1. San Yehofa wani u du?

 SANI á de di e meke wan toowpaa piisii enke te den meke pikin. Winsi fa den lobi a pikin, toku den naw wani a tan enke wan yonkuu pikin ala yuu. Efu den si taki a pikin fu den nai goo, a sani ya sa meke den bigin kusumi. A so a de anga Yehofa tu. Te u bigin dini en, ai piisii. Ma a wani u go a fesi aini a dini di we dini en (1 Kor. 3:1). A wani u toon gaansama a waaleiti.​—1 Kor. 14:20.

2. San wo luku aini a artikel ya?

² San a wani taki fu toon gaansama a waaleiti? Saw yeepi u fu goo a waaleiti? Fa a sutudeli di wo sutudeli Beibel o yeepi u fu wi anga Yehofa toon moo bun mati? Te u de wan pisiten a waaleiti, omen sani we sabi fu Yehofa. Ma saw yeepi u fu tan meke moiti fu wi anga Yehofa toon moo bun mati? Wo piki den akisi ya aini a artikel ya.

SAN A WANI TAKI FU TOON GAANSAMA A WAALEITI?

3. San a wani taki fu toon gaansama a waaleiti?

³ A Giiki wowtu toon gaansama di sikiifi aini Beibel wani taki ‘wan sani di de sondee fowtu’ (1 Kor. 2:6). Leti enke fa wan pikin e goo te enke a toon gaansama, a letiso useefi mu meke moiti tu fu wi anga Yehofa toon bun mati. Winsi u toon gaansama a waaleiti, toku u mu tan meke moiti fu go a fesi (1 Tim. 4:15). Ala u di de a waaleiti sa meke moiti fu go a fesi. Den yonkuuwan sa du a sani ya tu. Ma fa wo du sabi taki we go a fesi a waaleiti?

4. Fa wo du sabi efu wan sama toon gaansama a waaleiti?

 ⁴ Wan Kelesten di toon gaansama a waaleiti a wan sama di e du ala san Yehofa akisi en fu du. A nai du san enseefi wani. Fu di u sondu meke aw go e meke fowtu son yuu. Ma ala yuu aw meke moiti fu denki efuso du sani enke fa Yehofa wani. Aw meke moiti fu kengi en manii fu a sa de enke fa Yehofa wani (Efe. 4:22-24). Te a mu teke wan bosoloiti, ai wooko anga den weiti fu Yehofa. Ai wooko anga den leli fu Beibel tu. A naabi omen weiti fanowdu fu sabi san a mu du. Sowan sama e du ala san a poi fu doo den maiki di a poti.​—1 Kor. 9:26, 27.

5. San sa pasa anga wan sama di nai meke moiti fu toon gaansama a waaleiti? (Efeisesama 4:14, 15)

⁵ Wan sama di nai meke moiti fu toon gaansama a waaleiti o go e biibi ala nyunsu di sama di komoto a waaleiti e paati. Ai biibi ala nyunsu di a si a internet tu. a (Leisi Efeisesama 4:14, 15.) Kande sowan sama o dyalusu anga taawan. En ati o go e boon gaw. A naw poi dwengi enseefi te en ati boon tu.​—1 Kor. 3:3.

6. Saide u sa maiki a toon di wan sama e toon gaansama a waaleiti anga a goo di wan pikin e goo? (Luku a fowtow tu.)

⁶ Enke faw be taki kaba, da Beibel e maiki a toon di wan sama e toon gaansama a waaleiti anga te wan pikin e goo kon toon gaansama. A omen sani wan pikin á sabi, neen meke a abi wan gaansama fanowdu fu yeepi en. Kande wan mma o akisi a pikin meisyo fi en fu holi en ana te den e abaa sitaati. Kande te a pikin ya kon moo bigi, en mma o fika en wawan fu abaa sitaati, ma aw taigi en fu luku bun fosi a abaa fu wagi á naki en. Te a pikin ya toon gaansama, aw sabi fa a mu kibii enseefi fu ogii á miti en. Leti enke fa wan pikin abi gaansama fanowdu fu yeepi en fu ogii á miti en, a letiso wan sama di naabi ondoofeni a waaleiti abi wan sama fanowdu fu yeepi en fu toon gaansama a waaleiti. Wan Kelesten di toon gaansama a waaleiti e denki bun san Beibel e taki fosi a du wan sani. Den e meke  moiti fu wooko anga san Beibel taki te den e du sani.

