1-2. Fa u sa waka a Yesesi baka? Sowtu ageisitoli e yeepi u fu fusutan a sani ya moo bun?

MEKE u taki yu anga wan kulu sama e waka aini wan busi pe ogii sa miti u. Eisi kai tapu a peesi pe u mu waka. Ma wan sama di sabi a peesi bun e waka a u fesi. Wi e si den futu maiki fi en a pe a waka pasa. Te a daai wan uku, kande u nai si en moo, toku u nai buuya bika wi e si den futu maiki fi en. Yu e meke moiti fu waka pilisisi a pe a waka pasa.

² A goontapu ya de enke wan busi pe ala sowtu ogii sa miti u. Kelesten de enke wan kulu sama di e waka pasa aini a busi ya. Ma Yehofa gi wi a moo bun sama di sa tyai u pasa aini a busi ya fu sani á miti u. A sama ya neen Manpikin, Yesesi Kelestesi (1 Peit. 2:21). Peitilisi be taki Yesesi de enke wan sama di e tyai wan kulu sama go a wan peesi. Leti enke fa den sama di e waka na a fesiman baka e si pe a waka pasa, a so useefi e si pe Yesesi waka pasa di a be de a goontapu. Meke u luku san a wani taki fu waka a Yesesi baka, saide u mu waka a Yesesi baka, anga fa u sa waka neen baka.

3. San a wani taki fu waka a wan sama baka?

³ San a wani taki fu waka a wan sama baka? Fu waka a wan sama baka, wani taki wi e tyai useefi enke a sama (Gen. 6:9; Odo 4:26). A fasi fa wan sama be e du sani di a be de a libi, de enke futu maiki di a fika a baka. Te yu e waka a sowan sama baka, a leti enke yu e poti futu, a pe  a puu futu. Dati wani taki yu e luku fa a sama be libi, da yu e meke moiti fu libi so tu.

4. San a wani taki fu waka a Yesesi baka?

⁴ San a wani taki fu waka a Yesesi baka? A sani ya wani taki u mu du sani enke fa Yesesi be e du sani. Aini a tekisi di e holibaka gi a artikel ya, apostel Peitilisi soi u fa u sa waka a Yesesi baka te u luku fa a holidoo di tesi be miti en. Ma a ná te tesi e miti u namo u sa waka a Yesesi baka (1 Peit. 2:18-25). U sa waka a Yesesi baka tu te u luku a fasi fa a be e libi, den sani di a be e taki, anga den sani di a be e du.

5. Sondu libisama poi waka a Yesesi baka?

⁵ I si enke sondu libisama poi waka a Yesesi baka? Eeye u poi. U ná o poi du sani pilisisi enke en, ma u sa meke moiti. Te wi e meke moiti fu du sani enke Yesesi, wi e soi taki wi e du san apostel Yohanisi be taki. A be taki u mu e ‘du sani enke fa Kelestesi be e du sani’.​—1 Yoh. 2:6.

6-7. Saide wi anga Yehofa o toon moo bun mati te wi e waka a Yesesi baka?

⁶ Te wi e waka a Yesesi baka, wi anga Yehofa e toon moo bun mati. Saide u sa taki a sani ya? We, Yesesi soi u fa u mu libi efu u wani Yehofa lobi u (Yoh. 8:29). Neen meke te wi e waka a Yesesi baka, wi e meke Yehofa piisii. Efu wi e meke moiti fu toon Yehofa mati, noiti a o gwe fika u.​—Yak. 4:8.

⁷ Wan taa sani, a taki Yesesi be e du sani enke en Dda. Neen meke a be taki: ‘A sama di si mi, si a Dda tu’ (Yoh. 14:9). U sa waka a Yesesi baka te u luku den manii fi en, anga fa a be e libi anga taawan.  Tyali be e kisi Yesesi te sani be e miti sama. Na a sani ya meke a be deesi wan kokobeman anga wan uman di be siki omen yali langa. Tyali be e kisi en tu te a be e si fa sama e kee te wan sama fu den be dede. A denseefi manii ya Yehofa abi, neen meke te wi e waka a Yesesi baka, a Yehofa baka wi e waka tu (Malik. 1:40, 41; 5:25-34; Yoh. 11:33-35). Moo wi e du sani enke Yehofa, moo wi anga en o toon mati.

8. Fa a waka di wi o waka a Yesesi baka o yeepi u fu ‘wini goontapu’?

⁸ Te wi e waka a Yesesi baka, a ogii goontapu ya ná o poi tapu u fu dini Yehofa. A neti fosi den kii Yesesi a be taki: ‘Mi wini goontapu’ (Yoh. 16:33). A sani ya wani taki Yesesi á be meke a fasi fa den sama fu a goontapu ya e denki anga den sani di den e du, puu en pakisei na a wooko di Yehofa be gi en. Ala yuu a be e holi a pakisei taki a be kon a goontapu fu yeepi santa a nen fu Yehofa. Aini a ten ya sani lai di sa puu u pakisei na a dini di wi e dini Yehofa. Ma efu wi á meke den sani ya puu u pakisei, da leti enke Yesesi useefi o ‘wini a goontapu’.​—1 Yoh. 5:5.

