1. San ala den sama di e dini Gadu wani du? Saide den wani du a sani ya? (Luku a fowtow a fesise fu A Wakititolen.)

YESESI KELESTESI be sende den bakaman fi en fu ’go a sama fu ala kondee, da den meke den toon en bakaman’ (Mat. 28:19). Ala den sama di e dini Gadu anga den hii ati wani sabi fa den mu ’du a wooko ya bun’ (2 Tim. 4:5). A wooko ya na a moo pelensipali wooko di wi e du. A abi wini moo ala taa wooko. Ma ai taanga son leisi fu fende ten fu du a peleikiwooko enke fa u wani.

2. San sa meke a taanga gi u fu du a peleikiwooko?

² Boiti a peleikiwooko, a omen taa pelensipali sani wi e du di e teke omen ten fu u. Den sani ya e meke u weli. Kande u mu wooko taanga fu man solugu wi osufamii. Kande wi abi taa faantiwowtu aini wi osufamii. Kande u siki efuso wi abi taa polobelema di e gi u booko-ede. Kande u gusontu e go a baka fu di wi e kon gaandi. San o yeepi u fu du a peleikiwooko bun te wi abi den sowtu polobelema ya?

3. San wi e leli fu a sani di Yesesi taki a Mateyesi 13:23?

³ Efu wi abi wan polobelema di e meke a taanga gi u fu wooko enke fa u wani gi Yehofa, wi á mu lasi-ati. Yesesi be sabi taki son sama be o man du moo aini a peleikiwooko moo taawan. (Leisi Mateyesi 13:23.) Yehofa e piisii te wi e du ala san u man (Heb. 6:10-12). Ma kande yu e si enke i sa du moo. Aini a artikel ya wi o luku san u mu du fu soi taki wi e poti a wooko fu  Gadu a fesi. Wi o luku tu fa u sa soi taki u nai meke nawan sani puu u pakisei na a wooko ya. Boiti dati wi o luku fa u sa toon wan moo bun peleikiman anga fa u sa gi leli moo bun. Wi o luku fosi san a wani taki fu du a peleikiwooko bun.

4. Fa wi e soi taki wi e du a peleikiwooko bun?

⁴ Efu u wani du a peleikiwooko bun, u mu e peleiki ala yuu. U mu e leli sama tu. A ná den yuu di wi e wooko wan mun wawan pelensipali. Ma u mu sabi saide wi e peleiki. A sani ya pelensipali gi Yehofa. A di u lobi Yehofa anga taa sama meke wi e du a peleikiwooko anga u hii ati * (Malik. 12:30, 31; Kol. 3:23). Efu wi e dini Gadu anga u hii ati, wi o du ala san u man aini a peleikiwooko. Efu wi e si a peleikiwooko enke wan gaandi, wi o meke moiti fu paati a bun nyunsu anga ala sama di u miti.

5-6. Gi wan ageisitoli fu soi fa u sa poti a peleikiwooko a fesi, winsi fa wi abi omen taa sani fu du.

⁵ Meke u taki wan yonkuman sabi pee gitali. Ai switi gi en te ai pee gitali, neen meke ai wani pee gitali ala yuu. Bakaten a fende wan wooko fu pee gitali sataa anga sonde. Ma a moni di a be e fende á be sai, neen a go suku wooko a wan peesi pe den e seli guluntu. Ai du a wooko ya monde te anga feeda. Winsi fa ai moo de a pe ai seli guluntu, tokuso na a poku a moo lobi. A wani leli pee poku moo bun fu a sa man libi fu a poku di ai pee. Winsi fa a ná abi ten fu pee poku enke fa a wani nownow, tokuso ai piisii te a fende a okasi fu pee.

⁶ Useefi nai fende ten fu du a peleikiwooko enke fa u wani, ma na a wooko ya u moo lobi. Wi e meke moiti fu a bun nyunsu di wi e paati gi den sama, doo den ati. A omen sani e teke gaanse fu u ten, neen meke a bun fu akisi useefi san  u sa du fu soi taki a peleikiwooko na a moo pelensipali wooko di u mu du.

7-8. San u mu du fu soi taki wi e si a peleikiwooko enke fa Yesesi be e si en?

⁷ Yesesi be soi fa u mu poti a peleikiwooko a fesi. A moo pelensipali wooko di a be e du, na a paati di a be e paati a Kownukondee bosikopu anga taawan (Yoh. 4:34, 35). A waka omen ondoo kilomeiti fu paati a bun nyunsu. A be e peleiki gi ala den sama di a be e miti a den osu efuso taa peesi. Yesesi be e poti a peleikiwooko a fesi ala yuu.

