Di mi be abi 13 yali, mi á be e fii enke mi anga Yehofa a mati moo. Mi be wani libi enke den pikin a sikoo, bika a be gei enke den be sa du san den wani. Mi be e si enke den weiti fu nda anga mma be ibi tumisi. Mi be e si den weiti di Yehofa poti gi Kelesten enke wan ibi tu. A sani ya be meke a taanga gi mi fu dini Yehofa. Mi be e biibi taki Yehofa de tuutuu, ma mi á be si enke mi anga en a be mati.

Mi be e peleiki soso fu di mi á be wani tyai nen taki mi nai peleiki moo. Mi á be e seeka fosi mi go aini a peleikiwooko, neen meke a be e taanga gi mi fu taki anga sama. Mi á be e abi gobaka anga Beibelsutudi tu. A gei a fu soso mi be e go peleiki. Mi be e akisi miseefi taki: ‘Fa sama e du man peleiki ala wiki? Bika a wooko ya á switi.’

Di mi be abi 17 yali, mi á be wani nda anga mma taki gi mi moo. Neen meke mi paki mi lai, neen mi foloisi go a Australiya.  A be hati nda anga mma di mi foloisi. Winsi fa den be e booko den ede anga mi, toku den á be e si enke mi be sa gwe fika Yehofa.

Ma di mi go a Australiya sani be moo ogii baka. A wawan leisi mi be e go a komakandaa. Mi be e paa anga taa yonkuuwan di á be e dini Yehofa anga den hii ati. U be e go a komakandaa tide, da tamaa u be e go a dansi, diingi sopi te a sai u. A ten de mi be de anga wan futu a waaleiti, anga wan futu a goontapu. Mi á be sabi san mi be wani du anga mi libi.

Wan sani fu tu yali baka di mi go a Australiya, mi miti wan sisa di meke mi go sidon denki mi libi. Mi be e tan anga fo taa sisa di á toow aini wan osu. U be kai a kelen-owluman anga en uman Tamara fu kon tan anga u wan wiki. Tamara be e fika a osu gi toli anga u te en man be go seeka sani gi a kemeente. Mi be lobi en manii. Na ala sowtu toli i be sa gi anga en. Mi be e foondoo taki wan sama di e du so fuu gi Yehofa, be e piisii so.

Te i be luku Tamara i be man si taki ai piisii fu dini Yehofa. A peleikiwooko be e switi gi en. A sani ya be e foondoo mi. Tamara be e piisii fu di a be e dini Yehofa anga en hii ati. Ma mi á be e piisii, bika mi á be e dini en anga mi hii ati. Di mi luku Tamara te a kaba, mi be wani piisii leti enke en. A meke mi pakisei wan sani di sikiifi aini Beibel. Beibel taki Yehofa wani ala ‘u dini anga en piisii’.​—Ps. 100:2.

Mi be wani piisii enke fa Tamara be e piisii. Fu be man du a sani ya, mi be mu kengi wantu sani aini mi libi. A be teke ten, ma mi meke moiti kengi saafisaafi. Mi be bigin seeka fosi mi go a peleikiwooko, mi be e du a yeepi pioniliwooko wawan leisi tu. Mi be e moo peleiki  anga a Beibel. Den sani ya be yeepi mi fu mi á be e senuwe so moo. Mi be kon lobi a peleikiwooko baka. Bakaten mi be e du a yeepi pioniliwooko ala mun.

Mi bigin mosoo anga baala anga sisa di be e dini Yehofa anga piisii. Den sama ya yeepi mi fu poti den moo pelensipali sani a fesi. Mi be bigin leisi Beibel ala dei. Mi be kon moo lobi a peleikiwooko, neen meke mi bigin du a kowownu pioniliwooko. Di mi bigin du den sani ya, mi be e piisii baka fu de aini a kemeente. Mi be e fii taki a ya mi mu de.

Baka wan yali, mi miti wan baala den e kai Alex. A baala ya be abi bun manii. A be lobi Yehofa. A be lobi a peleikiwooko tu. Alex a be wan dinali a ten de. A sigisi yali kaba a be e pionili. Wan pisiten a be go yeepi a Malawi, pe moo peleikiman de fanowdu. Di a be de anda, a be e paa anga wantu zendeling. Den gi en taanga-sikin fu tan poti a dini di ai dini Yehofa a fesi.

