1, 2. San be miti Pawlesi anga Silas di den be de a Filipi? (Luku a fowtow na a bigin.)

PAKISEI san be miti Pawlesi anga Silas. Den tu zendeling ya be de aini a moo dunguu kambaa fu wan sitaafu-osu na a foto Filipi. Den be fasi den futu a wan udu. Boiti dati den be fon den te den baka be e hati den (Toli 16:23, 24). A dei de wantu ogii-ati sama hali Pawlesi anga Silas tyai go na a wowoyo fu Filipi. Baka dati den leisi sitaafu gi den, den piiti den kosi, neen den naki den anga tiki (Toli 16:16-22). Den á libi bun anga den seefiseefi! Pawlesi a be wan Romesama, neen meke den be mu koti kuutu gi en a wan leti fasi. *​—Luku a maiki a ondoo.

 ² Kande di Pawlesi be de a dunguu-osu, a be e pakisei den sani di miti en a dei de. Kande a be e pakisei den sama di e tan a Filipi tu. Nawan Dyu keliki osu be de aini Filipi enke den taa foto di Pawlesi be go. Neen meke a koosube fu wan liba di be de a doose fu a foto, den Dyu be e go dini Gadu (Toli 16:13, 14). Aini a ten de, tin manengee di be de Dyu be mu de aini wan foto fosi den be sa meke wan Dyu keliki aini a foto de. Kande den á be doo a nombuu de. Den sama fu Filipi be e fii denseefi fu di den a be Romesama (Toli 16:21). Pawlesi anga Silas a be Dyu. Kande neen meke den á be e denki taki den be sa de Romesama tu. Wi á sabi fa sani waka pilisisi, ma u sabi taki den á be kuutu den a wan leti fasi di den poti den a dunguu-osu.

3. Saide Pawlesi be sa buuya di den poti en a duungu-osu? Ma san a du di den sani ya miti en?

³ Kande Pawlesi be e pakisei san be meke a go a Filipi. Wantu mun a fesi, Pawlesi be de na a taa se fu a Egeyus Se, aini Pikin Asiya. Di a be de ape a santa yeye tapu en omen leisi fu peleiki na a pisi de. A be gei enke a santa yeye be wani a go a wan taa peesi (Toli 16:6, 7). Ma pe a be wani a go? Di Pawlesi be de a Trowas wan man taigi en aini wan fisyun taki: „Kon yeepi wi a Masedoniya.” Yehofa be soi Pawlesi kiin pe a be wani a go. Neen meke Pawlesi go wantenwanten a Masedoniya. (Leisi Toli 16:8-10.) Ma fa sani waka baka dati? Di Pawlesi go a Masedoniya a á teke langa, neen den poti en a dunguu-osu. Saide Yehofa meke a sani ya miti en? On langa a be o de a dunguu-osu? Winsi Pawlesi be e pakisei den sani ya, tokuso en biibi á be kon swaki. A be e dini Yehofa anga piisii ete. En anga Silas bigin „begi. Den be e singi gafa Gadu” tu (Toli 16:25). A freide fu Gadu be yeepi den fu den á buuya.

4, 5. (a) Saide a sani di be miti Pawlesi sa miti u tu? (b) Saide u sa taki sani be waka a wan fasi di Pawlesi á be denki?

⁴ A sani di miti Pawlesi miti i wan leisi kaba? Kande i begi Gadu fu a soi i san i mu du, neen i du san en Wowtu taki. Kande i be si enke a santa yeye be e tii yu. Ma baka dati a omen sani miti i. Kande i be abi fu kengi a fasi fa i be e libi (Peleikiman 9:11). Kande te yu e denki a toli ya, yu e akisi iseefi saide Yehofa e fika son sani fu e pasa. San o yeepi i fu holidoo efuso fitoow Yehofa den ten de? Efu u wani sabi a sani ya, da u mu luku fa sani waka anga Pawlesi anga Silas bakaten.

⁵ Di Pawlesi anga Silas be e singi, a omen sani di den á be denki pasa. A fosi sani a wan gaan seke-doti, neen den doo fu a sitaafu-osu opo. Ala den bui fu den sitaafuman losi. Baka dati Pawlesi tapu a man di be holi wakiti na a dunguu-osu fu a á kii enseefi. A man ya anga en hii osufamii dopu. A taa dei den edeman fu a foto sende sama fu puu Pawlesi anga Silas a dunguu-osu. Den begi den fu den komoto  aini a foto. Di den edeman yee taki Pawlesi anga Silas a Romesama, den fusutan taki den be meke wan gaan fowtu. Neen meke denseefi tyai den puu aini a foto. Ma fosi Pawlesi anga Silas gwe den be wani gi Lidiya siibun. A sisa ya á be dopu langa ete. Den koboloiki a okasi de fu gi den baala fu Filipi taanga-sikin (Toli 16:26-40). A wan satu pisiten ala den sani ya pasa.

