1. San na a ageisi paladeisi? Saw mu de kabakaba fu du?

 WAN ageisi paladeisi de a goontapu nownow. A omen bun sani den sama di de aini e du. Den sama ya e piisii tuutuu. Den e meke moiti fu tan aini a ageisi paladeisi tu. Boiti dati, den e du ala san den man fu yeepi taawan fu kon aini a ageisi paladeisi. a

2. San a wantu moin sani fu a ageisi paladeisi?

² Aini a ageisi paladeisi a foluku fu Yehofa de nownow. Den e libi na a wan. A wan gaan sani Yehofa du ya, bika den sama aini a goontapu nai libi na a wan. Den e buuse denseefi (1 Yoh. 5:19; Openb. 12:12). Yehofa sabi sai miti den sama aini a goontapu, neen meke ai giw den sani di wi abi fanowdu fu u sa tan dini en anga piisii. Beibel taki a ageisi paladeisi de enke wan ‘kibii pe’. A de enke wan ‘dyali di e fende tyaipi wataa’ (Yes. 4:6; 58:11). Winsi fa a goontapu ogii nownow, toku den sama di de aini a ageisi paladeisi e piisii tuutuu.​—Yes. 54:14; 2 Tim. 3:1.

3. Fa a polofeititoli di sikiifi a Yesaya kapitel 65 be kon tuu aini a ten fu den Islayelisama?

³ Yehofa be meke polofeiti Yesaya sikiifi fa a libi be o de aini a ageisi paladeisi. Den sani di a be taki sikiifi a Yesaya kapitel 65. Den sani ya be kon tuu aini a yali 537  Fosi Kelestesi. A ten de den Dyu di be de a katibo a Babilon be daai go a den kondee baka. Yehofa be belesi den. A be yeepi den fu den meke a tempel baka. Na a tempel den be e kon makandaa fu dini Yehofa.​—Yes. 51:11; Sak. 8:3.

4. Fa a polofeititoli di sikiifi a Yesaya kapitel 65 e kon tuu aini a ten ya?

⁴ Du fu tu leisi di a polofeititoli ya kon tuu pasa aini a yali 1919. Aini a yali de a foluku fu Yehofa komoto aini a Gaan Babilon. Bakadati, neen a ageisi paladeisi bigin paati na ala se fu goontapu. Fu di den baala anga sisa be e paati a bun nyunsu anga den hii ati, meke den be poi opo omen kemeente. A omen sama di be e du ogii, anga sama di be e libi wan hululibi ‘kengi den manii, fu den sa libi enke fa Gadu wani’ (Efe. 4:24). Aini a nyun goontapu ala den sani di Yesaya taki o kon tuu. Ma a nownow kaba we fende wini fu den sani di a taki, bika u de aini a ageisi paladeisi. Meke u luku fa a ageisi paladeisi e meke u fii anga saide wa mu komoto aini.

FA DEN SAMA DI DE AINI A AGEISI PALADEISI E FII?

5. Enke fa Yesaya 65:13 e soi, da san we fende aini a ageisi paladeisi?

⁵ U gusontu. We fende kaakiti baka. A polofeititoli fu Yesaya e soi taki a libi fu den sama di de aini a ageisi paladeisi anga den sama di á de aini, a ná aseefi. (Leisi Yesaya 65:13.) Yehofa e gi den sama di e dini en ala san de abi fanowdu fu den á gwe fika en. Ai gi wi a santa yeye fi en. A gi wi a Wowtu fi en tu. Boiti dati, ai giw den leli di wi abi fanowdu fu taanga u biibi. Fu di u de aini a ageisi paladeisi meke we ‘nyan, . . . diingi, . . . [anga] piisii’. (Luku Openbaring 22:17 tu.) Ma sani de taa fasi gi den sama di á de aini a ageisi paladeisi. Neen meke ‘angii e kii den . . . , wataa e kii den . . . , sen e kisi den tu’. Den sama ya anga Gadu a ná mati.​—Am. 8:11.

