1. San e meke u piisii?

 YEHOFA wani u piisii. Fa u du sabi a sani ya? Bika piisii a wan fu den manii di a yeye fu Gadu e meke sama abi (Gal. 5:22). Beibel taki wi e piisii te wi e gi sama sani, neen meke wi e piisii te wi e du ala san u poi gi Yehofa, anga te wi e yeepi den baala anga sisa.​—Toli 20:35.

2-3. (a) Enke fa Galasiyasama 6:4 e soi, da san a tu sani di o meke u piisii te wi e wooko gi Yehofa? (b) San wi o luku aini a artikel ya?

² Pawlesi be kai tu sani a Galasiyasama 6:4 di o yeepi u fu piisii te wi e wooko gi Yehofa. (Leisi en.) A fosi sani, a taki u mu du ala san u poi gi Yehofa. U mu e piisii te wi e du ala san u poi gi en (Mat. 22:36-38). Du fu tu sani a taki wi á mu e maiki useefi anga taawan. Kande wi á poi du san u be sa wani du gi Yehofa, ma u mu teke en fu bigi taki u poi wooko gi en, bika neen gi wi ala den sani di wi abi nownow. Boiti dati, efu wi e si taki taa sama e du moo gi Yehofa u mu piisii anga den, bika den nai du sani fu soi sama taki den bun moo taawan, efuso fu fende wini gi denseefi. Neen meke wi á mu e maiki useefi anga den, ma u mu meke moiti fu luku fa u sa waka a den baka.

³ Aini a artikel ya, wi o luku san u sa du te wi e fii booko-saka fu di wi á poi wooko enke fa u wani gi Yehofa. Wi o luku tu san u sa du te u poi du wan sani bun. Boiti dati, wi o luku fa u sa waka a taawan baka.

4. Gi wan ondoofenitoli di e soi san sa meke u fii booko-saka.

⁴ Son wan fu wi e fii booko-saka te wi á poi wooko gi Yehofa enke fa u wani fu di u siki efuso kon gaandi. Na a sani ya be miti wan sisa den e kai Carol. Fosi, a be e yeepi a wan kemeente pe moo peleikiman de fanowdu. Di a be de aini a kemeente ya, a sutudeli Beibel anga 35 sama. A yeepi omen fu den fu dopu tu. Sani be e go bun di Carol be de na a kemeente de. Ma bakaten a bigin siki, neen meke na ala yuu a be e de a osu. Carol taki: ‘Mi sabi taki mi á poi du den sani di taawan e du, bika mi e siki nownow. A sani ya e meke mi fii booko-saka, bika mi á poi du san mi be sa wani du gi Yehofa.’ Winsi fa Carol á poi wooko gi Yehofa enke fosi moo, toku u sabi taki Yehofa e piisii anga en, bika ai du ala san a poi gi en.

5. (a) San u mu holi a pakisei te wi e fii booko-saka fu di wi á poi wooko gi Yehofa enke fosi moo? (b) Enke fa a fowtow e soi, da fa a baala du ala san a be poi du gi Yehofa?

⁵ Efi yu e fii booko-saka fu di yu á poi wooko gi Yehofa enke fosi moo, i mu akisi iseefi taki: ‘San Yehofa wani mi du?’ A wani i du ala san i poi gi en nownow. Pakisei a toli ya. Kande wan sisa di abi 80 yali e fii booko-saka, fu di a á poi wooko gi Yehofa enke fa a be e wooko gi en di a be abi 40 yali. A sisa ya e si enke winsi fa ai du ala san a poi gi Yehofa nownow, toku a nai piisii anga en. Ma a so a de tuu? Holi a pakisei taki efu a sisa ya be e du ala san a poi gi Yehofa di a be abi 40 yali anga di a abi 80 yali, na aseefi sani ai du ete. A sani ya e soi taki solanga yu e du ala san i poi gi Yehofa, i sa biibi taki ai piisii anga i.​—Luku Mateyesi 25:20-23 tu.