7. Kelesten di toon gaansama a waaleiti abi yeepi fanowdu?

⁷ A tuu taki wan sama di toon gaansama a waaleiti naabi yeepi fanowdu moo? Nono. Denseefi abi yeepi fanowdu tu. Kande wan sama di naabi ondoofeni a waaleiti e wani taawan taigi en san a mu du. Ma na a taa se, winsi fa wan sama di toon gaansama a waaleiti e akisi taawan fu poti en a pasi, toku a sabi taki ala sama o ‘tyai en faantiwowtu’. Neen meke a nai akisi sama san a mu du.​—Gal. 6:5.

8. Saide u sa taki Kelesten di toon gaansama a waaleiti nai du sani na aseefi fasi?

⁸ A ná ala gaansama e du sani na aseefi fasi. A letiso a de anga den sama di toon gaansama a waaleiti tu. Son wan fu den abi koni fu du son sani, taawan abi deki-ati. Yu abi sama di lobi gi sama sani, taawan abi tyali-ati anga taawan. Winsi fa ibiiwan fu den e teke den eigi bosoloiti, toku na ala yuu den e du sani enke fa Beibel e taki. Fu di den e holi a kosensi fu taawan a pakisei, meke den nai kuutu taawan te den teke wan bosoloiti. Den e meke moiti fu libi na a wan.​—Rom. 14:10; 1 Kor. 1:10.

SAW YEEPI U FU TOON GAAN SAMA A WAALEITI?

9. A te wan sama de langa a waaleiti, da dati wani taki a toon gaansama a waaleiti?

⁹ Te wan pikin meke, ai kon moo bigi te den yali e pasa. Ma a ná so a de anga wan Kelesten. Efu u wani toon gaansama a waaleiti, u mu meke moiti. We si a sani ya te u luku den Kelesten a Korente. Den be aliki a bun nyunsu, neen den dopu. Den be fende a santa yeye tu. Boiti dati, a omen sani Pawlesi be leli den (Toli 18:8-11). Ma baka wantu yali di den dopu, a omen fu den á be toon gaansama a waaleiti ete (1 Kor. 3:2). Saw yeepi u fu a sani ya á miti u?

10. Saw mu du fu toon gaansama a waaleiti? (Yudasi 20)

¹⁰ A fosi sani a taki useefi mu wani toon gaansama a waaleiti. Den sama di ‘lobi fu de sondee ondoofeni’ á wani kengi. Neen meke noiti den o toon gaansama a waaleiti (Odo 1:22). Yu abi sama di kon bigi kaba, ma ala yuu te den mu du wan sani, a den mma anga dda den e akisi san den mu du. Wa wani de enke den sowtu sama de a waaleiti. Useefi mu meke moiti fu wi anga Yehofa toon bun mati. (Leisi Yudasi 20.) Efi ye meke moiti fu toon gaansama a waaleiti, i sa begi Yehofa fu a yeepi i. Begi en tu fu a ‘meke yu angii fu du sani di e meke a piisii’.​—Filip. 2:13.

11. San Yehofa e giw fu yeepi u fu toon gaansama a waaleiti? (Efeisesama 4:11-13)

¹¹ Yehofa sabi taki wi abi yeepi fanowdu fu toon gaansama a waaleiti. Neen meke a poti owluman aini a kemeente fu giw leli. Den baala ya e yeepi u tu fu go a fesi a waaleiti. Den poi yeepi u fu ‘toon gaansama di abi aseefi biibi di Kelestesi be abi’. (Leisi Efeisesama 4:11-13.) Yehofa gi wi a santa yeye fi en tu fu yeepi u fu denki enke Kelestesi (1 Kor. 2:14-16). Boiti dati, a meke den sikiifi den fo Beibel buku di e taki fu a libi fu Yesesi fu soi u fa Yesesi be e denki, fa a be e taki, anga fa a be e du sani di a be de a goontapu. Efi ye meke moiti fu denki efuso du sani enke Yesesi, a sani de o yeepi i fu toon gaansama a waaleiti.

