1, 2. Saide Yehofa Kotoigi e booko den ede anga a fasi fa den e wei koosi? (Luku a fowtow na a bigin.)

WAN kolanti fu Bakaakondee, be taki fu a fasi fa den keliki fesiman be wei a wan komakandaa fu den. A kolanti taki: „A omen fu den e wei enke a koi den e go koi te den de a den komakandaa fu den, moomoo te a peesi waan.” Aseefi kolanti taki, Yehofa Kotoigi nai wei so te den e go a den konkelesi. A taki den boi, anga den man e wei paki anga das. Den yonkuu umanpikin fu den kotoigi anga den moo gaanwan e wei moin koosi. Den koosi fu den nai satu. A omen leisi sama e gafa Yehofa Kotoigi fu a fasi fa den e wei koosi. Pawlesi taki, Kelesten „mu e wei koosi a wan lesipeki fasi anga wan fasi di e soi taki den de anga kiinkiin fusutan”. Den mu wei koosi di fiti wan sama di e dini Gadu (1 Timotiyesi 2:9, 10). A den umanpikin Pawlesi be e taki, ma a sani di a taki e teli gi manengee tu.

² A de taanga fanowdu taki a foluku fu Yehofa wei koosi di fiti. A sani ya pelensipali gi a Gadu di wi e dini  (Genesesi 3:21). A Beibel e soi kiin taki Yehofa, a sama di meke hemel anga goontapu, taigi en foluku fa a wani den wei koosi. Neen meke a ná te wan koosi moin gi u, da a namonamo u mu wei en, a mu bun gi Yehofa tu.

3. San a Weiti di Gadu be gi den Islayelisama e leli u fu den koosi di wi e wei?

³ A Weiti fu Mosesi be e yeepi den Islayelisama fu den á libi a tyobo libi di den taa foluku be e libi. A Weiti be e soi kiin taki Yehofa á lobi te manengee e wei uman koosi efuso te umanpikin e wei manengee koosi. Aini a ten ya, yu abi koosi di uman anga man sa wei. (Leisi Deitolonomi 22:5.) A Weiti be e soi taki Yehofa á lobi te manengee e wei koosi di e meke den gei umanpikin. A á lobi te umanpikin e wei koosi di e meke den gei manengee. Boiti dati Yehofa á lobi te sama e wei koosi di e meke á taanga fu sabi efu a manengee efuso umanpikin.

4. San o yeepi Kelesten fu wei koosi di fiti?

⁴ Beibel e yeepi u fu sabi sowtu koosi fiti wan Kelesten. Winsi sowtu kondee wi e tan, winsi fa u kiya, winsi a peesi waan efuso koo, tokuso den sani di Beibel taki fu koosi e fiti ala sama. A á de fu u kai ala den koosi di bun anga den di á bun. Beibel nai tapu u fu wei koosi di u lobi. Wi o luku wantu tekisi di o yeepi u fu sabi fa ’Gadu wani’ u wei koosi.​—Romesama 12:1, 2.

5, 6. Fa taawan mu si den koosi di wi e wei?

⁵ Gadu meke apostel Pawlesi sikiifi a pelensipali sani di wi e leisi aini 2 Korentesama 6:4. (Leisi.) A fasi fa wi e wei koosi e soi sama a wi. Te sama luku fa wi e wei, den e sabi sama wi (1 Samuweli 16:7). Fu di wi a Gadu foluku meke u mu luku bun san wi e wei. Ná fu di wan koosi e fiti u, da a namonamo u mu wei en. U mu du san Beibel taki. Wi á mu wei koosi di simpan efuso di e poti u sikin a doo. Wi á mu wei koosi di e meke sama poti pakisei a den kibii peesi fu u sikin tu. A fasi fa wi e wei koosi, á mu meke sama fii fuufeli. A á mu meke den dai den fesi gi u tu.

⁶ Te wi e wei koosi di fiti, koosi di kiin, anga koosi di e soi taki wi abi sakafasi, da sama o lesipeki u. Boiti dati te wi e modo na a fasi ya, kande den si taki wi a sama di e dini Yehofa tu. Kande den o wani sabi moo fu a Gadu di wi e dini. Den o moo lesipeki a olikanisâsi fu u. Den o moo aliki a bosikopu di sa kibii den libi tu.

7, 8. On ten u mu wei koosi di fiti?