⁸ Wi e suku fasi fu paati a bun nyunsu anga taawan tu, winsi pe u miti den, winsi on yuu u miti den, leti enke Kelestesi. U de kabakaba fu poti sani di u lobi a wan se fu du a peleikiwooko (Malik. 6:31-34; 1 Peit. 2:21). Son baala anga sisa a spesuutu pionili, kowownu pionili efuso yeepi pionili. Son wan fu den leli wan taa tongo. Taawan foloisi go a pe moo peleikiman de fanowdu. A omen baala anga sisa á poi du den sani ya, ma tokuso den e du ala san den man. Yehofa e piisii anga ala san u man du aini a peleikiwooko, solanga wi e du en anga u hii ati. A wani u piisii te wi e paati a bun nyunsu fu „a koloku Gadu”.​—1 Tim. 1:11; Deit. 30:11.

9. (a) Fa Pawlesi be soi taki a peleikiwooko na a moo pelensipali sani aini en libi, winsi fa a be e wooko fu solugu enseefi? (b) Fa Pawlesi be e si a peleikiwooko te u luku san sikiifi a Toli 28:16, 30, 31?

⁹ Apostel Pawlesi soi u fa u mu poti a wooko fu Gadu a fesi. Di a go du fu tu leisi a Korente enke zendeling, a á be makiliki gi en, bika a á be abi moni sai. Neen meke a be e meke tenti seli. Pawlesi á be e si a meke di a be e meke tenti enke a moo pelensipali wooko di a be e du. Ma a be e du en fu solugu enseefi, bika a á be wani ’akisi den sama fu Korente moni’ fu tapu den kosutu fi en (2 Kor. 11:7). Winsi fa Pawlesi be e wooko fu solugu enseefi, tokuso a be e poti a peleikiwooko a fesi ala yuu. A be e peleiki ala Sabadei. Di sani kengi bakaten, a be man poti moo pakisei na a peleikiwooko. A bigin „paati a wowtu fu Gadu fayafaya. A soi den Dyu kiin taki a Yesesi na a Kelestesi” (Toli 18:3-5; 2 Kor. 11:9). Bakaten di Pawlesi be de a sitaafu a Rome tu yali langa, a be e peleiki gi den sama di be e go luku en. A be e sikiifi biifi tu. (Leisi Toli 28:16, 30, 31.) Noiti Pawlesi be e meke sani puu en pakisei na a peleikiwooko. A be sikiifi taki: „A di Gadu soi u tyali-ati meke a gi wi a wooko ya. Neen meke u nai gi abaa” (2 Kor. 4:1). Leti enke Pawlesi, useefi e si a peleikiwooko enke a moo pelensipali sani aini u libi, winsi wi e wooko fu solugu wi osufamii.

10-11. Fa u sa du a peleikiwooko winsi u siki?

¹⁰ Efu wi á poi peleiki osu fu osu fu di u kon gaandi efuso u siki, u sa peleiki taa fasi. Den fosi Kelesten be e paati a bun nyunsu na ala pe den be e miti sama. Den be e peleiki osu fu osu, a peesi pe tyaipi sama e pasa anga taa peesi (Toli 17:17; 20:20). Efi yu á poi waka bun, kande i sa sidon a wan peesi pe tyaipi sama e pasa, da yu e peleiki gi den sama di e waka pasa. Kande i sa peleiki a telefon efuso sikiifi biifi.  Kande i sa peleiki gi den sama di yu e miti te yu e go a dataa efuso taa peesi. A omen peleikiman di ai taanga gi fu peleiki osu fu osu fu di den siki efuso fu di den abi taa polobelema, e piisii fu peleiki a den fasi ya.

¹¹ Winsi u siki, tokuso u poi du a peleikiwooko. Pakisei apostel Pawlesi baka. A taki: „Mi poi du ala sani bika na a sama di e gi kaakiti e yeepi mi” (Filip. 4:13). Pawlesi be abi a kaakiti ya fanowdu di a be siki wan fu den leisi di a be go peleiki enke zendeling. A be taigi den Galasiyasama taki: „U sabi taki a di mi be siki meke mi be fende a okasi fu paati a bun nyunsu gi u” (Gal. 4:13). Neen meke te i siki i sa fende okasi fu peleiki gi dataa, sesite anga taa sama di e yeepi i. Somen fu den sama ya e de a wooko te den Kotoigi go peleiki a den osu.

