1, 2. (a) San sa meke wan sama akisi Yehofa „on langa” a mu wakiti ete? (b) Saide wi e fende taanga-sikin te u pakisei den sama di be e dini Yehofa a fositen?

POLOFEITI Yesaya anga Habakuk be akisi Yehofa taki: „Yehofa, on langa?” (Yesaya 6:11; Habakuk 1:2) Di Kownu David sikiifi Psalm 13, a poti aseefi akisi ya (Psalm 13:1, 2). Boiti dati di Yesesi si taki den sama di be de anga en á be e biibi, a akisi taki: „On langa mi mu de anga wi ete?” (Mateyesi 17:17) Kande son leisi wi e akisi useefi a sani ya tu.

² San sa meke wan sama akisi Yehofa „on langa” a mu wakiti ete? Son leisi a te wan sama du wan sani anga u di á fiti, te u siki efuso te wi e kon gaandi, anga te wi abi booko-ede fu di ’a libi taanga’ (2 Timotiyesi 3:1). Son leisi na a fasi fa den sama di wi  anga den e lolo e tyai denseefi. Winsi san e meke wi e poti a akisi ya, wi e fii bun fu di u sabi taki Yehofa á be sitaafu efuso bali den sama di be poti a akisi ya a fositen.

3. San sa yeepi u te tesi e miti u?

³ San o yeepi u te tesi e miti u? Yehofa be meke Yakowbesi sikiifi taki: „Baala, neen meke u mu pasensi te enke Masaa kon” (Yakowbesi 5:7). A sani ya e soi taki ala u mu abi pasensi. Ma, san a pasensi? Fa u sa soi taki wi abi pasensi?

4, 5. (a) San a wani taki fu abi pasensi? (b) San Yakowbesi taki fu pasensi? (Luku a fowtow na a bigin.)

⁴ Beibel e soi taki na a santa yeye fu Gadu e yeepi sama fu abi pasensi. Efu Gadu á yeepi u, a o taanga gi wi enke sondu libisama fu abi pasensi te sani nai go bun. Pasensi a wan kado di Gadu gi u. Te wi abi pasensi, a wan fasi fa wi e soi Yehofa anga taawan taki u lobi den. Efu u ná abi pasensi, u ná o poi soi taawan taki u lobi den (1 Korentesama 13:4; Galasiyasama 5:22). San a pasensi? Wan sama di abi pasensi e piisii, winsi san e miti en (Kolosesama 1:11; Yakowbesi 1:3, 4). Pasensi e yeepi u fu holidoo te polobelema e miti u. Ai yeepi u tu fu wi á pai ogii fu ogii. Beibel taki u mu de kabakaba fu wakiti te a de fanowdu. Na a sani ya Yakowbesi 5:7, 8. (Leisi.) e leli u.

⁵ Saide u mu wakiti Yehofa? A disipel Yakowbesi taki wan Kelesten de enke wan sama di e paandi goon. Winsi fa ai wooko taanga fu paandi en goon, tokuso a á poi meke alen kai nati den sani di a paandi. A á poi meke den goo moo gaw. A abi fu wakiti anga pasensi „te enke den sani di a paandi meke nyanyan”. A so useefi á poi du son sani a pisiten di wi e wakiti fu Yehofa du san a paamisi u (Malikisi 13:32, 33; Toli 1:7). Neen meke u mu wakiti anga pasensi, leti enke wan sama di e paandi goon.

6. San wi e leli fu a polofeiti Mika?

⁶ A omen sani be e miti polofeiti Mika leti enke fa omen sani e miti wi aini a ten ya. A be e libi na a ten di Kownu Akas be e tii. Akas a be wan kownu di be abi ogii-ati. Sani á be e go bun seefiseefi di a be e tii a kondee. Sani be ogii te neen Beibel taki den sama fu a kondee be „sabi fa fu du ogii”. (Leisi Mika 7:1-3.) Mika be sabi taki a á be o poi meke sani go bun aini a kondee. San a du di a be sabi a sani de? A taki: „Mi dati o wakiti Yehofa. Mi o wakiti mi Gadu fu a yeepi mi. Mi Gadu o yee mi”  (Mika 7:7). Leti enke Mika, a so useefi mu „wakiti” tu.

