1. Enke fa Efeisesama 6:10-13 e soi, da san a wan fasi fa Yehofa e soi taki ai booko en ede anga u?

WAN fu den fasi fa Yehofa e soi den sama di e dini en taki ai booko en ede anga den, na a kibii di ai kibii den fu feyanti á du ogii anga den. Den moo gaan feyanti fu wi a Saatan anga den ogii yeye. Yehofa e wasikoi u fu luku bun anga den ogii yeye. A gi u san wi abi fanowdu fu toto futu gi den tu. (Leisi Efeisesama 6:10-13.) Efu u meke Yehofa yeepi u, da u fitoow en anga u hii ati, wi o man toto futu gi Didibii. Efu u meke moiti, u biibi o taanga enke Pawlesi. A sikiifi taki: „Efu Gadu de anga wi, da sama o poi du sani anga wi?”​—Rom. 8:31.

2. San wi o luku aini a artikel ya?

² Wi enke tuu Kelesten nai lasi u ten e taki ala yuu fu Saatan anga den ogii yeye. Wi e moo meke moiti fu leli sabi Yehofa moo bun. Wi e moo poti pakisei na a dini di wi e dini en tu (Ps. 25:5). Ma toku u mu sabi san Saatan e du. Saide? A sani ya o yeepi u fu Saatan á fende u koli (2 Kor. 2:11). Aini a artikel ya, wi o luku wan fu den pelensipali fasi fa Saatan anga den ogii yeye e koli sama. Wi o luku san u mu du fu den á fende u koli.

3-4. (a) San na afokodeei? (b) Omen sama e biibi aini afokodeei?

³ Wan fu den pelensipali fasi fa ogii yeye e koli sama, na afokodeei. Den sama di e du afokodeei e biibi taki  den poi du sani di libisama á poi du anga den eigi kaakiti. Son wan e suku maiki fu sabi san o pasa aini a ten di e kon. Son wan e du enke den e taki anga dede sama. Son wan e bonu, taawan e wisi efuso tofuu. *

⁴ Omen sama e biibi aini afokodeei? Wan ondoosuku di du aini 18 kondee fu Latijn-Ameekan anga den Karaibis kondee, soi taki te i teli dii sama, da wan fu den be e biibi aini tofuu, bonu, kunu efuso wisi. Beina ala den sama ya be e biibi taki i sa taki anga sama di dede. Den du wan taa ondoosuku tu aini 18 kondee fu Afiikan. Moo enke afu fu den sama di den taki anga den, e biibi taki sama poi wisi taawan. Ma winsi pe wi e tan, u mu luku bun anga afokodeei, bika u sabi taki Saatan e meke moiti fu „koli sama a hii goontapu”.​—Openb. 12:9.

5. Fa Yehofa e si afokodeei?

⁵ Yehofa na „a Gadu di nai lei” (Ps. 31:5). Fa Yehofa e si afokodeei? Ai buuse en! Yehofa be taigi den Islayelisama taki: „Nawan fu u mu meke en manpikin efuso umanpikin boon aini faya. Nawan fu u mu du lukuman wooko, bonu efuso tofuuwooko. Wi á mu go suku maiki fu sabi san o pasa. Nawan wisiman, sama di e taki anga ogii yeye, sama di e koti luku efuso sama di e taki anga dede mu de a u mindii. Bika Yehofa e buuse den sama di e du den sani ya” (Deit. 18:10-12). A á de fu Kelesten holi a Weiti di Yehofa be gi Mosesi moo aini a ten ya. Ma toku u sabi taki Yehofa á kengi, na aseefi fasi ai si afokodeei ete.​—Male. 3:6.

6. (a) Fa Saatan e koboloiki afokodeei fu du ogii anga sama? (b) Enke fa Peleikiman 9:5 e soi, da san e pasa anga wan sama te a dede?

⁶ Yehofa taki u mu luku bun anga afokodeei, bika a sabi taki Saatan e koboloiki a sani ya fu du ogii anga sama. Saatan e koboloiki afokodeei fu meke sama biibi den lei fi en. Ai koboloiki afokodeei fu meke sama biibi taki te wan sama dede ai libi go doo a wan taa peesi. (Leisi Peleikiman 9:5.) Ai koboloiki afokodeei tu fu meke sama feele. A sani ya e meke a taanga gi sama fu dini Yehofa. A wani sama di e du afokodeei biibi den ogii yeye, pe fu den biibi Yehofa.

