1. San Beibel e leli u fu Yehofa te a abi fu du anga a fasi fa ai si sama?

FA I be o fii efu sama be e kuutu i fu di de á lobi a kololu fi i sikin, fu di de á lobi i fesi, efuso a fasi fa i sikin meke? A á be o switi gi i, ná so noh? Wi e fii bun te u sabi taki Yehofa nai kuutu wi anga san libisama ain e si namo. Di Samuweli be si den boi fu Isai, a á be e si sani enke fa Yehofa be e si sani. Yehofa be taigi Samuweli taki a wan fu den boi fu Isai be o toon kownu fu Islayeli. Ma sowtu wan fu den Yehofa be o teke? Di Samuweli si Eliyab, a moo gaan boi fu Isai a taki: „A ná abi misi, na a salufuwan fu Yehofa taampu neen fesi ya.” Samuweli be fende taki Eliyab be gei wan sama di be sa toon kownu. „Ma Yehofa taigi Samuweli taki: ’Yu á mu luku neen fesi efuso fa a langa, bika á neen mi wani.’” San a sani ya e leli u? Yehofa taigi Samuweli taki: „Libisama e wooko anga san den ain si, ma Yehofa e si san de a wan sama ati.”​—1 Sam. 16:1, 6, 7.

2. Enke fa Yohanisi 7:24 e soi, da saide wi á mu kuutu sama anga san wi e si namo?

² Fu di wi abi sondu meke son yuu wi e kuutu sama sondee fu u sabi den tuutuu. (Leisi Yohanisi 7:24.) Ma wi á poi sabi fa wan sama de tuutuu te u luku en namo. Meke u taki i siki neen i go a dataa. Winsi omen yali a dataa e du a wooko ya kaba, efuso winsi fa a koni, a á poi luku wan sama da a sabi pilisisi san na a siki fi en. A abi fu akisi a sama o langa a siki kaba anga fa ai fii, fosi a o poi taki sowtu siki a sama abi. Son leisi a dataa e sende i go meke fowtow seefi fu luku i sikin ini. Efu a á du a sani de a sa gi i deesi di nai kai anga a siki fi i. A so useefi ná o poi sabi u baala anga sisa tuutuu efu wi e wooko anga san wi e si namo. Ma u mu meke moiti fu fusutan fa den e denki  anga fa den e fii. U mu holi a pakisei taki wi á poi si san de aini wan sama ati, neen meke noiti wi o man fusutan den enke fa Yehofa e fusutan den. Ma tokuso u sa meke moiti fu waka a Yehofa baka. Fa u sa du a sani ya?

3. Fa den toli fu sama aini Beibel ten di wi o luku aini a artikel ya o yeepi u fu waka a Yehofa baka?

³ Fa Yehofa e libi anga den sama di e dini en? Ai aliki den. Ai holi a pakisei fa den kiya anga den sani di e miti den. Boiti dati, ai soi tyali-ati gi den. Meke u luku fa Yehofa du aseefi sani ya gi Yona, Eliya, Hagar, anga Lot, anga fa u sa waka a Yehofa baka.

4. Saide meke a be o taanga gi u fu fitoow Yona baka?

⁴ Fu di wi á sabi Yona bun, meke te u luku san a du, kande wi á be o fitoow en moo. Kande u be o si en enke wan man di taangayesi Yehofa. Yehofa be sende Yona fu a go taigi den sama fu Ninifei taki a o poli a foto. Ma pe fu Yona du san Yehofa sende en, a teke boto fu go a wan hii taa se, fu di a be wani „kibii gi Yehofa” (Yona 1:1-3). Efu a be yu, i be o fitoow Yona da i gi en aseefi wooko baka? Kande yu á be o fitoow en moo. Ma toku Yehofa gi Yona ete wan okasi fu du san a be sende en.​—Yona 3:1, 2.

