Saide nawan sama á mu poti den buku anga taa sani fu Yehofa Kotoigi a taa website efuso a den app pe sama e taki anga taawan a internet?

Son sama e si enke di u nai seli den buku anga taa sani fu u, da den sa kopi den poti a internet gi taa sama fu luku. Ma a sani ya sa tyai gaan polobelema. U sikiifi na a website fu u na a pisi di den e kai Gebruiksvoorwaarden, taki sama á mu koboloiki den buku anga taa sani di wi e meke na a fasi ya  *(luku a maiki a ondoo). U sikiifi ape taki „sama á mu kopi sani enke buku, fowtow, felon, poku efuso artikel fu a website poti a internet (den á mu poti den sani ya a den app efuso wan taa peesi a internet pe i sa poti fowtow anga felon fu taa sama si)”. Saide den weiti ya de fanowdu?

Ala den sani di de a den website fu u, de a lantibuku taki a wi abi den. A sani ya de fanowdu fu sama á go du poli sani anga den buku efuso den taa sani di de na a website. Son leisi sama di gwe fika a biibi, anga taa sama di wani poli a wooko fu wi e poti den buku fu wi a den website, fu koli Yehofa Kotoigi anga taa sama. Ma den e poti sani a den website fu den tu fu buuya sama (Psalm 26:4; Odo 22:5). Son sama e teke sani a u website efuso a jw.org logo fu meke lekalaama. Den e poti den sani ya aini app efuso taa sani di den e seli. Ma u sa tyai den go a kuutu, bika a sikiifi a lantibuku taki a wi abi den sani ya (Odo 27:12). Ma efu den kuutubakaa si taki wi e gi son sama a okasi fu poti den sani fu a website fu wi a taa website, den ná o wani holibaka gi u, moomoo te den si taki son wan fu den sama ya a Yehofa Kotoigi.

Efu u go a taa website fu download den buku fu u, u sa leisi efuso si sani di á bun. Na „a koni saafu di u sa fitoow” Yehofa poti fu leli u (Mateyesi 24:45). A „saafu” ya nai sende u go a taa website fu go teke a leli ya, ma a den website fu u wawan: www.pr418.com, tv.pr418.com, anga wol.pr418.com. Boiti dati, a dii app namo wi abi: JW Language^®, JW Library^®, anga JW Library Sign Language^®. Te sama go a den website efuso den app fu u, den ná o si lekalaama efuso taa sani fu Saatan goontapu. Ma efu den go a taa website go download den buku anga taa sani fu u, da kande sama kengi den sani ya poti enke fa den wani.​—Psalm 18:26; 19:8.

Ete wan taa sani di u mu holi a pakisei, na a poti di sama e poti den buku efuso taa sani fu wi a website pe sama sa sikiifi fa den e denki fu a olikanisâsi. A sani ya e gi sama di gwe fika a waaleiti anga taa sama a okasi fu kuutu a olikanisâsi fu Yehofa. Son Kotoigi e sitee taki anga den sama ya a internet. A sani ya seefi e gi Yehofa polinen. A ná te wi e sitee anga sama a internet da wi o man yeepi den fu kengi a fasi fa den e denki. A ná a sani ya o yeepi a sama fu fusutan a tuu leli tu (1 Timotiyesi 6:3-5; 2 Timotiyesi 2:23-25). Boiti dati, son sama e meke website di e gei du fu a olikanisâsi. Son leisi den e du enke a den baala di e tii a wooko abi den website ya. Ma nawan fu den baala di e tii a wooko abi wan website efuso wan peesi a internet pe ai taki anga taawan.

Te wi e soi sama fa den sa go a jw.org, wi e yeepi paati a „bun nyunsu” (Mateyesi 24:14). Den website anga den app fu wi e kon moo bun dei fu dei. U wani ala sama fende wini fu den. Neen meke u sa sende wan kopi fu wan buku aini e-mail gi wan sama, efuso sende wan link gi den di o tyai den go na a website. A so wi e yeepi den fu go na a website fu „a koni saafu di u sa fitoow”, den baala di Yehofa e koboloiki fu leli u.