1, 2. Sowtu tesi miti Yefta anga en umanpikin?

WAN yonkuu uman e lon go miti en dda. A poolo di a si taki en dda á dede aini a feti. A be e singi, e dansi fu di en dda wini a feti. A be musu dyombo di a yee san en dda taigi en. En dda piiti en koosi neen a taki: „Ooho, mi umanpikin! I meke tyali kisi mi.” Baka dati neen en dda taigi en taki a paamisi Yehofa wan sani di be o kengi en hii libi. Fu di a paamisi Yehofa a sani de, meke noiti a umanpikin be o toow efuso meke pikin. A sani di a umanpikin piki en dda e soi taki a be e biibi taki Yehofa á be o meke a du wan sani di á bun (Kuutubakaa 11:34-37). En dda poolo di a si fa en biibi taanga. A be sabi taki Yehofa be o lobi en fu di a be de kabakaba fu wooko gi en.

² Yefta anga en umanpikin be e fitoow Yehofa anga den hii ati. Den be e fitoow a fasi fa a be e du sani tu.  Winsi a be e taanga gi den son leisi, den be e soi biibi. Den be wani Yehofa lobi den, neen meke den du den sani ya.

3. Sowtu wini wi o fende di wi o waka a Yefta anga en umanpikin baka?

³ A ná ala yuu a makiliki fu du sani enke fa Yehofa wani. Wi abi fu du „ala san u man fu feti gi a biibi” (Yudasi 3). Meke u luku fa Yefta anga a umanpikin fi en holidoo di tesi be e miti den. A sani ya o yeepi u fu holidoo tu. Fa den holidoo?

4, 5. (a) San den Islayelisama be mu du di den doo a paamisi kondee? (b) Enke fa Psalm 106 e soi, san miti den Islayelisama di den á be e aliki Yehofa?

⁴ Kande na ala dei Yefta anga en umanpikin be e si san be e miti den Islayelisama fu di den á be e aliki Yehofa. Beina 300 yali a fesi, Yehofa be taigi den Islayelisama taki den be mu kii ala den sama di be e dini falisi gadu puu aini a paamisi kondee, ma den ná aliki en (Deitolonomi 7:1-4). A omen Islayelisama bigin dini falisi gadu enke den Kana-ansama. Den bigin libi wan hululibi tu.​—Leisi Psalm 106:34-39.

⁵ Den Islayelisama á be e aliki Yehofa, neen meke a á be e kibii den gi den feyanti moo (Kuutubakaa 2:1-3, 11-15; Psalm 106:40-43). A be musu taanga gi den sama di be lobi Yehofa fu holidoo a ten de. Ma toku Beibel e taki fu sama di be holidoo. Yefta anga en umanpikin, Elkana, Hana anga Samuweli a wantu fu den sama ya. Den be wani Yehofa piisii.​—1 Samuweli 1:20-28; 2:26.

6. Fa den sama fu a ten ya e tyai denseefi? Fa u mu tyai useefi?

⁶ Den sama fu a ten fu u, e tyai denseefi leti enke den Kana-ansama. A soso hulu, du ogii, anga moni de a den ede. Ma Yehofa soi u fa u mu tyai useefi. Leti enke fa a be wani kibii den Islayelisama gi den ogii di be e pasa na a ten fu den, a so a wani kibii wi tu. Den fowtu di den meke leli u wan sani? (1 Korentesama 10:6-11) U mu meke moiti fu wi á denki enke den sama fu a goontapu ya (Romesama 12:2). Yu o meke a moiti de?

7. Fa den sama fu Yefta be e libi anga en? (b) Fa Yefta tyai enseefi?

⁷ A ten fu Yefta, den Islayelisama á be e aliki Yehofa, neen meke Yehofa be fika den Filisteyasama anga den Amonsama fu pina den (Kuutubakaa 10:7, 8). Boiti a pina di den taa foluku be e pina den Islayelisama, den baala fu Yefta anga den gaanman fu Islayeli á be e libi bun anga en. Den baala fi en be e dyalusu anga en. Boiti dati den be e buuse en, neen meke den yaki en puu na a kondee (Kuutubakaa 11:1-3). Winsi fa den libi ogii anga Yefta, toku den sani ya á meke a kon abi takuu manii.  Fa u du sabi a sani ya? Di den gaanman fu a foluku begi en fu a yeepi den, a á daaidaai. A yeepi den (Kuutubakaa 11:4-11). San yeepi Yefta fu du a sani ya?

