1-2. Fa sani be di Yesesi taki den lasiti wowtu fi en fosi a dede?

A BE 14 Nisan fu a yali 33. Sama lei gi Yesesi, den kosi en, den fon mi en, neen den sipikii en a wan ponsu. Ala boo di ai hali, ai fii den sipikii di fasi neen ana anga en futu. Te a mu taki, a moo ogii baka. Ma toku ai taki, bika a wani den bakaman fi en sabi wantu pelensipali sani fosi a dede.

² Meke u poti pakisei a den lasiti sani di Yesesi taki fosi a dede na a ponsu. Wi o luku tu san u sa leli fu den sani di a taki. A so wi o aliki Yesesi enke fa Yehofa taki.​—Mat. 17:5.

3. Sama Yesesi be e taki di a taki: ‘Nda gi den paadon’?

³ San Yesesi be taki? Di den sipikii Yesesi na a ponsu, a begi Yehofa taki: ‘Nda, gi den paadon.’ Sama Yesesi be e begi gi? A taa pisi fu a tekisi e yeepi u fu fusutan sama Yesesi be e taki. A taki: ‘Bika den á sabi san den e du’ (Luk. 23:33, 34). Kande a den suudati fu Rome di be sipikii en na a ponsu a be e begi gi. Den man ya á be sabi sama a Yesesi tuutuu. Ma kande a be e begi gi den taa sama di be e bali taki den mu kii en, bika kande son wan fu den be o toon en disipel bakaten (Toli 2:36-38). Yesesi á be du nawan sani fu sama kii en. Toku a á holi den sama ya na ati (1 Peit. 2:23). Ma a begi Yehofa fu gi den paadon fu a ogii di den du anga en.

4. San u sa leli fu a fasi fa Yesesi be de kabakaba fu gi taawan paadon?

 ⁴ San u sa leli fu a sani di Yesesi taki ya? Leti enke Yesesi u mu e gi taawan paadon (Kol. 3:13). Son sama e libi ogii anga u fu di u nai libi enke den. Son wan fu den sama ya a u famii. Kande den e lei gi u, efuso gi u sen a sama aini. Kande den e poli den buku fu u. Son leisi den e taigi u taki den o du ogii anga wi efu wi á komoto a waaleiti. Te den sani ya e miti i, yu á mu holi den sama ya na ati. Begi Yehofa fu a yeepi den fu denseefi sa si taki a disi na a tuu biibi (Mat. 5:44, 45). Son leisi a nai makiliki fu gi den paadon, moomoo efu den du omen hati sani anga u. Ma efu wi e holi den na ati, a useefi wi e fooseli. Wan sisa taki: ‘Mi kon fusutan taki te mi e gi taawan paadon, a sani de á wani taki mi e si a sani di den du enke wan lawlaw sani. A ná fika mi e fika sama fu waka a mi ede tapu tu. Mi nai holi sama na ati bika a sani de sa tyai siki gi mi’ (Ps. 37:8). Te wi e gi taawan paadon, u nai meke den ogii di den du anga u poli den bun manii fu u.​—Efe. 4:31, 32.

5. San Yesesi paamisi wan fu den ogiiman di den be sipikii neen se? Saide a be poi paamisi en a sani ya?

⁵ San Yesesi be taki? Den be sipikii tu ogiiman a Yesesi se. Den man ya be e soso Yesesi leti enke den taa sama (Mat. 27:44). Ma bakaten wan fu den kon fusutan taki den sani di sama be e taki fu Yesesi a ná be tuu (Luk. 23:40, 41). A man ya be bigin biibi taki Yesesi be o weki baka fu tii enke Kownu. Neen meke a taigi en taki: ‘Yesesi membee mi te i de aini i Kownukondee’ (Luk. 23:42). A man ya soi taki a be e biibi tuutuu taki Yesesi be o toon Kownu wan dei. Yesesi piki en taki: ‘Tuutuu, mi e taigi i tide: Yu o de anga mi aini a paladeisi’ (Luk. 23:43). Yesesi taigi a man taki ‘yu’ o de anga ‘mi’ aini a paladeisi. A sani ya e soi taki a be poti pakisei na a man ya tuutuu. A di Yesesi sabi taki en Dda e gi sama paadon, meke a be poi paamisi a man a sani ya.​—Ps. 103:8.