7. San Yehofa leli u?

⁷ Enke fa u be luku kaba, da Yehofa e leli u san u mu du fu Saatan anga den ogii yeye á fende u koli. Meke u luku wantu sani di u sa du fu den á fende u koli.

8. (a) San na a moo pelensipali sani di o yeepi u fu toto futu gi ogii yeye? (b) Fa Psalm 146:4 e soi taki den sani di Saatan taki e pasa te wan sama dede a ná tuu?

⁸ Leisi Beibel, da i teke ten pakisei san i leisi. A sani ya a wan fu den moo pelensipali sani di o yeepi u fu wi á biibi den lei di den ogii yeye e paati.  A Wowtu fu Gadu e yeepi u fu si taki Saatan a wan leiman (Efe. 6:17). Wan fu den lei di Beibel e yeepi u fu wi á biibi, na a lei taki u poi taki anga dede sama. (Leisi Psalm 146:4.) Beibel e yeepi u fu fusutan tu taki a Yehofa wawan poi taki a fesi san o pasa (Yes. 45:21; 46:10). Efu wi e leisi a Wowtu fu Gadu ala yuu da u pakisei san u leisi, Saatan anga den ogii yeye ná o fende u koli.

9. San a wantu fu den sani di abi fu du anga afokodeei di Kelesten nai du?

⁹ Ná du nawan sani di abi fu du anga afokodeei. Enke tuu Kelesten u nai du nawan sani di abi fu du anga afokodeei. U nai go a bonuman. U nai meke moiti fu taki anga dede sama tu. U be luku aini a artikel a fesi taki te wan sama fu u dede, u nai du nawan sani di abi fu du anga afokodeei. U nai go a lukuman fu sabi san o pasa tu (Yes. 8:19). Efu u be o du wan fu den sani ya a be o tyai takuu bakapisi gi u, bika ala den sani ya abi fu du anga Saatan anga den ogii yeye.

10-11. (a) San son sama aini a ten fu den apostel du di den kon sabi a tuu? (b) Enke fa 1 Korentesama 10:21 e soi, da saide u mu waka a den fosi Kelesten baka? Fa u sa du a sani ya?

¹⁰ Towe ala sani di abi fu du anga bonu. Aini a ten fu den fosi Kelesten, a omen sama fu Efeise be e du afokodeei. Ma di den kon sabi a tuu, den á daaidaai, den du wan sani wanten. Somen fu den „sama di be e bonu, tyai den buku fu den kon dyunta boon a lanti fesi” (Toli 19:19). Den sama ya be du ala san den be mu du fu ogii yeye á fooseli den moo. Den buku ya be dii, ma toku di den kon sabi a tuu, den á seli den fu meke moni. Den á gi taa  sama den tu. A boon den boon ala den. A moni di den be sa fende efu den be seli den buku ya, á be pelensipali gi den enke a du di den be wani du san Yehofa wani.

¹¹ Fa u sa waka a den fosi Kelesten baka? A moo bun sani di u sa du a fu towe ala sani di abi fu du anga afokodeei. U mu towe sani enke bui, keti, linga, obiya bataa anga iniiwan taa sani di sama e wei efu poti aini den osu fu kibii den gi ogii yeye.​—Leisi 1 Korentesama 10:21.

12. San i mu akisi iseefi te i luku den sani di yu e du fu piisii?

¹² Konikoni anga san yu e du fu piisii. Akisi iseefi taki: ’Mi e leisi buku, efuso taa sani a internet di abi fu du anga bonu efuso tofuuwooko? Mi e aliki poku di abi fu du anga afokodeei? Fa fu den felon di mi e luku efuso den game di mi e pee? Den abi fu du anga sani enke azeman, dede sama di e waka efuso dalagula? Den e soi sani enke bonu, supuku anga wisi enke wan kowownu sani? Son buku efuso felon abi anainsitoli aini, ma a ná ala den abi fu du anga afokodeei. Te yu e luku san yu o du fu piisii, i mu luku bun fi yu á du sani di Yehofa e buuse. U mu du ala san u man fu „abi wan kiin kosensi”.​—Toli 24:16. *

13. Anga san u mu luku bun?

¹³ Ná gi toli di abi fu du anga ogii yeye. U mu waka a Yesesi baka (1 Peit. 2:21). Fosi Yesesi kon a goontapu, a be  sabi omen sani fu Saatan anga den ogii yeye, bika neen anga den be de a hemel anda. Tokuso di a kon a goontapu, a á be e gi omen simpan toli fu den sani di den ogii yeye be e du. Yesesi be wani de wan Kotoigi fu Yehofa. A á be wani meke lekalaama gi Saatan fu a moo fende balinen. Leti enke Yesesi, winsi u sabi son sani di den ogii yeye du, wi á mu e paati den toli de. Te wi e gi toli, u wani taki fu den sani di Yehofa leli u di ’doo wi ati’.​—Ps. 45:1.

