1-2. (a) Fa Saatan e koli sama? (b) San wi o luku aini a artikel ya?

FANAFU a ten fu Adan anga Efa neen Saatan, ’a dda fu lei e koli sama’ anga den lei di ai paati (Yoh. 8:44). Son wan fu den lei ya e meke sama biibi taki te wan sama dede ai libi go doo. Tide na a dei a omen sani sama e du te wan sama fu den dede. Neen meke a omen Kotoigi abi „fu feti gi a biibi” fu den te wan sama fu den dede.​—Yud. 3.

² San o yeepi i fu du san Beibel e taki te den sowtu tesi ya e miti i? (Efe. 6:11) Fa i sa gi wan baala efuso sisa taanga-sikin te sama wani dwengi en fu du sani di Gadu á lobi? A artikel ya o soi fa Yehofa e yeepi u fu pasa den tesi ya. Meke u luku fosi san Beibel taki e pasa anga wan sama te a dede.

3. Sowtu takuu bakapisi a fosi lei tyai gi libisama?

³ Di Gadu meke libisama a be wani u libi fu teego. Efu Adan anga Efa be wani libi fu teego den be mu du san Yehofa taki. A be taigi den taki: „A bon di den e kai sabi bun anga ogii, yu á mu nyan a sii fi en, bika a dei di yu o nyan en, yu o dede namo” (Gen. 2:16, 17). Ma Saatan poli sani gi den. A du enke a wan sineki be e taki anga Efa di a taigi en taki: „I ná o dede seefi.” A tyali taki Efa biibi Saatan neen a nyan a sii fu a bon di Gadu be taigi den taki den á mu nyan. Bakaten Adan seefi nyan (Gen. 3:4, 6). Neen meke ala sama e dede, bika ala den abi sondu.​—Rom. 5:12.

4-5. Fa Saatan e koli sama te na a dei fu tide?

 ⁴ Adan anga Efa dede, leti enke fa Gadu be taigi den. Baka di Saatan meke a fosi lei, a meke omen taa lei di abi fu du anga dede. Wan fu den lei ya na a koli di ai koli sama taki te wan sama dede, wan sani de aini en di e libi go doo a dede kondee. Te na a dei fu tide a omen sama e biibi a lei ya.​—1 Tim. 4:1.

⁵ Saide sama e biibi den lei fu Saatan? Saatan sabi taki Gadu meke wi anga a fii fu libi fu teego. Neen meke ai koboloiki a sani ya fu koli sama. Nawan sama á wani dede (Peleik. 3:11). Wi e si dede enke wan feyanti.​—1 Kor. 15:26.

6-7. (a) Saatan poi koli ala sama anga den lei di ai paati fu dede? (b) Fa den leli fu Beibel e yeepi u fu wi á feele dede sama?

⁶ Winsi san Saatan e du, a á poi koli ala sama. A omen sama sabi san Beibel e leli fu dede anga sowtu howpu de gi den sama fu u di dede (Peleik. 9:5, 10; Toli 24:15). Den leli ya e toosutu u. Den e yeepi u fu wi á feele taki dede sama o du ogii anga wi efuso taki den sama fu u di dede e pina. U sabi taki te wan sama dede, a leti enke ai siibi wan dipi siibi. A á sabi nawan sani moo (Yoh. 11:11-14). U sabi tu taki te wan sama dede a nai sabi seefi o langa a dede. Neen meke di Yesesi o weki den sama di dede, winsi a omen ondoo yali den be dede, a o gei enke a eside den go didon neen den weki baka.

⁷ Den sani di Saatan e leli sama fu dede e meke den buuya, den nai sabi san den mu biibi. Ma te i kon sabi kaba san Beibel e taki fu dede, yu o si taki a makiliki fu fusutan. A ná koli namo Saatan e koli sama anga den lei di ai paati, ai poli Gadu nen tu. Fu yeepi u fu si san a den bakapisi fu den lei fu Saatan, wi o luku den akisi ya: Fa den lei fu Saatan poli Yehofa nen? Fa den lei ya meke son sama e si a dede di Yesesi dede gi wi enke wan soso sani? Fa den lei ya e gi sama moo booko-ede?

