A LIBI kon moo taanga aini den „lasiti dei” ya, neen meke wi abi moo pasensi fanowdu (2 Timotiyesi 3:1-5). Gaanse sama aini a goontapu ya ná abi pasensi. A denseefi namo den e denki, den lobi kwali anga taawan, den á poi dwengi denseefi tu. Neen meke u mu akisi useefi taki: ’Mi de enke den sama fu a goontapu ya di ná abi pasensi? San a wani taki fu abi pasensi? San mi mu du fu abi pasensi?’

San a wowtu „pasensi” wani taki aini Beibel? A ná te wan sama sabi fa fu libi anga wan polobelema da dati wani taki a abi pasensi. Wan sama di abi pasensi e howpu taki sani o go bun. A nai pakisei enseefi namo, ma ai holi a fii fu taawan a pakisei winsi den du wan hati sani anga en. Wan sama di abi pasensi e howpu taki en anga taawan o libi switi anga denseefi wan dei. Beibel taki a lobi e meke sama abi pasensi. A sani ya nai foondoo wi. * (Luku a maiki a ondoo.) (1 Korentesama 13:4). Pasensi a wan fu „den manii di a yeye e meke sama abi” (Galasiyasama5:22, 23). San u mu du fu abi pasensi?

Efu u wani abi pasensi, u mu begi Yehofa fu a gi wi en santa yeye. A den sama di e biibi en ai gi en santa yeye (Lukasi 11:13). Winsi fa a yeye fu Yehofa taanga, tokuso useefi mu meke moiti fu du san wi akisi Yehofa (Psalm 86:10, 11). A sani ya wani taki u mu meke moiti ala dei fu abi pasensi. Sama mu sabi wi enke sama di abi pasensi. Ma a ná ala yuu a o makiliki fu soi pasensi. San o yeepi u?

U mu sutudeli Beibel da u meke moiti fu waka a Yesesi baka. Pawlesi be taki pasensi a wan fu den manii di u mu abi efu u wani „toon nyun sama”. A be taki tu: „Meke a freide fu Kelestesi tii wi ati” (Kolosesama 3:10, 12, 15). Efu u wani a freide fu Gadu, u mu waka a Yesesi baka, da u biibi taki Yehofa o seeka sani gi u na a moo bun yuu. A sani ya o yeepi u fu abi pasensi winsi san e miti u.​—Yohanisi 14:27; 16:33.

Ala u wani a nyun goontapu doo gaw. Ma te u luku fa Yehofa pasensi anga u, da wi e si taki u mu abi moo pasensi. Beibel taki: „Yehofa nai daaidaai fu du san a paamisi, ma a abi pasensi anga u, bika a á wani nawan sama dede. A wani ala sama fende a okasi fu tapu anga den sondu fu den” (2 Peitilisi 3:9). Neen meke te wi e pakisei a pasensi di Yehofa abi anga u,  wi e moo abi pasensi anga taawan (Romesama 2:4). On ten u mu soi taki wi abi pasensi?

A omen okasi wi abi fu soi taki wi abi pasensi. Te wan sama e taki neen u wani taki wan pelensipali sani, u mu abi pasensi fu wi á koti a sama mofu (Yakowbesi 1:19). U mu abi pasensi tu te wan sama du wan hati sani anga u. Pe fu u feti du sani, a moo bun fu pakisei fa Yehofa anga Yesesi e pasensi anga u, winsi fa den sabi den swakifasi fu u. Den nai poti pakisei a den somen fowtu di wi e meke. Ma den e si den bun manii fu u, neen meke den e pasensi anga wi fu u sa fende a okasi fu go a fesi.​—1 Timotiyesi 1:16; 1 Peitilisi 3:12.

U mu abi pasensi tu te wan sama taigi u taki wi á tyai useefi bun. Kande wi ati o boon da u taki sani fu soi taki a lei a sama lei gi u. A Wowtu fu Gadu e soi a moo bun sani di u mu du. A taki: „A moo bun fu abi pasensi moo enke fu abi heimembee. Yu ati á mu e boon gaw, bika a don sama ati e boon gaw” (Peleikiman 7:8 , 9). Neen meke winsi wan sama lei gi u, u mu abi pasensi da u denki bun fosi u piki en. Na aseefi sani Yesesi be e du te sama be lei gi en.​—Mateyesi 11:19.