5. San yu e leli fu Yona, te i luku den sani di a taki di a be begi Yehofa a Yona 2:1, 2, 9?

⁵ Te u luku den sani di Yona taki di a begi Yehofa, a sani ya o yeepi u fu sabi Yona moo bun. (Leisi Yona 2:1, 2, 9.) A musu de taki a omen leisi Yona begi Yehofa. A begi di a begi di a be de aini a fisi bee, e yeepi u fu si taki Yona a be wan bun man. Den sani di a taki aini a begi e soi taki a be abi sakafasi, a be sabi kiyoo. Boiti dati, a be de kabakaba fu aliki Yehofa. Neen meke a nai foondoo wi taki Yehofa á luku a sani di Yona du namo, ma a aliki a begi fi en. A meke a tan wooko enke polofeiti gi en.

6. Saide u mu e aliki bun te taawan e taki?

⁶ Efu u wani aliki bun te taawan e taki, u mu abi sakafasi anga pasensi. Wi o fende dii wini te wi e du a sani ya. A fosiwan, a taki u ná o kuutu sama sosokaali. Du fu tu, a taki wi o sabi fa u baala anga sisa e fii tuutuu. Wi o sabi saide den e du son sani tu. Den sani ya o yeepi u fu fusutan den moo bun. Du fu dii, a taki wi o man yeepi den fu kon si taki den abi wantu  moin manii di den á be sabi taki den be abi. Son leisi a te wan sama taigi wan taawan fa ai fii fosi enseefi e fusutan fa a be e fii tuutuu (Odo 20:5). Wan owluman fu Asiya taki: „Wan leisi mi taki wan sani fosi mi be sabi a fini fu a toli. Mi taigi wan sisa taki a mu meke moiti fu gi moo bun piki a den komakandaa. Bakaten mi kon fusutan taki a bunbun moiti a sisa e meke fu gi piki, bika a nai leisi so bun.” A sani ya e soi taki owluman mu meke moiti fu ’sabi a fini fu wan toli’ fosi den poti taawan a pasi.​—Odo 18:13.

7. San u sa leli fu a fasi fa Yehofa libi anga Eliya?

⁷ Ai taanga gi son baala anga sisa fu taigi taawan fa den e fii, fu di son sani be miti den. A fasi fa son sama kiya e meke ai taanga gi den fu taigi sama fa den e fii tu. Son sama a sen e kisi den. Fa u sa meke a makiliki gi taawan fu taigi u fa den e fii? Pakisei san Yehofa be du di Eliya be e lowe gi Iseibel. A baka omen dei fosi Eliya taigi en Dda di de a hemel fa a be e fii. Yehofa aliki en anga ala en pakisei. Baka dati a gi Eliya taanga-sikin neen a gi en wooko fu du (1 Kow. 19:1-18). Kande a o teke ten fosi wan baala efuso sisa taigi u fa ai fii tuutuu. Ma a te a taigi u fosi wi o man sabi fa ai fii. Efu wi abi pasensi enke Yehofa, a sani ya o meke den baala anga sisa fitoow u. Te den e taigi u fa den e fii, u mu aliki den anga ala u pakisei.

8. Enke fa Genesesi 16:7-13 e soi, da fa Yehofa yeepi Hagar?

⁸ Hagar, a umansaafu fu Salai, be du wan don sani baka di a toon Abalam uman. Di Hagar kon de anga bee, neen a bigin wisiwasi Salai fu di a á be meke pikin. Salai libi ogii anga Hagar te neen a be abi fu lowe (Gen. 16:4-6). Enke libisama kande u be o taki a san Hagar paandi ai koti. Ma a ná so Yehofa be e denki. A sende wan engel fi en go a Hagar. Di a engel miti en, a belesi en. A sani ya be meke Hagar fusutan taki Yehofa be e poti pakisei neen. A be sabi san be e miti en. Neen meke a kai Yehofa a „Gadu di e si ala sani . . . a sama di e si mi”.​—Leisi Genesesi 16:7-13.

