1, 2. (a) Saide u sa taki a goontapu ya de enke wan ogiiman di den e tyai go kii? (Luku a fowtow na a bigin.) (b) Fa den engel a hemel anga den sama di o tan a goontapu ya o fii te Gadu poli a ogii goontapu ya?

PAKISEI a toli ya. Den leisi dede sitaafu gi wan ogiiman, neen wan sikowtu e tyai en go a pe den o kii en. A ogiiman ya de a libi, a gusontu, ma tokuso a leti enke a dede kaba.

² A goontapu ya de enke wan ogiiman di den e tyai go kii. Beibel taki: „A goontapu ná o de moo” (1 Yohanisi 2:17). Yehofa poti neen ede kaba taki a o poli a ogii goontapu ya. Winsi fa a goontapu ya de enke wan ogiiman di den e tyai go kii, tokuso wan sani kengi. Te den e tyai wan ogiiman go kii, da son sama e meke moiti fu yeepi a ogiiman fu di den fende taki den á kuutu en anga leti. Ma Yehofa na a moo bun sama di sa koti kuutu. A abi leti fu poli a ogii goontapu ya (Deitolonomi 32:4). Sama ná o poi tapu en fu poli a goontapu ya. Baka te Gadu poli a ogii goontapu ya, da ala den engel a hemel anga ala sama a  goontapu o piisii fu di denseefi o si taki Gadu du sani a wan leti fasi.

3. San a den fo sani di a Kownukondee fu Gadu o puu gi u?

³ San a den sani fu ’a goontapu di ná o de moo’? Den sani ya na ala den ogii di e pasa a goontapu nownow. Dyonson den ná o de moo. Disi a wan fu den „bun nyunsu fu a Kownukondee” (Mateyesi 24:14). Aini a artikel ya, wi o taki fu fo fu den polobelema di a Kownukondee fu Gadu o puu gi u. A o puu: Sama di e du ogii anga taawan, olikanisâsi di nai du sani a wan leti fasi, den ogii di e pasa na a goontapu anga den nowtu di e miti sama. Di wi o luku den fo sani ya, wi o si (1) fa wi e fii te ogii e pasa, (2) san Yehofa o du anga den, anga (3) san a o poti a den peesi di a o puu den.

4. Fa den sama di e du ogii anga taawan e fooseli wi aini a ten ya?

⁴ Fa den sama di e du ogii anga taawan e fooseli wi aini a ten ya? Apostel Pawlesi be taki: „Aini den lasiti dei a libi o taanga.” Baka dati a taki: „Ogiiman anga bidiigiman o kon moo ogii” (2 Timotiyesi 3:1-5, 13). Yu e si enke a sani ya e pasa tuutuu? A omen fu u sama e deegi. Den e du ogii anga wi son leisi fu di wi anga den a ná aseefi nasi. Son wan fu den sama ya nai kibii den ogii di den e du. Son wan e du enke den wani yeepi taawan ma aini den ati a soso ogii den e pakisei. Winsi den sani ya á pasa anga wi toku den e fooseli u. Te wi e yee fa sama e du ogii-ati sani anga pikinnengee, gaandi sama anga den sama di á poi yeepi denseefi u nai fii bun. Den sama di e du den sowtu sani ya e du enke meti. Den e tyai denseefi enke ogii yeye (Yakowbesi 3:15). Ma wi e piisii, bika a Wowtu fu Yehofa e soi u taki sani o go bun.

5. (a) Sowtu okasi den sama di e du ogii abi ete? (b) San o pasa anga den sama di á wani kengi a fasi fa den e libi?

⁵ San Yehofa o du? Nownow Yehofa e gi den sama di e du ogii a okasi fu kengi a fasi fa den e libi (Yesaya 55:7). Winsi fa Gadu o poli a goontapu ya dyonson, toku a á lati gi den e ete. San o pasa anga den sama di á wani kengi a fasi fa den e libi, anga den sama di o holibaka gi a goontapu ya na a ten fu a gaan banowtu? Yehofa paamisi taki a o puu ala den sama di e du ogii a goontapu. (Leisi Psalm 37:10.) Son sama sabi fa fu kibii den ogii den e du, neen meke den nai fende sitaafu fu den sani di den e du (Yopu 21:7, 9). Ma Beibel taki: „Gadu e si den pasi fu libisama. Ai si pe den e poti den futu. Nawan peesi dunguu sai fu kibii den sama di e du ogii. A ná abi fa a peesi dunguu” (Yopu 34:21, 22). Peesi á de fu den kibii gi Yehofa. Ai si ala den ogii di den e du. Baka Alimakedon den ná o de moo. Den o dede fu teego!—Psalm 37:12-15.

