1. San Yehofa e si te ai luku a foluku fi en?

YEHOFA Gadu ‘e piisii anga a foluku fi en’ (Ps. 149:4). A sabi di u sabi a sani ya e meke u fii bun. Yehofa e si den bun manii fu u te ai luku u, neen meke a wani u toon en mati. Efu u nai gwe fika Yehofa, enseefi ná o gwe fika u.​—Yoh. 6:44.

2. Saide ai taanga gi son sama fu biibi taki Yehofa lobi den?

² Son sama e taki: ‘Mi sabi taki Yehofa lobi a foluku fi en, ma ai poti pakisei a mi tu?’ Saide son sama e akisi denseefi a sani ya? Wan sisa den e kai Oksana * taki: ‘A omen sani miti mi di mi be yonkuu. Baka di mi dopu, mi bigin pionili, mi be e piisii. Ma baka 15 yali, mi be bigin pakisei den sani di be miti mi. Mi be kon e fii enke mi á bun sai fu Yehofa lobi mi.’ Yuwa, wan taa pionili sisa di be miti omen sani di a be yonkuu taki: ‘Mi dopu fu di mi be wani meke Yehofa piisii. Ma mi be e si enke noiti Yehofa be o poi lobi mi.’

3. San wi o luku aini a artikel ya?

³ Kande leti enke den tu sisa ya, i lobi Yehofa, ma yu e fii enke Yehofa á lobi i. Saide i mu e biibi taki Yehofa lobi i tuutuu? San o yeepi i te yu e fii enke Yehofa  á lobi i? Wi o luku den akisi ya aini a artikel ya.

4. San sa pasa te u nai biibi taki Yehofa lobi u?

⁴ Lobi e taanga u. Neen meke efu wi e biibi taki Yehofa lobi u, wi o du ala san u man fu dini en anga u hii ati winsi san e miti u (Odo 24:10). Ma efi yu e fii enke Yehofa á lobi i, a sani ya sa meke Saatan fende i koli fu du sani di Yehofa e buuse.​—Efe. 6:16.

5. San pasa anga son Kelesten aini a ten ya fu di den be e fii enke Yehofa á lobi den?

⁵ Son Kelesten aini a ten ya biibi be kon swaki, fu di den be e fii enke Yehofa á lobi den. Wan owluman den e kai James taki: ‘Mi be e wooko a Betel, mi be e yeepi aini wan kemeente pe den e taki wan taa tongo tu, toku mi be e fii enke Yehofa á lobi mi. Wan pisiten mi be e fii enke Yehofa á be e aliki den begi fu mi seefi.’ Eva, wan sisa di e du a fuuten diniwooko taki: ‘Mi kon si taki te yu e fii enke Yehofa á lobi i, a sani ya sa meke i nai dini en anga piisii moo.’ Michael, wan owluman di e du a pionili wooko taki: ‘Efi i nai biibi taki Yehofa lobi i, yu o gwe fika en saafisaafi.’

6. San u mu du te wi e fii enke Yehofa á lobi u?

⁶ Den toli ya e soi u san sa pasa te wi e fii enke Yehofa á lobi u. San u mu du te wi e fii so? U mu meke moiti wantenwanten fu puu den pakisei ya aini wi ati. Akisi Yehofa fu a gi yu a freide fi en di o yeepi i fu pakisei sani di bun (Ps. 139:23; Filip. 4:6, 7). Holi a pakisei tu taki a nai wawan e fii so. A omen baala anga sisa di e dini Yehofa anga den hii ati e fii so tu son leisi. A omen fu den sama di be e dini Yehofa a fositen be abi aseefi polobelema ya. Meke u luku san u sa leli fu apostel Pawlesi.

7. Sowtu polobelema Pawlesi be abi?

⁷ Kande son leisi yu e fii enke yu á poi tyai ala den faantiwowtu fi i. A so  Pawlesi be e fii tu. Pawlesi be e booko en ede anga ala den kemeente (2 Kor. 11:23-28). Yu abi wan siki di dataa á poi deesi? Kande a sani ya e meke i nai piisii moo. Beibel taki Pawlesi be abi ‘wan maka aini en sikin’. Kande a maka ya a be wan siki di á be poi deesi. A omen leisi Pawlesi begi Yehofa fu puu a maka ya gi en (2 Kor. 12:7-10). Kande a den swakifasi fi yu e meke i fii booko-saka son yuu. Efu a so, a nai wawan a sani ya e miti. Den swakifasi fu Pawlesi be e meke a fii booko-saka son yuu tu.​—Rom. 7:21-24.

