1. Fa Yehofa be seeka a olikanisâsi fi en na a ten fu den fosi Kelesten?

 TE YEHOFA gi a foluku fi en wan wooko fu du, ai wani den du en bun (1 Kor. 14:33). Gadu wani u peleiki a bun nyunsu na a hii goontapu (Mat. 24:14). Yehofa poti Yesesi enke fesiman fu a wooko ya. Yesesi seeka sani fu du a wooko ya enke fa Yehofa wani. A omen kemeente be opo na a ten fu den fosi Kelesten, neen meke den be poti owluman fu teke fesi aini den kemeente ya (Toli 14:23). A den apostel anga wantu taa owluman di be de a Yelusalem be e teke bosoloiti gi a olikanisâsi fu Yehofa a ten de. Ala den kemeente be e wooko anga san den taki (Toli 15:2; 16:4). A fu di den baala anga sisa be e du den sani di den baala be taigi den, meke ‘a sani ya taanga a biibi fu den kemeente. Dei fu dei moo sama be e toon Yesesi bakaman’.​—Toli 16:5.

2. Fa Yehofa tii a foluku fi en fanafu a yali 1919? Fa a gi den leli?

² Yehofa e seeka a olikanisâsi fi en te anga now. Fanafu a yali 1919, Yesesi poti wan kulu salufu baala fu seeka a peleikiwooko anga fu giw leli (Luk. 12:42). a A de kiin fu  si taki Yehofa e belesi a wooko fu den.​—Yes. 60:22; 65:13, 14.

3-4. (a) Sowtu wini wo fende te sani seeka bun? (b) San wo luku aini a artikel ya?

³ Efu sani á be seeka bun, wa be o poi du a wooko di Yesesi sende u fu du (Mat. 28:19, 20). Efu den baala á be seeka sani fu den kemeente be e peleiki na a pisi fu den, ala sama be o go e peleiki a pe den wani. A sani ya be sa meke we peleiki a wan peesi namo. I sabi wantu taa fasi fa we fende wini te sani seeka bun?

⁴ Leti enke fa Yesesi be e seeka den bakaman fi en a pisiten di a be de a goontapu, a letiso ai seeka a foluku fu Gadu aini a ten ya tu. Aini a artikel ya, wo luku fa Yesesi be du sani anga faw sa waka neen baka. Wo luku tu faw sa soi taki we fitoow a olikanisâsi fu Yehofa.

A OLIKANISÂSI FU YEHOFA E WAKA A YESESI BAKA

5. San a wan fasi fa we soi taki we waka a Yesesi baka? (Yohanisi 8:28)

⁵ Yesesi Dda be e leli en san a mu du anga san a mu taki. A olikanisâsi fu Yehofa e waka a Yesesi baka, bika den e wooko anga a Wowtu fu Gadu fu yeepi u fu sabi san bun anga san á bun. Den e yeepi u fu sabi faw mu tyai useefi tu. (Leisi Yohanisi 8:28; 2 Tim. 3:16, 17) Na ala yuu den e membee u fu leisi a Wowtu fu Gadu anga fu du den sani di we leisi. Sowtu wini we fende te we du a sani ya?

6. San a wan fu den moo pelensipali fasi fa we fende wini te we sutudeli a Beibel?

⁶ Ná pikin wini we fende te we wooko anga den buku fu u fu sutudeli Beibel. We maiki den leli fu Beibel anga den sani di a olikanisâsi e soi u. Te we si taki a fasi fa a olikanisâsi e tii wi e kai anga den leli fu Beibel, a sani ya e meke we moo fitoow a olikanisâsi fu Yehofa.​—Rom. 12:2.

7. Sowtu nyunsu Yesesi be e peleiki? Fa a olikanisâsi fu Yehofa e waka neen baka?

⁷ Yesesi be e peleiki ‘a bun nyunsu fu a Kownukondee fu Gadu’ (Luk. 4:43, 44). Yesesi be taigi den disipel fi en fu peleiki fu a Kownukondee ya tu (Luk. 9:1, 2; 10:8, 9). Aini a ten ya ala sama di de aini a olikanisâsi fu Yehofa e peleiki fu a Kownukondee ya winsi pe den de efuso winsi sowtu faantiwowtu den abi.

8. Sowtu gaandi wi abi?

⁸ A wan gaandi wi abi fu taki anga taawan fu a Kownukondee fu Gadu. A ná ala sama abi a gaandi ya. Di Yesesi be de a goontapu, aa be teke sama di be e du ogii fu peleiki (Luk. 4:41). Fosi wan sama bigin peleiki anga den Yehofa Kotoigi, a mu e libi enke fa Yehofa wani. We soi taki we teke a gaandi ya fu bigi te we taki anga taa sama fu a Kownukondee fu Gadu a iniiwan okasi. U wani de enke Yesesi, neen meke we du ala saw man fu peleiki gi taawan anga fu leli den a tuu.​—Mat. 13:3, 23; 1 Kor. 3:6.