6. San den sani di Yesesi be taigi a ogiiman e leli u?

⁶ San u sa leli fu a sani di Yesesi taki ya? Yesesi abi denseefi manii fi en Dda (Heb. 1:3). Yehofa de kabakaba fu gi u paadon efu u soi taki den sani di u du e hati u. U mu e biibi tu taki a dede fu Yesesi poi fii u fu sondu (1 Yoh. 1:7). Son sama e si enke Yehofa ná o poi gi den paadon fu den ogii di den du. Efu a so yu e fii, da pakisei a sani ya: Fosi Yesesi dede, a gi wan man paadon di be du wan gaan ogii te den gi en dede sitaafu. Efu Yesesi be gi a man ya paadon, da u sa biibi taki Yehofa de kabakaba fu gi den sama di e meke moiti fu libi enke fa a wani paadon tu.​—Ps. 51:1; 1 Yoh. 2:1, 2.

7. San Yesesi taigi Maliya anga Yohanisi aini Yohanisi 19:26, 27? Saide a taki a sani ya?

⁷ San Yesesi be taki? (Leisi Yohanisi 19:26, 27.) Yesesi be e booko en ede anga en mma, bika a gei enke Yowsefu  be dede kaba a pisiten de. Den taa pikin fu Maliya be sa solugu en. Ma a gei enke nawan fu den baala fu Yesesi be toon en bakaman fosi a dede. Neen meke Yesesi be e booko en ede sama be o yeepi en mma fu tan dini Yehofa. Yohanisi a be wan fu den apostel fu Yesesi. En anga Yesesi a be bun mati. Yesesi be e si den sama di e dini Yehofa makandaa anga en, enke en famii (Mat. 12:46-50). Neen meke Yesesi akisi Yohanisi fu luku en mma gi en, bika a be sabi taki a be o yeepi en fu tan dini Yehofa. A taigi Maliya taki: ‘Mma, luku i boi de!’ Neen a taigi Yohanisi taki: ‘Luku i mma ye!’ Fanafu a dei de, Yohanisi bigin solugu  Maliya enke fa a be o solugu en mma di meke en. A toli ya e soi taki Yesesi be lobi en mma tuutuu. Ai soi tu taki a be e bigi gi en taki Maliya solugu en te a kon bigi. A holibaka gi en tu te enke a dede.

8. San a sani di Yesesi taigi Maliya anga Yohanisi e leli u?

⁸ San u sa leli fu a sani di Yesesi taki ya? Son yuu wi anga den baala anga sisa aini a olikanisâsi e libi bun anga useefi moo den famii fu u. Kande den famii fu wi e libi ogii anga u fu di wi e dini Yehofa. Ma Yesesi paamisi u taki efu wi á gwe fika Yehofa, wi o fende tyaipi famii a waaleiti. Wi o fende dda, mma, baala, sisa, anga pikin di lobi u (Malik. 10:29, 30). Den baala anga sisa di yu o fende aini a olikanisâsi ya lobi Yehofa anga den hii ati, den lobi denseefi tu. Fa yu e fii fu dini Yehofa makandaa anga den sama ya?​—Kol. 3:14; 1 Peit. 2:17.