Mma anga dda mu abi pasensi te den e yeepi den pikin fu libi enke fa Yehofa wani. Luku a toli fu Mattias wan baala fu Europa di e wooko a Betel. Di Mattias be moo yonkuu, den pikin a sikoo be e soso en fu di a be e dini Yehofa. En mma anga en dda á be sabi san e miti en. Ma den be kon si taki en biibi be e kon swaki. A Mattias dda den e kai Gillis. A taki, en anga en uman be mu pasensi anga Mattias. Mattias be e akisi den taki: „Sama a Gadu? Fa u du sabi taki Beibel na a Wowtu fu Gadu? Fa u du sabi taki a Gadu wani u du son sani?” A be e akisi en dda taki: „Saide yu e kuutu mi efu mi á wani biibi den sani di yu e biibi?”

Gillis taki: „Son leisi anga boon ati a be e poti akisi gi u. A ná mi anga en mma en  ati be e boon, ma na a waaleiti. A be e si enke na a waaleiti be e meke son sani miti en.” Fa baala Gillis yeepi a boi fu en? A taki: „Mi anga a boi fu mi be e sidon taki omen yuu langa.” Son leisi na aliki namo a be e aliki a boi fi en, da ai poti akisi gi en fu sabi fa ai fii anga fa ai denki. Son leisi Gillis be e leli a boi fi en wantu sani, da a be sende en fu a go pakisei san a taigi en. Baka wan pisiten da den be e taki a toli baka. Son leisi fosi Gillis piki a boi fi en, a be e taigi en taki enseefi abi wantu dei fanowdu fu go denki san a akisi en. Den sani ya yeepi Mattias fu kon fusutan san a dede fu Yesesi wani taki. A kon fusutan tu taki Yehofa lobi u, neen abi a leti fu taigi u fa u mu libi. Mattias dda taki: „A teke ten, a be taanga tu, ma saafisaafi a be bigin lobi Yehofa. Mi anga mi uman e piisii taki u be pasensi anga a boi fu u. Wi e piisii taki u be man doo en ati.”

A pisiten di Gillis anga en uman be e yeepi a boi fu den anga pasensi, den be e biibi taki Yehofa o yeepi den. Gillis taki: „Mi be lobi taigi Mattias taki a fu di mi anga en mma lobi en anga u hii ati, meke wi e moo begi Yehofa fu a yeepi en fusutan den sani di ai leli.” A mma anga a dda ya e piisii tuutuu taki den pasensi anga a boi fu den. Den á gi abaa!

U mu abi pasensi tu te wi e solugu wan famii efuso mati fu u di siki omen ten kaba. Luku a toli fu Ellen * (luku a maiki a ondoo), di e tan a Europa.

Wan sani fu aitin yali pasa, buulu naki a man fu Ellen tu leisi. A siki ya meke a nai fusutan sani moo. A á sabi san a piisii, tyali efuso kusumi. A sani ya á makiliki seefiseefi gi Ellen. A taki: „Mi be mu abi pasensi. A omen leisi mi be e begi tu. Wan tekisi di e gi mi deki-ati a Filipisama 4:13, pe sikiifi taki: ’Mi poi du ala sani bika na a sama di e gi kaakiti e yeepi mi.’” A Yehofa yeepi Ellen fu abi pasensi di a nowtu ya miti en.​—Psalm 62:5, 6.

A moo bun sama di abi pasensi a Yehofa (2 Peitilisi 3:15). A omen peesi aini Beibel wi e leisi fa Yehofa soi pasensi (Nehemiya 9:30; Yesaya 30:18). I sabi ete san Yehofa be du di Abalaham be poti omen akisi gi en di a be de fu poli Sodom? Yehofa á be koti Abalaham mofu. A aliki anga pasensi. A gi en a okasi fu taki fa a be e fii. Bakadati, Yehofa soi Abalaham taki a be e fusutan fa ai fii. A taigi Abalaham taki winsi a tin leti-ati sama namo be de aini a foto Sodom a á be o poli en (Genesesi 18:22-33). Yehofa e aliki anga pasensi ala yuu. En ati nai boon gaw.

Pasensi a wan fu den manii di ala Kelesten mu abi. Efu u meke moiti fu abi pasensi, wi o gi u Dda di abi pasensi anga di e booko en ede anga wi gaandi. Da „wi o libi enke den sama di fende den sani di Gadu be paamisi, fu di den be abi biibi anga pasensi”.​—Hebrewsama 6:10-12.