga pasa peesi. Anga a kaakiti ya Gadu e toosutu sama winsi san e miti den.

• Begi. Beibel e gi u taanga-sikin taki „wi á mu booko wi ede anga nawan sani, ma taigi Gadu ala sani te wi e begi. Gi en daa, begi en fayafaya. Da a freide fu Gadu di libisama á poi fusutan o kibii wi ati anga u fusutan”.​—Filipisama 4:6, 7.

• Taa Kelesten sa de enke tuutuu mati di sa gi u taanga-sikin te nowtu miti u. Apostel Pawlesi taki, den mati fi en be ’toosutu en’ di a be abi „banowtu efuso nowtu”.​—Kolosesama 4:11; 1 Tesalonikasama 3:7.

Ma kande yu e akisi iseefi efu den sani di u kai a tapu ya, e toosutu sama tuu. Meke u luku san yeepi den sama di u be taki fu den na a bigin. Leti enke den, iseefi o si taki Gadu e du san a paamisi di a taki: „Leti enke fa wan mma e toosutu en manpikin, a letiso mi o toosutu u ala yuu.”​—Yesaya 66:13.