9. Fa a olikanisâsi fu Yehofa e meke sama sabi a nen fi en?

⁹ Yesesi meke sama kon sabi a nen fu Gadu. Di a be e begi en Dda a hemel, a be taki: ‘Mi meke den kon sabi i nen’ (Yoh. 17:26). Leti enke Yesesi, a olikanisâsi fu Yehofa e du ala san a poi fu yeepi sama fu kon sabi a nen fu Gadu. Di a olikanisâsi meke a Nyun-Grontapuvertaling, den poti a nen fu Gadu a den peesi pe a be de baka. Nownow a hii Beibel efuso son pisi fi en de aini moo enke 270 tongo. Efii wani sabi moo sani fu a nen  fu Gadu, i sa luku kapitel 1 anga 2 fu a Saanantongo buku di den e kai ‘Studeri Gado Wortu moro fini’. Kapitel 2 e soi saide a olikanisâsi fu Yehofa poti a nen fu Gadu 237 leisi aini den Giiki buku fu Beibel.

10. San we leli fu a sani di a uman fu Miyanmar taki?

¹⁰ Leti enke Yesesi, u wani du ala saw man fu yeepi sama fu kon sabi a nen fu Gadu. Baka di wan gaandi uman fu Miyanmar di abi 67 yali kon sabi a nen fu Gadu, neen a bigin kee. A taki: ‘A disi na a fosi leisi aini mi libi di mi yee taki Gadu nen a Yehofa. A sani ya na a moo pelensipali sani di mi leli te anga now.’ A toli ya e leli u taki te u kon sabi a nen fu Gadu u hii libi e kengi.

TAN SOI TAKI YE FITOOW A OLIKANISÂSI FU U

11. Fa owluman sa soi taki den e fitoow a olikanisâsi fu Yehofa? (Luku a fowtow tu.)

¹¹ San a wan fasi fa owluman sa soi taki den e fitoow a olikanisâsi fu Gadu? Te a olikanisâsi e soi den owluman fa den sa du son sani, den mu du ala san den poi fu wooko anga den sani di den e soi den. Den nai soi den namo fa den mu gi leli efuso fa den mu begi gi a kemeente, ma den e soi den fa den mu solugu den sikapu tu. Efu den owluman e wooko anga den sani di a olikanisâsi e soi den, den baala anga sisa o fii taki Yehofa lobi den. Den o fii taki ai booko en ede anga den tu.

12. (a) Saide u mu e wooko makandaa anga den baala di e teke fesi? (Hebrewsama 13:7, 17) (b) Saide u mu e poti pakisei a den bun manii fu den baala di e teke fesi?

¹² U mu de kabakaba fu aliki te den owluman e poti wi a pasi. Te we du a sani ya, aw moo makiliki gi den baala fu du den wooko. Beibel e giw taanga-sikin fu aliki den sama di e teke fesi. Boiti dati, a taki u mu e saka useefi a den ondoo. (Leisi Hebrewsama 13:7, 17.) Son yuu a sa taanga giw fu du a sani ya. Saide? Bika den baala ya a sondu sama. Efu we poti pakisei a den fowtu di den e meke pe fu u poti pakisei a den bun manii fu den, u be o meke sani moo makiliki gi Saatan, a feyanti fu u. Saide u sa taki a sani ya? Bika efu u be o du a sani ya, u be o soi taki u nai fitoow a olikanisâsi fu Yehofa. Saw sa du fu soi taki den sani di den feyanti fu we taki a ná tuu?

NÁ MEKE SAMA TAPU I FU FITOOW A OLIKANISÂSI FU YEHOFA

13. Fa den feyanti fu Gadu e meke sama si a olikanisâsi fi en?

¹³ Den feyanti fu Gadu wani sama si den bun sani di a olikanisâsi fu Yehofa e du enke sani di á bun. Wan fu den sani ya na a fasi fa Yehofa wani u tyai useefi. Beibel e leli u taki u mu kiin. Neen meke we meke moiti fu u sikin de kiinkiin ala yuu. Yehofa wani u tyai useefi a wan fasi di fiti. A fasi fa we dini en mu e kai anga san Beibel e taki tu. Boiti dati, efu wan sama e tan tyai enseefi a wan fasi di á fiti, da Yehofa e si en enke wan sama di á kiin. Neen meke den o puu sowan sama aini a kemeente (1 Kor. 5:11-13; 6:9, 10). Fu di we du san Yehofa taki, meke den feyanti fu u taki we suku fini, wa lobi sama.

