1, 2. (a) Sowtu ogii be miti Naabot anga den boi fi en? (b) San wi o luku aini a artikel ya?

TU OGII-ATI man lei gi wan man taki a du wan gaan ogii. A sani de meke den leisi dede sitaafu gi en. Pakisei fa den sama di lobi te sani e waka a wan leti fasi fii di den si fa sama fiingi siton naki a man anga den boi fi en kii. A toli ya, a ná wan anainsi toli. A wan sani di pasa tuutuu anga Naabot, wan man di be e dini Yehofa anga en hii ati. Naabot be e libi aini a ten di kownu Akab be e tii Islayeli.—1 Kownu 21:11-13; 2 Kownu 9:26.

² Aini a artikel ya wi o taki fu a ogii di sama be du anga Naabot. Wi o taki tu fu wan gaan fowtu di wan owluman be meke na ten fu den apostel, winsi fa a be e dini Yehofa anga en hii ati. Den tu toli ya o leli u taki  efu u wani denki enke fa Yehofa e denki, u mu abi sakafasi. Boiti dati u mu e gi taawan paadon.

3, 4. Fa Naabot be e denki? Saide a á be wani seli a doloifi goon fi en gi kownu Akab?

³ Naabot be e du sani enke fa Yehofa wani winsi fa gaanse fu den Islayelisama be e waka na a ogii-ati Iseibel baka. Iseibel a be a uman fu kownu Akab. Den be e dini falisi gadu. Den á be e lesipeki Yehofa anga den weiti fi en. Ma a dini di Naabot be e dini Yehofa be pelensipali gi en moo en libi.

⁴ Leisi 1 Kownu 21:1-3. Di Akab akisi Naabot fu a seli a doloifi goon fi en gi en efuso fu kengi en teke wan moo bun goon, a á be wani. Saide? Naabot taigi Akab a wan lesipeki fasi taki: „Te mi pakisei a fasi fa Yehofa e denki, da noiti mi o poi gi i a goon di a gi den afo fu mi.” Naabot á be wani seli a goon fi en gi kownu Akab, bika a be sabi taki a weiti fu Yehofa á be e gi den Islayelisama pasi fu seli den goon fu den fu ala ten gi taa sama (Lefitikesi 25:23; Numeri 36:7). A sani ya e soi taki Naabot be e du san Yehofa taki.

5. San Iseibel du di a be wani a doloifi goon fu Naabot?

⁵ Di Naabot á be wani seli a doloifi goon fi en gi kownu Akab, neen Akab anga en uman du wan ogii-ati sani anga en. Iseibel meke tu man lei gi Naabot fu di en anga en man be wani a doloifi goon fi en. Na a lei di den lei gi en tyai dede gi en anga den boi fi en. San Yehofa du di den du a gaan ogii ya?

6, 7. Fa Yehofa soi taki a á lobi te sama e du ogii? Saide a sani ya be musu toosutu den famii anga den mati fu Naabot?

⁶ Yehofa á daaidaai, a sende Eliya fu kai Akab a kuutu. Eliya taigi Akab taki, en a wan kiiman anga wan fufuuman. Sowtu sitaafu Yehofa gi den? Akab anga en uman anga den boi fi en be o dede leti enke Naabot anga den boi fi en.—1 Kownu 21:17-25.

⁷ Ná pikin hati a hati den famii fu Naabot di den si a sani di Akab du. Ma Yehofa seefi be si san Akab du, neen meke a leisi sitaafu gi en. Den famii anga den mati fu Naabot be musu fii bun di den yee a sani ya. Ma tokuso a sani di be pasa baka dati be o soi efu den abi sakafasi anga efu den e fitoow Yehofa.

8. San Akab du di a yee a sitaafu di Yehofa be o gi en? San a be a bakapisi?

⁸ Di Akab yee a sitaafu di Yehofa taki a o gi en „a piiti en koosi, neen a  wei koosi di sama gwenti wei te den e tyali. A á be e nyan. A be e kusumi te. Te a be e go didon, a á be e puu a koosi de neen sikin”. Akab saka enseefi. San a be a bakapisi? Yehofa taigi Eliya taki: „Fu di a saka enseefi meke a te a dede fosi mi o meke a sani ya pasa. Mi o meke ogii miti Akab famii, na a ten di en manpikin o tii enke kownu” (1 Kownu 21:27-29; 2 Kownu 10:10, 11, 17). Yehofa a Gadu di e „ondoosuku sama ati” be si fa Akab be e fii, neen meke tyali kisi en.—Odo 17:3.

