Saide fosi Yesesi dede a taki a sani di David be taki a Psalm 22:1?

Wan fu den lasiti sani di Yesesi taki fosi a dede sikiifi a Mateyesi 27:46. A taki: ‘Mi Gadu, mi Gadu, saide i gwe fika mi?’ Di Yesesi taki a sani ya, a meke a sani di David be taki a Psalm 22:1 kon tuu (Malik. 15:34). Di Yesesi be taki a sani ya, a sani ya á wani taki a á be e biibi Yehofa moo. A á be e fii enke Yehofa be gwe fika en tu. Yesesi be de kabakaba fu dede, bika a be sabi taki a fu a sani ya ede a be kon a goontapu (Mat. 16:21; 20:28). A be sabi taki di a be o de fu dede, Yehofa á be o kibii en moo (Yopu 1:10). Yehofa gi Yesesi a okasi fu soi taki a be o holidoo, winsi san sama be o du anga en fosi den kii en.​—Malikisi 14:35, 36.

Ma saide Yesesi taki den sani ya fosi dede? Wi á sabi pilisisi saide a taki den sani ya, ma wi o luku wantu sani di be sa meke a taki den sani ya. *

Kande a be wani soi taki Yehofa be o gi pasi fu a dede. A Yesesi seefi be mu pai a paiman gi u, neen meke Yehofa á be poi yeepi en. A be mu dede enke fa libisama e dede, a so a be o man fii ala sama.​—Heb. 2:9.

Di Yesesi taki den sani ya, kande a be wani den taa sama di de ape membee den taa sani di sikiifi a Psalm 22. A ten de den  Dyu be gwenti leli den Psalm a ede. Te den be kai wan vers, da den be man membee a hii kapitel fu a Psalm de. Efu a dati Yesesi be abi a pakisei, da a sani ya be o yeepi den bakaman fi en di be de ape fu membee den taa polofeititoli di sikiifi aini a Psalm ya di e taki fu a fasi fa a be o dede (Ps. 22:7, 8, 15, 16, 18, 24). Boiti dati, den lasiti vers fu a Psalm ya e gafa Yehofa enke Kownu fu hii goontapu.​—Ps. 22:27-31.

Kande di Yesesi taki den sani ya, a soi a be wani soi taki a ná ogii a du meke den kii en. Fosi Yesesi dede, a moo hei kuutu-osu fu den Dyu holi wan kuutu, neen den lei gi Yesesi taki a kosi Gadu (Mat. 26:65, 66). Den kon makandaa a gaan neti, neen den suku falisi kotoigi fu lei gi Yesesi (Mat. 26:59; Malik. 14:56-59). Di Yesesi be taki ‘mi Gadu, mi Gadu, saide i gwe fika mi’, kande a be wani soi taki a ná wan ogii a du meke den kii en.

Kande di Yesesi taki den sani ya, a be wani membee den sama di de ape taki Yehofa be gi pasi taki sama be du ogii anga David, ma a sani ya á be wani taki Yehofa á be lobi David moo. A ná lobi David á be lobi Yehofa moo meke a be taki a sani ya. Den sani di David taki baka dati e soi taki a be e biibi taki Yehofa poi yeepi den sama di e dini en. Yehofa be e belesi David tu (Ps. 22:23, 24, 27). Neen meke winsi fa sama be sipikii Yesesi, ‘a Manpikin fu David’ a wan ponsu, toku a sani ya á be wani taki Yehofa á be lobi en moo.​—Mat. 21:9.

Yehofa á be e kibii Yesesi moo, fu di a be mu soi taki a o holibaka gi en Dda te enke a dede. Kande di Yesesi taki ‘mi Gadu, mi Gadu saide i gwe fika mi’, a be wani soi taki sani be e moo en tuutuu fa en Dda á be e kibii en moo. Di Yehofa be meke Yesesi, a á be abi a pakisei taki a be mu pina te enke a dede. A di Adan anga Efa taangayesi Yehofa meke Yesesi be abi fu kon dede gi u. Yesesi á be du nawan ogii, ma a be abi fu pina te enke a dede fu soi taki Saatan a wan leiman. A be abi fu dede tu fu fii libisama fu sondu anga dede (Malik. 8:31; 1 Peit. 2:21-24). Efu Yehofa be e kibii Yesesi ete, a á be o poi du a sani ya.

Kande Yesesi be wani yeepi den bakaman fi en fu fusutan saide Yehofa fika en fu pina te enke a dede. * A ogiiman den be e kii na a fasi fa den be kii Yesesi. Yesesi be sabi taki a sani ya be o meke omen sama á be wani waka neen baka moo (1 Kor. 1:23). Efu den bakaman fi en be holi a pakisei saide a be mu dede, a sani ya be o yeepi den fu poti pakisei na a wini di den be o fende fu a dede fi en (Gal. 3:13, 14). Efu den be poti pakisei na a sani de, den á be o si Yesesi enke wan ogiiman, ma den be o si en enke a sama di fii den fu sondu anga dede.

Wi á sabi pilisisi saide Yesesi be taki den sani ya, ma a be sabi taki a fa Yehofa be wani, sani waka a dei de. Baka di Yesesi taki den sani di sikiifi aini Psalm, a taki: ‘A kaba’ (Yoh. 19:30; Luk. 22:37). A di Yehofa á be kibii Yesesi moo, meke a be man du ala san a be kon du a goontapu ya. Di a dede a meke ‘ala den sani di a Weiti fu Mosesi, den Polofeiti anga den sani di den Psalm taki kon tuu’.​—Luk. 24:44.