6. San wi o luku aini a artikel ya?

⁶ San a toli ya e leli u? Yehofa man du sani di wi á be denki, neen meke wi á mu booko wi ede te tesi e miti u. A sani ya be gi Pawlesi taanga-sikin. Bika a be gi den Kelesten aini Filipi taanga-sikin fu den á booko den ede anga nawan sani, ma den mu meke moiti fu suku a freide fu Gadu. Aini a artikel ya wi o taki fu den sani di Pawlesi sikiifi a Filipisama 4:6, 7. (Leisi.) Wi o luku wantu toli fu Beibel tu di e soi fa Yehofa be du sani di sama á be denki. Boiti dati wi o luku fa a freide fu Gadu sa yeepi u fu holidoo anga fu fitoow Yehofa anga u hii ati te tesi e miti u.

7. San Pawlesi be wani leli den baala fu Filipi anga a biifi di a sikiifi gi den? San wi e leli fu a sani di Pawlesi sikiifi aini a biifi ya?

⁷ Di den baala fu Filipi leisi a biifi di Pawlesi sende gi den, gaanse fu den be musu e pakisei san be miti Pawlesi anga fa Yehofa yeepi en a wan fasi di den á be denki. San Pawlesi be wani leli den anga a biifi di a sikiifi gi den? A be wani leli den taki den á mu booko den ede. Den mu begi, da den o fende a „freide fu Gadu di libisama á poi fusutan”. San a sani ya wani taki? Pawlesi be wani soi den taki a „freide fu Gadu” e wooko a wan foondoo fasi moo san wi e denki. Winsi wi á sabi fa fu losi den polobelema fu u son leisi, Yehofa sabi. A man du sani di wi á be denki.​—Leisi 2 Peitilisi 2:9.

8, 9. (a) Sowtu bun sani be pasa, winsi fa den á be libi bun anga Pawlesi a Filipi? (b) Saide den baala fu Filipi be sa biibi den sani di Pawlesi be sikiifi?

⁸ A biifi fu Pawlesi be musu gi den baala fu Filipi taanga-sikin te den be e denki san Yehofa be du gi den aini den tin yali di pasa. Winsi Yehofa be fika den sama fu Filipi fu du ogii anga Pawlesi anga Silas, tokuso na a sani ya meke ’lanti gi den pasi fu peleiki’ (Filipisama 1:7). Den edeman fu Filipi á be abi a deki-ati fu du ogii anga a nyun Kelesten kemeente moo. Kande  a fu di Pawlesi taki en a wan Romesama, meke a disipel Lukasi be man tan a Filipi baka di Pawlesi anga Silas be gwe. Lukasi be man yeepi a nyun Kelesten kemeente a Filipi.

⁹ Di den baala fu Filipi leisi a biifi fu Pawlesi, den be fusutan taki a ná koli Pawlesi be e koli den. A omen tesi be miti Pawlesi. Di a be e sikiifi a biifi ya, a be de enke sitaafuman neen osu a Rome. Ma toku a be soi taki a be abi „a freide fu Gadu”.​—Filipisama 1:12-14; 4:7, 11, 22.

10, 11. San u mu du te wi e booko wi ede anga wan polobelema? San u mu holi a pakisei?

¹⁰ San o yeepi u fu wi á ’booko wi ede anga nawan sani’, ma fu abi „a freide fu Gadu”? A biifi di Pawlesi sikiifi gi den Kelesten fu Filipi e soi taki a sani di o yeepi u te wi abi polobelema, a begi. Neen meke te wi abi booko-ede, u mu e begi. (Leisi 1 Peitilisi 5:6, 7.) Te i begi Yehofa, i mu biibi anga i hii ati taki ai booko en ede anga i. Gi en daa fu ala den bun sani di a du gi i. Noiti i mu feegete taki Yehofa „man du moo san wi e begi en efuso san wi e denki”.​—Efeisesama 3:20.

¹¹ Leti enke Pawlesi anga Silas, wi o foondoo te u si fa Yehofa yeepi u. Kande a ná o du wan gaan wonduu fu yeepi u, ma a o gi u san wi abi fanowdu (1 Korentesama 10:13). A sani ya á wani taki u mu sidon luku fu Yehofa yeepi u namo, ma te u begi, useefi mu meke moiti tu (Romesama 12:11). Den sani di wi e du, o soi efu u wani Yehofa yeepi u tuutuu. A o belesi a moiti di u meke. Wi á mu feegete taki Yehofa man du moo enke san wi e begi en efuso san wi e denki. Son leisi ai du sani di wi á be denki. Meke u luku wantu toli fu Beibel di e soi fa Yehofa du sani di sama á be denki. Den toli ya o yeepi u fu fitoow Yehofa.

12. (a) San Kownu Heskiya du di Kownu Sanherib kon fu feti anga Yelusalem? (b) San wi e leli fu a fasi fa Yehofa yeepi den?