8. San yeepi Pawlesi fu tan dini Yehofa winsi fa a be lai booko-ede?

⁸ Winsi fa Pawlesi be lai booko-ede, toku a tan dini Yehofa. San be yeepi en fu du a sani ya? Winsi fa Pawlesi be abi swakifasi, toku a be sabi taki na ala sama Yesesi dede gi. A be sabi taki ‘ala sama di e biibi Yehofa anga Yesesi, be sa fende a teego libi’ (Yoh. 3:16; Rom. 6:23). Pawlesi be e biibi taki winsi sowtu sondu wan sama du, Yehofa o gi en paadon efu a soi taki a sani di a du e hati en.​—Ps. 86:5.

9. San a sani di Pawlesi taki a Galasiyasama 2:20 e leli u?

⁹ Pawlesi be e biibi taki Yehofa lobi en, bika a be sende en Manpikin kon dede gi en. (Leisi Galasiyasama 2:20.) Luku san Pawlesi taki na a kaba pisi fu a tekisi ya. A taki: ‘A Manpikin fu Gadu lobi mi, a kon dede gi mi.’ Pawlesi á taki Gadu be o lobi son sama moo taawan. A be taigi den Romesama taki: ‘Gadu soi u taki a lobi u fu di a meke Kelestesi dede gi wi aladi u be de sondu sama ete’ (Rom. 5:8). Sani á de di poi tapu Gadu fu lobi u.

10. San den sani di sikiifi a Romesama 8:38, 39 e leli u?

¹⁰ Leisi Romesama 8:38, 39. Pawlesi be e biibi anga en hii ati taki Gadu lobi en. A be taki ‘sani á de di poi tapu Gadu fu lobi u’. Pawlesi be sabi fa Yehofa be pasensi anga den Islayelisama, winsi fa den be e taangayesi en ala yuu baka. A be sabi tu taki a di Gadu soi bun-ati gi en meke a be poi toon wan Kelesten. Kande Pawlesi be e pakisei taki: ‘Efu Yehofa sende en wan kodo Manpikin kon dede gi mi, da a ná abi misi, a lobi mi tuutuu.’​—Rom. 8:32.

11. Saide Pawlesi be e biibi taki Gadu lobi en, winsi fa a be du den sani di sikiifi a 1 Timotiyesi 1:12-15?

 ¹¹ Leisi 1 Timotiyesi 1:12-15. Son leisi Pawlesi be musu e pakisei den sani di a be du fosi a toon wan Kelesten. Pawlesi taki fu ala den sama di de a goontapu, sama á sondu enke en. Saide a be taki a sani ya? Fosi Pawlesi be toon wan Kelesten, a be e du ogii anga den bakaman fu Yesesi. A be e poti son wan fu den a sitaafu-osu, taawan a be e tyai go a kuutu fu sama kii den (Toli 26:10, 11). Fa i denki Pawlesi be e fii te a be miti den pikin fu den Kelesten di a be meke sama kii? A be e hati Pawlesi taki a be du den sani ya, ma a be sabi tu taki a á be poi kengi san pasa kaba. A be e biibi taki Kelestesi dede gi en tu, winsi san a be du a fesi. Neen meke a be taki: ‘A di Gadu soi mi bun-ati meke mi de enke fa mi de nownow’ (1 Kor. 15:3, 10). San a toli ya e leli u? I mu e biibi taki Kelestesi dede gi yu, fi yu anga Yehofa sa toon mati (Toli 3:19). Yehofa nai luku sowtu fowtu i be meke, ma ai poti pakisei a san yu e du nownow, anga san yu o du aini a ten di e kon.​—Yes. 1:18.

12. Fa den sani di sikiifi a 1 Yohanisi 3:19, sa yeepi u te wi e fii enke wi á bun?

¹² Kande yu e fii enke yu á bun sai fu fende wini fu a dede di Yesesi kon dede gi u. Son leisi wi e fii so fu di wi ati e koli u. Ai meke u fii enke wi á bun. (Leisi 1 Yohanisi 3:19, 20.) Te wi e fii so, u mu holi a pakisei taki ‘Gadu bigi moo wi ati’. A lobi di Yehofa lobi u, sa yeepi u fu puu ala den takuu pakisei di de aini wi ati. U mu meke moiti fu si  useefi enke fa Yehofa e si u. Den sani di o yeepi fu du a sani ya, a te wi e sutudeli, te wi e begi, anga te wi e paa anga sama di lobi Yehofa. Saide den sani ya pelensipali?