6. Enke fa Yoweli 2:21-24 e soi, da san a wantu belesi di Yehofa giw? Sowtu wini we fende fu den sani ya?

⁶ Aini a polofeititoli di Yoweli sikiifi, a be taki fu alisi, win, anga oleifi oli. Den sani ya e soi taki Yehofa e giw ala den sani di wi abi fanowdu fu taanga u biibi (Yowe. 2:21-24). A gi wi a Beibel, den buku fu a olikanisâsi, a website fu u, den komakandaa, den kelen-komakandaa anga den konkelesi. We fende wini fu den sani ya ala dei. Neen meke u gusontu. We fende kaakiti baka.

7. Sai meke wan sama ‘ati bun’? (Yesaya 65:14)

⁷ We piisii. We tifeedi anga sani. A foluku fu Yehofa e ‘piisii’, bika den e teke den sani di ai du gi den fu bigi. (Leisi Yesaya 65:14.) Den sani di we leli aini Beibel, anga den sani di Yehofa paamisi u, e giw taanga-sikin. A dede fu Yesesi e yeepi u fu biibi taki den di Yehofa paamisi wo kon tuu. A den sani ya e yeepi u fu de sama di ‘ati bun’. Te wi anga den baala anga sisa e taki fu den sani ya ná pikin piisii we piisii.​—Ps. 34:8; 133:1-3.

8. San a tu pelensipali manii di den sama di de aini a ageisi paladeisi abi?

⁸ A foluku fu Yehofa lobi denseefi. Den e libi na a wan tu. A den manii ya den sama di de aini a ageisi paladeisi abi. A fasi fa wi anga den baala anga sisa fu we libi nownow e meke u pakisei fa a libi o de aini a nyun goontapu. A ten de a foluku fu Yehofa o moo lobi denseefi. Den  o moo libi na a wan tu (Kol. 3:14). Wan sisa taki san a si di a miti den Yehofa Kotoigi a fosi leisi. A taki: ‘Mi anga den sama fu mia be sabi san a tuutuu piisii. A fosi leisi di mi si sama e soi lobi gi taawan, a di mi anga den Yehofa Kotoigi miti.’ Ala den sama di wani piisii tuutuu mu kon aini a ageisi paladeisi. Winsi san den sama aini a goontapu e taki fu a foluku fu Yehofa, toku wi abi wan bun nen a Yehofa anga den baala anga sisa.​—Yes. 65:15.

9. San Yesaya 65:16, 17 e taki fu den sani di e giw booko-ede?

⁹ U nai buuya. Yesaya 65:14 e soi taki den sama di á wani kon aini a ageisi paladeisi ‘e bali kee fu di den ati e du den ogii. Den e kee fu di den e fii booko-saka’. Saw pasa anga den sani di e gi a foluku fu Yehofa booko-ede? ‘Den naw membee den sani de moo. Noiti moo den o membee fa den be e pina.’ (Leisi Yesaya 65:16, 17.) Yehofa o puu ala den polobelema fu u. U naw pakisei fa den sani de be e meke u fii moo.

10. Saide ai bigi gii taki i sa de makandaa anga den baala anga sisa? (Luku a fowtow tu.)

¹⁰ We fii bun te u de a den komakandaa. Te u de ape u nai pakisei den sani di e giw booko-ede moo. We meke den baala anga sisa fii bun tu te we soi den lobi, freide, switifasi, anga safu-ati. Na a santa yeye fu Yehofa e yeepi u fu abi den manii ya (Gal. 5:22, 23). Ai bigi giw taki u de aini a olikanisâsi fu Yehofa. Ala den sama di tan aini a ageisi paladeisi o si a ten di Gadu o meke a ‘nyun hemel anga a nyun goontapu’.

