1. Fa son sama e fii te den e taki anga sama aini a peleikiwooko? (Luku a fowtow tu.)

 ENKE a foluku fu Yehofa, we peleiki gi sama fu di u lobi u Dda di de a hemel. U wani den kon sabi en. Ai switi gi son baala anga sisa te den e du a peleikiwooko, ma ai taanga gi son sama fu piisii te den e du a wooko ya. Saide? Son sama sen e kisi den fu taki anga sama. Taawan fu den e si enke den á sabi peleiki. Aa makiliki gi son sama fu go peleiki gi sama a den osu. Den e si enke den sama ati o boon a den. Winsi fa den baala anga sisa ya lobi Yehofa, toku ai taanga gi den fu taki anga sama di den á sabi. Ma fu di den sabi taki a peleikiwooko pelensipali, meke den e du ala san den poi fu du a wooko ya. Ná pikin piisii Yehofa e piisii anga den.

2. Saide ya mu lasi-ati efu ai taanga gii fu piisii te ye du a peleikiwooko?

² Ai taanga gii son yuu fu piisii te ye du a peleikiwooko? Efu a sani ya e miti i, ya mu lasi-ati. Tei nai fitoow iseefi, a sani ya e soi taki yu abi sakafasi. A sani ya e soi tu taki ya wani suku toobi anga sama. Nawan sama á lobi te taa sama ati e boon a den, moomoo te den e meke moiti fu du bun gi den. I Dda a hemel sabi fa ye fii,  neen meke aw yeepi i fu pasa ala den tesi di e miti i (Yes. 41:13). Aini a artikel ya, wo luku feifi sani di o yeepi u fu piisii te we du a peleikiwooko.

MEKE A WOWTU FU GADU YEEPI I

3. San be yeepi Yelemiya fu du a peleikiwooko?

³ Aini a ten di pasa, a Wowtu fu Gadu be e yeepi den sama di be e wooko gi en winsi fa a wooko di den be mu du be taanga. Luku a toli fu polofeiti Yelemiya. A be e feele di Yehofa be taigi en fu a go peleiki. A be taki: ‘Mia sabi taki baa, mi a wan boi ete’ (Yel. 1:6). San yeepi en fu bigin du a peleikiwooko? Den sani di Yehofa be taigi en be gi en taanga-sikin. A be taki: ‘A de enke wan faya di e boon aini mi bon. Mi weli fu holi en gi miseefi’ (Yel. 20:8, 9). Winsi fa a be taanga gi Yelemiya fu du a peleikiwooko, toku a bosikopu di a be mu paati be gi en a kaakiti di a be abi fanowdu fu du a wooko fi en.

4. Sai pasa te we leisi a Wowtu fu Gadu, daw teke ten pakisei saw leisi? (Kolosesama 1:9, 10)

⁴ Den baala anga sisa e fende taanga-sikin te den e leisi a Wowtu fu Gadu. Pawlesi be taigi den Kelesten fu Kolose aini a biifi di a be sende gi den taki efu den e meke moiti fu kon sabi Yehofa moo bun, a sani ya be o meke ‘sani waka bun aini ala san den e du’.Den be o ‘tyai denseefi enke fa Yehofa wani’ tu. (Leisi Kolosesama 1:9, 10.) A wooko di Pawlesi e taki fi en aini a tekisi ya na a peleikiwooko. Neen meke te we leisi a Wowtu fu Gadu daw teke ten pakisei saw leisi, a sani ya o meke a biibi fu u kon moo taanga. Aw yeepi u tu fu fusutan saide a pelensipali fu taki fu a Kownukondee fu Gadu.

5. Saw yeepi u fu fende wini te we leisi Beibel anga te we sutudeli?

⁵ Efu u wani fende wini fu a Wowtu fu Gadu, u mu e leisi en ala dei, u mu e sutudeli en tu. Boiti dati, u mu e teke ten pakisei saw leisi. Efii doo wan tekisi di taanga gii fu fusutan, i mu meke moiti fu fusutan san a wani taki. Efii wani fusutan a tekisi dii leisi, i sa luku a Saanantongo buku di den e kai Ondrosuku Bijbel moro fini​—Gi Yehofa Kotoigi. Te ye teke ten sutudeli a Wowtu fu Gadu, a sani ya o yeepi i fii biibi kon moo taanga  (1 Tes. 5:21). Efi ye biibi den sani di ye leli, yo moo piisii te ye taigi taawan sai leli.

