A YALI di pasa, a omen dunsu baala a hii goontapu toon owluman efuso dinali. Efu yu a wan fu den, i musu e poolo taki yu abi a okasi fu dini Yehofa anga fu yeepi i baala anga sisa na a fasi ya.

Ma kande yu e booko yu ede pikinso. A nai wawan e fii so. Wan yonkuu owluman den e kai Jason, taki: „Biginbigin mi be e si enke mi á be o poi tyai den faantiwowtu fu wan owluman.” Mosesi anga Yelemiya seefi be e si enke den á be o poi tyai a faantiwowtu di Yehofa be gi den (Ekisodesi 4:10; Yelemiya 1:6). Efu a so yu e fii, san o yeepi i fi yu á fii so moo? San o yeepi i fu go a fesi? I sa leli omen sani fu Timotiyesi.​—Toli 16:1-3.

Kande a 20 yali Timotiyesi be abi di a bigin waka anga apostel Pawlesi. Biginbigin di a fende a faantiwowtu ya, kande a be e si enke a ná o poi leli sama efuso poti sama a pasi fu di a be yonkuu (1 Timotiyesi 4:11, 12; 2 Timotiyesi 1:1, 2, 7). Ma a tan go a fesi. Baka tin yali Pawlesi sikiifi aini wan biifi gi den baala anga sisa a Filipi taki: „Efu Masaa Yesesi wani, mi o sende Timotiyesi kon a u dyonson.” Saide a be o sende Timotiyesi go a den? Pawlesi taki: „Mi ná abi taa sama di e denki enke fa ai denki.”​—Filipisama 2:19, 20.

Saide owluman sa waka a Timotiyesi baka? Wi o luku sigisi sani.

1. A be e booko en ede anga taawan tuutuu. Pawlesi be taigi den baala anga sisa fu Filipi taki Timotiyesi be o „yeepi” den (Filipisama 2:20). Timotiyesi be wani den baala anga sisa tan koosube a Yehofa. A be de kabakaba fu gi en ten anga en kaakiti fu yeepi den.

William e du a owluman wooko moo enke 20 yali kaba. A lobi taigi nyun owluman taki: „I mu soi den baala anga sisa taki i lobi den. A moo bun fi i poti pakisei a den baala anga sisa moo enke den wooko fi i.” Yu á mu de enke wan besiman di e moo booko en ede fu doo na a yuu a den peesi pe den sama e wakiti a besi. Ma de enke wan besiman di e wakiti fu den sama kon aini a besi.

2. A be e poti a dini di a mu dini Yehofa a fesi. Pawlesi taki Timotiyesi á be de enke den sama di be e ’suku wini fu den wawan. Den sama ya á be e meke moiti fu du san Yesesi Kelestesi wani’ (Filipisama 2:21). Pawlesi be si taki den taa baala be e moo poti pakisei a den eigi libi. Son leisi a san den wani den be e poti a fesi, da den be e poti a wani fu Yehofa a baka. Ma Timotiyesi á be de so! Di a fende a okasi fu du moo gi Yehofa, a du enke Yesaya di be taki: „Luku mi ya! Sende mi!”​—Yesaya 6:8.

San o yeepi i fu du sani anga koni te yu e poti pakisei a yu eigi libi anga te yu e luku fa i sa yeepi a kemeente? A fosi sani di i sa du, a fu du san Pawlesi be taki: „Sabi san a den moo pelensipali sani” (Filipisama 1:10). I mu e poti Yehofa wooko a fesi. Du fu tu, ná du sani di e meke i lasi ten efuso di e meke i weli tumisi. Pawlesi taigi Timotiyesi taki: „Basi den fii di yonkuu sama abi. Meke moiti fu libi a wan letifasi, fu abi biibi, lobi anga freide.”​—2 Timotiyesi 2:22.