9. San den sani di Yesesi taki a Mateyesi 27:46 e leli u?

⁹ San Yesesi be taki? Fosi Yesesi boo koti, a bali taanga taki: ‘Mi Gadu, mi Gadu, saide i gwe fika mi?’ (Mat. 27:46) A á sikiifi aini Beibel saide Yesesi taki a sani ya. Ma meke u luku san u sa leli fu a sani di Yesesi be taki ya. Di Yesesi taki a sani ya, a meke a polofeititoli di sikiifi a Psalm 22:1 kon tuu. * A sani di Yesesi taki ya be e soi kiin tu taki Yehofa á be ‘poti wan sikotu lontu en’ Manpikin (Yopu 1:10). Yesesi be fusutan taki en Dda be fika en gi den feyanti fi en fu du san den wani anga en. Sama á de a goontapu di tesi miti enke Yesesi. A sani di a taki ya be e soi tu taki a á be du sani fu sama kii en.

10. San a sani di Yesesi taigi en Dda e leli u?

¹⁰ San u sa leli fu a sani di Yesesi taki ya? A toli fu Yesesi e leli u taki a ná ala yuu Yehofa o kibii u fu sani á miti u. Den sani di e miti u, e moo taanga a biibi fu u. Leti enke fa Yesesi be holidoo te enke a dede, a so useefi mu de kabakaba fu dede fu a biibi fu wi ede (Mat. 16:24, 25). Ma winsi san e miti u, u sa biibi taki Yehofa ná o meke sani miti u du wi á poi tyai (1 Kor. 10:13). Wan taa sani di a toli ya e leli u, a taki leti enke Yesesi, kande sama o du ogii anga u, sondee fu u du wan sani. Den o du a sani ya fu di wi a ná wan pisi fu a goontapu ya (1 Peit. 2:19, 20). Den e buuse u fu di wi e leli sama a tuu (Yoh. 17:14; 1 Peit. 4:15, 16). Yesesi be sabi saide en Dda be fika den feyanti fi en fu du ogii anga en. Ma son leisi, son sama di e dini Yehofa e akisi denseefi saide Yehofa e fika son sani fu miti den (Hab. 1:3). Yehofa e fusutan u. A sabi saide wi e fii so, neen meke ai toosutu u.​—2 Kor. 1:3, 4.

11. Saide Yesesi taki a sani di sikiifi a Yohanisi 19:28?

¹¹ San Yesesi be taki? (Leisi Yohanisi 19:28.) Saide Yesesi taki ‘wataa e kii mi’? A be taki a sani ya fu meke a polofeititoli di sikiifi a Psalm 22:15 kon  tuu. Ape sikiifi taki: ‘Mi ná abi koso moo. Mi kon de enke wan pisi fu wan tokotoko patu di booko a omen pisi. Mi tongo fasi a mi tapu mofu.’ Te i luku ala den sani di miti Yesesi fosi den sipikii en na a ponsu, da na pikin wataa be musu e kii en.

12. San wi e leli fu a sani di Yesesi taki a Yohanisi 19:28?

¹² San u sa leli fu a sani di Yesesi taki ya? Sen á be e kisi Yesesi fu taki fa a be e fii. Kande yu á gwenti taigi sama te yu abi wan sani fanowdu, ma leti enke Yesesi sen á mu e kisi i fu akisi taawan fu yeepi i te i fuka. Kande i yali kon gwe kaba, efuso kande i siki. Son leisi yu o abi fu akisi taawan fu tyai i go a wenkii efuso dataa. Efi yu e fii booko-saka, i sa taki anga wan Kelesten di abi ondoofeni. A fasi fa a o taki anga i sa meke i kisi iseefi baka (Odo 12:25). Den baala anga sisa lobi u, den de kabakaba fu yeepi u te u fuka (Odo 17:17). Ma efu wi á taigi den, den ná o sabi fa wi e fii efuso san wi abi fanowdu.