6. San a toli fu Maria e leli u?

⁶ Wi o moo piisii te u poti pakisei a den sani di u poi du gi Yehofa. Luku a toli fu wan sisa den e kai Maria di abi wan siki di e meke a á poi du ala san a wani aini a peleikiwooko. Biginbigin a be e booko en ede pasa peesi. A be e fii enke a á bun sai. Ma a pakisei a toli fu wan sisa aini en kemeente di á poi komoto neen bedi. Maria be wani yeepi a sisa ya. A taki: ‘Mi be meke mofu anga en fu peleiki anga telefon anga fu sikiifi biifi gi sama. Te mi anga en be e wooko makandaa, mi be e piisii. Mi be e fii bun taki mi be yeepi mi sisa.’ Useefi o moo piisii te wi e poti pakisei a den sani di u poi du. Ma san u mu du efu u si taki u poi du moo gi Yehofa, efuso te u sabi du wan sani bun?

7. San apostel Peitilisi be taigi den Kelesten fu a ten fi en?

⁷ Aini a fosi biifi di Peitilisi sikiifi, a taigi den baala anga sisa taki den be mu koboloiki den koni di den abi fu gi taawan taanga-sikin. A be taki: ‘Leti enke fa ala u fende a koni fu man du son sani, a so u mu koboloiki a koni de fu dini makandaa enke bun futuboi di Gadu soi bun-ati’ (1 Peit. 4:10). U mu wooko anga den koni di wi abi fu dini Yehofa. Wi á mu e si enke taawan o dyalusu efuso fii booko-saka te wi e du a sani ya. Efu u nai wooko anga den koni di wi abi  fu dini Yehofa fu di wi e booko wi ede anga san sama o taki, da u nai du ala san u poi gi Yehofa.

8. Enke fa 1 Korentesama 4:6, 7 e soi, da saide wi á mu e gafa te u sabi du wan sani bun?

⁸ U mu koboloiki den koni di wi abi fu dini Yehofa, ma wi á mu e gafa efu u sabi du wan sani bun. (Leisi 1 Korentesama 4:6, 7.) Meke u taki i sabi fa fu bigin Beibelsutudi. Fa i sa soi taki i nai gafa fu di i sabi du a sani ya? Kande i taki anga wan sama aini a peleikiwooko, neen yu akisi en fu sutudeli Beibel anga en. Di yu akisi en a piki i taki a wani sutudeli Beibel. Yu e piisii, neen meke i wani gi den taawan a toli. Ma a ten di i wani gi a toli, wan sisa e gi wan toli di e soi fa a taki anga wan sama, neen a fika wan buku gi en. A sisa á bigin wan Beibelsutudi, ma yu bigin wan. San i be o du? I sabi taki den baala anga sisa be o fende taanga-sikin te den be o yee a ondoofenitoli fi i. Ma fu di yu a wani a sisa fii wan fasi meke a be o moo bun fu gi den taawan a toli wan taa leisi. Dati e soi taki i nai gafa. Winsi a ná ala yuu yu o gi taawan toli fa yu e bigin Beibelsutudi, toku ala yuu te yu e peleiki i mu meke moiti fu bigin wan Beibelsutudi. Te yu e du a sani de a ná gafa yu e gafa, bika a Gadu gi yu a koni de. A wani i wooko anga en.

9. Fa i mu koboloiki den koni di yu abi?

⁹ I mu holi a pakisei taki a Gadu gi yu ala den koni di yu abi. Neen meke i mu koboloiki den koni ya fu yeepi a kemeente, yu á mu du sani fu soi sama taki i bun moo den (Filip. 2:3). Te yu e koboloiki i kaakiti anga den koni di yu abi fu gafa Yehofa, yu o piisii.

10. Saide wi á mu e maiki useefi anga taawan?

¹⁰ Efu wi á luku bun, wi o go e maiki useefi anga taawan. Kande wan baala sabi holi lezing bun. A sani ya sa meke a bigin maiki enseefi anga wan taa baala di á sabi du a sani ya bun. Ma winsi fa a baala ya á sabi holi lezing bun, toku kande a lobi kai sama kon neen osu. A sabi fa fu leli den pikin fi en. Boiti dati, ai wooko taanga aini a peleikiwooko. Ai bigi gi u taki wi abi omen sowtu baala anga sisa aini a olikanisâsi di e wooko anga den koni di den abi fu du ala san den poi gi Yehofa anga fu yeepi taawan.

11. Saide u mu meke moiti fu waka a Yesesi baka?

¹¹ Wi á mu maiki useefi anga taawan, ma u mu luku san u sa leli fu den. Meke u luku a toli fu Yesesi. Wi á poi maiki useefi anga en, bika a á be abi sondu. Ma toku a omen sani u sa leli fi en (1 Peit. 2:21). Te wi e meke moiti fu du sani enke Yesesi, wi anga Yehofa o toon moo bun mati. A sani ya o yeepi u fu du u wooko moo bun tu.

