1. Fa Baala Russell anga den mati fi en be e sutudeli Beibel? Saide a fasi fa den be e ondoosuku Beibel be bun?

MOO enke wan ondoo yali pasa, Baala Charles Russell anga wantu taa sama di be e ondoosuku a Wowtu fu Gadu be bigin kon makandaa. Den be wani fusutan san Beibel e leli fu Yehofa Gadu anga Yesesi Kelestesi. Den be wani sabi tu san e pasa anga wan sama te a dede anga sowtu wini u sa fende fu a dede fu Yesesi. A fasi fa den be e ondoosuku Beibel á be taanga. Wan fu den be e poti wan akisi, da den be e luku ala den Beibeltekisi di e taki fu a toli de. Baka dati, den be e sikiifi san den fende di den ondoosuku a toli. Yehofa yeepi den man ya fu fusutan omen pelensipali leli fu Beibel. Te anga a dei fu tide wi e wooko anga omen fu den leli ya.

2. San sa meke wi á fusutan wan polofeititoli bun?

² Den Beibel Ondoosukuman kon fusutan taki a moo taanga fu fusutan san den polofeititoli aini Beibel wani taki. Saide? We, son polofeititoli a te den e pasa fosi yu e fusutan den. Taawan a baka te den pasa kaba fosi yu e fusutan san a be wani taki. Wan taa sani a taki fu man fusutan wan polofeititoli bun, i mu luku a hii toli. Efi yu e luku wan pisi fu wan polofeititoli namo, yu o fusutan wan hii taa sani. A gei na a sani ya be pasa anga a fasi fa u be e fusutan wan fu den polofeititoli di de aini a Beibel buku Yoweli. Wi o luku a polofeititoli ya baka, da wi o luku saide u be abi fu kengi a fasi fa u be e fusutan en.

3-4. Fa u be e fusutan a polofeititoli di sikiifi a Yoweli 2:7-9?

³ Leisi Yoweli 2:7-9. Yoweli be taki tyaipi makonkon be o poli Islayeli. Den makonkon ya tifi anga den agba de  enke du fu wan lew. Den be o nyan ala den sani di e goo aini a kondee (Yowe. 1:4, 6). Wan hii pisiten u be denki taki a polofeititoli ya be e soi fa a foluku fu Yehofa be o peleiki fayafaya enke wan gaan kulu makonkon di sama á poi tapu. U be denki taki a peleikiwooko be o buuya den sama aini a „kondee”, efuso den sama di de aini falisi keliki. *

⁴ Efu u luku Yoweli 2:7-9 wawan, da a gei enke u be e fusutan a polofeititoli bun. Ma te u luku a hii toli, wi e si taki a wan hii taa sani a wani taki. Meke u luku fo sani di meke u taki so.

5-6. San u sa akisi useefi te wi e leisi (a) Yoweli 2:20? (b) Yoweli 2:25?

⁵ A fosiwan na a sani di Yehofa paamisi. A be taki: „Mi o poti den sama fu a se fu noord [den makonkon] faawe fu u” (Yowe. 2:20). Efu den makonkon a den Kotoigi fu Yehofa di e peleiki enke fa Yesesi be sende den, da saide Yehofa taki a o yaki den? (Eseik. 33:7-9; Mat. 28:19, 20) A sani ya e soi taki a ná den sama di e dini Yehofa a o yaki, ma a den feyanti fu den.

⁶ Du fu tu sani, a san sikiifi a Yoweli 2:25. Yehofa taki ape taki: „Mi be sende tyaipi makonkon, makonkon di ná abi mapaapi, makonkon di e nyan sani anga makonkon di e poli sani fu nyan den sani fu u. Ma mi o gi wi ala den sani ya baka aini den yali di e kon.” Yehofa paamisi aini a tekisi ya taki a o gi ’den ala den sani’ di den makonkon be poli. Efu den makonkon a den sama di e paati a bun nyunsu fu a Kownukondee, da dati wani taki a bosikopu di den e paati e du ogii anga sama. Ma u sabi taki a bosikopu ya nai du ogii anga sama, ma a sa yeepi den fu kengi den libi fu den sa fende teego libi (Eseik. 33:8, 19). Moo so bun sani á de.