9. Saide Gadu soi tyali-ati gi Hagar?

⁹ San Yehofa be sabi fu Hagar? A be si ala san be e miti Hagar (Odo 15:3). Hagar a be wan uman fu Egepte di be e tan anga Hebrewsama. Kande son yuu a be e fii enke sama á be lobi en. Kande a be e pakisei en famii anga pe a be e tan fosi. Boiti dati, Hagar a ná be a wan kodo uman fu Abalam. Fosi, son sama di be e dini Yehofa be e abi moo enke wan uman. Ma a ná a sani ya Yehofa be wani di a meke libisama (Mat. 19:4-6). Neen meke a nai foondoo u taki polobelema be de aini a osufamii fu Abalam. Winsi fa Yehofa á be fende en bun taki Hagar be e soso Salai, tokuso a be sabi fa Hagar be e fii. Neen meke a soi tyali-ati gi en.

10. San u mu du efu u wani sabi u baala anga sisa moo bun?

¹⁰ Te wi e meke moiti fu fusutan u baala anga sisa, wi e soi taki wi e waka a Yehofa baka. Meke moiti fu sabi i baala anga sisa moo bun. Taki anga den fosi a komakandaa bigin, efuso baka a komakandaa. Wooko anga den aini a peleikiwooko. I sa kai den kon nyan wan sani a yu osu tu. Den sani ya o yeepi i fu sabi den moo bun, bika yu o leli nyun sani fu  den. Kande yu o si taki a sisa di i denki á lobi taki anga sama, a sen e kisi en fu taki anga sama. Kande yu o si taki a baala di i be denki e fii enseefi fu di a abi moni, lobi gi sama sani. Kande i kon fusutan tu taki ná pikin moiti a osufamii di lobi kon lati a den komakandaa e meke fu doo ape (Yopu 6:29). A tuu taki wi á wani „gongosa” (1 Tim. 5:13). Ma toku a bun fu sabi son sani fu den baala anga sisa fu u, bika a sani ya o yeepi u fu fusutan den moo bun. A o yeepi u tu fu sabi saide den e du son sani.

11. Saide owluman mu sabi den baala anga sisa bun?

¹¹ Owluman mu sabi den baala anga sisa di de aini den kemeente bun. Luku a toli fu wan kelen-owluman den e kai Artur. En anga wan taa owluman be go luku wan sisa di be e sen. A taki: „Di u go luku en, u kon sabi taki a á langa baka di den toow, neen en man dede. Winsi fa a be taanga gi en, tokuso a yeepi den tu umanpikin fi en fu lobi Yehofa. Te enke now den e dini Yehofa ete. Nownow a sisa ya nai si bun moo. Ai fii booko-saka ala yuu tu. Tokuso a lobi Yehofa anga en hii ati. En biibi taanga tu. A omen sani u leli fu a sisa ya” (Filip. 2:3). A kelen-owluman ya be waka a Yehofa baka. Yehofa sabi den sikapu fi en bun, a sabi san e miti den tu (Ek. 3:7). Te owluman sabi den baala anga sisa bun, den o sabi san na a moo bun fasi fu yeepi den.

12. Sowtu wini wan sisa di e tan a Asiya fende di a meke moiti fu sabi wan sisa aini a kemeente moo bun?

¹² Efu wan baala efuso sisa aini a kemeente abi wan manii di e fuka i, meke moiti fu sabi en moo bun. A sani ya o yeepi i fu fusutan saide ai du son sani. Luku a toli fu wan sisa di e tan a Asiya. A taki: „Wan sisa aini mi kemeente lobi bali te ai taki. Mi be fende taki a manii a sisa ya ná abi meke ai ligei so. Ma di mi anga en wooko aini a peleikiwooko, neen a taigi mi taki a be e yeepi en mma seli fisi a wowoyo. A be gwenti bali taanga fu kai sama fu kon bai den fisi. A sani ya leli mi taki efu mi wani fusutan den baala anga sisa aini a kemeente, mi mu leli sabi den moo bun.” A á makiliki fu kon sabi wan sama bun. A moiti u mu meke fu man du a sani ya. Ma te yu opo yu ati gi taawan enke fa Beibel taki, yu e soi taki yu e waka a Yehofa baka, bika a lobi  „ala sowtu sama”.​—1 Tim. 2:3, 4; 2 Kor. 6:11-13.