 U MU E NYAN TAANGA NYANYAN

12. San a wantu fu den moo pelensipali sani di wan Kelesten mu sabi?

¹² Efu u wani toon gaansama a waaleiti, wa mu sabi den moo pelensipali leli fu Beibel namo, ma u mu sabi den moo dipi toli tu. U be leli taki efu wan sama wani toon wan Kelesten da a mu daai en libi. A mu e biibi Yesesi, a mu e biibi taki den sama di dede o weki baka. Boiti dati, a mu dopu (Heb. 6:1, 2). Disi a wantu fu den moo pelensipali sani di wan Kelesten mu sabi. Neen meke apostel Peitilisi be taki fu den sani ya na a Pinksterfesa (Toli 2:32-35, 38). Wan sama abi fu biibi den sani ya fu man toon wan Kelesten. Pawlesi be taigi den Kelesten taki efu den nai biibi taki dedesama o weki baka, da a fu soso den de wan Kelesten (1 Kor. 15:12-14). Ma efu u wani toon gaansama a waaleiti, a ná den pelensipali sani ya namo u mu sabi.

13. Saw yeepi u fu fende wini fu a taanga nyanyan di Pawlesi kai a Hebrewsama 5:14? (Luku a fowtow tu.)

¹³ Den dipi toli fu Beibel nai taki fu den weiti fu Yehofa namo, ma den e yeepi u fu sabi saide a giw den weiti ya. Den toli ya e yeepi u fu sabi fa Yehofa e denki. Efu u wani fende wini fu den toli ya, u mu e sutudeli a Wowtu fu Gadu, u mu e teke ten pakisei saw leli, daw meke moiti du den sani di we leli. Efu we du den sani ya, Yehofa o piisii anga a fasi fa we du sani. b​—Leisi Hebrewsama 5:14.

14. Fa Pawlesi be yeepi den Kelesten a Korente fu toon gaansama a waaleiti?

¹⁴ Te wan Kelesten á toon gaansama a waaleiti, ai taanga gi en fu sabi san a mu du te Beibel naabi wan weiti fu a sani di a wani du. Sowan sama e si enke a sa du san a wani. Taawan e wani sama taigi en kiin san a mu du anga san aa mu du. A gei enke den Kelesten aini Korente be akisi Pawlesi fu a taigi den kiin efu den be mu nyan wan nyanyan di sama gi enke ofaandi a falisi gadu. Pe fu a taigi den san den mu du, a soi den taki ala sama mu luku sai kai anga en kosensi. A soi  den wantu leli aini Beibel di be o yeepi den fu den á du sani di be o meke den kosensi fon den efuso fu meke taawan dyakata (1 Kor. 8:4, 7-9). Pawlesi leli den Kelesten a Korente fa den mu wooko anga den leli fu Beibel te den mu du wan sani. A sani ya be o yeepi den fu den nai akisi taawan ala yuu san den mu du. A be o yeepi den tu fu den nai suku weiti aini Beibel fu ala sani di den wani du. Efu den be wooko anga san Pawlesi leli den, den be o toon gaansama a waaleiti.