8. Enke fa Yelemiya 19:5 e soi, da fa den lei di Saatan paati fu dede, e poli Yehofa nen?

⁸ Den lei di Saatan paati fu dede e gi Yehofa poli nen. Wan fu den lei ya, na a leli taki dede sama e boon aini wan gaan  faya. Den sowtu leli ya e poli Yehofa nen. Fa den e poli en nen? Efi i luku en bun, da den leli ya e soi taki a Gadu di lobi sama abi denseefi manii fu Didibii (1 Yoh. 4:8). Fa a sani ya e meke i fii? Fa a sani ya e meke Yehofa fii? Bika en a wan Gadu di e buuse ogii.​—Leisi Yelemiya 19:5.

9. Fa den lei fu Saatan e meke son sama á biibi san sikiifi a Yohanisi 3:16 anga 15:13?

⁹ Den lei fu Saatan meke son sama e si a dede di Yesesi kon dede gi wi enke wan soso sani (Mat. 20:28). Wan taa lei fu Saatan, na a leli taki wan sani de aini u di nai dede. Efu a sani ya a be tuu, da wi abi teego libi kaba. Kelestesi á be o abi fu kon dede gi u fu fii wi fu sondu. A dede di Kelestesi kon dede gi u, na a moo gaan sani di wan sama be sa du fu soi taki a lobi u. (Leisi Yohanisi 3:16; 15:13.) A musu e hati Yehofa anga Yesesi te sama e paati lei di e meke a gei enke a fu soso Yesesi kon dede gi u!

10. Fa den lei di Saatan paati fu dede e meke sama moo kusumi?

¹⁰ Den lei fu Saatan e tyai pina anga booko-ede gi libisama. Son sama e taigi mma anga dda di pikin dede taki a Gadu teke a pikin fu den fu di a be abi ete wan engel fanowdu a hemel. A leli ya e toosutu sama, efuso ai moo fooseli den? Son keliki be e leli sama taki sama di du ogii o boon aini hel te den dede. A omen sama den boon libilibi aini a ten di pasa, fu di den sama ya be e soi taawan taki den keliki e lei. Wan pisiten i be abi wan Gaan kuutu fu Lomusu Keliki aini Sipanyookondee di be e du ogii anga den sama ya. Den be e boon den libilibi a wan ponsu. Wan buku taki den be e du a sani ya fu di den be wani a sama „fii fa a tan te wan sama e boon aini hel”. Son wan fu den kuutubakaa fu a Gaan kuutu ya be e biibi taki a sani ya be o yeepi den sama fu daai den libi fosi den dede, da den á be o go aini a tuutuu faya fu teego. Aini omen kondee sama e towe wataa gi den afo fu den di dede fu gi den gaandi, efuso fu suku belesi a den. Taawan e du a sani ya fu den afo fu den á sa du ogii anga den. Te sama e biibi den sowtu sani ya, den nai fende toosutu. Den lei ya e meke sama ná abi losutu aini den libi, den e feele sosokaali.

11. Fa famii anga mati di e booko den ede anga u sa puubei fu dwengi u fu du sani di Yehofa á lobi?

¹¹ Kande famii anga mati o wani dwengi u fu du sani di Yehofa á lobi te wan sama fu u dede. Kande den e du a sani ya fu di den e booko den ede anga u. Ma efu u lobi Yehofa anga den weiti fi en, u ná o du sani di a á lobi. Kande den o taki sani fu meke u fii wan fasi. Kande den o taigi u taki wi á be lobi a sama fu u di dede. Kande den o taki wi á be e lesipeki en. Kande den o taigi u taki wi o meke a sama di dede du ogii anga a famii. San o yeepi u fu du san Beibel taki? Meke u luku fa i sa wooko anga wantu fu den leli fu Beibel te den sowtu sani ya e pasa.