9. San u mu du efu u wani fende a teego libi?

⁹ Efu wi e waka a Yesesi baka, wi o fende a teego libi. Wan leisi, wan gudu yonkuman be akisi Yesesi san a mu du fu fende a teego libi. Yesesi taigi en taki: ‘Kon toon mi bakaman’ (Mat. 19:16-21). Son wan fu den Dyu á be e biibi taki Yesesi na a Kelestesi. Ma Yesesi be taigi den Dyu ya taki: ‘Den sikapu fu mi e waka a mi baka, mi o gi den a teego libi’ (Yoh. 10:24-29). Nikodeimesi, wan man di be e wooko na a Gaan kuutu osu fu den Dyu, be wani sabi moo fu den sani di Yesesi be e leli. Neen meke Yesesi taigi en taki ‘den sama di e biibi en be o fende a teego libi’ (Yoh. 3:16). Wi e soi taki wi e biibi Yesesi, te wi e meke moiti fu waka neen baka. Efu wi e du san Yesesi leli u, wi o fende a teego libi.​—Mat. 7:14.

10. San u mu du efu u wani sabi Yesesi moo bun? (Yohanisi 17:3)

¹⁰ Efu u wani waka a Yesesi baka, u mu sabi en bun fosi. (Leisi Yohanisi 17:3.) Wi á poi du a sani ya aini wan dei. Winsi u sabi wantu sani fu Yesesi kaba, toku u mu tan meke moiti fu sabi en moo bun. U mu sabi den manii fi en. U mu sabi san a lobi anga san a á lobi. Winsi a omen ten u de a waaleiti kaba, toku na ala yuu u mu e meke moiti fu kon sabi Yehofa anga Yesesi moo bun.

11. Fu san den Beibel buku Mateyesi, Malikisi, Lukasi anga Yohanisi e taki?

¹¹ Yehofa wani u sabi a Manpikin fi en,  neen meke a meke sama sikiifi den fo Beibel buku di e taki fu a libi fu Yesesi, anga a fasi fa a be e du a peleikiwooko. Den buku ya e taigi u san Yesesi be e taki, san a be e du, anga fa a be e fii (Heb. 12:3). Den buku ya e yeepi u fu sabi Yesesi moo bun, fu u sa waka neen baka.

12. Fa u sa fende wini fu den Beibel buku Mateyesi, Malikisi, Lukasi anga Yohanisi?

¹² Efu u wani fende wini fu den sani di sikiifi aini Mateyesi, Malikisi, Lukasi anga Yohanisi, wi á mu e leisi den namo, ma u mu teke ten pakisei san den buku ya e leli u tu. (Luku Yowsuwa 1:8 tu.) Meke u luku tu sani di o yeepi u fu fusutan san wi e leisi, anga fa u sa wooko anga den sani ya.

13. San o yeepi i fu si den sani di sikiifi aini den buku di e taki fu a libi fu Yesesi enke sani di be pasa tuutuu?

¹³ A fosi sani di i mu du te yu e leisi den buku ya: Du enke i be de ape di den sani di sikiifi aini be e pasa. Puubei fu si san be e pasa, du enke yu e yee den sani di den sama be e yee, meke moiti fu fii fa den be e fii. Fu man du a sani ya, i mu sabi a toli bun. Neen meke a bun fu wooko anga den sani di a olikanisâsi seeka gi u fu ondoosuku Beibel moo fini. Efi i wani fusutan a hii toli, i mu leisi den taa tekisi di e taki fu a toli ya. Luku efi i sa fende sani di e soi fa den sama di kai aini a toli kiya, efuso fa sani be de na a pisi pe den be e tan. Son leisi wan fu den buku di e taki fu Yesesi, e taki fu wan toli di á de aini den taa dii buku. Son wan e taki sani pikinso taa fasi. Te wi ondoosuku ala den fo buku ya, wi o fusutan a hii toli moo bun.

14-15. Fa u sa wooko anga den sani di sikiifi aini den fo Beibel buku di e taki fu a libi fu Yesesi?

¹⁴ Du fu tu sani di i mu du: Luku fa i sa wooko anga san i leli (Yoh. 13:17). Baka te i sutudeli wan fu den fo buku di e taki  fu a libi fu Yesesi, a bun fu akisi iseefi taki: ‘Wan sani de aini a pisi ya di mi sa wooko anga en? Fa mi sa yeepi taa sama anga den sani di mi leli ya?’ Efi i sabi wan sama di i sa yeepi anga a sani di i leli, luku wan bun yuu, da i go taki anga en.

¹⁵ Meke u luku fa u sa du den tu sani ya. Wi o luku a toli fu a pooti uman di be kon na a tempel.