9. Saide sakafasi be o yeepi den famii anga den mati fu Naabot fu den biibi á swaki?

⁹ A be musu de wan tesi gi den famii anga den mati fu Naabot di den yee taki a te Akab dede fosi Yehofa o sitaafu en famii. Ma sakafasi be o yeepi den fu den biibi á swaki. Saide? Sakafasi be o yeepi den fu tan dini Yehofa. Sakafasi be o yeepi den tu fu biibi taki Yehofa e du sani a wan leti fasi ala yuu. (Leisi Deitolonomi 32:3, 4.) Aini a ten di e kon, Yehofa o meke den famii anga den mati fu  Naabot si en anga den boi fi en te den o kon a libi baka. Naabot anga den manpikin fi en o si kiin taki Yehofa e du sani a wan leti fasi ala yuu (Yopu 14:14, 15; Yohanisi 5:28, 29). Wan sama di abi sakafasi sabi taki „a tuu Gadu o kuutu ala sani di wan sama e du, winsi a sani di taa sama nai si. Winsi na bun efuso ogii” (Peleikiman 12:14). Yehofa e poti pakisei a son sani di wi enke libisama á sabi. Neen meke sakafasi o yeepi u fu u biibi á swaki.

10, 11. (a) San sa meke a taanga gi u fu soi sakafasi aini a kemeente? (b) Fa sakafasi o yeepi u?

¹⁰ San yu o du efu den owluman kuutu wan toli a wan fasi di i nai fusutan efuso a wan fasi di yu á lobi? Meke u taki yu efuso wan mati fi i lasi en gaandi aini a kemeente, san yu o du? Efu den owluman puu i toowpaa, wan pikin fi i efuso wan mati fi i na a kemeente, san yu o du efu yu e si enke den á kuutu a toli bun? San yu o du efi i fende taki den owluman á be mu soi tyali-ati gi wan sama di du wan sondu? Den sani ya o soi efu u biibi taanga. Den o soi tu efu wi e biibi taki a Yehofa e tii a kemeente. Fa sakafasi o yeepi i te den sani ya miti i? Meke u luku tu fasi fa a o yeepi u.

¹¹ A fosi sani di wi o du te wi abi sakafasi, wi o holi a pakisei taki wi á sabi a hii toli. Winsi wi e si enke u sabi a fini fu a toli, toku a bun fu holi a pakisei taki a Yehofa wawan e si sama ati (1 Samuweli 16:7). Efu u holi a sani ya a pakisei wi o abi sakafasi. Boiti dati a o yeepi u fu kengi a fasi fa u be e denki, bika wi o fusutan taki wi á sabi a hii toli. Du fu tu sani na, efu sama du ogii anga u, efuso u si wan ogii di wan sama du, da sakafasi o yeepi u fu du sani enke fa Yehofa wani. A o yeepi u tu fu wakiti Yehofa meke a seeka a toli. Beibel taki: „Sani o waka bun gi den sama di e lesipeki a tuu Gadu.” Ma a taki tu: „Ma sani ná o waka bun seefiseefi anga den ogii sama. Den nai lesipeki Gadu, neen meke den ná o libi langa, leti enke fa kaaka nai tan langa a wan peesi” (Peleikiman 8:12, 13). Efu wi abi sakafasi, wi o fende wini. Ala den sama di fii a bakapisi fu wan ogii di pasa seefi o fende wini efu den abi sakafasi.—Leisi 1 Peitilisi 5:5.

12. Sowtu toli wi o luku? Saide wi o luku a toli ya?

¹² Wan sani be pasa anga den fositen Kelesten fu Antiyokiya di be o soi efu den abi sakafasi. A sani ya be o soi efu den de kabakaba fu gi taawan paadon tu. Meke u poti pakisei na a  toli ya, da u luku efu useefi de kabakaba fu gi taawan paadon. A sani ya o yeepi u fu fusutan saide Yehofa e wooko anga sondu libisama sondee fu a poti den weiti fi en a wanse.

13, 14. San Yehofa be sende Peitilisi fu du? Fa a soi taki a abi deki-ati?

¹³ Apostel Peitilisi a be wan owluman di gaanse fu den fosi Kelesten be sabi. A be wan bun mati fu Yesesi. Boiti dati a be abi gaan faantiwowtu (Mateyesi 16:19). Aini a yali 36 Yehofa be sende Peitilisi fu go peleiki gi Koneiliyesi anga den sama di be de aini en osu. Saide a sani ya a be wan apaiti sani? A fu di Koneiliyesi a ná be Dyu. A á be besnei tu. Ma di Yehofa gi Koneiliyesi anga ala den sama di be de aini en osu santa yeye, neen Peitilisi fusutan taki den be sa dopu enke Kelesten. A be taki: „Sama poi tapu den sama ya di fende a santa yeye enke wi, fu dopu aini wataa?”—Toli 10:47.