14. Sama e paati den lei di sama e taki fu a olikanisâsi fu Yehofa?

¹⁴ U mu fusutan sama wani du ogii anga u. A Saatan Didibii e meke sama paati lei fu a olikanisâsi fu Yehofa. Neen na ‘a dda fu lei’ (Yoh. 8:44; Gen. 3:1-5).  Neen meke wa mu dyombo te Saatan e meke den sama di e holibaka gi en e paati lei fu a olikanisâsi fu Yehofa. A sani ya be pasa na a ten fu den fosi Kelesten tu.

15. San den keliki fesiman be du anga Yesesi anga den bakaman fi en?

¹⁵ Noiti Yesesi du wan sondu. A omen wonduu a be e du. Toku Saatan be e meke sama paati omen lei fu Yesesi. Den keliki fesiman be e taigi sama taki na a tiiman fu den takuu yeye be gi Yesesi makiti ‘fu puu takuu yeye a sama tapu’ (Malik. 3:22). Di Yesesi be de fu dede, den keliki fesiman be taki a kosi Gadu. Den be gi a foluku taanga-sikin fu taki Yesesi be mu dede (Mat. 27:20). Bakaten di den bakaman fu Yesesi be e paati a bun nyunsu, den feyanti fu den be ‘du sani fu meke den taa kondee sama ati boon’ a den bakaman fu Yesesi (Toli 14:2, 19). A Saanantongo Wakititolen fu 1 december 1998 be taki san a tekisi fu Toli fu den apostel 14:2 wani taki. A be taki: ‘Den feyanti fu den Dyu á be wani aliki a bosikopu fu den Kelesten. Ma dati a be sai den, den be wani poli den Kelesten nen tu. Den be e taki omen sani fu den fu sama be sa buuse den.’

16. Saw mu holi a pakisei te u yee sama e paati lei fu Yehofa Kotoigi?

¹⁶ Saatan e tan paati den lei fi en aini a ten ya. ‘Ai koli sama a hii goontapu’ (Openb. 12:9). Efi ye yee den e paati lei fu a olikanisâsi fu Yehofa efuso fu den baala di e teke fesi, pakisei fa den feyanti fu Gadu be e libi anga Yesesi anga den bakaman fi en. Yesesi be taki sama be o libi ogii anga den sama di e dini Yehofa. Den be o go e lei gi den. Na aseefi sani ya e pasa aini a ten ya (Mat. 5:11, 12). Efu u  sabi sama e paati den lei ya, u naw biibi den. Saw mu du fu wa biibi den lei ya?

17. Saw mu du fu Saatan á fende u koli anga den lei fi en? (2 Timotiyesi 1:13) (Luku a faki di den e kai ‘ Saw mu du te u yee wan lei toli’.)

¹⁷ Ná biibi den lei di sama e paati. Pawlesi soi u kiin saw mu du te u yee wan fu den lei fu Saatan. A be taigi Timotiyesi ‘fu taigi son sama taki den á mu . . . aliki lei toli di e gi Gadu polinen’ (1 Tim. 1:3, 4; 4:7). Pakisei a toli ya, wan beibi sa piki wan sani a doti poti aini en mofu, ma wan sama di e fusutan sani kaba naw du a sani ya, bika a sabi taki a sa siki. U nai biibi lei toli, bika u sabi sama e paati den lei ya. Ma we aliki den ‘soifili leli’, bika den leli ya a tuu.​—Leisi 2 Timotiyesi 1:13.

18. Faw sa soi taki we fitoow a olikanisâsi fu Yehofa?

¹⁸ Aini a artikel ya, u luku dii fasi fa a olikanisâsi fu Yehofa e waka a Yesesi baka. Te ye sutudeli Beibel, meke moiti fu si wantu taa fasi fa a olikanisâsi fu Yehofa e soi taki ai buuse den lei fu Saatan leti enke Yesesi. Yeepi taawan aini a kemeente fu meke den moo fitoow a olikanisâsi fu Gadu. Soi taki ai bigi gii taki i de aini a olikanisâsi ya. I sa du a sani ya te ye dini Yehofa anga i hii ati anga te ye wooko makandaa anga a olikanisâsi di ai koboloiki fu meke sani waka enke fa a wani (Ps. 37:28). Meke u tan soi taki ai bigi giw taki u de aini a olikanisâsi fu Yehofa.