13. Sowtu pelensipali sani Yesesi du di a holidoo te enke a dede?

¹³ San Yesesi be taki? Di Yesesi de fu dede a bali taki: ‘A kaba.’ A sani ya pasa wan pisiten fu dii yuu bakadina na a 14 Nisan (Yoh. 19:30). Faisi a taki a sani ya, a so en boo koti. A sani di a taki ya e soi taki a du ala san Yehofa be akisi en fu du. Di Yesesi holidoo te enke a dede, a du dii pelensipali sani. A fosiwan, a soi taki Saatan a wan leiman. Yesesi soi taki wan libisama di ná abi sondu poi dini Yehofa winsi san Saatan e du anga en. Du fu tu, a dede fu Yesesi gi wi a okasi fu toon Gadu mati. A di a dede gi u meke wi abi a howpu fu libi fu teego tu. Du fu dii, di Yesesi holidoo te enke a dede, a soi taki a Yehofa abi a leti fu tii. A so a santa a nen fi en Dda.

14. San u mu meke moiti fu du ala dei?

¹⁴ San u sa leli fu a sani di Yesesi taki ya? Na ala dei u mu meke moiti fu wi á gwe fika Yehofa. Baala Maxwell Friend, a wan fu den baala di be e teke fesi na a Gileyad sikoo. Wan leisi a baala ya be holi wan lezing a wan konkelesi. A lezing be e taki fu a dini di u mu dini Yehofa anga u hii ati. A taigi den sama di be de ape taki: ‘San i poi du tide, du en puu, bika yu á sabi efu tamaa yu o de a libi. Neen meke ala dei i mu e libi enke a disi na a lasiti dei di yu abi fu soi Yehofa taki i lobi en tuutuu.’ Efu wi e meke moiti fu du a sani di a baala ya taki, da winsi u be o de fu dede nownow seefi, toku u sa taigi Yehofa taki: ‘Mi du ala san mi be poi fu dini yu anga mi hii ati. Mi du san mi be poi fu soi taki Saatan a wan leiman. Mi du san mi be poi tu fu santa a nen fi i.’

15. Enke fa Lukasi 23:46 e soi, da san Yesesi be sabi?

¹⁵ San Yesesi be taki? (Leisi Lukasi 23:46.) Yesesi taki: ‘Nda, mi libi de aini yu ana ye.’ Yesesi be sabi taki neen Dda wawan be abi a makiti fu weki en baka. A be sabi tu taki winsi san be o pasa, Yehofa be o du san a be paamisi en.

16. San a toli fu a yonkuu baala fu 15 yali e leli u?

¹⁶ San u sa leli fu a sani di Yesesi taki  ya? I mu de kabakaba fu poti i libi aini Yehofa ana. Fu man du a sani ya i mu e ‘fitoow en anga i hii ati’ (Odo 3:5). Luku a toli fu Joshua, wan yonkuu baala fu 15 yali. A be siki wan gaan siki. A á be wani den dataa du sani gi en di be o pasa den weiti fu Yehofa. Fosi a dede a taigi en mma taki: ‘Mma, nownow mi libi de aini Yehofa ana. Mi e biibi taki Yehofa o weki mi baka di a yuu o doo. A sabi san de aini mi ati, a sabi taki mi lobi en.’ * Ala u mu akisi useefi taki: ‘Efu mi be de fu dede, mi be o poi poti mi libi aini Yehofa ana? Mi e biibi taki a o weki mi baka di a yuu o doo?’

17-18. San u leli aini a artikel ya? (Luku a faki ‘ San den lasiti sani di Yesesi taki e leli u?’)

¹⁷ Den lasiti sani di Yesesi taki e leli u wantu pelensipali sani. A membee u taki u mu e gi taawan paadon, da Yehofa seefi o gi u paadon. U si tu taki wi abi tyaipi baala anga sisa di de kabakaba fu yeepi u, ma wi á mu e feele fu taigi den te u fuka. U si taki Yehofa o yeepi u fu holidoo winsi sowtu tesi e miti u. U leli tu taki na ala dei u mu meke moiti fu libi enke fa Yehofa wani, bika wi á sabi on dei wi o dede.

¹⁸ Ná pikin sani Yesesi leli wi anga den sani di a taki di den be sipikii en na a ponsu. Te wi e meke moiti fu du den sani ya, da wi e soi taki wi e aliki Yesesi enke fa Yehofa taigi u.​—Mat. 17:5.