7. San den wowtu „baka dati” di sikiifi a Yoweli 2:28, 29 e soi?

⁷ Leisi Yoweli 2:28, 29. Du fu dii, na a yuu di den sani be o pasa. Luku san Yehofa taki: „Baka dati mi o gi ala sowtu sama a yeye fu mi.” Yehofa be o du a sani ya baka te den makonkon be kaba du den wooko. Efu den makonkon a sama di e peleiki a bun nyunsu fu a Kownukondee, da saide a baka te den kaba peleiki fosi Yehofa be o gi den a santa yeye? Sama be e du ogii anga den. Feyanti be e suku fu tapu a wooko tu. Fu taki en kiin, den á be o man peleiki omen yali efu den á be abi a santa yeye fu Gadu.

8. Sama a den makonkon aini a polofeititoli di sikiifi a Openbaring 9:1-11? (Luku a fowtow a fesise fu A Wakititolen.)

⁸ Leisi Openbaring 9:1-11. Meke u luku du fu fo sani di meke u bigin si a toli ya taa fasi. Fosi, u be denki taki a polofeititoli fu den makonkon di sikiifi a Openbaring, anga a wan di sikiifi aini a buku Yoweli be wani taki aseefi sani. A polofeititoli di sikiifi a Openbaring e taki fu tyaipi makonkon di abi libisama fesi, anga ’wan sani di e gei gowtu kownu-ati’ a den ede (Openb. 9:7). Den e pina „den sama [den feyanti fu Gadu] di ná abi a maiki fu Gadu a den fesi-ede” feifi mun langa. A wan sani fu feifi mun wan makonkon e libi (Openb. 9:4, 5). Den makonkon aini a polofeititoli ya, a den salufu Kelesten. Den e taigi sama  taki Gadu o poli a ogii goontapu ya. Den sama á lobi a bosikopu ya seefiseefi.

9. San kengi a den makonkon di Yoweli be si, anga den makonkon di Yohanisi be si?

⁹ A tuu taki son pisi fu a polofeititoli di sikiifi aini Openbaring anga a polofeititoli di Yoweli sikiifi e gei. Ma a omen sani kengi aini den tu polofeititoli ya. Yoweli sikiifi aini a polofeititoli fi en taki den makonkon e poli ala san e goo a goontapu (Yowe. 1:4, 6, 7). Aini a fisyun di Yohanisi si „den taigi den makonkon taki den á mu du sani anga den sani di e goo a goontapu” (Openb. 9:4). Den makonkon di Yoweli si be komoto na a se fu noord (Yowe. 2:20). Den makonkon di Yohanisi si be komoto aini wan dipi peti (Openb. 9:2, 3). Den yaki den makonkon di Yoweli be si. Ma den á be yaki den makonkon di Yohanisi be si. Nawan peesi aini Beibel e soi taki Yehofa á be fende den makonkon ya bun.​—Luku a faki „ Den polofeititoli fu den makonkon​—San kengi aini den toli ya?”

10. Sowtu tekisi e soi taki son leisi wan sani aini Beibel wani taki wan taa sani te den e taki fi en aini wan taa toli?

¹⁰ U si kaba taki den tu polofeititoli á wani taki aseefi sani. Den makonkon di Yoweli e taki anga den makonkon di sikiifi aini Openbaring a ná aseefi. A sani ya nai foondoo wi, bika son leisi wan  sani aini Beibel wani taki wan taa sani te den e taki fi en aini wan taa toli. Wi e si a sani ya kiin, te u luku san sikiifi a Openbaring 5:5 anga 1 Peitilisi 5:8. Aini Openbaring Beibel e kai Yesesi „a lew fu a lo fu Yuda”. Ma Peitilisi sikiifi taki Didibii de enke „wan lew di e bali”. Den fo sani di u luku ya, e soi taki wi á be fusutan a polofeititoli fu Yoweli bun. Ma san a polofeititoli ya wani taki?