12. San a wantu sani di nai kai anga den leli fu Beibel, di sama e du te wan sama dede?

¹² U mu tan faawe fu gwenti di nai kai anga den leli fu Beibel (2 Kor. 6:17). Son sama e biibi taki te wan sama dede, a sa du sani anga den sama di be du ogii anga en. Den e biibi taki a sama di dede sa du ogii anga wan hii lo. Son sama abi  a gwenti fu tapu den sipikii fesi aini a osu, fu di den e si enke den o si a sama di dede na a sipikii. Son sama e koti den uwii, towe sopi a doti efuso den e sidon bookode. Enke Kotoigi fu Yehofa, u nai biibi nawan fu den lei fu Saatan. U nai du sani tu di e soi taki wi e holibaka gi den.​—1 Kor. 10:21, 22.

13. Enke fa Yakowbesi 1:5 e soi, da san i mu du efi yu á sabi fa Yehofa e denki fu son gwenti?

¹³ Efi i wani sabi fa Yehofa e denki fu son gwenti, begi en fu a yeepi i fu du sani anga koni. (Leisi Yakowbesi 1:5.) Baka te i begi en, da i luku san a olikanisâsi e taki fu den toli de. Efi i si enke yu abi moo yeepi fanowdu, i sa go a den owluman. Den ná o taigi i san i mu du, ma den o yeepi i fu si san Beibel e leli te a abi fu du anga den toli de. Te yu e du den sani ya, yu e ’leli fa fu koboloiki i fusutan a wan bun fasi’. A sani ya o yeepi i fu „sabi san bun anga san á bun”.​—Heb. 5:14.

14. San u mu du efu wi á wani meke sama dyakata?

¹⁴ ’Ala san yu e du mu gi Gadu gaandi. Yu á mu wani meke taawan dyakata’ (1 Kor. 10:31, 32). Te wi e luku efu wi o du son sani di sama gwenti du te wan sama fu den dede, u mu holi a kosensi fu taawan a pakisei, moomoo den baala anga sisa fu u. Noiti wi á wani tyai a nen taki u meke wan sama dyakata! (Malik. 9:42) U mu meke moiti tu fu wi á du sani di o meke den sama di nai dini Yehofa ati boon a wi sosokaali. Lobi o yeepi u fu taki anga den a wan lesipeki fasi. A so wi e hei Yehofa nen. Wi á mu kwali anga sama efuso wisiwasi den sani di den e biibi. Wi á mu feegete taki te wi e soi lobi gi sama sani e waka bun. Neen meke u mu soi taki wi e holi den fii fu den a pakisei. U mu soi den taki wi e lesipeki den tu, da kande den o wani aliki u.

15-16. (a) Saide a bun fu meke sama sabi a fesi san yu e biibi? Gi wan ondoofenitoli. (b) Fa u sa wooko anga a sani di Pawlesi taki a Romesama 1:16?

¹⁵ Meke den sama fi i sabi taki yu a wan Yehofa Kotoigi (Yes. 43:10). Te den sama fi i sabi a fesi san yu e biibi a o moo makiliki fu taki anga den te wan sani pasa. Francisco di e tan a Mosambik, taki:  „Di mi anga mi uman, Carolina kon sabi a waaleiti, u taigi u famii wanten taki u ná o go e du den sani di u be gwenti du moo te wan sama dede. A sani ya á be makiliki di Carolina sisa dede. Te wan sama fu a lo fu u dede, den e du omen sani te den go wasi a dede. A moo koosube famii mu siibi dii dei langa a pe den towe a wataa di den wasi a dede. Den taki den e du den sani ya fu a yeye fu a sama fii bun. Den famii fu Carolina be wani a siibi a pe den be towe a wataa di den wasi a dede sikin fi en sisa.”

