Winston, i sa taigi u fa i kon sabi a waaleiti?

Mi kiya a wan peesi pe den be e paandi goon, a wan foto den e kai Queensland, aini Australiya. Den sama fu mi á be e go a keliki. Fa u be e tan faawe, beina anga soso famii mi be e miti. Di mi be abi 12 yali, neen mi bigin suku Gadu. Mi be e begi en fu a yeepi mi fu sabi en. Bakaten mi foloisi komoto a pe u be e paandi goon, neen mi fende wan wooko a Adelaide, wan foto a Zuid-Australiya. Di mi be abi 21 yali, mi go a fakansi a Sydney, neen mi miti Pam. Pam taigi mi taki wan keliki den e kai British-Israel (Ingiisi-Islayeli) e leli sama taki den sama fu Ingiisikondee a den bakapikin fu a tin-lo kownukondee fu Islayeli di be go a katibo aini a yali 740 Fosi Kelestesi. Di mi go a Adelaide baka, mi akisi wan man a pe mi be e wooko fa ai denki fu a sani de. A man ya be e sutudeli Beibel anga Yehofa Kotoigi. Mi anga en taki wantu yuu, ma a fu den sani di Yehofa Kotoigi e biibi u moo taki. Di mi kaba taki anga en, mi be kon fusutan taki Gadu be piki a begi di mi be begi en di mi be yonkuu. Mi be kon sabi sama a Gadu tuutuu anga san na a Kownukondee fi en. Mi be fende a „gaan dii parel”.​—Mat. 13:45, 46.

Pam, iseefi bigin suku a waaleiti yonkuuyonkuu. Fa i du fende en?

Mi kiya a wan foto den e kai Coffs Harbour, a New South Wales. Den sama fu mi be e go a keliki. Mma, nda, mi gaandda anga mi gaanmma fu mi mma se, be e go na a British-Israel (Ingiisi-Islayeli) keliki. Mi anga mi pikin baala, mi gaan sisa anga den  taa galanpikin fu mi gaandda anga mi gaanmma be leli taki den bakapikin fu den sama fu Ingiisikondee na a foluku fu Gadu. Winsi fa u be e go a keliki, mi á be e fii enke a disi na a tuu biibi. Mi á be e fii enke mi e dini a tuu Gadu. Di mi be abi 14 yali, mi bigin go a omen keliki di be de koosube. Mi go a Anglikan keliki, Baptist, anga Zevendedagsadventist. Ma toku den á yeepi mi fu sabi Gadu.

Bakaten mi famii foloisi go na a foto Sydney. A so mi be miti Winston di a be kon a fakansi a Sydney. Enke fa Winston be taki kaba, da a di mi anga en gi keliki toli meke a be bigin sutudeli anga Yehofa Kotoigi. Baka dati a be lobi sikiifi Beibeltekisi aini den biifi di a be e sende gi mi. Mi á mu lei, biginbigin mi be e booko mi ede. Son yuu mi ati be e boon neen, ma baka wan pisiten mi be kon fusutan taki den sani di Winston be e sikiifi be musu de a tuu.

Mi foloisi go a Adelaide aini 1962 fu mi be sa de moo koosube fu Winston. A be seeka sani gi mi fu mi be e tan anga wan baala anga en uman den e kai Thomas anga Janice Sloman. Den be du a zendeling wooko a Papuwa Nyun Gineya wan pisiten. Den libi switi anga mi te. A 18 yali mi be abi a ten de. A den yeepi mi fu kon sabi Yehofa moo bun. A so miseefi bigin sutudeli Gadu Wowtu. A á teke langa neen mi fusutan taki mi fende a waaleiti. Baka di mi anga Winston toow, u bigin du moo gi Yehofa. A sani ya yeepi u fu teke en fu bigi taki u fende a waaleiti, winsi fa tesi e miti u.

Winston, i sa taigi u fa den fosi yali di i be e dini Yehofa be de?

A á langa di mi anga Pam toow, neen Yehofa gi wi a okasi fu du moo gi en (1 Kor. 16:9). A Baala Jack Porter be gi u taanga-sikin fu bigin anga a fuuten diniwooko. En anga en uman Roslyn be kon a u kemeente enke kelen-owluman. (Nownow mi anga en de aini a Beikantoo Komte fu a Australasiya beikantoo). Jack anga en uman gi u taanga-sikin fu du a kowownu pioniliwooko. U du a kowownu pioniliwooko 5 yali. Di mi be abi 29 yali neen den akisi mi anga Pam fu du a kelen wooko a den tabiki a Stille Zuidzee. A den baala fu a beikantoo fu Fidyi be e luku a wooko a den tabiki ya. Den tabiki ya na: Ameekan Samowa, Samowa, Kiribati, Nayuru, Niyuye, Tokelayu, Tonga, Tuvalu, anga Vanuwatu.