11. Fa Yoweli 1:6 anga 2:1, 8, 11 e yeepi u fu fusutan sama a den makonkon?

¹¹ Te u luku ala den vers di e taki fu a polofeititoli ya, da wi e si taki Yoweli be e taki fu sama di be o kon feti anga a foluku fu Gadu (Yowe. 1:6; 2:1, 8, 11). Yehofa taki a be o meke „tyaipi” suudati fu Babilon sitaafu den Islayelisama, bika den be abi taangayesi (Yowe. 2:25). A polofeititoli e kai den suudati ya, „den sama fu a se fu noord”, bika na a se fu noord den Babilonsama be o komoto kon feti anga Islayeli (Yowe. 2:20). Beibel taki den suudati ya de enke makonkon, den nai waka buuyabuuya. Yoweli taki: „Ibiiwan fu den e poti pakisei a pe ai go. . . . Den e booko go aini a foto. Den e lon na a sikotu. Den e subi a den osu, da den pasa a den fensee enke fufuuman” (Yowe. 2:8, 9). Puubei fu si fa a sani ya e pasa. Suudati be de na ala se. Nawan peesi á be de fu kibii. Nawan sama be poi kibii gi den suudati fu Babilon.

12. Fa a polofeititoli di Yoweli be taki fu den makonkon kon tuu?

¹² Leti enke makonkon, a so den Babilonsama (efuso den Kaldeyasama) booko go aini Yelusalem aini a yali 607 Fosi Kelestesi. Beibel taki: ’A kownu fu den Kaldeyasama teke fetihow neen a kii den yonkuman fu den. Tyali á be e kisi en gi nawan sama, winsi a be wan yonkuman, efuso wan uman di á be siibi anga man ete. Winsi a wan gaandi dda, efuso wan sama di swaki. A boon a osu fu a tuu Gadu, neen a booko a sikotu fu Yelusalem. A boon ala den gaan taanga osu anga ala den dii sani di be de a Yelusalem’ (2 Kolon. 36:17, 19). Baka di den Babilonsama poli a kondee, sama be e taki: „A wan booko peesi pe nawan sama efuso meti e tan. A den Kaldeyasama abi en nownow.”​—Yel. 32:43.

13. San Yelemiya 16:16, 18 wani taki?

¹³ Wan sani fu 200 yali baka di Yoweli sikiifi a polofeititoli ya, Yehofa meke Yelemiya sikiifi wan taa sani fu a feti ya. A be taki den feyanti be o suku den Islayelisama di be e du ogii. A taki nawan fu den be o poi lowe. Yelemiya sikiifi taki: „Yehofa taki: ’Mi o sende tyaipi fisiman go kisi den enke fisi. Baka dati mi o sende tyaipi ontiman go onti den na ala den mongo, den pikin mongo anga den mongo olo. . . . Mi o pai den fu ala den ogii anga den sondu di den du.’” Den Islayelisama di á be wani fika den ogii di den be e du á be o poi kibii gi den Babilonsama.​—Yel. 16:16, 18.

14. On ten a sani di sikiifi a Yoweli 2:28, 29 kon tuu?

¹⁴ Yoweli abi bun nyunsu tu. A taki a kondee be o meke tyaipi nyanyan baka (Yowe. 2:23-26). A sani ya wani taki wan ten be o kon pe tyaipi sama be o sabi den moin leli di de aini a Wowtu fu Gadu. Yehofa be taki: „Mi o gi ala sowtu sama a yeye fu mi, da den manpikin anga den  umanpikin fu wi o taki polofeititoli, mi o meke den man di gaandi kaba deen sani, mi o meke den yonkuman si fisyun. . . . Mi o gi den mansaafu anga umansaafu fu mi a yeye fu mi tu” (Yowe. 2:28, 29). Yehofa á be gi den Islayelisama en santa yeye wantenwanten baka di den komoto a Babilon. A baka wan sani fu 600 yali fosi a gi den en santa yeye na a Pinksterfesa fu a yali 33. Fa u du sabi a sani ya?