16. Te i leisi Malikisi 12:41, da fa sani be waka aini a tempel a dei de?

¹⁶ Du enke i be de ape. (Leisi Malikisi 12:41.) Pakisei fa sani be waka na a 11 Nisan fu a yali 33. A wantu dei namo be fika fosi sama kii Yesesi. Na ala yuu Yesesi e de aini a tempel e leli sama. Den keliki fesiman e du ala san den poi fu tapu en. Wantu fu den akisi en sama gi en a leti fu du den sani di ai du. Den e poti akisi gi en tu di den be si enke a á be o poi piki (Malik. 11:27-33; 12:13-34). Baka dati, Yesesi go luku fa sani e waka a den taa pisi fu a tempel. A gei enke na a pisi di den e kai a Fesi-dyali fu den umansama a be de, bika a be e si a moni kedee na a pisi pe a be de. Yesesi sidon e luku fa den sama e poti moni aini a moni kedee. A si fa omen guduman kon poti moni aini a kedee. Kande ai yee fa den moni e kai kengelenkengelen go aini a kedee.

17. San a pooti uman di sikiifi a Malikisi 12:42 du?

¹⁷ Leisi Malikisi 12:42. Di Yesesi e luku fa sama e poti moni aini a kedee, a si ‘wan pooti uman’ di man be dede kaba (Luk. 21:2). A uman ya ná abi moni sai seefi fu bai den sani di a abi fanowdu fu solugu enseefi. Toku a waka go a wan fu den kedee, neen a poti tu kopoo sensi aini. Den moni ya be feke te, kande yu á be o yee seefi fa den e kai go aini a kedee. Yesesi sabi omen moni a uman ya poti. Den tu kopoo sensi di a uman poti, a be a moo lagi moni di be de a pisiten de. Den á be sai seefi fu bai wan fu den moo bunkopu pikin foo di sama be e seli.

18. Enke fa Malikisi 12:43, 44 e soi, da san Yesesi taki fu a sani di a pooti uman du?

¹⁸ Leisi Malikisi 12:43, 44. Yesesi be si a sani di a uman ya du enke wan gaan sani. Neen meke a kai den disipel fi en, a soi den a uman, neen a taigi den taki: ‘A pooti uman ya, poti moo ala den taa sama di e poti moni aini a moni kedee.’ Saide a taki a so? A taigi den taki: ‘Den taa sama a san fika den poti aini a kedee, ma a uman ya na ala san a be abi fu solugu enseefi a poti, winsi fa a pooti.’ Di a uman ya poti a lasiti moni fi en aini a kedee, a soi taki ai biibi taki Yehofa o solugu en.​—Ps. 26:3.

19. San den sani di Yesesi taki fu a pooti uman e leli u?

¹⁹ Meke moiti fu du san i leli. Akisi iseefi taki: ‘San den sani di Yesesi taki fu a pooti uman e leli mi?’ Pakisei fa a uman ya be e fii. A be sa wani gi Yehofa moo enke tu kopoo sensi. Ma winsi fa a moni fi en á be ipi, toku na ala san a be abi a gi Yehofa. Yesesi be sabi taki en Dda be teke a sani di a uman ya du fu bigi. A sani ya e leli u taki Yehofa e teke en fu bigi te wi e gi en den moo bun sani di wi abi. Ai bigi gi en te wi e dini en anga u hii ati (Mat. 22:37; Kol. 3:23). Yehofa e piisii te wi e du ala san u poi aini a peleikiwooko, anga te wi e go a den komakandaa ala yuu.

20. Fa i sa wooko anga a sani di a toli fu a pooti uman leli u?

 ²⁰ Fa i sa wooko anga a sani di i leli fu a toli fu a pooti uman? Pakisei wantu sama di i sa gi taanga-sikin fu di den á poi du ala san den be sa wani gi Yehofa. Kande i sabi wan gaandi sisa di e fii enke a ná abi fa, fu di a á poi wooko taanga enke fosi moo. Kande i sabi wan baala di nai poi kon na ala den komakandaa fu di a abi wan siki di e fooseli en. I sa gi den sama ya ‘taanga sikin’ (Efe. 4:29). Soi den san a toli fu a pooti uman e leli u. Membee den taki Yehofa e teke en fu bigi kaba te den e du ala san den poi, winsi fa a nyoni (Odo 15:23; 1 Tes. 5:11). Te yu e gafa taawan fu den sani di den e du gi Yehofa, yu e soi taki yu e waka a Yesesi baka.

21. San i de kabakaba fu du?

²¹ Ai bigi gi u taki den Beibel buku Mateyesi, Malikisi, Lukasi anga Yohanisi e taigi wi omen sani fu a libi fu Yesesi. Den sani ya e yeepi u fu sabi Yesesi moo bun, fu u sa waka neen baka. I sa taki fu den buku ya na a osufamii anbegi. I wawan sa sutudeli den tu. Efi i wani fende wini te yu e sutudeli, i mu puubei fu si fa den toli di yu e leisi be pasa tuutuu, da i meke moiti du san i leli. Ma a ná den sani di Yesesi be e du namo u mu du, u mu du den sani di a be taki tu. Aini a taa artikel wi o luku san u sa leli fu wantu sani di Yesesi be taki di a be de a goontapu ya.