3. A be e wooko taanga. Pawlesi be taki fu Timotiyesi taki: „Leti enke wan dda anga en pikin a so a wooko taanga makandaa anga mi fu meke a bun nyunsu go a fesi” (Filipisama 2:22). Timotiyesi á  be lesi. A be e wooko taanga makandaa anga Pawlesi, neen meke den be de bun mati.

Aini a ten ya wooko lai fu du aini Yehofa olikanisâsi. Te wi e du den sowtu wooko ya, wi e piisii tuutuu. Den e yeepi u fu wi anga den baala anga sisa fu u toon mati tu. Neen meke ala yuu i ’mu e wooko taanga gi Masaa’.​—1 Korentesama 15:58.

4. A be e du san a leli. Pawlesi be sikiifi aini wan biifi gi Timotiyesi taki: „I poti pakisei finifini a san mi leli i, a fasi fa mi e libi, san mi be wani aini mi libi, a biibi fu mi, a pasensi fu mi, a lobi fu mi anga a fasi fa mi holidoo” (2 Timotiyesi 3:10). Timotiyesi be e du san a be leli, neen meke a be fende moo faantiwowtu.​—1 Korentesama 4:17.

Meke mati anga wan owluman di i sa waka neen baka. Tom, a owluman omen yali kaba. A taki ai membee ete taki wan owluman di be abi ondoofeni be poti pakisei neen. A owluman ya leli en omen sani. A taki: „Ala yuu mi e akisi en fa mi sa du son sani. Da te a soi mi, mi e wooko anga san a soi mi. A sani ya yeepi mi fu abi deki-ati.”

5. A be e meke moiti fu du san Gadu wani. Pawlesi be taigi Timotiyesi taki: „I mu e meke moiti naamo fu dini Gadu fayafaya” (1 Timotiyesi 4:7). Winsi fa wan sportman abi wan sama di e leli en, ai leli enseefi tu. Pawlesi be taigi Timotiyesi taki: „Meke moiti naamo fu e leisi gi sama, fu gi den taanga-sikin, fu leli den te enke mi kon. . . . Sidon pakisei den sani ya bun, du den anga i hii ati, da ala sama o si taki yu e go a fesi.”​—1 Timotiyesi 4:13-15.

Ala yuu i mu meke moiti fu go a fesi anga den sani di yu e du. Wan sama di e sutudeli Beibel finifini mu sabi den nyun fasi fa a olikanisâsi e du sani. Yu á mu biibi iseefi tumisi. Yu á mu si enke fu di yu abi ondoofeni, da yu o man losi wan polobelema sondee fi i luku san den baala taki fu a toli de. Leti enke Timotiyesi, „tan poti pakisei a iseefi. Tan poti pakisei na a fasi fa yu e leli sama tu”.​—1 Timotiyesi 4:16.

6. A be e meke a yeye fu Yehofa tii en. Di Pawlesi be e taki fu a fasi fa Timotiyesi be e wooko taanga, a membee en taki: „Meke a santa yeye di de aini u yeepi i fu kibii a gudu di i fende” (2 Timotiyesi 1:14). Timotiyesi be mu fitoow a yeye fu Gadu.

Donald, a wan owluman omen yali kaba. A taki: „Den baala di abi faantiwowtu mu e teke en fu bigi taki den anga Gadu a mati. A sani ya gi o ’den taanga-sikin’ fu du a wooko fu den. Efu den e begi Yehofa en santa yeye, neen den e meke moiti fu abi den manii fu a yeye, den o man yeepi den baala anga sisa.”​—Psalm 84:7; 1 Peitilisi 4:11.

A wan piisii sani fu si fa dinali anga owluman e go a fesi anga a dini di den e dini Yehofa. Jason, di u be taki fi en kaba, taki: „Di mi toon owluman, mi leli omen sani. Mi biibi kon moo taanga tu. Nownow, mi lobi a wooko ya. Mi e si en enke wan gaandi fu du a wooko ya!”

Yu o tan go a fesi? Efi i waka a Timotiyesi baka, iseefi o de enke wan belesi gi den baala anga sisa.