12. San Yesesi be wani leli wi anga a sani di a taki a Mateyesi 6:22?

¹² Yesesi taki: „A faya fu a sikin na a ain. Neen meke efi yu ain kiin, i hii sikin o kiin” (Mat. 6:22). San Yesesi be wani taki anga a sani ya? A be wani soi taki te u nai libi bigi, wi e poti u pakisei a wan sani namo, u nai meke taa sani puu u pakisei na a sani de. Yesesi be e poti ala en pakisei na a peleikiwooko. A be leli den bakaman fi en taki na a Kownukondee anga a dini di den e dini Yehofa mu de a moo pelensipali sani aini den libi. U sa soi taki wi e waka a Yesesi baka te wi e si  a peleikiwooko enke a moo pelensipali sani aini u libi. A sani ya e soi taki wi e „poti a Kownukondee fu Gadu anga en leti-du a fesi”.​—Mat. 6:33.

13. San o yeepi u fu du moo aini a peleikiwooko?

¹³ Wan sani di o yeepi u fu du moo aini a peleikiwooko, a te u nai libi bigi. A sani ya o meke wi abi moo ten fu yeepi sama fu toon Yehofa mati. * Kande u sa taki anga u basi fu u sa fende wan dei a mindiiwiki fu peleiki. Efu u be e teke omen ten fu piisii, kande u sa teke afu fu a ten de fu du sani di moo pelensipali.

14. San wan toowpaa du fu fende moo ten fu du a peleikiwooko?

¹⁴ Na a sani ya wan owluman den e kai Elias anga en uman be du. A taki: „Wi á be poi bigin anga a pioniliwooko wantenwanten, ma u meke moiti fu fende moo ten fu peleiki. U be e meke moiti fu wi á bai sani di u ná abi fanowdu. Wi á be e koboloiki omen ten fu piisii moo enke fosi. Wi akisi u basi tu fu kengi den yuu di u be e wooko, fu u sa fende moo ten fu peleiki. A so u be man peleiki a neti. U be kon abi moo Beibelsutudi tu. Boiti dati, tu leisi aini wan mun u be e peleiki mindiiwiki. A sani ya be e meke u piisii.”

15-16. San o yeepi u fu du a peleikiwooko moo bun te u luku san sikiifi a 1 Timotiyesi 4:13, 15? (Luku a faki „ Wantu sani di o yeepi i fu du a peleikiwooko moo bun”.)

¹⁵ Wan taa fasi fa u sa du moo, a te wi e meke moiti fu peleiki moo bun. Te  sama e du son wooko, den mu e leli sani fu a wooko di den e du fu den sa du a wooko moo bun. A so a de anga Kownukondee peleikiman tu. Na ala yuu u mu e leli fa u mu du a peleikiwooko moo bun.​—Odo 1:5; leisi 1 Timotiyesi 4:13, 15.

¹⁶ San o yeepi u fu du a peleikiwooko moo bun? U mu e poti pakisei a den sani di wi e leli a den mindiiwiki komakandaa. A komakandaa ya e yeepi u fu peleiki moo bun. Te wi e aliki bun te a fesiman e taki anga den sama di holi lezing, u sa leli wan sani di o yeepi wi aini a peleikiwooko. Wan taa leisi te wi e peleiki u sa du den sani di u leli na a komakandaa ya. U sa akisi a fesiman fu a peleikiwooko kulu fu u, wan pionili, wan peleikiman di abi ondoofeni efuso a kelen owluman fu yeepi u. Te u kon sabi wooko moo bun anga den sani di wi abi fu leli sama, a peleikiwooko o moo switi gi u.

17. Sowtu wini yu o fende te yu e meke moiti fu du a peleikiwooko moo bun?

¹⁷ A wan gaandi wi abi fu „wooko makandii” anga Yehofa (1 Kor. 3:9). Efi i sabi „san a den moo pelensipali sani”, neen yu e poti pakisei na a peleikiwooko di wi enke Kelesten e du, a sani ya o yeepi i fu ’dini Yehofa anga piisii’ (Filip. 1:10; Ps. 100:2). U sa biibi taki Gadu o gi wi a kaakiti di wi abi fanowdu fu du a wooko fi en, winsi sowtu polobelema wi abi di be sa tapu u fu du a wooko ya (2 Kor. 4:1, 7; 6:4). A ná ala u man du moo aini a peleikiwooko. Ma winsi san u man du wi o piisii, efu wi e du en anga u hii ati (Gal. 6:4). Te yu e meke moiti fu du ala sani i man aini a peleikiwooko, yu e soi taki i lobi Yehofa. Yu e soi tu taki i lobi taa sama. „Te i du so, da yu anga den sama di e aliki yu o man fende a libi.”​—1 Tim. 4:16.