15. Fa Pawlesi be yeepi den Hebrew Kelesten fu go a fesi a waaleiti?

¹⁵ We leli wan pelensipali sani fu a biifi di Pawlesi be sikiifi gi den Hebrew Kelesten. Son wan fu den á be e go a fesi a waaleiti. Pawlesi be taki a leti enke den be ‘kon de enke beibi di abi meliki fanowdu’. Den ‘á be poi nyan taanga sani’ (Heb. 5:12). Den á be e poti pakisei a den nyun sani di Yehofa be e leli den, neen meke den be fika a wan peesi. Den á be e go a fesi (Odo 4:18). Son wan fu den Dyu Kelesten be e wooko anga a Weiti fu Mosesi ete. Ma baka di Yesesi dede, a Weiti ya á be e teli moo. A wan sani fu 30 yali a sani ya be pasa kaba (Rom. 10:4; Tit. 1:10). A 30 yali den Dyu Kelesten be abi fu fusutan taki a Weiti fu Mosesi á be e teli moo. A biifi di Pawlesi sikiifi gi den, a be fu yeepi den fu fusutan wantu dipi toli fu Beibel. A biifi ya be mu yeepi den fu biibi taki a fasi fa Yesesi soi den fu dini Gadu, be bun moo a fasi fa den be e dini Gadu fosi. A gi den taanga-sikin tu fu tan peleiki, winsi den taa Dyu be e du sani anga den.​—Heb. 10:19-23.

MEKE MOITI FU TAN GO A FESI

16. Saw mu tan du winsi u toon gaansama a waaleiti kaba?

¹⁶ Wa mu meke moiti fu toon gaansama a waaleiti namo, ma u mu meke moiti fu tan go a fesi. Neen meke noiti u mu fii enke u bun kaba (1 Kor. 10:12). Ma u mu e ‘ondoosuku naamo’ luku efu we go a fesi.​—2 Kor. 13:5.

17. Fa a biifi di Pawlesi be sikiifi gi den Kelesten a Kolose e soi taki u mu tan meke moiti fu go a fesi?

¹⁷ Te u luku a biifi di Pawlesi be sikiifi gi den Kelesten a Kolose, we si tu taki u  mu meke moiti fu tan go a fesi. Winsi fa den be toon gaansama a waaleiti kaba, tokuso Pawlesi be taigi den taki den mu luku bun fu den á bigin denki enke den sama fu a goontapu (Kol. 2:6-10). A gei enke Epafras be sabi den baala anga sisa fu Kolose. Na ala yuu a be e begi gi den fu a ‘biibi fu den sa taanga’ (Kol. 4:12). San we leli fu a sani ya? Pawlesi anga Epafras be fusutan taki te u toon gaansama a waaleiti kaba, Yehofa o yeepi u fu tan go a fesi, ma useefi mu tan meke moiti tu. Den be wani yeepi den baala anga sisa fu Kolose fu tan go a fesi, winsi sowtu tesi be e miti den.

18. San sa pasa anga wan Kelesten di toon gaansama a waaleiti? (Luku a fowtow tu.)

¹⁸ Pawlesi be wasikoi den Hebrew Kelesten taki wan sama di be toon gaansama a waaleiti kaba, be sa du sani fu meke en anga Gadu poli fu teego. Efu wa luku bun, wo bigin du sani di Yehofa á lobi. A sa pasa taki wan Kelesten e taangayesi Yehofa te, da a nai fii fu kengi moo. Efu aa wani kengi, Yehofa naw poi gi en paadon. We poolo taki a sani ya á be pasa anga den Hebrew Kelesten (Heb. 6:4-9). Aini a ten ya, yu abi baala anga sisa di nai peleiki moo, anga taawan di den baala puu aini a kemeente. Fa sani sa waka gi den? Efu den soi sakafasi, neen den kengi a fasi fa den e libi, den anga Yehofa sa toon mati baka. Den naw de enke den sama di Pawlesi be taki poli anga Gadu fu teego. Ma te den daai kon a Yehofa baka, den mu teke a yeepi di aw gi den (Eseik. 34:15, 16). Kande den owluman o akisi wan baala efuso sisa di abi ondoofeni fu sutudeli Beibel anga en.

19. Sai mu meke moiti fu du?

¹⁹ Efi ye meke moiti fu toon gaansama a waaleiti, i sa doo a maiki ya. I mu e sutudeli den dipi toli fu Beibel, dai meke moiti fu du sani enke fa Yehofa wani. Efii toon gaansama a waaleiti kaba, i mu meke moiti fu tan go a fesi. Meke moiti tu fi ya gwe fika Yehofa noiti.