⁷ Te wi e wei koosi, u mu holi u baala anga sisa, anga den sama na a pisi pe wi e tan a pakisei. Den koosi di wi e wei, mu fiti a bosikopu di wi e paati. U mu wei koosi di e gi Yehofa gaandi tu (Romesama 13:8-10). A fasi fa wi e wei koosi pelensipali, moomoo te wi e go a komakandaa anga peleikiwooko. U mu wei koosi di fiti wan sama di e dini Gadu (1 Timotiyesi 2:10). A ná ala kondee e wei koosi na aseefi fasi. Son kondee nai si enke a fiti fu wei son koosi. Neen meke winsi pe wi enke Yehofa Kotoigi e tan, u mu luku bun fu wi á  wei koosi di sa meke sama si u wan fasi.

⁸ Leisi 1 Korentesama 10:31. Te wi e go a kelen-komakandaa anga konkelesi, u mu wei koosi di fiti. Wi á mu wei koosi enke den sama fu a goontapu. Fosi a konkelesi bigin anga baka a konkelesi, wi á mu wei enke a koi wi e go koi. Te wi e wei koosi di fiti, sen ná o kisi u fu taigi sama taki wi a Yehofa Kotoigi. Wi o poi peleiki tu winsi pe u de.

9, 10. Fa wi o wei koosi te u luku san Filipisama 2:4 e taki?

⁹ Leisi Filipisama 2:4. Saide u mu luku san wi e wei te u de anga den baala anga sisa fu u? Wan fu den sani, a di u wani du san Beibel taki. A taki: U mu „kii den pisi fu u sikin di sa meke u didon anga taawan a wan fa ná fiti fasi, libi wan libi di á kiin, a dwengi di sama nai dwengi denseefi na a se fu man anga uman libi” (Kolosesama 3:2, 5). Son baala anga sisa fu u fika a fasi fa den be e tyai denseefi na a se fu man anga uman libi, ma kande den mu feti anga den fii ya ete. Efu wi á luku bun, den koosi di wi e wei sa meke a moo  taanga gi den fu du san Beibel taki (1 Korentesama 6:9, 10). Wi á wani du sani di o meke a taanga gi u baala anga sisa fu feti anga den fii fu den.

¹⁰ Te u de anga den baala anga sisa fu u, den nai gi u taanga-sikin fu tyai useefi a wan fasi di á fiti. A fasi fa wi e wei koosi te u de a komakandaa efuso te wi e go koi, o yeepi taawan tu fu den á pakisei sani di á fiti. A useefi mu luku san wi o wei, ma u mu holi a pakisei taki wi á mu wei koosi di sa meke taawan pakisei efuso taki sani di á fiti (1 Peitilisi 1:15, 16). Efu u lobi u baala anga u sisa tuutuu, u ’ná o tyai useefi a wan fa ná fiti fasi’. Bika „lobi nai suku wini fi en wawan”.​—1 Korentesama 13:4, 5.

11, 12. Fa Peleikiman 3:1, 17 e yeepi u te u mu luku sowtu koosi wi o wei?

¹¹ Te a foluku fu Gadu e wei koosi, den e holi a pakisei taki „ala sani abi en ten” (Peleikiman 3:1, 17). Sani enke alen ten, dee ten, siki anga taa sani sa meke u wei koosi a wan taa fasi. Ma den weiti fu Yehofa nai kengi.​—Maleyaki 3:6.

¹² Te a peesi waan, ai moo taanga gi son sama fu wei koosi di fiti. Neen meke den baala anga sisa fu wi e teke en fu bigi te u nai wei koosi di simpan tumisi efuso koosi di e poti u sikin a doo (Yopu 31:1). Boiti dati te u go suwen u mu wei koosi di fiti (Odo 11:2, 20). Winsi omen goontapu sama e wei suwen koosi di e poti den sikin a doo, tokuso den koosi di wi e wei fu suwen, mu gi Yehofa a santa Gadu fu u gaandi.

13. Saide u mu holi san sikiifi a 1 Korentesama 10:32, 33 a pakisei te wi e wei koosi?

¹³ Ma Beibel taki wan taa sani di wi á mu feegete te wi e luku san wi o wei. U mu holi taawan kosensi a pakisei te wi e wei koosi. (Leisi 1 Korentesama 10:32, 33.) U mu luku bun fu wi á wei koosi di sa meke u baala anga sisa efuso taa sama fii wan fasi. Apostel Pawlesi be sikiifi taki: „Ala u mu du sani di o meke taawan fii bun, sani di e gi sama taanga-sikin.” A be taki saide u mu du a sani ya tu. A taki: „Bika Kelestesi seefi á be e suku wini fi en wawan” (Romesama 15:2, 3). Leti enke Yesesi, a dini di wi e dini Gadu anga a yeepi di wi e yeepi taawan mu pelensipali gi u moo san u lobi. Neen meke u ná o wei koosi di o meke sama á wani aliki a bun nyunsu di wi e paati.