7. Saide u mu wakiti anga u hii ati te enke Yehofa du san a paamisi?

⁷ Efu u biibi taanga enke du fu Mika, wi o wakiti Yehofa anga u hii ati. Wi á de enke wan man di de aini dunguu-osu di kisi dede sitaafu. A nai wani a dei di den o kii en doo. A di a ná abi taa fasi meke ai wakiti. Ma wi dati e wakiti Yehofa fu di u sabi taki a o du san a paamisi u. A o gi u teego libi di a yuu fi en o doo. Neen meke wi e „holidoo anga pasensi, anga ala piisii” (Kolosesama 1:11, 12). U nai kuutu taki Yehofa nai du sani gawgaw. Efu u be o du a sani de, a á be o piisii anga u.​—Kolosesama 3:12.

8. San wi e leli fu den sama di be e dini Yehofa a fositen?

⁸ San o yeepi u fu wakiti anga u hii ati? U sa pakisei den sama fu fositen di be wakiti anga pasensi te enke Yehofa du san a be paamisi den (Romesama 15:4). Te wi e taki fu den sama ya, a be o bun fu pakisei on langa den be mu wakiti, anga fa Yehofa belesi den fu di den be abi pasensi.

9, 10. On langa Abalaham anga Sala wakiti Yehofa?

 ⁹ Pakisei Abalaham anga Sala. A di den be abi „biibi anga pasensi” meke den „fende den sani di Gadu be paamisi” den. Beibel taki „baka di Abalaham holi pasensi”, Yehofa paamisi en taki a o belesi en. Yehofa taigi en taki a o meke a toon dda, fu wan gaan foluku (Hebrewsama 6:12, 15). Saide Abalaham be mu abi pasensi? Bika ten be o de fanowdu fu a fende a sani di Gadu ben paamisi en. Tinafo Nisan fu a yali 1943 fosi Kelestesi Abalaham, Sala anga ala den sama fi en osufamii, abaa a Eufraat liba go aini a Paamisi Kondee. Ma a 25 yali Abalaham be abi fu wakiti fosi Sala meke Isaki. Baka dati a 60 yali a be abi fu wakiti fosi en galanpikin Esau anga Yakopu meke.​—Hebrewsama 11:9.

¹⁰ On pisi fu a paamisi kondee Abalaham be fende? Beibel taki Yehofa „á be gi en nawan pisi fu a kondee. Wan pikin pisi seefi a á gi en. Ma a be paamisi en taki a o gi en anga den bakapikin fi en a kondee, winsi fa a á be abi pikin ete” (Toli 7:5). Di Abalaham abaa a Eufraat liba, a baka 430 yali fosi neen den bakapikin fi en toon a foluku di be o tan aini a kondee.​—Ekisodesi 12:40-42; Galasiyasama 3:17.

11. Saide Abalaham wakiti Yehofa anga en hii ati? Sowtu wini a fende di a wakiti?

¹¹ Abalaham wakiti Yehofa anga en hii ati, fu di a be sabi taki Yehofa be o du san a be paamisi. A be e biibi Yehofa. (Leisi Hebrewsama 11:8-12.) Abalaham be e wakiti anga piisii, winsi fa a á si fa ala den paamisi fu Gadu kon tuu. Ma pakisei fa a o piisii, di a o weki baka di a o si taki a hii goontapu toon wan paladeisi. A o foondoo di a o si taki wan hii pisi fu a Beibel e taki fi en anga en famii. * (Luku a maiki a ondoo.) Pakisei fa a o piisii di a o yee taki en a wan fu den pelensipali sama di meke a polofeititoli fu a Mesiyas kon tuu. A ná abi misi, Abalaham o si taki a ná fu soso a wakiti Yehofa anga pasensi.

12, 13. Saide Yowsefu be mu abi pasensi? San be yeepi en fu abi pasensi?

¹² A bakapikin fu Abalaham di den e kai Yowsefu be abi pasensi tu. A omen leisi sama libi takuu anga en. Den baala fi en seli en enke saafu di a be abi 17 yali. Baka dati den lei gi en taki a be wani suwa anga a uman fu a basi fi en, neen den poti en a sitaafu-osu (Genesesi 39:11-20;  Psalm 105:17, 18). Winsi fa Yowsefu be e dini Gadu, tokuso a be e gei enke pe fu a fende belesi, a soso ogii be e miti en. Ma baka 13 yali neen sani kengi. Den puu en a sitaafu osu, neen a toon du fu tu tiiman fu Egepte.​—Genesesi 41:14, 37-43; Toli 7:9, 10.

¹³ Den sani di miti Yowsefu meke a kon abi takuu manii? A be e si enke Yehofa gwe fika en? Nono. Yowsefu wakiti anga pasensi. San yeepi en? Na a biibi di a be e biibi Yehofa. A be sabi taki Yehofa be e si san e pasa. We si a sani ya te u luku san a taigi den baala fi en. A taigi den taki: „A á de fu u feele. U si enke mi poi teke Gadu peesi? Winsi fa u be wani du ogii anga mi, tokuso Gadu be wani a ogii di u du anga mi toon bun. A be wani yeepi omen sama fu den tan a libi, enke fa ai du nownow” (Genesesi 50:19, 20). Yowsefu be si taki a ná fu soso a wakiti Yehofa.