¹² Beibel e taki fu omen sani di Yehofa du di sama á be denki. Wan fu den leisi di Yehofa du a sani ya, a di Sanherib a kownu fu Asiriya, be teke Yuda anga ala den foto fi en abaa, boiti Yelusalem. A ten de a Heskiya be e tii Yuda (2 Kownu 18:1-3, 13). Bakaten Sanherib be e go feti anga Yelusalem. San Kownu Heskiya du? A fosi sani di a du, a begi a begi Yehofa fu yeepi en. A akisi Yesaya a polofeiti fu Yehofa san a mu du (2 Kownu 19:5, 15-20). Boiti dati, Heskiya du sani anga koni. A pai Sanherib a moni di a be wani (2 Kownu 18:14, 15). Te fu kaba Heskiya seeka sani fu den sama fu a foto abi san den abi fanowdu te Sanherib be o lontu a foto (2 Koloniki 32:2-4). Fa sani waka? Yehofa sende wan engel fu kii 185.000 suudati fu Sanherib aini wan kodo neti. Heskiya  seefi á be sabi taki Yehofa be o du a sani de.​—2 Kownu 19:35.

13. (a) San wi e leli fu a libi fu Yowsefu? (b) Sowtu sani di Sala á be denki, Yehofa du gi en?

¹³ Pakisei a toli fu a yonkuman di den e kai Yowsefu. Di a be de a dunguu-osu, noiti a be denki taki wan dei a be o toon du fu tu tiiman fu Egepte, baka a kownu. A á be sabi tu taki Yehofa be o meke a yeepi en famii fu den á dede, di wan gaan angiiten be o de (Genesesi 40:15; 41:39-43; 50:20). A sani di Yehofa du be bigi moo san Yowsefu be pakisei. Pakisei a afo fu Yowsefu di den e kai Sala. I si enke gaandi Sala be denki taki Yehofa be o gi en wan manpikin, boiti a manpikin di a uman saafu fi en be meke? A meke di Sala meke Isaki, a wan sani di noiti a be denki.​—Genesesi 21:1-3, 6, 7.

14. San u mu biibi taki Yehofa o du?

¹⁴ U sabi taki Yehofa ná o du wonduu fu puu ala den booko-ede fu wi aini a  ten ya. Wi á mu si enke Yehofa musu fu du sani gi u fu meke u libi kon moo bun. Ma u sabi taki aini Beibel ten Yehofa be yeepi den sama di be e dini en, a wan foondoo fasi. Yehofa á kengi. (Leisi Yesaya 43:10-13.) Neen meke wi e fitoow en. U sa biibi taki a o gi wi a kaakiti di wi abi fanowdu fu du san a wani (2 Korentesama 4:7-9). San a toli fu Heskiya, Yowsefu anga Sala e leli u? Winsi san e miti u, Yehofa o yeepi u fu holidoo efu wi e biibi en.

15. San o yeepi u fu abi a freide fu Gadu winsi sowtu nowtu wi abi?

¹⁵ San o yeepi u fu abi a „freide fu Gadu” winsi sowtu nowtu wi abi? U mu meke moiti fu wi anga Yehofa de mati. A di Yesesi dede gi u meke wi anga Yehofa poi de mati. A dede di Yesesi dede gi u, a wan fu den gaan sani di Yehofa du. A di Yesesi dede gi u meke Yehofa e gi u paadon. Na a dede fu Yesesi e yeepi u fu abi wan kiin kosensi. Boiti dati ai yeepi u fu kon koosube a Yehofa.​—Yohanisi 14:6; Yakowbesi 4:8; 1 Peitilisi 3:21.

16. San o pasa efu wi abi „a freide fu Gadu”? Gi wan ageisitoli.

¹⁶ San o pasa efu wi abi „a freide fu Gadu di libisama á poi fusutan”? Beibel taki a o „kibii” wi ati anga u fusutan (Filipisama 4:7). A wowtu „kibii” aini Giikitongo, a wan wowtu di suudati be sabi. A wani taki wan kulu suudati di be mu luku wan foto fu feyanti á kon du ogii anga den sama fu a foto. A wan kulu suudati be e koti wakiti gi a foto Filipi. Neen meke den sama fu a foto be sa siibi bun a neti sondee fu booko den ede taki sama o kon du ogii anga den. Efu wi abi „a freide fu Gadu” useefi ná o go e booko wi ede. U sabi taki Yehofa e booko en ede anga u. A wani sani waka bun anga u (1 Peitilisi 5:10). A sani ya o yeepi u fu wi á booko wi ede tumisi te wi abi polobelema.

17. San o yeepi u fu fitoow Yehofa na a ten fu a gaan banowtu?

¹⁷ Dyonson a gaan banowtu o kon a hii goontapu (Mateyesi 24:21, 22). Wi á sabi pilisisi san o pasa anga wi. Ma toku wi á mu booko wi ede tumisi anga a ten de. Wi á sabi san Yehofa o du, ma u sabi u Gadu Yehofa. U sabi san a du gi den sama di be e dini en aini a ten di pasa. U sabi taki winsi san e pasa, Yehofa o meke den sani di a abi a pakisei pasa. A man du sani di wi á denki fu meke san a abi a pakisei pasa. Neen meke ibiiwan leisi te Yehofa e yeepi u, a wan nyun fasi fa wi e si taki ’a freide fu Gadu bigi moo san libisama poi fusutan’.