Wan buku e taki: ‘Wan sweli a wan sani di wan sama e paamisi taki a o du. Gaanse leisi a sama e kai Gadu nen te ai sweli.’ I sa sweli a mofu, ma i sa sikiifi en a pampila tu.

Son sama e si enke wi á mu e sweli seefiseefi, bika Yesesi be taki: ‘Wi á mu sweli seefiseefi. . . Te i taki “iya”, a mu tan iya. Te i taki “nono”, a mu tan nono. Bika ala taa sani di yu o taki ete, a fu a ogiiwan’ (Mat. 5:33-37). Yesesi be sabi taki a Weiti fu Mosesi be e meke den Dyu sweli fu du son sani (Gen. 14:22, 23; Ek. 22:10, 11). Boiti dati, a be sabi taki Yehofa be e sweli son yuu tu (Heb. 6:13-17). A sani di Yesesi be taki, á wani taki wi á mu e sweli seefiseefi. A soi a be wani soi u taki wi á mu e sweli fu ala pikinpikin sani. Yehofa wani wi e du san u paamisi ala yuu.

San i mu du efu den akisi i fu sweli? A fosi sani, a taki i mu sabi fu saide yu o sweli. Efi yu á sabi pilisisi san yu o sweli fu du, a moo betee yu á sweli. Gadu wasikoi u taki: ‘Pe fi i sweli taki yu o du wan sani da yu á du en, a moo yu á sweli seefiseefi’ (Peleik. 5:5). Du fu tu sani, a taki i mu luku san Beibel e taki fu a sani di i wani sweli fu du. I mu wooko anga san i kosensi e taigi tu. Sowtu tekisi i mu holi a pakisei fosi i sweli?

Son sani di wi e sweli fu du e kai anga san Gadu wani. Yehofa Kotoigi e meke wan paamisi te den e toow. A sweli den e sweli te den e meke a paamisi ya. A toowpaa e paamisi a Gadu anga taa sama fesi taki den o lobi denseefi, den o solugu denseefi, anga taki den o lesipeki denseefi ‘solanga den tu man de a libi’. (Son toowpaa e taki taa sani te den e meke a paamisi ya, ma toku a paamisi fu den a wan sweli tu.) Baka dati den e toon man anga uman. Den mu tan anga denseefi den hii libi langa (Gen. 2:24; 1 Kor. 7:39). A paamisi ya fiti, a wan sani di e kai anga san Gadu taki.

Son sweli nai kai anga san Gadu wani. Wan tuutuu Kelesten ná o sweli fu go feti gi wan kondee, efuso fu gwe fika Gadu. Efu a sweli fu du wan fu den sani ya, da ai du wan sani di Gadu á lobi. Kelesten ‘nai mumui anga a goontapu’, neen meke wi á wani go aini den feti fu den.​—Yoh. 15:19; Yes. 2:4; Yak. 1:27.

Son yuu a wan sama seefi mu luku efu a o sweli fu du wan sani. Son yuu u mu pakisei san Yesesi be taki fosi u sweli fu du wan sani. A be taki: ‘Pai Gaankownu san a fu Gaankownu, ma pai Gadu san a fu Gadu.’​—Luk. 20:25.

 Kon u taki wan Kelesten mu meke wan pampila fu tan aini wan kondee, efuso wan taa lanti pampila. Te i go meke den pampila ya aini son kondee, den e meke i sweli taki noiti yu o pasa den weiti fu a kondee. Ma efu den wani u sweli fu du wan sani di nai kai anga den weiti fu Gadu, wi á be o du a sani de. Son leisi lanti sa gi i pasi fu kengi wantu sani na a sweli ya fi i sa seeka a pampila fi i.

Son yuu te lanti e akisi sama fu sweli, a sani di a sama o sweli fu du e kai anga san sikiifi a Romesama 13:1. Ai taki: ‘Ala sama mu saka denseefi a lanti ondoo.’ A Gadu seefi taigi u fu du a sani ya, neen meke a ná wan fowtu sani fu sweli fu du wan sani di enseefi taki u mu du.

Wan Kelesten mu aliki en kosensi tu te den akisi en fu holi wan sani efuso fu meke wan sani anga en ana te ai sweli. Te den Romesama anga den Skitsama be e sweli, den be e holi wan feti-how. A sani ya be wani taki den be e sweli aini a nen fu a gadu fu feti fu soi taki sama be sa fitoow den. Den Giikisama be e opo den ana go a tapu te den be e sweli. Den be e du a sani ya fu soi taki wan sama de a hemel di e si ala san wi e taki anga san wi e du. Den be e biibi tu taki i be o abi fu gi faantiwowtu na a sama ya.

Den sama di e dini Yehofa ná o holi wan sani di e soi taki den e dini wan falisi gadu te den e sweli. Ma san i mu du te i de a kuutu neen den akisi i fu poti yu ana a wan Beibel tapu, da i sweli taki den sani di yu o taki a tuu? A sani ya á fowtu, bika Beibel abi toli fu sama di be du wan sani anga den ana di den be e sweli (Gen. 24:2, 3, 9; 47:29-31). Ma i mu holi a pakisei taki a sweli yu e sweli a Gadu fesi taki yu o taki a tuu. Neen meke yu á mu lei te den o akisi i sani.

A dini di wi e dini Yehofa na a moo pelensipali sani aini u libi. Neen meke fosi u sweli fu du wan sani, u mu begi en fu a yeepi u. U mu pakisei bun fu a sani di den akisi u fu sweli fu du tu. U mu luku efu a sani de o meke u pasa den weiti fu Yehofa. U mu luku tu efu a o meke u kosensi fon u bakaten. Boiti dati, te i sweli taki yu o du wan sani, i mu du en.​—1 Peit. 2:12.