‘Den Kotoigi a á be e libi switi anga mi wawan, ma den be e libi switi anga den dagu fu mi tu. Wan leisi Elaine, a sisa di be e taampu na a wagi, gi den tu dagu fu mi kuku fu nyan. Baka dati, solanga u be e pasa de, den dagu be e wani go koosube fu den Kotoigi fu go suku kuku baka.’

‘A omen mun den du a sani ya. A ten de mi be e taki anga den Kotoigi, ma mi á be e taki langa anga den, bika mi á be sabi san den e biibi. A 70 yali mi be abi, ma mi á be e go a keliki moo bika mi á be lobi den sani di den be e leli sama. Neen meke mi be si enke a be o moo bun fu miseefi sutudeli Beibel.

‘A omen taa peesi aini a foto mi be e si den Kotoigi anga den pikin wagi fu den. Ala den be e taki switi anga sama. Te mi be akisi den wan sani, den be e soi mi san Beibel e taki. A sani ya be meke mi moo fitoow den.

‘Wan dei, Elaine akisi mi taki: ‘I sabi taki den meti a wan kado di Gadu gi u?’ Mi piki en taki: ‘Eeye.’ Baka dati a leisi Yesaya 11:6-9 gi mi. A tekisi ya kengi a fasi fa mi be e denki, ma toku mi be e daaidaai ete fu teke den buku fu den.

‘Elaine anga en man Brent be lobi taki anga mi fu sani di mi be wani sabi senten. Wan leisi den taigi mi taki efu mi wani sabi san a wani taki fu de wan bakaman fu Yesesi, mi mu leisi Mateyesi te anga Toli fu den apostel. Di mi go a osu, mi go leisi den Beibel buku ya. A á langa baka dati neen Elaine anga Brent bigin sutudeli Beibel anga mi. A sani ya pasa aini a yali 2016.

‘Mi be lobi a sutudeli di u be e sutudeli. Mi be lobi go a den komakandaa tu. Mi be e piisii taki mi kon sabi san Beibel e leli tuutuu. Mi dopu wan sani fu wan yali baka di mi bigin sutudeli. Nownow a 79 yali mi abi, ma mi sabi taki mi fende a tuu biibi. Yehofa yeepi mi fu kon aini a osufamii fi en.’