¹⁴ Aini a yali 49, den apostel anga den owluman fu Yelusalem be kon a makandii fu taki fiti efu a de fanowdu fu den taa kondee sama di toon Kelesten besnei. Na a komakandaa ya, Peitilisi teke deki-ati taigi den baala taki a luku duun fa Yehofa gi taa kondee sama di á besnei santa yeye. Na a sani di Peitilisi be si yeepi den baala di be e tii a wooko na a ten de fu kuutu a toli bun (Toli 15:6-11, 13, 14, 28, 29). Den Dyu anga den taa kondee sama di be de Kelesten be e teke en fu bigi taki Peitilisi be abi a deki-ati fu taki fa sani be waka. A sani ya be meke a makiliki gi den fosi Kelesten fu fitoow Peitilisi.—Hebrewsama 13:7.

15. Sowtu fowtu Peitilisi meke di a be de a Antiyokiya?

¹⁵ Baka di den baala fu Yelusalem taki fiti, neen Peitilisi go a Antiyokiya. A go luku den Kelesten di á be de Dyu. Pakisei fa den fii di den yee den ondoofenitoli fu Peitilisi. A be musu hati den di Peitilisi á be wani nyan anga den moo. Wantu taa Kelesten waka a Peitilisi baka. Wan fu den sama di waka neen baka a Barnabas. Fa a waka a owluman ya meke sowan gaan fowtu di be sa meke a kemeente á libi na a wan moo? Fa a fowtu di Peitilisi meke sa yeepi u te wan owluman taki efuso du wan sani di hati u?

16. San yeepi Peitilisi fu fusutan taki a á be tyai enseefi bun? San u sa akisi useefi?

¹⁶ Leisi Galasiyasama 2:11-14. Peitilisi be e feele sama (Odo 29:25). A be sabi fa Yehofa e si den sama di á be de Dyu. Ma tokuso a be e si enke den Dyu fu Yelusalem di be kon ape,  be o si en wan fasi te den be si ai mosoo anga den taa kondee sama di be toon Kelesten. Apostel Pawlesi taigi Peitilisi taki ai konkuu. Saide? Bika Pawlesi be yee fa Peitilisi be e yeepi den taa kondee sama di a be de na a komakandaa a Yelusalem aini a yali 49 (Toli 15:12; Galasiyasama 2:13). San den Kelesten di á be de Dyu du di den si fa Peitilisi paati bee? Den meke a sani de puu den a waaleiti? Peitilisi lasi en faantiwowtu fu di a meke a fowtu ya?

17. Sowtu wini Peitilisi fende di Yehofa gi en paadon?

¹⁷ Peitilisi be abi sakafasi. Di Pawlesi taki anga en, a yee. Beibel á taki Peitilisi lasi den faantiwowtu fi en. Bakaten Yehofa meke a sikiifi tu biifi di toon wan pisi fu Beibel. Aini du fu tu biifi di Peitilisi sikiifi a kai Pawlesi „a baala fu u di u lobi” (2 Peitilisi 3:15). Kande a fowtu di Peitilisi be meke hati den taa kondee sama di be de Kelesten. Ma toku Yesesi, a edeman fu a kemeente be e gi Peitilisi faantiwowtu ete (Efeisesama 1:22). Den baala anga sisa fu a ten de be abi a okasi fu waka a Yehofa anga Yesesi baka. Denseefi be mu gi Peitilisi paadon. Noiti u mu meke a fowtu di wan taa sondu sama meke puu wi a waaleiti.

18. On ten a o moo taanga gi u fu soi taki wi e denki enke fa Yehofa e denki?

¹⁸ Leti enke fa den owluman fu a ten fu den apostel be e meke fowtu, a so den owluman fu a ten ya e meke fowtu. Beibel taki: „Ala wi e sondu omen leisi” (Yakowbesi 3:2). U sabi taki ala den owluman e meke fowtu. Ma san yu o du efu wan fu den du wan hati sani anga i? Yu o denki enke fa Yehofa e denki? Efu wan owluman taki wan sani di gei enke ai paati bee, san yu o du? Yu o gwe fika a waaleiti efu wan owluman taki wan sani di hati i? Yu o de namonamo fu den puu a baala enke owluman, efuso yu o wakiti Yesesi, a edeman fu a kemeente? Pe fu u poti pakisei na a fowtu fu a baala, a be o moo bun fu denki den yali di a baala dini Yehofa anga en hii ati. Meke u taki den á puu a baala di du wan hati sani anga i enke owluman, ma den gi en moo faantiwowtu, yu o piisii? Efi i de kabakaba fu gi en paadon da yu e soi taki yu e denki enke fa Yehofa e denki.—Leisi Mateyesi 6:14, 15.

19. San u mu de kabakaba fu du?

¹⁹ U lobi te sani e waka a wan leti fasi, neen meke wi e angii fu si a dei di Yehofa o puu ala den ogii di Saatan e meke sama du na a goontapu ya (Yesaya 65:17). A ten de á doo ete, neen meke u mu abi sakafasi. Te sama du wan ogii anga wi, u mu holi a pakisei taki wi á sabi ala sani. Boiti dati u mu de kabakaba fu gi den paadon. Te u du den sani ya, da wi e soi taki wi e meke moiti fu denki enke fa Yehofa e denki.