A pisiten de, den sama fu den faawe tabiki á be e kaba fitoow Yehofa Kotoigi, neen meke u be mu konikoni te u be go a den (Mat. 10:16). Den kemeente á be bigi. Son kemeente á be e poi fende peesi gi u fu siibi, neen meke u be e akisi den sama fu a tabiki efu u sa siibi a den osu. Den be e libi switi anga u te.

Winston, i lobi a puu di wi e puu buku poti a taa tongo. Saide i lobi a wooko ya so?

Di u bigin go a Tonga Tabiki, a wantu talakitaati anga wantu taa buku namo den be abi aini Tongantongo. Den be e sutudeli anga sama aini a Ingiisi wan fu a buku di den e kai „A tuu leli di o meke i fende teego libi”. A pisiten fu a owluman sikoo di be holi fo wiki, dii owluman fu Tonga Tabiki di be e fusutan Ingiisi pikinso taki den o puu a buku ya poti aini Tongantongo. Pam sikiifi en a computer neen u sende en gi den baala na Ameekankondee fu doloki en gi u. A wan sani fu aitin wiki a teke fu kaba anga a buku. Winsi fa son sani aini a buku á be kaba taki soifili, tokuso a yeepi omen sama di be e taki a Tongantongo fu kon a waaleiti. Mi anga Pam nai puu buku poti aini taa tongo, ma toku a sani di wi ondoofeni meke u kon lobi a wooko ya.

Pam, te i maiki Australiya anga den tabiki, san i si de taa fasi?

A kengi dyow! Son wan fu den peesi pe u be e go be lai makisita. Son peesi be waan,  taawan na alen be e kai te. Son wan be lai alata. Son leisi u be e siki. Son leisi wi á be e abi nyanyan sai. Ma na a taa se, a be e switi te bakadina fu sidon aini u fale (a so den e kai langa aini Samoyantongo) e luku a Se. Son neti a mun be e kiin te da u be e si den kokoonoto bon. A mun be e beenki na a wataa tapu. U be e gi Yehofa daa fu den moin sani ya. Den be e yeepi u fu wi á poti pakisei a den sani di be e miti u.

U be lobi den pikinnengee, den be e foondoo ten den be si fa u be weti. Wan leisi di u be go a Niyuye, wan pikin boi be si fa Winston ana lai uwii. A lobi ana a Winston neen a taki „mi lobi den foo uwii fi i”. A gei a á be si sama ana lai uwii so ete, neen meke a á be sabi fa a be mu kai den.

Tyali be e kisi u te u be si fa den sama pooti anga fa a libi be e taanga gi den. A peesi be moin, ma den á be abi bun dataa, den á be abi wataa sai fu diingi tu. Tokuso den baala anga sisa á be e booko den ede anga den sani de. Den be gwenti a libi ya. Den be e piisii taki den be poi de anga den famii, den be abi wan peesi fu holi komakandaa, den be abi a gaandi fu gafa Yehofa. A fasi fa den be e libi yeepi u fu poti pakisei a den moo pelensipali sani. A sani ya yeepi u fu wi á libi bigi tu.

Pam, son leisi a iseefi be mu go kisi wataa fu boli. Fa i be man du a sani de?

Ai bigi gi mi taki nda be leli mi son sani. A leli mi fa mi mu meke udufaya fu boli. A leli mi te mi ná abi tyaipi sani, fa mi be mu wooko anga a pikinso di mi abi. Wan leisi di u go a Kiribati, u be e tan a wan pikin osu di be meke anga uwii. Den be tapu en lontu anga tutu, neen den iti tyatya aini. Mi diki wan olo a doti aini a osu, da mi be e meke faya anga kokoonoto buba. A so mi be e boli. Mi be e kisi wataa a wan peti pe den uman fu a tabiki be e kisi wataa. Den be e tei wan tetei a wan tiki di be langa wan sani fu 2 meter. A be e gei wan uku, ma a wan pikin boketi den be tei neen mofu. Di mi luku fa den uman be e kisi wataa, mi be denki a makiliki. Ma di a doo yuu fu mi kisi, mi iti a boketi omen leisi, ma wataa á be e go aini. Den uman lafu mi te. Baka dati neen wan fu den yeepi mi. Den sama be e libi bun anga wi, den be lobi yeepi u.

Yu anga Pam be kon lobi a wooko di u be e du a den tabiki. Wi abi wantu ondoofenitoli?