Mi anga Alex toow aini 2003. U du a fuuten diniwooko fanafu a ten de te anga now. A omen sani u leli aini den ten di pasa. Ná pikin belesi Yehofa belesi u.

Aini 2009, den baala akisi u fu go enke zendeling a Timor-Leste, wan tabiki di de koosube fu Indonesia. Di u yee a sani ya u dyombo. U be e piisii, ma u be e feele tu, bika wi á be sabi fa sani be o de. Feifi mun baka dati u doo a Dili, a mamafoto fu Indonesia.

A libi be de taa fasi ya. U be mu leli wan taa tongo, u be mu gwenti a nyanyan, anga a fasi fa den sama e libi. Te u be de aini a peleikiwooko, u be e miti  sama di be pooti, omen fu den á be go a sikoo. Te u be e luku den sama, u be e si den takuu bakapisi fu den somen feti di feti aini a kondee. *

A be switi fu peleiki yaaso. Wan leisi mi be miti wan meisyo fu 13 yali den e kai Maria. * En mma be dede wantu yali pasa. A te a langa da a be si en dda, bika a ná anga en a be e tan. Leti enke omen yonkuuwan, Maria á be sabi san a wani du anga en libi. Mi e membee ete fa a be e kee di ai taigi mi fa ai fii. Ma mi á be e fusutan san ai taki, bika mi á be poi taki a tongo fi en bun. Neen meke mi begi Yehofa fu a yeepi mi fu toosutu en. A so mi bigin leisi Beibeltekisi fu gi en taanga-sikin. Baka wantu yali, mi si fa Maria bigin wooko anga den sani di a be e leli. A meke moiti go a fesi te enke dopu. Nownow enseefi e yeepi sama fu kon dini Yehofa. A de aini a osufamii fu Yehofa pe ai fii taki den lobi en.

Yehofa belesi a wooko a Timor-Leste. Winsi fa omen fu den baala anga sisa á de a waaleiti langa, toku son wan fu den e du a pioniliwooko. Son baala a dinali efuso owluman. Taawan e yeepi poti buku aini taa tongo tu. Mi e piisii te mi e yee fa den baala anga sisa ya e singi te u de a komakandaa anga te den e gi piki. Mi e piisii tu te mi e si fa den de koloku anga fa den e go a fesi.

Di u be e tan a Timor-Leste a libi be de taa fasi, ma toku mi be e piisii. Son yuu den wagi di u be e teke fu go a peesi, be e fuu anga sama di be e tyai dee fisi anga guluntu di den be bai a wowoyo. Son leisi te u be e sutudeli anga sama, aini den pikin waan osu fu den u be e sidon. Den osu ya á be sima tu. Son yuu osu-foo be e lon pasa te u be sidon e sutudeli. Winsi fa sani á be makiliki ala yuu, toku mi be e piisii.

Mi e gi nda anga mma daa taki den leli mi fu libi enke fa Yehofa wani. Winsi fa mi á be e dini Yehofa anga mi hii ati wan pisiten, toku den tan yeepi mi. Odo 22:6 á lei. Nda anga mma e poolo te den si fa mi anga Alex e dini Yehofa. Fanafu 2016 neen u bigin anga a kelen wooko na a pisi pe a Australasiya beikantoo e luku.

Son yuu mi e foondoo taki mi á be lobi a peleikiwooko fosi. Nownow ná pikin lobi mi lobi en. Mi kon si taki winsi san e pasa aini u libi, a te wi e dini Yehofa anga u hii ati namo wi o de koloku tuutuu. Den 18 yali di mi anga Alex dini Yehofa makandaa, a den moo piisii ten aini mi libi. A no mi si taki a sani di David be taigi Yehofa a tuu. A be taki: ‘Ala den sama di e kon suku kibii a yu, o piisii. Den o piisii fu teego. . . . Den sama di lobi a nen fi yu o piisii gaan piisii.’​—Ps. 5:11.