8, 9. (a) Fa a Weiti fu Mosesi yeepi Yefta fu sabi fa a mu tyai enseefi? (b) San be moo pelensipali gi en?

⁸ Yefta be taanga. Boiti dati a be sabi fa sani be waka anga Islayeli aini den ten di pasa. A be sabi a Weiti fu Mosesi bun tu. A fasi fa Yehofa be e libi anga en foluku yeepi Yefta fu si san Gadu lobi anga san a á lobi (Kuutubakaa 11:12-27). A den sani ya yeepi Yefta fu sabi fa a be mu tyai enseefi. A be sabi bun fa Yehofa e si boon ati, anga te sama e holi taawan na ati. A be sabi taki Gadu wani en foluku lobi denseefi. Boiti dati a Weiti soi en fa a mu libi anga taawan winsi den e buuse en.​—Leisi Ekisodesi 23:5; Lefitikesi 19:17, 18.

⁹ Kande a toli fu Yowsefu yeepi Yefta tu. A be yee fa Yowsefu gi den baala fi en paadon winsi fa den be e buuse en (Genesesi 37:4; 45:4, 5). Kande a di Yefta be e sidon pakisei a toli ya meke a be du sani enke fa Yehofa wani. A fasi fa den baala fu Yefta libi anga en be hati en. Ma a feti di a be mu feti gi a nen fu Yehofa, anga a yeepi di a be mu yeepi a foluku, be pelensipali gi en moo den booko-ede fi en (Kuutubakaa 11:9). A be poti neen ede fu dini Yehofa anga en hii ati. Di a tyai enseefi so, neen Yehofa belesi en anga den Islayelisama.​—Hebrewsama 11:32, 33.

10. Fa den sani di sikiifi aini Beibel e yeepi u fu tyai useefi enke Kelesten?

¹⁰ Yu o meke moiti fu de enke Yefta? San yu o du te wan baala efuso sisa e du wan sani di yu á lobi? San yu o du efi i si enke den nai libi bun anga i? Wi á mu meke a fasi fa wi e fii tapu u fu dini Yehofa. Noiti u mu tapu fu go a komakandaa efuso fu wooko anga a kemeente. Meke wi aliki Yehofa enke fa Yefta be aliki en. A sani ya o yeepi u fu holidoo te tesi e miti u. Taawan o waka a u baka tu.​—Romesama 12:20, 21; Kolosesama 3:13.

11, 12. San Yefta be paamisi Yehofa? San a sani de be wani taki?

¹¹ Yefta be sabi taki efu Gadu á be yeepi en, a á be o poi yeepi den Islayelisama fu den Amonsama á pina den. Neen meke a be paamisi Yehofa taki efu a meke a wini a feti, a o gi en a fosi sama fi en osu di o waka kon miti en baka a feti. A sama ya be o de  enke wan boon ofaandi (Kuutubakaa 11:30, 31). San a sani ya wani taki?

¹² Yehofa á lobi te sama e boon taa libisama enke ofaandi. Neen meke u sabi taki a ná tuutuu boon Yefta be o boon a sama di be o kon miti en gi Yehofa (Deitolonomi 18:9, 10). A Weiti fu Mosesi e soi taki te wan sama gi Yehofa wan boon ofaandi, a ná wan pisi fu a sani ai gi en, ma na ala. Dati wani taki a sama di Yefta be o gi Yehofa, be o wooko en hii libi na a tabernakel. Yehofa du san Yefta begi en, a meke a wini a feti (Kuutubakaa 11:32, 33). Ma sama Yefta be o gi Yehofa?

13, 14. San den sani di Yefta taki a Kuutubakaa 11:35 e soi fu a biibi fi en?

¹³ Pakisei san u be taki na a bigin fu a toli ya. Di Yefta wini a feti a fosi sama fi en osu di kon miti en, neen umanpikin. A wan kodo pikin fi en. Yefta be o du san a paamisi Yehofa? A be o meke a wan kodo pikin fi en wooko na a tabernakel en hii libi?

¹⁴ A Weiti fu Gadu be yeepi Yefta a leisi ya tu fu du san Yehofa wani. Kande a pakisei san sikiifi a Ekisodesi 23:19. Ape e soi taki a foluku fu Gadu mu gi Yehofa den moo bun sani fu den. A Weiti be e soi tu taki te wan sama paamisi Yehofa wan sani „a á mu kengi mofu. A mu du san a taki” (Numeri 30:2). Kande en anga Hana be e libi na aseefi ten. Leti enke Hana, Yefta be mu du san a paamisi Yehofa, winsi a be o taanga gi en anga en umanpikin. Fu di a umanpikin fi en be o wooko na a tabernakel meke a á be o poi meke pikin. Dati wani taki nawan sama be o de fu tyai Yefta nen. Sama á be o de  tu fu teke den gudu fi en (Kuutubakaa 11:34). Winsi fa Yefta be sabi a sani ya, tokuso fu di en biibi be taanga meke a taki: „Mi paamisi Yehofa wan sani, mi á poi kengi mofu” (Kuutubakaa 11:35). Yehofa teke a ofaandi di Yefta gi en. A belesi en tu. I be o man du a sani di Yefta du ya?