13. Enke fa Genesesi 19:15, 16 e soi, da san den engel du di Lot be e daaidaai? Saide den du a sani ya?

¹³ Wan leisi Lot be e daaidaai fu du san Yehofa taigi en, winsi fa a be sa dede. Tu engel go a Lot neen den taigi en anga en osufamii taki den mu komoto aini Sodom. Saide? Den engel taigi en taki: „Wi o poli a peesi ya” (Gen. 19:12, 13). A tamaa mamanten, Lot anga en osufamii be de a osu ete. Winsi fa den engel wasikoi Lot, tokuso a be e „daaidaai” ete. Kande u be o taki a taangayesi Lot abi meke a á be du san Yehofa taigi en. Ma ’tyali be e kisi Yehofa gi Lot’, neen meke den engel kisi Lot anga en osufamii a den ana neen den tyai den go a doose fu a foto.​—Leisi Genesesi 19:15, 16.

14. San a wantu sani di be sa meke Yehofa soi tyali-ati gi Lot?

¹⁴ Yehofa sabi saide a soi tyali-ati gi Lot. Kande Lot be e daaidaai fu komoto aini a foto fu di a be e feele den sama di be e tan a doose fu a foto. Kande Lot be e feele taa sani tu. Wantu peti di be fuu anga taa be de koosube fu Sodom anga Gomora. Kande Lot be sabi a toli fu den tu kownu di be kai go aini den peti ya (Gen. 14:8-12). Lot be abi uman anga pikin tu, neen meke a be musu e booko en ede anga den. Boiti dati, Lot be gudu, kande a be abi wan moin osu aini Sodom (Gen. 13:5, 6). A tuu taki nawan sani á be mu meke Lot daaidaai fu du san Yehofa taki. Toku Yehofa á be luku den fowtu fu Lot namo, ma a be si en enke wan sama „di be e libi a wan letifasi”.​—2 Peit. 2:7, 8.

15. San u mu e du pe fu u kuutu wan sama?

¹⁵ Pe fi i kuutu wan sama, a moo bun fu meke moiti fu fusutan fa ai fii. Wan sisa den e kai Veronica di e tan aini Europa meke moiti fu du a sani ya. A taki: „Ala yuu wan sisa be lobi de masimasi fesi. A á be lobi mumui sama. Son yuu mi be  e feele fu go taki anga en. Ma mi be e pakisei taki: ’Efu a be mi, mi be o wani wan mati.’ Neen meke mi go akisi en fa ai fii. A so a bigin taki anga mi. Now mi e fusutan en moo bun.”

16. Saide u mu e begi Yehofa fu a yeepi u fu soi tyali-ati gi taawan?

¹⁶ A Yehofa wawan too sabi fa wan sama de tuutuu (Odo 15:11). Neen meke u mu akisi en fu yeepi u fu si taawan enke fa ai si den. U mu akisi en tu fu yeepi u fu sabi fa u mu soi tyali-ati gi den. Begi yeepi wan sisa den e kai Anzhela fu soi tyali-ati gi taawan. A taki wan sisa aini en kemeente be kaakeli. Anzhela taki: „A be o moo makiliki fu kuutu a sisa, da mi a mumui en moo. Ma mi akisi Yehofa fu a yeepi mi fu fusutan a sisa.” Yehofa aliki a begi fu Anzhela? A taki: „Mi anga a sisa wooko aini a peleikiwooko. Baka dati u gi toli omen yuu langa. Mi aliki en anga pasensi. Now mi moo lobi en. Mi o tan meke moiti fu e gi en taanga-sikin ala yuu tu.”

17. San u mu tan du?

¹⁷ A ná sama u wani u mu e soi tyali-ati gi, ma u mu du a sani ya gi ala baala anga sisa. Sani e miti ala den leti enke Yona, Eliya, Hagar anga Lot. Son wan fu den a denseefi go suku den sani di tyai polobelema gi den. Ma ala wi e du sani son yuu di e tyai takuu bakapisi gi u bakaten. Neen meke Yehofa wani u soi tyali-ati gi taawan (1 Peit. 3:8). Te wi e du san Yehofa taki, wi o libi na a wan. Neen meke u mu e aliki u baala anga sisa te den e taki, u mu e meke moiti fu kon sabi den moo bun, u mu e soi tyali-ati gi den tu.