11. Enke fa Yesaya 65:18, 19 e soi, da fa a ageisi paladeisi di Yehofa seeka giw aini a ten ya e meke u fii?

¹¹ Ai bigi giw, we poolo. Yesaya be soi saide ‘u mu piisii tuutuu’ te u de aini a ageisi paladeisi. A Yehofa seefi seeka a paladeisi ya. (Leisi Yesaya 65:18, 19.) Neen meke a wani u yeepi den sama fu a goontapu ya fu komoto aini a ogii olikanisâsi fu Saatan di nai leli sama den tuu leli fu Gadu. Te we luku den belesi di we fende fu di u de aini a tuu leli, ná pikin bigi a sani ya e bigi giw. We fende taanga-sikin te we soi taawan den belesi di we fende.​—Yel. 31:12.

12. Fa a sani di sikiifi a Yesaya 65:20-24 e meke i fii? Saide ye fii so?

¹² Ai bigi giw te u luku a howpu di wi  abi, bika wi anga Yehofa a tuutuu mati. We poolo tu taki wi abi a howpu ya. Pakisei ala den sani di wo si anga den sani di wo du te u de aini a nyun goontapu. Beibel paamisi u taki: ‘Noiti moo wan potopoto pikin . . . o libi wantu dei namo, sama o go e libi langa.’ Wo ‘meke osu da wo tan aini, wo ‘paandi doloifigoon, da useefi o nyan den sani di u paandi’. U naw ‘wooko taanga fu soso’, bika wo de ‘pikin di Yehofa belesi’. Yehofa paamisi u wan libi pe ala sani o waka bun. Wo libi aini freide. Na a sani ya a be abi a pakisei gi libisama. ‘Fosi den kai’ en, aw sabi kaba san ala sama wani, da aw ‘gi ala sani di de a libi san den wani’.​—Yes. 65:20-24; Ps. 145:16.

13. San Yesaya 65:25 e taki fu a kengi di sama e kengi te den bigin dini Yehofa?

¹³ We libi na a wan. A omen sama di á be e dini Yehofa be abi manii di á bun. Ma a santa yeye yeepi den fu kengi den manii. (Leisi Yesaya 65:25.) A bunbun moiti den meke fu kengi den manii fu den di á be bun (Rom. 12:2; Efe. 4:22-24). A tuu taki den sama di e dini Gadu a sondu sama. Neen meke wo go e meke fowtu. Ma winsi fa we meke fowtu, toku Yehofa tyai ‘ala sowtu sama’ di lobi en kon a wan. Den sama ya lobi denseefi. A sani ya meke den e libi na a wan (Tit. 2:11). Na a moo taanga Gadu wawan poi du a wonduu ya.

14. Fa a sani di sikiifi a Yesaya 65:25 kon tuu te u luku a toli fu a baala aini a paragraaf?

¹⁴ Wan sama poi kengi en manii tuutuu? Pakisei a toli ya. Wan yonkuman di be e du omen ogii be koti sitaafu omen leisi di a be abi wan sani fu 20 yali. A be e libi wan tyobo libi. Den be poti en a sitaafu-osu fu di a be e fufuu wagi anga fu di a be e booko go aini sama osu. A be e du omen taa ogii tu. A be e de kabakaba fu feti anga ala sama di a be miti. Ma di a yee a tuu leli anga di a bigin go a den komakandaa, neen a kon fusutan taki a fende a sani di a be e suku. A be fende a okasi fu kon aini a ageisi paladeisi di Yehofa seeka giw. Baka di a dopu, a be e pakisei fa a sa wooko anga a sani di sikiifi a Yesaya 65:25. Aa be e du ogii anga sama moo. A be toon wan sama di be e libi bun anga taawan.

