A PELEIKIWOOKO de taanga fanowdu. Ma a ná ala sama e fusutan a sani ya. Wantu sama di lobi den toli fu Beibel seefi nai si enke a de fanowdu fu sutudeli a Beibel.

Luku a toli fu wan man den e kai Gavin. Winsi fa a be lobi go a komakandaa, a á be wani den Kotoigi sutudeli a Beibel anga en. Gavin taki a á be wani sama sabi taki a á sabi a Beibel bun. Boiti dati, a be e si enke den be o akisi en fu a toon kelikiman. A á be wani sama koli en tu. I si enke i be sa yeepi Gavin? Pakisei fa Beibel e kengi sama. Yehofa be taigi den Islayelisama taki: „Den sani di mi o taki o kai enke buingi. Den o de enke alen di e kai filifili nati a gaasi” (Deitolonomi 31:19, 30; 32:2). Meke u taki moo fini fu buingi. Wi o luku fa a o yeepi u fu peleiki gi „ala sowtu sama”.​—1 Timotiyesi 2:3, 4.

Buingi safu. Pikin fini doopu wataa de aini a winta di e wai. Te den fini doopu wataa dyunta kon a wan, da den e toon buingi. Saide den sani di Yehofa taki be de enke buingi? A fu di a be e taki switi anga en foluku. A fasi fa a be e taki be e soi taki a be e booko en ede anga den. Te wi e lesipeki a biibi fu taawan, da wi e soi taki wi e waka a Yehofa baka. U mu gi den taanga-sikin fu sidon denki den sani di wi e taki. Boiti dati wi á mu dwengi den fu biibi den sani di wi e leli den. Efu wi e paati a bun nyunsu so, da sama o aliki den sani di wi e leli den anga piisii. Boiti dati wi o du a peleikiwooko moo bun.

Buingi e meke sama fii bun. A peleiki di wi e peleiki o meke sama fii bun te wi e meke moiti fu paati a bun nyunsu gi den a omen sowtu fasi. A baala di be akisi Gavin a fosi leisi efu a wani sutudeli, a Chris. A baala ya á dwengi Gavin fu sutudeli Beibel anga Yehofa Kotoigi. Ma a be e puubei omen sowtu fasi fu meke Gavin angii fu sabi den toli di sikiifi aini Beibel. Chris taigi Gavin taki anga ala fa omen sani sikiifi aini a Beibel, tokuso a wan kodo bosikopu sikiifi na a hii Beibel. A taigi en taki efu a sabi a bosikopu de, a o fusutan den sani di ai leli a den komakandaa moo bun. Chris taigi en tu taki a den sani di Beibel be taki a fesi, e meke a biibi taki den sani di sikiifi aini a Beibel a tuu. A sani de be meke Chris anga Gavin taki omen leisi fu den polofeititoli fu Beibel. Den takimakandaa ya be e meke Gavin fi i bun, bakaten a meke den Kotoigi sutudeli anga en.

Buingi de taanga fanowdu. Te dee ten be de aini Islayeli, a omen mun langa alen á be e kai. Efu buingi á be e kai, ala den sani di den be paandi be o dede. Yehofa be taki a fesi taki a ten ya be o de enke wan gaan dee ten. Bika den sama be o angii „fu yee den wowtu fu Yehofa”, leti enke fa sama e wani diingi wataa te wataa e kii den (Amos 8:11). Beibel be taki den salufu Kelesten be o de enke ’a buingi fu Yehofa’ te den be o peleiki a bun nyunsu fu a Kownukondee. Den taa sikapu be o yeepi den fu du a wooko ya (Mika 5:7; Yohanisi 10:16). Na a bosikopu ya Yehofa e koboloiki fu meke den sama di wani sabi den tuu toli fu Beibel, fende a libi. Wi e si a bosikopu ya enke wan pelensipali sani?

Buingi a wan kado di Yehofa e gi u (Deitolonomi 33:13). A peleiki di wi e peleiki de enke wan kado gi den sama di e aliki a bun nyunsu. Gavin be e si a sutudeli di a be e sutudeli Beibel enke wan kado, bika a kon sabi ala den sani di a be wani sabi. A sani de yeepi en fu go a fesi, te enke a dopu. Nownow en anga en uman Joyce e paati a bun nyunsu gi taawan anga piisii.

Efu wi e si a peleikiwooko enke buingi, wi o fusutan taki a moiti di wi e meke fu paati a bun nyunsu gi taawan a ná fu soso. Fu saide? Wan doopu wataa, ná abi yeepi. Ma na miliyunmiliyun fini doopu wataa, e nati a doti. A so a de anga u tu. Kande wi e si den sani di wi e du aini a peleikiwooko enke pikinpikin sani. Ma te ala den miliyunmiliyun Kotoigi e paati a bun nyunsu, da ala „den nasi” fu goontapu e yee a bun nyunsu (Mateyesi 24:14). A peleiki di wi e peleiki o de enke wan kado di Yehofa gi taawan? Eeye. A bosikopu di yu e paati o de enke buingi te yu e taki switi anga taawan. Te yu e taki sani di e meke den fii bun. A o yeepi den tu fu fende a libi!