15. Enke fa Toli 2:16, 17 e soi, da sowtu pisi fu a polofeititoli di sikiifi a Yoweli 2:28 Peitilisi taki taa fasi? San a sani ya e soi?

¹⁵ Apostel Peitilisi soi taki a sani di pasa na a Pinksterfesa fu a yali 33 abi fu du anga a polofeititoli di sikiifi a Yoweli 2:28, 29. Wan sani fu neigin yuu mamanten, Gadu gi wan kulu sama en santa yeye neen den bigin taki aini omen tongo fu „den gaan sani di Gadu du” (Toli 2:11). Ma Peitilisi á taki denseefi sani di Yoweli taki. San Peitilisi taki? (Leisi Toli 2:16, 17.) A polofeititoli fu Yoweli be bigin anga den wowtu „baka dati”. Ma di Peitilisi taki fu a polofeititoli ya, a bigin anga den wowtu: „Aini den lasiti dei”. Peitilisi be e taki fu a pisiten pe den be o poli Yelusalem anga a tempel. Na a ten de, Gadu be o „gi ala sowtu sama a yeye” fi en. A sani ya e soi taki baka di a polofeititoli fu den makonkon be o kon tuu, a be o teke langa fosi a pisi fu a polofeititoli fu Yoweli ya kon tuu.

16. Fa a santa yeye fu Gadu be yeepi den futuboi fi en fu du a peleikiwooko aini a ten fu den apostel? Fa ai yeepi den aini a ten ya?

¹⁶ Baka di Gadu salufu sama anga en santa yeye aini a ten fu den apostel, neen a peleikiwooko bigin go a fesi. A ten di apostel Pawlesi sikiifi a biifi gi den Kolosesama  aini a yali 61, a be taki a peleiki „gi ala sama a goontapu” (Kol. 1:23). Dati wani taki a bun nyunsu be peleiki na ala den pisi fu goontapu pe Pawlesi anga den taa Kelesten be man doo. Aini a ten ya a santa yeye fu Yehofa yeepi u fu peleiki „te a den moo faawe peesi fu goontapu”.​—Toli 13:47; luku a faki „ Mi o gi ala sowtu sama a yeye fu mi”.

17. Fa wi e fusutan a polofeititoli fu den makonkon aini a buku Yoweli nownow?

¹⁷ Nownow wi e fusutan a polofeititoli di sikiifi aini Yoweli 2:7-9 moo bun. U kon fusutan taki a ná fu a peleikiwooko den vers ya e taki, ma a den suudati fu Babilon di be kon feti anga Yelusalem aini 607 Fosi Kelestesi den e taki.

18. San á kengi?

¹⁸ A tuu taki a fasi fa wi e fusutan a polofeititoli aini Yoweli 2:7-9 kengi, ma a faya di wi abi gi a peleikiwooko nai kengi. A foluku fu Yehofa e tan peleiki a bun nyunsu na ala se. Na ala sowtu fasi den e peleiki tu (Mat. 24:14). Nawan tiiman poi tapu u fu du a peleikiwooko. Fu di Yehofa e belesi u, meke wi e peleiki a bun nyunsu fu a Kownukondee anga moo faya anga deki-ati. Wi e biibi taki Yehofa o tan yeepi u fu fusutan den polofeititoli fu Beibel. A o yeepi u tu fu fusutan „ala san tuu” na a moo bun ten.​—Yoh. 16:13.