TE WI abi booko-ede, wi e fii enke wan koko de a wi ati (Odo 12:25). Yu e kusumi fu di yu abi booko-ede? Yu e fii enke yu á poi moo? A nai wawan e fii so. A omen sani e meke wi e booko wi ede efuso e kusumi aini a ten ya. Kande i mu luku wan sama fi i di siki. Kande wan sama di i lobi dede. Efuso kande wan gaan ogii pasa na a pisi pe yu e tan. Den sani ya sa meke yu e kusumi. Ma san o yeepi u fu holidoo te wi e fii so? a

A toli fu Kownu David sa yeepi u fu holidoo te wi abi booko-ede. A omen sani be miti en aini en libi. Son yuu sama be e suku fu kii en (1 Sam. 17:34, 35; 18:10, 11). San be yeepi en fu holidoo winsi fa a be abi booko-ede? Fa u sa waka neen baka?

A omen sani be e miti David na aseefi yuu. Pakisei a ten di a be mu lowe gi Kownu Saul fu di a be wani kii en. Wan leisi, en anga den man fi en be go a wan feti, di den daai kon a pe den be e tan, den si taki sama fufuu ala den sani fu den. Den boon den osu fu den, neen den tyai den uman anga den pikin fu den gwe. San David du? Beibel taki: ‘David anga den man fi en bali kee. Den kee te den á poi moo.’ Ma a ná a booko-ede de namo David be abi. Den man fi en ati be boon te, neen den taki ‘den o fiingi siton naki en te enke a dede’ (1 Sam. 30:1-6). A dii sani be miti David na aseefi yuu. Den be tyai en osufamii gwe, den man fi en be wani kii en. Boiti dati, Kownu Saul be e suku fu kii en ete. Ná pikin booko-ede David be abi.

San David du? A go suku yeepi neen Gadu Yehofa. Fa a du a sani ya? Te sani be e miti David, a be lobi begi Yehofa, da a be e pakisei fa a be yeepi en kaba (1 Sam. 17:37; Ps. 18:2, 6). Na a sani ya a du baka. A akisi Yehofa san a be mu du. Di Yehofa soi en san a mu du, a wooko anga a sani ya wanten. Di a du a sani ya, Yehofa yeepi en anga den man fi en fu fii den sama fu den (1 Sam. 30:7-9, 18, 19). I si san a den dii sani di David du? A fosiwan, a begi Yehofa fu a yeepi en. Du fu tu, a pakisei fa Yehofa be yeepi en kaba. Anga du fu dii, a wooko anga san Yehofa be taigi en. Fa u sa waka a David baka? Wi o luku dii fasi fa u sa du a sani ya.

1. Begi. Te wi abi booko-ede, u sa begi Yehofa fu a yeepi u fu si fa u sa du sani anga koni. Wi o fii moo bun te u taigi Gadu san de a wi ati. Winsi wi á poi begi taanga, u sa begi en aini wi ati. Te wi e begi Yehofa fu a yeepi u, wi e soi taki wi e fitoow en leti enke David. A be taki: ‘Yehofa a mi siton mongo, neen mi e lon go kibii, neen na a Sama di e yeepi mi. A mi Gadu a mi taanga, a de enke wan mongo pe mi e lon go kibii’ (Ps. 18:2). Begi e yeepi tuutuu? Wan pionili sisa den e kai Kahlia taki: ‘Te mi kaba begi, mi e fii bun. Ai yeepi mi fu denki enke fa Yehofa e denki. Mi e moo fitoow en tu.’ Begi a wan kado di Gadu gi u. Begi e yeepi u te wi abi booko-ede.

 2. Pakisei fa Yehofa yeepi i kaba. I sabi ete fa Yehofa yeepi yu anga den tesi di miti yu aini den ten di pasa? Te wi e pakisei fa Yehofa yeepi wi aini den ten di pasa, a sani ya e meke u fii moo bun. Wi e moo fitoow en tu (Ps. 18:17-19). Wan owluman den e kai Joshua taki: ‘Mi sikiifi ala den leisi di Yehofa piki den begi fu mi a pampila. A sani ya e yeepi mi fu membee ala den leisi di mi taigi Yehofa pilisisi san mi be wani, neen a gi mi san mi be abi fanowdu.’ Te wi e pakisei ala den leisi di Yehofa yeepi wi aini a ten di pasa, a sani ya e yeepi u fu wi á booko wi ede so moo.

3. Wooko anga san i leli. Fosi u du wan sani, u sa luku san Beibel e taki fu a sani di u wani du (Ps. 19:7, 11). A omen sama taki te den ondoosuku wan tekisi finifini, a sani ya e yeepi den fu si fa den sa du san a tekisi e taki. Wan owluman den e kai Jarrod taki: ‘Te mi ondoosuku wan tekisi, a sani ya e yeepi mi fu fusutan en moo bun. Mi e si san Yehofa wani leli mi anga a tekisi ya tu. Mi e moo biibi san a taki. A sani ya e meke a moo makiliki gi mi fu du san mi leli.’ Efu wi e meke moiti fu luku san Beibel e taki, da u wooko anga san u leli, a sani ya o yeepi u fu piisii winsi wi abi booko-ede.

David be sabi taki a Yehofa namo be sa yeepi en anga den booko-ede fi en. Ná pikin bigi a be e bigi gi en taki Yehofa be e yeepi en, neen meke a be taki: ‘A Gadu e gi mi kaakiti fu subi sikotu. Na a tuu Gadu e gi mi kaakiti’ (Ps. 18:29, 32). Kande wi e fii enke den polobelema fu u de enke wan sikotu di wi á poi subi. Ma winsi sowtu polobelema wi abi, Yehofa sa yeepi u fu pasa den. U mu e begi Yehofa fu a yeepi u, u mu e pakisei san a du gi wi aini den ten di pasa, da u wooko anga den sani di wi e leli aini a Wowtu fi en. Efu wi e du den sani ya, a o gi wi a kaakiti anga a koni di wi abi fanowdu fu holidoo te wi abi booko-ede.