SEEKA BUN GI A PELEIKIWOOKO

6. Saide u mu e seeka useefi bun gi a peleikiwooko?

⁶ Te ye seeka iseefi gi a peleikiwooko, a sani ya o yeepi i fi ya feele fu taki anga sama. Yesesi be e yeepi den bakaman fi en fu seeka denseefi fosi den go aini a peleikiwooko (Luk. 10:1-11). Fu di den be e wooko anga den sani di Yesesi be leli den, meke den be man du omen bun sani. Neen meke ná pikin piisii den be e piisii.​—Luk. 10:17.

7. Faw sa seeka useefi gi a peleikiwooko? (Luku a fowtow tu.)

⁷ Faw sa seeka useefi gi a peleikiwooko? U mu pakisei saw wani taki, daw taki a wan fasi di o makiliki gi a sama fu fusutan. U mu pakisei tu fa den sama na a pisi pe we peleiki e denki, daw luku fa wo piki den. Bakadati, te we taki anga wan sama, u mu meke moiti fu booko lafu gi en. U mu taki a wan switifasi tu.

8. Pawlesi taki u de enke gudu aini doti patu. San a be wani taki anga a sani ya?

⁸ Pawlesi be taigi den baala anga sisa taki: ‘A gudu ya, aini doti patu a de’ (2 Kor. 4:7). San na a gudu ya? Na a peleikiwooko di we du fu kibii sama libi (2 Kor. 4:1). San na a doti patu? A den sama di e peleiki a bun nyunsu fu Gadu. Aini a ten fu Pawlesi den sama di be e seli sani be e koboloiki wan doti patu fu poti sani enke nyanyan, win, anga moni. Yehofa e piisii te we du a peleikiwooko. A fu di ai yeepi u meke we fende a taanga-sikin di wi abi fanowdu fu man du a wooko ya.

BEGI YEHOFA FU ABI DEKI-ATI

9. Saw yeepi u fu wa feele sama te we peleiki? (Luku a fowtow tu.)

⁹ Son yuu ai taanga giw fu peleiki fu di we si enke den sama naw wani aliki. Saw yeepi u fu wa feele? Pakisei fa den apostel be e begi di den be mu go peleiki. Winsi fa den be e feele, toku den tan du a peleikiwooko. Den be akisi Yehofa fu a yeepi den fu tan ‘paati a wowtu fi en sondee feele’. Yehofa be piki a begi fu den  wantenwanten (Toli 4:18, 29, 31). Efu ai taanga giw fu peleiki fu di we feele sama, u mu akisi Yehofa fu a yeepi u. Akisi en fu a yeepi i fu a lobi di yu abi gi taawan kon moo taanga, bika a sani ya o yeepi i fi ya feele fu paati a bun nyunsu.

10. Fa Yehofa e yeepi u te we du a peleikiwooko? (Yesaya 43:10-12)

¹⁰ A Yehofa taki u mu peleiki gi sama, neen meke a paamisi u taki aw yeepi u. (Leisi Yesaya 43:10-12.) Luku fo fasi fa ai du a sani ya. A fosi wan, Yesesi e holibaka giw te we du a peleikiwooko (Mat. 28:18-20). Du fu tu, Yehofa e meke den engel yeepi u (Openb. 14:6). Du fu dii, ai giw a santa yeye fi en fu yeepi u fu membee den sani di u leli (Yoh. 14:25, 26). Du fu fo, a giw baala anga sisa di e giw taanga-sikin. Fu di Yehofa anga den baala anga sisa e yeepi u, meke we tan du a peleikiwooko.

FITI ISEEFI A DEN SAMA

11. Faw sa fende moo sama te we du a peleikiwooko? (Luku a fowtow tu.)

¹¹ Ye fii booko-saka te a wantu sama namo ye miti a osu? Efu a so ye fii, akisi iseefi taki: ‘Pe den sama fu a pisi pe mi e peleiki de?’ (Toli 16:13) ‘Den go a wooko efuso den go bai sani?’ Efii nai miti tyaipi sama a osu, kande i sa peleiki gi den sama di ye miti a sitaati. Wan baala den e kai Joshua taki: ‘Mi lobi peleiki a wowoyo anga den peesi pe omen sama e pasa.’ En anga en uman Bridget be e miti moo sama a osu te den be e peleiki a neti anga te den be e telefon sama sonde bakadina.​—Efe. 5:15, 16.

