Te a sani ya pasa, a fosi toow nai teli moo. Efu a sama toow baka, na a nyun toow a kemeente o teli. Fu man fusutan a toli ya moo bun, wi o luku san Yesesi be taki fu booko-toow anga a toow di sama e toow baka.

Yesesi be soi a Mateyesi 19:9 on ten wan sama sa booko-toow anga en toowpaa. A be taki: ‘Efu wan man booko-toow anga en uman, sondee en uman du ogii neen osu, neen a man toow anga wan taa uman, da a waka a waka gi en uman.’ A sani di Yesesi taki e leli u tu sani: (1) A te wan sama waka gi en toowpaa fosi da a toow sa booko. (2) Efu wan man booko-toow anga en uman go toow anga wan taawan, sondee a uman du ogii neen osu, a waka a waka gi en uman. a

A sani di Yesesi taki ya wani taki wan man di waka gi en uman neen a booko-toow anga en, sa toow baka? A ná abi fu de so. Te wan man waka gi en uman, na a uman mu luku efu a wani booko a toow, efuso gi en man paadon. Efu a uman taki a ná o gi en paadon neen a toow booko, ala den tu man sa toow baka.

Meke u taki a uman gi en man paadon fu di a á wani booko a toow. Efu a uman du a sani ya, da a man á poi booko a toow. Ma san be o pasa efu a man booko a toow, neen a go toow anga wan taa uman fu di a á wani en uman moo? Efu a man du a sani ya, a waka a waka gi en uman baka. Den owluman o seeka ete wan kuutu komte fu kuutu a toli ya.​—1 Kor. 5:1, 2; 6:9, 10.

Fa a kemeente e si en te wan man booko-toow anga en toowpaa, go toow anga wan taa sama sondee fi en toowpaa waka gi en? Te u luku san Beibel e taki, da a fosi toow e teli ete? A uman sa gi en man paadon ete winsi fa a man toow anga wan taa uman? A kemeente e si a nyun toow enke a waka a man e waka gi en uman?

Fosi a kemeente be e si enke te a man be toow anga wan taa sama, a waka a be e waka gi a fosi uman solanga a fosi uman á be toow baka. Den be e si enke a te a fosi uman be toow baka, hulu, efuso dede fosi da a man á be e waka gi en moo. Ma di Yesesi be taki fu booko-toow anga a toow di sama e toow baka, a á be taki nawan sani fu a toowpaa di abi leti. A soi a be soi namo taki wan man di be go toow anga wan taa uman sondee fi en uman du ogii neen osu be waka gi en uman. Te a sani ya pasa, a fosi toow nai teli moo.

Efu a man booko a toow neen a go toow anga wan taa uman sondee fi en uman waka gi en, a fosi uman á poi taki a o gi  en paadon moo. A ná abi fu go sidon booko en ede anga a sani de, bika a man toow anga wan taa sama kaba. A kemeente o teli a nyun toow, winsi a fosi uman de a libi ete, winsi a á toow baka efuso hulu.  b

Na a bigin u be taki a man waka gi en uman, neen den booko a toow. Ma meke u taki a man á waka gi en uman, ma a booko a toow neen a toow anga wan taa uman. Efuso meke u taki a man booko a toow, neen a hulu a pisiten di a toow be booko. Di a uman yee a taki, a be wani gi en paadon, ma toku a man go toow anga wan taa uman. Winsi san pasa, solanga a man toow baka, a waka a waka gi en uman. Neen meke a fosi toow nai teli moo. A nyun toow e kuudei anga lanti weiti. A Ingiisi Wakititolen fu 15 november 1979 be taki a bladzijde 32: ‘Te a man toow baka, a á poi booko a nyun toow fu daai go neen fosi uman baka. A sani di a man du meke a fosi toow nai teli moo.’

A sani ya á wani taki Kelesten nai si a toowlibi enke wan santa sani moo. A á wani taki den nai si hululibi enke wan gaan sondu tu. Den owluman o sete wan kuutu komte fu kuutu wan baala di booko-toow anga en uman fu go toow anga wan taa uman, sondee fi en uman du ogii neen osu. Den o kuutu en bika a hulu a hulu (Efu a nyun uman di a toow anga en a wan Kotoigi, den o sete wan kuutu komte fu kuutu en tu, bika a hulu a hulu). Winsi fa na a nyun toow a kemeente o teli now, toku a man pasa wan weiti fu Gadu di a du a sani ya. Neen meke a omen yali langa a baala ná o poi tyai faantiwowtu aini a kemeente, bika a o teke ten fu den baala anga sisa aini a kemeente lesipeki en baka. Fosi den owluman gi en faantiwowtu baka, den mu luku fosi fa sani e go anga a fosi uman. Efu den be abi pikin, den mu luku fa sani e go anga den pikin tu, bika kande na a uman wawan a fika den pikin gi fu solugu.​—Male. 2:14-16.

Yehofa e si a toowlibi enke wan santa sani, neen meke wan Kelesten di e wooko anga san Yehofa taki ná o booko-toow sondee fi en toowpaa waka gi en.​—Peleik. 5:4, 5; Heb. 13:4.