14. Fa mma anga dda sa yeepi den pikin fu gi Yehofa gaandi anga a fasi fa den e wei koosi?

¹⁴ Mma anga dda di e dini Yehofa mu leli den pikin fu wei koosi enke fa Beibel taki. A sani ya wani taki den anga den pikin fu den mu wei koosi di fiti, da den o meke Gadu piisii. Den mu modo a wan fasi di fiti tu (Odo 22:6; 27:11). Fa mma anga dda sa yeepi den pikin fu lesipeki Gadu? Den pikin mu man waka a den mma anga den dda baka. Mma anga dda mu soi den pikin on pe den sa fende koosi di fiti. Den mu soi den tu fa den mu suku koosi. A ná fu di a koosi moin, da den pikin mu  wei en namonamo. Ma den mu wei koosi di e gi Yehofa gaandi.

15. San o yeepi u fu wei koosi di fiti?

¹⁵ Beibel sa yeepi u fu du sani di e gi Gadu gaandi. Den koosi di wi e wei e soi sama a wi. A ná aseefi koosi ala sama lobi. A ná ala sama abi moni fu bai den koosi di den lobi tu. Ma tokuso den koosi di wi e wei mu kiin. Wi á mu wei koosi di o meke taawan si u wan fasi.

16. Saide a de taanga fanowdu fu meke moiti fu wei koosi di fiti?

¹⁶ A ná ala yuu a makiliki fu fende bun koosi. A soso den koosi di de a modo, son wenkii e seli. Neen meke a taanga fu fende koto, yapon anga bulusu di fiti. A taanga fu fende manengee paki anga buuku di á simpan tumisi. Ma den baala anga sisa fu wi, o si a moiti di wi e meke fu wei moin koosi di fiti. Den o si tu taki ai bigi gi u fu gafa u Dda a hemel, fu di u nai wei koosi di á fiti winsi a koosi di u lobi.

17. San o yeepi wan baala fu sabi efu a sa kweki baiba?

¹⁷ A fiti fu kweki baiba? A Weiti fu Mosesi e soi taki manengee be mu abi baiba. Ma a Weiti fu Mosesi nai teli gi Kelesten moo (Lefitikesi 19:27; 21:5; Galasiyasama 3:24, 25). Aini son kondee, a á fowtu fu kweki baiba. Aini den kondee ya, te wan baala e kweki baiba a nai tapu sama fu aliki a bun nyunsu. Son baala di abi faantiwowtu e kweki baiba tu. Ma toku, son baala nai kweki baiba (1 Korentesama 8:9, 13; 10:32). A son peesi efuso kondee, sama e si enke a á fiti fu Kelesten kweki baiba. Neen meke efu wan baala be o abi baiba aini den sowtu kondee ya, da a sani ya be o tapu en fu gafa Gadu, bika sama be o fende ’fowtu neen’.​—1 Timotiyesi 3:2, 7; Romesama 15:1-3.

18, 19. Fa Mika 6:8 e yeepi u?

¹⁸ Ai bigi gi u taki Yehofa á sikiifi pilisisi san u mu wei anga san wi á mu wei. Den sani di sikiifi aini Beibel e yeepi u fu sabi sowtu koosi fiti fu wei. Neen meke a fasi fa wi e wei koosi e soi taki wi abi sakafasi. Ai soi tu taki wi a sama di e dini Gadu.​—Mika 6:8.

¹⁹ U sabi taki Yehofa santa neen meke a fasi di ai soi u fu libi na a moo bun wan. Efu wi abi sakafasi, wi o libi enke fa a soi u. Sakafasi o yeepi u fu lesipeki a fasi fa taawan e fii anga a fasi fa den e si sani tu.

20. Fa taawan mu fii te den si den koosi di wi e wei?

²⁰ Den koosi di wi e wei, e soi kiin taki a Yehofa wi e dini. A fasi fa Yehofa wani u libi, bun moo a fasi fa goontapu e libi. Neen meke u wani libi enke fa Yehofa wani. Wi e gafa den baala anga sisa a hii goontapu fu a fasi fa den e seeka den sikin, anga a kiin libi fu den. A fasi fa den e tyai denseefi e meke omen bun-ati sama aliki a bun nyunsu. A sani ya e meke Yehofa piisii. Ai gi en gaandi tu. Efu wi e wei koosi anga koni, da a Gadu wi e gi gaandi.​—Psalm 104:1, 2.