12-13. San u sa leli fu Kownu David?

¹² U sa waka a son sama di kai aini Beibel baka. Winsi fa den sama ya be abi sondu, toku den be e du sani di be e soi taki den lobi Yehofa anga den hii ati (Heb. 6:12). Pakisei Kownu David. Yehofa be kai en ‘wan man di mi lobi’ (Toli 13:22). Ma David be abi sondu. A omen leisi a du sani di Yehofa á lobi. Ma toku u sa waka neen baka. Saide? Bika te a be meke wan fowtu, a be e aliki te sama be poti en a pasi. A be e soi taki a sani di a du e hati en tuutuu, da a be e meke moiti kengi en manii. Neen meke Yehofa be e gi en paadon.​—Ps. 51:3, 4, 10-12.

¹³ Efu u wani waka a David baka, u mu akisi useefi taki: ‘San mi e du te taawan poti mi a pasi? Mi e wooko anga san den taigi mi? Efuso mi e sitee taki anga den fu soi taki a sani di mi du á bigi so? Mi e gi taawan a fowtu fu den sani di mi du? Efuso mi e meke moiti fu mi á meke aseefi fowtu taa leisi moo?’ Te yu e leisi den toli fu den sama di be dini Yehofa anga den hii ati aini Beibel, i sa akisi iseefi den sani ya: ‘A sama ya be abi denseefi polobelema di mi abi nownow? Sowtu bun manii a be abi?’ I mu akisi iseefi tu taki: ‘Fa mi sa meke moiti fu du sani enke a sama ya?’

14. Sowtu wini wi e fende te wi e luku fa taawan e du sani?

¹⁴ Wi e fende wini te wi e luku fa taawan e du sani, winsi den gaandi efuso yonkuu. Kande i sabi wan sama aini i kemeente di e holidoo winsi san e miti en. Kande taawan a sikoo efuso a wookope wani dwengi en fu du sani enke fa den wani. Kande den famii fi en e libi ogii anga en fu di ai dini Yehofa. Efuso kande i sabi wan sama di e meke moiti fu dini Yehofa winsi fa ai siki. Yu e si den  bun manii fu a sama ya? I poi waka neen baka? Efi yu e poti pakisei a den sani ya, a o yeepi i fu holidoo te tesi e miti i. Ai bigi gi u taki den sowtu baala anga sisa ya de aini a kemeente di u sa waka a den baka.​—Heb. 13:7; Yak. 1:2, 3.

15. Fa a sani di Pawlesi be taigi den fosi Kelesten e yeepi u fu piisii te wi e wooko gi Yehofa?

¹⁵ Na ala u mu meke moiti fu yeepi a kemeente fu libi na a wan. Pakisei a toli fu den fosi Kelesten. A omen koni den sama ya be abi. A omen sani den be e du aini a olikanisâsi tu (1 Kor. 12:4, 7-11). Ma a sani ya á be mu meke den sitee anga denseefi. Pawlesi be taigi den taki den be mu du san be de fanowdu ‘fu meke a sikin fu Kelestesi kon taanga’. A be taki: ‘Efu ala den pisi fu a sikin e du san den mu du, da a hii sikin o taanga fu di den lobi denseefi’ (Efe. 4:1-3, 11, 12, 16). Den Kelesten di be e meke moiti fu du san Pawlesi taki be e yeepi a kemeente fu libi na a wan. Na a sani ya wi e meke moiti fu du aini a ten ya tu.

16. San u mu du? (Hebrewsama 6:10)

¹⁶ Yu á mu e maiki iseefi anga taawan, ma i mu meke moiti fu waka a Yesesi baka. Meke moiti fu abi den manii fi en. Luku san i sa leli fu den sama a fositen di be e dini Yehofa enke fa a wani. Luku fa i sa waka a den sama baka di e dini en enke fa a wani aini a ten ya tu. Efi yu e meke moiti fu du ala san i poi gi Yehofa, i sa biibi taki ‘a ná o feegete a wooko di i du gi en’. (Leisi Hebrewsama 6:10.) I mu e piisii te yu e wooko gi Yehofa, bika ai piisii te yu e du ala san i poi gi en.