14-15. (a) Saide wi á mu feele ogii yeye? (b) Fa u du sabi taki Yehofa e kibii a foluku fi en?

¹⁴ Ná feele ogii yeye. Aini a ogii goontapu ya sani di wi á be denki sa miti u. Kande u siki wanboowanboo, kande ongooku miti u, kande wan sama di u lobi dede. Te den sowtu sani ya miti u, wi á mu denki taki a ogii yeye e du den sani ya anga wi. Beibel taki ’ogii ten anga sani di wi á poi si a fesi e miti ala u’ (Peleik. 9:11). Den ogii yeye abi makiti, ma aini a ten di pasa Yehofa soi taki a abi makiti moo ala den ogii yeye. Di Saatan be tesi Yopu, Yehofa á be gi en pasi fu a kii en (Yopu 2:6). Aini a ten fu Mosesi Yehofa be soi taki a abi makiti moo ala den bonuman fu Egepte (Ek. 8:18; 9:11). Di Yesesi toon Kownu, Yehofa gi en makiti fu towe Saatan anga den ogii yeye kon a goontapu. Aini a ten di e kon den o towe Saatan anga den ogii yeye go aini a dipi peti di nai doo doti. A ten de den ná o poi du ogii anga sama moo.​—Openb. 12:9; 20:2, 3.

¹⁵ A omen sani e soi taki Yehofa e kibii a foluku fi en aini a ten ya. Pakisei a sani ya: Wi e paati a bun nyunsu a hii goontapu (Mat. 28:19, 20). A peleiki di wi e peleiki e yeepi omen sama fu sabi sowtu ogii Didibii e du. Efu Saatan be poi, a be o tapu u fu wi á du a wooko ya, ma a á poi tapu u. Neen meke u ná abi fu feele ogii yeye. U sabi taki „Yehofa e luku lontu a hii goontapu fu si san e pasa, fu a sa koboloiki en  kaakiti fu yeepi den sama di e dini en anga den hii ati” (2 Kolon. 16:9). Efu wi e dini Yehofa anga u hii ati den ogii yeye ná o poi du sani anga u.

16-17. Gi wan ondoofenitoli di e soi taki u mu abi deki-ati efu u wani toto futu gi ogii yeye.

¹⁶ Efu u wani toto futu gi ogii yeye u mu abi deki-ati, moomoo te famii anga mati wani dwengi u fu du afokodeei. Te wi abi deki-ati Yehofa e belesi u. Luku a toli fu wan sisa den e kai Erica di e tan a Gaana. A be abi 21 yali di a bigin sutudeli Beibel anga Yehofa Kotoigi. En dda a be wan bonuman, neen meke den be wani a nyan den sani di en dda be e poti gi den afo fi en di dede. Di Erica á be wani neen den sama fi en fende taki ai wisiwasi den gaansama sani fi en. Den famii fi en be e feele taki den afo fu den be o du ogii anga den.

¹⁷ Den famii fu Erica be wani dwengi en fu nyan a nyanyan, ma a á du a sani ya. Neen meke den poti en a doo. Wantu Kotoigi meke a go tan anga den. A so Yehofa gi Erica baala anga sisa di libi anga en enke famii (Malik. 10:29, 30). Winsi fa den famii fi en poti en a doo, winsi fa den boon ala den sani fi en, toku Erica á gwe fika Yehofa. A dopu, nownow ai pionili. A nai feele ogii yeye. Erica taki: „Ala dei mi e begi gi den famii fu mi. Mi wani den kon dini Yehofa fu den ogii yeye á fooseli den moo.”

18. Sowtu wini wi o fende te wi e fitoow Yehofa?

¹⁸ Kande a sani di miti Erica ná o miti u, ma tokuso ala wi abi fu toto futu gi den ogii yeye. U mu biibi taki Yehofa o holibaka gi u. Efu u du a sani ya Yehofa o belesi u. Saatan ná o fende u koli. U ná o go e feele ogii yeye tu. Boiti dati, wi anga Yehofa o toon moo bun mati. A disipel Yakowbesi sikiifi taki: „U mu saka useefi a Gadu ondoo, da u toto futu gi Saatan, da a o lon gwe. Kon koosube a Gadu, da enseefi o kon koosube a yu.”​—Yak. 4:7, 8.