A TEN fu Pawlesi, sipi á be de di be e tyai sama wawan. Te wan sama be wani go a wan peesi anga sipi, da a be e akisi sama efu den sabi wan sipi di e tyai lai di be e go a pe a wani go. Ma a sama di abi a sipi be mu wani tyai a sama tu (Toli 21:2, 3). Winsi a sipi á be e doo a pe a sama be wani go, tokuso a be e go anga a sipi, da a suku wan taa sipi di be e doo pe a be e go.​—Toli 27:1-6.

A son pisiten fu a yali namo sama be e waka a sipi. Den á be e sabi a fesi on ten den be o komoto a lanpeesi. A omen sani den botoman be e luku fosi den komoto a lanpeesi. Efu gaan winta be e wai den á be e gwe. Boiti dati, son botoman be e biibi taki efu baaka foo be sidon na a sipi, sani be o miti den. Efu den be si wan pisi fu wan sipi di sungu, den á be e gwe tu. Den botoman be e wooko anga a winta. Te a winta be e wai enke fa den wani, da den be e komoto a lanpeesi. Te wan sama be fende wan sipi di wani tyai en, da a be e go a lanpeesi anga en lai. A be e wakiti fu yee on ten a sipi o gwe.

Wan sikiifiman den e kai Lionel Casson taki: „Rome be seeka sani gi den sama di be e suku okasi fu den á fooseli tumisi. A á be de fu den go a den sipi go suku okasi. A gaan lanpeesi fu Rome be de a Tiber liba. A foto Ostia be de koosube fu Rome. Wan gaan opo peesi be de aini a foto ya anga omen kantoo fu sama di be abi sipi. Den be e komoto na ala se kon a Ostia. Den botoman fu Narbonne [nownow a Faansikondee] be abi wan, den botoman fu Carthage [nownow a Tunisiya] be abi wan tu. . . . Taa botoman be abi tu. Ala sama di be e suku okasi, be e go a wan fu den kantoo ya fu luku efu wan fu den sipi be o pasa a pe ai go.”

Te wan sama be e go anga sipi a wan taa kondee, a be e doo moo gaw, ma a omen sani be sa miti en. A omen leisi Pawlesi sungu di a be e go peleiki enke zendeling a taa kondee.​—2 Kor. 11:25.