15. Saide u mu kai taa sama fu kon aini a ageisi paladeisi? Faw sa du a sani ya?

¹⁵ Yesaya 65:13 e bigin so: ‘Neen meke Masaa Yehofa taki.’ Vers 25 e kaba anga den wowtu ya: ‘A so Yehofa taki.’ Ala san a taki e kon tuu (Yes. 55:10, 11). U de aini a ageisi paladeisi nownow, bika Yehofa giw baala anga sisa di de enke u famii. Fu di u de aini a famii ya meke u man libi na a wan, winsi fa a goontapu ya ogii (Ps. 72:7). Neen meke u wani yeepi ala sama di u man fu kon aini a ageisi paladeisi. We du a sani ya te we yeepi sama fu toon Yesesi bakaman.​—Mat. 28:19, 20.

FAW SA YEEPI SAMA FU KON AINI A AGEISI PALADEISI

16. Saw yeepi sama fu kon aini a ageisi paladeisi?

¹⁶ Ala u sa du wan sani fu meke sama kon aini a ageisi paladeisi. U mu waka a Yehofa baka efu u wani du a sani ya. A nai dwengi sama fu kon aini a olikanisâsi fi en. Neenseefi e ‘hali’ sama kon neen (Yoh. 6:44; Yel. 31:3). Den bun-ati sama di sabi fa Yehofa lobi sama e toon en mati. Den sama ya kon sabi omen taa  moin manii fu Yehofa tu. Fa den bun manii fu u e hali sama kon aini a ageisi paladeisi?

17. Saw mu du fu meke sama wani kon aini a ageisi paladeisi?

¹⁷ Te we libi bun anga den baala anga sisa fu u, da a sani ya o meke taa sama wani kon aini a ageisi paladeisi. Te sama kon a den komakandaa fu u a fosi leisi, u wani den fii enke den sama fu Korente di be go a wan fu den komakandaa fu a ten de. Den be taki: ‘Gadu de anga u’ (1 Kor. 14:24, 25; Sak. 8:23). Neen meke u mu de kabakaba fu ‘libi na a wan anga taawan’.​—1 Tes. 5:13.

18. Saw meke sama wani kon aini a olikanisâsi fu u?

¹⁸ U mu meke moiti ala yuu fu si den baala anga sisa fu u enke fa Yehofa e si den. Efu u wani si den enke fa Yehofa e si den, u mu e poti pakisei a den bun manii fu den. Wa mu e luku a den fowtu di den e meke, bika dyonson den naw meke fowtu moo. Winsi wi anga den baala anga sisa fu wi abi sani, we soi den taki u lobi den. Bika Beibel taki: ‘U mu libi bun anga useefi, tyali mu e kisi u gi taawan, u mu e gi useefi paadon anga u hii ati’ (Efe. 4:32). A sani ya o meke taa sama wani kon aini a ageisi paladeisi, bika den wani taawan libi bun anga den. b

TAN AINI A AGEISI PALADEISI

19. (a) Enke fa a faki di den e kai ‘ Den gwe ma den daai kon baka’ e soi, da san son sama taki di den daai kon baka aini a ageisi paladeisi? (b) Saw mu de kabakaba fu du? (Luku a fowtow tu.)

¹⁹ Ná pikin bigi ai bigi giw taki u de aini  a ageisi paladeisi di Yehofa seeka giw aini a ten ya. Dei fu dei ai moin namo. Moo sama e kon aini ibii dei fu gafa Yehofa. Neen meke u wani soi Yehofa ala yuu taki ai bigi giw taki u de aini a ageisi paladeisi di a seeka giw. Ala sama di wani fende bun leli fu taanga den biibi, ala sama di wani piisii, ala sama di wani Yehofa yeepi den winsi fa den abi polobelema, mu kon aini a paladeisi ya. Noiti moo den mu komoto aini. Ma u mu de na ain, bika Saatan wani koli u fu u komoto aini a ageisi paladeisi (1 Peit. 5:8; Openb. 12:9). Wa mu meke a fende u koli. Meke u du ala saw man fu tan aini a paladeisi ya, bika a moin, a kiin, den sama di de aini e libi bun anga denseefi.