Winston: A omen ten a teke fosi u kon fusutan son gwenti fu den baala anga sisa a den tabiki. Te den be boli, da den be e puu ala a nyanyan gi u. Biginbigin u be e nyan ala, bika wi á be sabi taki u be mu fika gi den. U kon fusutan bakaten taki te den be puu ala a nyanyan gi u, u be mu fika gi den. Biginbigin wi á be e du sani enke fa den gwenti, ma tokuso den baala anga sisa ati á be e boon a wi. Den baala anga sisa be e poolo te den be e si wi ala sigisi mun aini den kemeente te u be e du a kelen wooko. Den á be e miti taa Kotoigi boiti mi anga Pam.

A go di u be e go luku den kemeente, be meke den sama fu den tabiki kon sabi moo bun sama a Yehofa Kotoigi. Gaanse fu den be e denki taki a den baala anga sisa fu den tabiki be opo den eigi keliki. Ma di den si taki sama fu taa kondee be e go luku den, den kon fusutan taki Yehofa Kotoigi a wan olikanisâsi di de a hii goontapu. Den foondoo te di den kon fusutan a sani ya.

Pam: Wan sani di mi ná o feegete, a san be pasa di u be go luku wan pikin kemeente a Kiribati. A wan kodo owluman be de aini a kemeente ya. Den be e kai en Itinikai Matera. A du ala san a be man fu solugu u. Wan dei di a kon luku wi, a tyai wan bakisi anga wan kodo foo igi aini kon gi u. A taki: „Luku ya.” Foo igi a be gaan sani gi wi a ten de. A sani di a gi wi a be wan pikin sani, ma a be bigi gi u tuutuu.

 Pam, wantu yali baka dati i be lasi wan bee. San be yeepi i fu holidoo?

Mi be kon de anga bee aini 1973 di mi anga Winston be de a den tabiki a Stille Zuidzee, neen u daai go a Australiya baka. Ma baka fo mun, neen a bee komoto. A sani ya du mi anga Winston ogii te. Bakaten a á be e du mi ogii so moo, ma toku mi be e fii en ete. A sani di toosutu mi, na a „akisi fu leisiman” di be kon aini [a Saanantongo] Wakititolen fu 15 april 2009. A artikel ya be akisi taki: „Efu wan beibi dede na ini en mama bere, dan a kan kisi wan opobaka?” A artikel taki u mu fika ala sani gi Yehofa, bika ai du sani a wan letifasi ala yuu. A o puu ala den pen di wi e fii fu di u de aini a goontapu fu Saatan. Neen Manpikin a poti fu du a sani ya (1 Yoh. 3:8). A artikel ya yeepi wi fu moo teke en fu bigi taki u kon sabi a waaleiti di de enke wan „gaan dii parel”. Wi e akisi useefi fa u libi be o de efu wi á be sabi san a Kownukondee o du gi libisama.

Baka di u lasi a pikin fu wi, u bigin anga a fuuten diniwooko baka. U wooko na a beikantoo fu Australiya wantu mun, neen u bigin anga a kelen wooko baka. Baka di u wooko a New South Wales anga Sydney fo yali langa, neen den kai u fu go na a beikantoo fu Australiya aini 1981. Nownow den e kai a beikantoo ya Australasiya beikantoo. Na ape u de te na a dei fu tide.

Winston, den sani di i leli a den tabiki a Stille Zuidzee yeepi i di i fende a gaandi fu de aini a Beikantoo Komte?

Eeye, den yeepi mi a omen fasi. Baka wan pisiten na a beikantoo fu Australiya be mu luku a wooko fu Ameekan Samowa anga Samowa. Baka dati, a beikantoo fu Australiya be mu luku a wooko fu Nieuw-Zeeland tu. Nownow den e kai a beikantoo ya Australasiya beikantoo. A beikantoo ya e luku a wooko fu Australiya, Ameekan Samowa anga Samowa, den Cook Tabiki, Nieuw-Zeeland, Niyuye, Oost-Timor, Tokelayu, anga Tonga. Mi be go a omen fu den peesi ya enke kelen owluman. A gaandi di mi be abi fu wooko anga den baala anga sisa a den tabiki ya yeepi mi tuutuu, moomoo anga a wooko di mi e du nownow.

Mi anga Pam leli taki a ná gaansama wawan e suku Gadu. Yonkuuwan seefi e suku a waaleiti, winsi taa sama aini a famii nai booko den ede fu fende en (2 Kow. 5:2, 3; 2 Kolon. 34:1-3). Yehofa a wan lobi ati Gadu di wani ala sama, gaanwan anga pikinwan fende a libi!

Di mi anga Pam bigin suku Gadu moo enke 50 yali pasa, wi á be sabi san u be o fende. A sabi di u sabi san na a Kownukondee de enke wan gaan dii parel di yu á poi bai anga moni. Wi o du ala san u poi fu wi á lasi a dii parel ya!