15. San omen fu u paamisi Yehofa? Fa u sa du a sani di u paamisi?

¹⁵ A paamisi di u paamisi Yehofa taki wi o dini en, wani taki wi o du san a taki winsi san e pasa. U sabi taki a ná ala yuu a o makiliki fu du san u paamisi en. San wi e du te u mu du wan sani di wi á kaba lobi? Efu wi e aliki Yehofa anga u hii ati winsi a á makiliki, da wi e soi taki wi e du san u paamisi. Winsi fa a taanga son leisi, tokuso a belesi di Yehofa o belesi u o moo bigi (Maleyaki 3:10). San a umanpikin fu Yefta du di a yee san en dda paamisi Yehofa?

16. San a umanpikin fu Yefta du di a yee san en dda paamisi Yehofa? (Luku a fowtow na a bigin.)

¹⁶ A sani di Yefta be paamisi, anga a sani di Hana be paamisi a ná aseefi. Hana be paamisi Yehofa taki a be o meke Samuweli wooko na tabernakel enke wan Nasireisama (1 Samuweli 1:11). Wan Nasireisama be sa toow, a be sa meke pikin tu. Ma Yefta be gi Yehofa a umanpikin fi en enke wan boon ofaandi, neen meke a á be o poi toow efuso meke pikin (Kuutubakaa 11:37-40). Pakisei a sani ya. A umanpikin fu Yefta be sa toow anga a moo bun man fu a kondee, bika neen dda be e tii Islayeli. Ma fu di en dda paamisi a sani de, meke a be o abi fu wooko na a tabernakel enke wan futuboi. San a yonkuu uman ya du? A poti san Yehofa wani a fesi, bika a taki: „Meke sani waka enke fa i paamisi” (Kuutubakaa 11:36). Winsi fa a be sa abi a fii fu toow efuso meke pikin, tokuso a fika ala den sani de fu  di a be wani du san Yehofa wani. Fa u sa waka neen baka?

17. (a) Fa u sa soi taki u biibi taanga enke Yefta anga en umanpikin? (b) Fa den sani di sikiifi a Hebrewsama 6:10-12 e gi i taanga-sikin fu wooko gi Yehofa?

¹⁷ Aini a ten ya a omen yonkuu Kelesten á toow. Taawan toow, ma den á wani pikin ete. Saide? Den wani du moo gi Yehofa. A omen gaandiwan e koboloiki a ten di den be sa de anga den pikin efuso den galanpikin fu wooko gi Yehofa. Son wan e yeepi a pe den baala e du bow wooko. Taawan go na a Kownukondee Peleikiman Sikoo. Baka a sikoo den go yeepi a pe moo peleikiman de fanowdu. Taawan e sete sani fu du moo na a ten fu a Membeefesa. Noiti Yehofa o feegete den sani di den baala anga sisa ya e du gi en. (Leisi Hebrewsama 6:10-12.) Fa a de anga yu? I si enke i sa fika wantu sani di i lobi fu man du moo gi Yehofa?

18, 19. San a toli fu Yefta anga en umanpikin leli u?

¹⁸ San yeepi Yefta fu pasa den tesi di be miti en? A be e meke Yehofa tii en. A á be e denki enke den sama fu a ten fi en. Winsi sama á be e libi bun anga en tokuso a be e du sani enke fa Yehofa wani. Yehofa seigi Yefta anga en umanpikin di den wooko gi en anga den hii ati. A koboloiki den fu soi taawan fa den mu dini en. Winsi fa den taa sama á be e du san Yehofa lobi, toku Yefta anga en umanpikin be e libi enke fa Yehofa wani.

¹⁹ Beibel taki: „Libi enke den sama di fende den sani di Gadu be paamisi, fu di den be abi biibi anga pasensi” (Hebrewsama 6:12). Meke u meke moiti fu waka a Yefta anga en umanpikin baka. Bika u sabi taki Yehofa o belesi u te wi e dini en anga u hii ati.