¹⁶ San Francisco anga en uman du? Francisco taki: „U lobi Yehofa, u wani a piisii, neen meke wi á du san den taki. Carolina famii ati boon te ná sani. Den taki u nai lesipeki den dedewan. Den taigi u taki den ná o go e yeepi wi a sani moo, den ná go e kon a wi osu moo tu. Fa u be taigi den a fesi kaba san wi e biibi, wi á taki a taki de anga den moo di den ati boon. Son famii opo taki gi u seefi, taki u be taigi den kaba taki u nai du den sani de moo. Di den ati koo, neen u meke en bun baka. Taawan kon te a wi osu kon suku buku anga taa sani fu leisi.” Noiti sen mu e kisi u fu taigi taawan san wi e biibi te a abi fu du anga dede.​—Leisi Romesama 1:16.

17. San o yeepi u fu de wan tuutuu mati gi u baala anga sisa te den e tyali fu di wan sama fu den dede?

¹⁷ Te wan sama fu wan baala efuso sisa dede, u mu du ala san u man fu de wan „tuutuu mati . . . , wan baala di meke fu yeepi i te i fuka” (Odo 17:17). Fa u sa soi taki wi a „tuutuu mati” te sama wani dwengi u baala efuso sisa fu du sani di Yehofa á lobi? Meke u luku tu leli fu Beibel di sa yeepi u fu toosutu den te den de anga buduufu na ati.

18. Saide Yesesi be kee? San a sani ya e leli u?

¹⁸ „Kee anga den sama di e kee” (Rom. 12:15). Kande u nai sabi san fu taki te u go luku wan sama di e tyali. Winsi wi á  sabi san fu taki son yuu, efu wi e kee anga den, den o fii taki wi e booko wi ede anga den. Di Lasalesi, a mati fu Yesesi be dede, Maata, Maliya anga den mati fi en be e kee. Di Yesesi doo baka fo dei „neen enseefi bigin kee”, winsi fa a be sabi taki a be o weki Lasalesi baka (Yoh. 11:17, 33-35). A kee di Yesesi kee e soi fa Yehofa be e fii di Lasalesi dede. A be e soi tu taki Yesesi lobi den sama fu Lasalesi tuutuu. A sani ya be musu gi Maata anga Maliya taanga-sikin. Te wi e soi u baala anga sisa taki u lobi den anga taki wi e booko wi ede anga den, den e fii taki a ná den wawan de.

19. Fa i sa wooko anga a sani di sikiifi a Peleikiman 3:7 te yu e toosutu wan Kelesten te wan sama fi en dede?

¹⁹ „Wan ten fu taki anga wan ten fu de pii” (Peleik. 3:7). Wan taa fasi fa u sa toosutu u baala anga sisa te wan sama fu den dede, a te wi e aliki den. Gi en a okasi fu taki puu koko neen ati. Yu á mu fii wan fasi te a taki sani „sondee fu denki” (Yopu 6:2, 3). Kande den famii fi en di á de a waaleiti e fooseli en. Neen meke a be o bun fu begi anga en. Akisi „a Sama di e aliki begi” fu gi en kaakiti (Ps. 65:2). Efi i fende a okasi i sa leisi Beibel anga en. I sa leisi wan artikel aini wan fu den buku fu wi anga en tu efuso wan ondoofenitoli di sa gi en taanga-sikin.

20. San wi o luku aini a taa artikel?

²⁰ A wan gaandi fu sabi san e pasa tuutuu anga wan sama te a dede. A wan gaandi tu fu sabi sowtu howpu de gi den sama di dede (Yoh. 5:28, 29). Neen meke den sani di wi e taki anga den sani di wi e du mu soi taki wi e holibaka gi den leli fu Beibel. Meke u leli taa sama tu solanga u fende a okasi. Ete wan fasi fa Saatan e puubei fu holi sama aini dunguu na afokodeei. Wi o luku a toli ya aini a taa artikel. Wi o si saide u mu luku bun anga afokodeei te wi e piisii.