6. Sama o tan a goontapu di ogii sama ná o de moo? Saide a sani ya a bun nyunsu?

⁶ Sama o tan a goontapu te ogii sama ná o de moo? Yehofa paamisi taki: „Den safu-ati sama o fende goontapu. Den o piisii fu a libi, bika ala sani o waka bun.” A taki tu: „Den sama di e  libi a wan leti fasi o fende a goontapu, a den o tan neen fu teego” (Psalm 37:11, 29). Sama a den „safu-ati sama” anga den „sama di e libi a wan leti fasi”? Den „safu-ati” sama, a den sama di abi sakafasi. Den leli sabi Yehofa, den e aliki en tu. „Den sama di e libi a wan leti fasi”, a den sama di lobi du san Gadu taki. Ogii sama lai a goontapu moo den sama di e libi a wan leti fasi. Ma a den safu-ati sama anga den sama di e libi a wan leti fasi wawan o de aini a nyun goontapu. A den o meke goontapu toon wan paladeisi!

7. Fa den olikanisâsi di nai du sani a wan leti fasi e fooseli u aini a ten ya?

⁷ Fa den olikanisâsi di nai du sani a wan leti fasi e fooseli u aini a ten ya? A den olikanisâsi di nai du sani a wan leti fasi e du gaanse fu den ogii di e pasa aini a ten ya. Keliki e koli miliyunmiliyun sama. Den nai leli sama fu den sabi sama a Gadu. Den e taki wi á mu biibi den sani di sikiifi aini Beibel. Boiti dati den nai leli sama san o pasa tuutuu aini a ten di e kon. Tiiman di e bidiigi sama e gi sama taanga-sikin fu kii taawan. Den e gi sama taanga-sikin tu fu denki taki den kondee efuso den nasi bun moo taawan. Den e kon gudu, bika a den sama di den sabi wawan den e yeepi. Den e teke tyuku tu. Fu di son olikanisâsi giili, meke den e poli a wataa, a winta anga taa sani fu a goontapu. Den e meke sama wooko enke saafu fu di den wani kon gudu. A sani ya e soi kiin taki son olikanisâsi abi wan ana aini a pina di libisama e pina.

8. San Beibel taki o pasa anga den olikanisâsi di sama e si enke gaan mongo aini a ten ya?

⁸ San Yehofa o du anga den olikanisâsi di nai du sani a wan leti fasi? A gaan banowtu o bigin te den politiki olikanisâsi o feti anga den keliki olikanisâsi di Beibel e kai a Gaan Babilon (Openbaring 17:1, 2, 16; 18:1-4). Den politiki olikanisâsi o puu ala den falisi keliki. Ma san o pasa anga den taa olikanisâsi di nai du sani a wan leti fasi? Beibel taki sama e si den olikanisâsi ya enke gaan mongo efuso tabiki di de gingin. (Leisi Openbaring 6:14.) Ma Beibel e soi tu taki Gadu o puu den politiki olikanisâsi anga taa olikanisâsi di nai holibaka gi a Kownukondee fi en. A sani ya o pasa na a kaba fu a gaan banowtu (Yelemiya 25:31-33). Baka dati olikanisâsi di nai du sani a wan leti fasi ná o de moo.

9. Saide u sa biibi taki sani o waka bun aini a nyun goontapu?

⁹ San o kon na a peesi fu den olikanisâsi di nai du sani a wan leti fasi? Olikanisâsi o de a goontapu ete baka Alimakedon? Beibel taki: „Wi dati e wakiti a sani di Gadu paamisi wi, wan nyun hemel anga wan nyun goontapu. Na ape sani o waka a wan leti fasi” (2 Peitilisi 3:13). A haw hemel a den tiiman fu a goontapu ya di nai du sani a wan leti fasi. A haw goontapu a den sama di den e tii. San o kon a den peesi te den ná o de moo? „Nyun hemel anga nyun goontapu.” A nyun hemel, na a Kownukondee di Yesesi anga den  144.000 sama o tii. A nyun goontapu a den sama di a Kownukondee o tii. Yesesi anga den sama di o tii anga en o du sani a wan leti fasi leti enke Yehofa. Te den o tii, sani ná o waka buuyabuuya, bika Yehofa á lobi te sani e waka buuyabuuya (1 Korentesama 14:33). Dati wani taki sani o go bun aini a „nyun goontapu”. Manengee di e du sani a wan leti fasi o teke fesi fu solugu taki sani waka bun (Psalm 45:16). A Yesesi anga den 144.000 sama di o tii anga en o tii den man ya. Gadu o puu ala den olikanisâsi di nai du sani a wan leti fasi. Pakisei fa a o de te a o poti wan kodo olikanisâsi di e du sani a wan leti fasi fu tii a goontapu!

10. Sowtu ogii e pasa na a pisi pe yu e tan? Fa yu anga i famii e fii te wi e si den sani ya?

¹⁰ Fa wi e fii te wi e si den ogii di e pasa na a goontapu ya? Hululibi lai a goontapu. Sama e bidiigi taawan, den e du ogii-ati sani anga taawan. Son poku, felon anga taa sani e gi sama taanga-sikin fu du den sani ya. Boiti dati den e wisiwasi den weiti fu Yehofa (Yesaya 5:20). Mma anga dda mu meke moiti fu kibii den pikin fu den. Ala Kelesten mu meke moiti fu den anga Yehofa á poli, bika a goontapu ya nai lesipeki den weiti fu Yehofa.