12. Fa wo du sabi san wan sama e biibi efuso sai gi en booko-ede?

¹² Efii taki anga wan sama neen aa wani aliki, meke moiti fu sabi san ai biibi efuso sai gi en booko-ede. Joshua anga Bridget be e taki fu den akisi fu den talakitaati anga sama. Te den be e taki fu a talakitaati di den e kai Fa yu e si a Beibel? da den e taki: ‘Son sama e si a Beibel enke a Wowtu fu Gadu, ma sowan nai si en so. Fa ye denki fu a toli ya?’ Efii du sani na a fasi ya, yo man bigin wan takimakandaa.

13. Saide u sa taki u doo a maiki fu u winsi fa son sama nai wani aliki u? (Odo 27:11)

 ¹³ Winsi fa son sama nai wani aliki u te we peleiki, toku u doo a maiki fu u. Saide? Bika u du a sani di Yehofa anga en Manpikin wani u du (Toli 10:42). Winsi u nai miti sama a osu efuso sama di wani aliki, toku u sa piisii, bika we meke u dda a hemel piisii.​—Leisi Odo 27:11.

14. Saide u sa piisii te wan baala efuso wan sisa fende wan sama di wani aliki?

¹⁴ U sa piisii te wan baala efuso wan sisa fende wan sama di wani aliki. Den Wakititolen e maiki a peleikiwooko di we du anga a suku di sama e suku wan pikin di lasi. A omen sama be e suku a pikin ya. Na ala peesi den be e suku en tu. Di den fende en, a ná a sama di fende a pikin wawan be e piisii, ma ala den taa sama be e piisii tu. A so a de anga a yeepi di we yeepi sama fu toon Yesesi bakaman. Wi abi ala den baala anga sisa aini a kemeente fanowdu fu peleiki gi den sama na a pisi pe we tan. Na ala we piisii te wan sama bigin kon a den komakandaa.

TAN POTI PAKISEI NA A LOBI DII LOBI YEHOFA ANGA TAA SAMA

15. Fa a sani di sikiifi a Mateyesi 22:37-39 o yeepi u fu piisii te we du a peleikiwooko? (Luku a fowtow a fesise fu A Wakititolen.)

¹⁵ Moo we du a peleikiwooko, moo wo kon lobi Yehofa anga taa sama. (Leisi Mateyesi 22:37-39.) Pakisei fa Yehofa e piisii te ai si fa we du a peleikiwooko. Ai si fa sama e piisii tu te den bigin sutudeli Beibel. Holi a pakisei taki efu den sama di we peleiki gi aliki u, neen den tan dini Yehofa, den o fende teego libi.​—Yoh. 6:40; 1 Tim. 4:16.

16. Saw yeepi u fu piisii te we du a peleikiwooko winsi wa poi komoto a osu?

¹⁶ Kande ya poi komoto a osu fu dii siki efuso fu di wan taa sani e tapu i. Efu sowan sani e miti i, poti pakisei a den sani dii sa du fu soi taki i lobi Yehofa anga taa sama. Na a ten di a COVID-19 siki be paati a hii goontapu, Samuel anga Dania á be poi komoto a osu. Winsi fa a be taanga gi den, toku den be e peleiki anga telefon, den be e sikiifi biifi tu. Boiti  dati, den be e sutudeli Beibel anga sama a zoom. Te Samuel be e go a dataa fu luku fa ai go anga a kanker fi en, a be e peleiki gi den sama di a be e miti. A taki: ‘Te sani e miti u, a sani ya sa meke we feele. A sa swaki u biibi tu. Ma u sa piisii te we dini Yehofa.’ Aa langa seefi neen Dania siki. A dii mun langa aa be poi du nawan sani. Sigisi mun langa a be de aini lolo sutuu. A taki: ‘Mi be e puubei fu du san mi poi. Mi be e peleiki gi a sesite di be e kon luku mi. Mi be e peleiki gi den sama di be e tyai sani kon gi mi a osu tu. Boiti dati, mi be e peleiki gi wan uman a telefon di be e wooko a wan apoteiki.’ Winsi fa Samuel anga Dania á be poi du sani enke fosi moo, toku den be e du ala san den poi fu piisii anga san den poi du.

17. Faw sa fende wini fu den sani di u taki aini a artikel ya?

¹⁷ Meke moiti fu wooko anga ala den feifi sani di u taki aini a artikel ya. Den sani di u luku ya, de enke den sani di ye poti aini i patu te ye boli. Efii poti ala sani dii mu poti aini a patu fii, ná pikin switi a nyanyan fi yo switi. Neen meke efu we wooko anga ala den sani di u taki aini a artikel ya, aw moo makiliki giw fu tan du a peleikiwooko, winsi u nai miti tyaipi sama a osu. Wo moo piisii te we du a wooko ya tu.