14, 15. (a) Saide u sa taki a bunbun pasensi David be abi? (b) San yeepi David fu wakiti anga pasensi?

¹⁴ A omen sani miti kownu David tu. A be yonkuu di Yehofa be salufu en enke kownu fu Islayeli. Ma a 15 yali David be mu wakiti fosi a toon kownu fu Yuda, a lo fi en (2 Samuweli 2:3, 4). Fosi a toon kownu, a be abi fu e lon kibii fu Saul á fende en kii. * (Luku a maiki a ondoo.) Neen meke a pisiten de, osu seefi David á be abi. A be abi fu tan a taa kondee. Son leisi a den mongo di be de aini den sabana a be e tan. Bakaten, Saul dede aini wan feti. Ma toku David be abi fu wakiti ete seibin yali fosi a toon kownu fu hii Islayeli.​—2 Samuweli 5:4, 5.

¹⁵ Saide David wakiti anga en hii ati? Enseefi e piki a akisi ya aini aseefi psalm pe a akisi Yehofa feifi leisi taki: „On langa?” A taki: „Mi sabi taki yu o soi mi taki i lobi mi. Mi o piisii, fu di i fii mi. Mi o singi gi Yehofa, bika a belesi mi” (Psalm 13:5, 6). David be sabi taki Yehofa lobi en. A be sabi tu taki Yehofa be o de anga en ala yuu. A be e pakisei den ten di Yehofa be yeepi en, da a be e luku go na a ten di Yehofa be o puu ala den booko-ede fi en. David be sabi taki a ná  fu soso a be o wakiti Yehofa anga pasensi.

16, 17. Fa Yehofa anga Yesesi Kelestesi soi taki den e wakiti anga pasensi?

¹⁶ Yehofa ná akisi u fu u du wan sani di enseefi á wani du. Sama á de di abi pasensi enke Yehofa. (Leisi 2 Peitilisi 3:9.) A omen dunsu yali kaba Saatan lei gi Gadu aini a Dyali fu Eden taki Gadu nai du sani a wan leti fasi. Yehofa e „wakiti anga pasensi” te enke a yuu doo di en nen o santa. A o belesi „ala den sama di e wakiti en”.​—Yesaya 30:18.

¹⁷ Yesesi seefi e wakiti anga pasensi. Di a be de a goontapu a holidoo te enke a dede. Baka dati aini a yali 33, a go a hemel neen a gi Yehofa a leti di a be abi fu libi enke libisama a goontapu ya. Ma toku a be abi fu wakiti te enke 1914 fosi a toon kownu (Toli 2:33-35; Hebrewsama 10:12, 13). Ma dati a ná ala. Yesesi mu wakiti te enke a tii wan dunsu yali fosi, da ala den feyanti fi en ná o de moo (1 Korentesama 15:25). A o wakiti langa, ma toku a o fende wini fu di a wakiti.

18, 19. San o yeepi u fu wakiti anga pasensi?

¹⁸ Den sani di u luku te anga now e soi taki Yehofa wani u wakiti anga pasensi. San o yeepi u fu du a sani ya? U mu begi Gadu en santa yeye. Ná feegete, pasensi a wan fu den manii di a santa yeye e meke sama abi (Efeisesama 3:16; 6:18; 1 Tesalonikasama 5:17-19). Neen meke i mu begi Yehofa fu a yeepi i fu holidoo anga pasensi.

¹⁹ Pakisei san yeepi Abalaham, Yowsefu, anga David fu wakiti anga pasensi te enke Yehofa du san a be paamisi den. A di den be e biibi Yehofa meke den wakiti. Den á be e poti pakisei namo a san den be wani. Efu wi e teke ten pakisei fa sani waka gi den, wi o fende taanga-sikin fu wakiti tu.

20. San u mu de kabakaba fu du?

²⁰ Neen meke winsi sowtu tesi e miti u, u de kabakaba fu „wakiti anga pasensi”. Kande son leisi wi o akisi Yehofa taki: „Yehofa, on langa”? (Yesaya 6:11). Ma a santa yeye poi yeepi u fu waka a Yelemiya baka. A be taki: „A Yehofa na a gudu di mi mu fende. Neen meke mi o wakiti en.”​—Tyali singi 3:21, 24.