13. Fa a sutudeli di wi o sutudeli Gadu Wowtu sa yeepi u? (Luku a faki ‘ Fa a Wowtu fu Gadu yeepi den?’)

¹³ Te yu e sutudeli Beibel ala dei, yu o kon sabi Yehofa moo bun. A sani ya o yeepi i fu si taki Yehofa e booko en ede anga i, a lobi i (2 Tim. 3:16). Kevin, wan owluman di be e fii enke a á bun sai fu Yehofa lobi en, taki: ‘Di mi teke ten pakisei a sani di sikiifi a Psalm 103, a yeepi mi fu si miseefi enke fa Yehofa e si mi.’ Eva, di u be taki fi en na a bigin taki: ‘Ala dei fosi mi go didon, mi e teke ten pakisei den manii fu Yehofa. A sani ya e taanga mi biibi, ai meke mi piisii.’

14. Fa begi e yeepi u?

¹⁴ Begi ala yuu (1 Tes. 5:17). Efi i wani meke mati anga wan sama, i mu e taki anga en ala yuu. I mu e taigi en fa yu e fii tu. A so a de anga Yehofa tu. Te wi e taigi en fa wi e fii, fa wi e denki, anga san a den booko-ede fu u, wi e soi taki wi e biibi taki a lobi u (Ps. 94:17-19; 1 Yoh. 5:14, 15). Yuwa, di u be taki fi en na a bigin taki: ‘Te mi e begi, mi nai taigi Yehofa namo san mi du a dei de, ma mi e taigi en fa mi e fii tu. A sani ya yeepi mi fu bigin si Yehofa enke wan Dda di lobi den pikin fi en.’​—Luku a faki ‘I leisi en kaba?’

15. Fa Yehofa e soi taki ai booko en ede anga u?

¹⁵ Paa anga sama di lobi Yehofa. Den mati fu u di lobi Yehofa de enke wan kado di a gi u (Yak. 1:17). Fu di Yehofa e booko en ede anga u, meke a gi u baala anga sisa di lobi u (Odo 17:17). Aini a biifi di Pawlesi be sende gi den Kelesten a Kolose, a be taki wantu baala anga sisa be e holibaka gi en. A taki a den be ‘toosutu en’ di sani be e taanga gi en (Kol. 4:10, 11). Yesesi seefi be e teke en fu bigi te taawan be e yeepi en efuso gi en taanga-sikin, winsi a be engel efuso libisama.​—Luk. 22:28, 43.

16. Fa mati di lobi Yehofa sa yeepi u fu wi á gwe fika en?

¹⁶ Yu abi mati aini a kemeente? Te yu e taigi den mati fi i san a den booko-ede fi i, a sani ya sa yeepi i fu kisi iseefi baka. James di u be taki fi en kaba taki: ‘A meke di mi meke mati anga Kelesten di abi ondoofeni, yeepi mi fu tan  dini Yehofa. Te mi e pakisei sani di e meke mi fii booko-saka, den mati ya e aliki mi anga pasensi. Den e soi mi taki den lobi mi. A fasi fa den e libi anga mi e soi mi taki Yehofa lobi mi tuutuu.’ Ala u mu suku mati aini a kemeente di lobi Yehofa.

17-18. Sama u mu biibi? Saide neen u mu biibi en?

¹⁷ Saatan wani u du sani di Yehofa á lobi. A wani u fii enke Yehofa á lobi, u efuso taki a nai booko en ede anga u. Ma a sani ya a ná tuu.

¹⁸ Yehofa lobi i, ai si yu enke wan gudu. Efi yu e meke moiti fu du san Yehofa taki, ‘a o lobi yu ala yuu’ leti enke fa a lobi Yesesi (Yoh. 15:10). Ná meke Saatan koli i taki Yehofa á lobi i. Te yu ati e kuutu i, holi a pakisei taki Yehofa bigi moo yu ati. Neen meke i mu meke moiti fu si iseefi enke fa Yehofa e si i. I sa biibi taki Yehofa e ‘piisii anga a foluku fi en’, ai piisii anga i tu.