11. San wi e leli fu a sani di Yehofa du anga Sodom anga Gomora?

¹¹ San Yehofa o du anga den ogii di e pasa nownow? Pakisei san Yehofa be du di den sama fu Sodom anga Gomora be e du omen sowtu ogii. (Leisi 2 Peitilisi 2:6-8.) Lot be e libi a wan leti fasi. Den somen ogii di den sama be e du be e fooseli en anga en osufamii. Ma Yehofa poli den tu foto ya fu di den be ogii pasa peesi. A poli den fu soi den ogii sama fu a ten ya san o miti den. Leti enke fa Yehofa be kii den sama di be e libi wan molusu libi na a ten fu Lot, a so a o kii den sama fu a ten ya di e libi wan molusu libi.

12. San yu e angii fu du te Yehofa o seeka a goontapu ya?

¹² Fa a libi o de a goontapu te ogii ná o de moo? Wooko o lai fu du aini a nyun goontapu, ma den wooko ya o meke u piisii. Wi o seeka a goontapu fu a toon wan paladeisi. Wi o go e meke osu fu wi anga den sama fu u tan. Boiti dati, wi o bali wadaa gi den miliyunmiliyun sama di o kon a libi baka. Wi o leli den fu sabi Yehofa anga den sani di a du gi libisama (Yesaya 65:21, 22; Toli 24:15). A ten de ala den sani di wi o du o gi u piisii. Wi o go e gafa Yehofa tu.

13. San e miti u fu di Saatan, Adan anga Efa sitee anga Yehofa?

¹³ Fa den nowtu di e miti sama nownow e meke u fii? A omen sani e pasa aini a ten ya di e gi sama booko-ede. Sama di e du ogii anga taawan, olikanisâsi di e bidiigi sama anga taa ogii lai na a goontapu ya. Son wan fu e tan a peesi pe oloku de, son wan fu u pooti, sama e libi ogii anga u fu di wi anga den a ná aseefi. Boiti dati, siki anga dede e fooseli u. Ala den ogii di e miti wi aini a ten ya bigin di Saatan, Adan  anga Efa sitee anga Yehofa. Na a sani ya meke ogii e miti wi te anga now.

14. San Yehofa o du anga den nowtu di e miti sama na a goontapu?

¹⁴ San Yehofa o du anga den nowtu di e miti sama? Meke u luku wantu fu den sani di Yehofa o du. Yehofa paamisi taki feti ná o de moo. (Leisi Psalm 46:8, 9.) A o puu siki (Yesaya 33:24). A o gwili dede fu teego (Yesaya 25:8). A o puu pina (Psalm 72:12-16). Yehofa o puu ala den sani di e fooseli libisama aini a ten ya. A o puu Saatan anga den ogii yeye tu, bika den e gi sama taanga-sikin fu du ogii.—Efeisesama 2:2.

15. San ná o de moo baka Alimakedon?

¹⁵ Pakisei fa a libi o de te feti, siki anga dede ná o de moo. Suudati anga feti sani ná o de moo. Sani ná o de di o meke u membee den feti di e feti a goontapu. Dataa ná o de fanowdu moo. Belipe ná o de fanowdu moo. Ogii ná o go e pasa moo, neen meke sikowtu anga wakitiman ná o de fanowdu. Kande sooto seefi ná o de fanowdu moo tu. Yehofa o puu ala den sani di e gi u booko-ede fu teego.

16, 17. (a) Fa den sama di o pasa Alimakedon o fii? (b) San u mu du fu tan a libi te Gadu o poli a goontapu ya?

¹⁶ Fa a libi o de te nowtu ná o miti sama moo? A á makiliki fu fusutan, bika di wi ain pii na a ogii goontapu ya u sabi. U libi aini te neen wi á kaba sabi ala den booko-ede di ai gi u. Pakisei a sani ya. Efu wan sama e tan koosube fu wan peesi pe loko e pasa, ai kon gwenti a bali fu a loko winsi fa ai bali taanga. Wan sama di e tan koosube fu wan peesi pe den e towe doti e kon gwenti a sumee fu a peesi baka wan pisiten. Ma di Yehofa o puu ala den ogii di e pasa, wi o boo.

¹⁷ Fa a libi o de te den booko-ede ya ná o de moo? Psalm 37:11 taki: „Den o piisii fu a libi, bika ala sani o waka bun.” Ai gi u taanga-sikin fu sabi taki na a libi ya Yehofa wani gi u. I mu du san i poi fu tan koosube fu Yehofa anga en olikanisâsi winsi fa a libi taanga nownow. Sani o go bun aini a ten di e kon, neen meke i mu e teke ten pakisei a ten di de a u fesi. I mu si en enke wan sani di o pasa tuutuu. Taigi taawan fu a ten de tu (1 Timotiyesi 4:15, 16; 1 Peitilisi 3:15). Efu yu e du den sani ya, yu o tan a libi te Yehofa o poli a ogii goontapu ya. Yu o piisii fu teego tu.