1. San e soi taki Yehofa lobi gi sama sani?

WAN ten be de di Yehofa wawan be de. Bakaten a meke engel anga libisama, neen a gi den libi. Yehofa, „a koloku Gadu” lobi gi sama bun sani (1 Timotiyesi 1:11; Yakowbesi 1:17). Yehofa wani u de koloku, neen meke a leli u taki u mu lobi gi taawan sani tu.​—Romesama 1:20.

2, 3. (a) Saide wi o de koloku te u lobi gi sama sani? (b) San wi o luku aini a artikel ya?

² Gadu meke libisama enke fa enseefi de (Genesesi 1:27). A sani ya wani taki Yehofa meke wi anga denseefi manii fi en. Efu u wani de koloku, u mu waka a Yehofa baka. Efu u du a sani ya a o belesi u. U mu e booko wi ede anga taawan. U mu e paati san wi abi anga den tu (Filipisama 2:3, 4; Yakowbesi 1:5). Saide? Bika a so Yehofa meke u. Winsi wi  abi sondu, u poi abi a gwenti fu e gi taawan sani, leti enke Yehofa.

³ Now wi o poti pakisei a wantu sani di Beibel e leli u fu a lobi di u mu lobi gi taawan sani. Wi o si saide Yehofa e piisii te a si taki u lobi gi taawan sani. Wi o si fa a gi di wi e gi sama sani o yeepi u fu du a wooko di Yehofa gi u. Wi o si tu saide wi o de koloku te u lobi gi taawan sani. Boiti dati wi o si saide wi á mu weli fu e gi sama sani.

4, 5. Fa Yehofa anga Yesesi soi taki den lobi gi sama sani? Saide u mu waka a den baka?

⁴ Yehofa wani u waka neen baka, neen meke ai piisii te u lobi gi sama sani (Efeisesama 5:1). Yehofa wani u piisii tu. Te u luku a fasi fa a meke wi anga den moin sani di de na a goontapu, da wi e si taki a wani u piisii tuutuu (Psalm 104:24; 139:13-16). Neen meke te wi e meke moiti fu meke taawan piisii, da a Yehofa wi e gi gaandi.

⁵ Te u lobi gi sama sani, da wi e waka a Yesesi baka tu. A soi u san na a moo bun fasi fa u sa gi taawan sani. A be taki: „A Manpikin fu libisama á kon fu sama dini en, ma a kon fu dini taawan anga fu gi en libi enke wan paiman fu fii omen sama” (Mateyesi 20:28). Apostel Pawlesi gi Kelesten taanga-sikin fu ’denki enke fa Kelestesi Yesesi be e denki. A fika ala san a be abi. A kon de enke wan saafu di a toon libisama’ (Filipisama 2:5, 7). Neen meke u mu akisi useefi taki: ’San mi sa du fu waka moo bun a Yesesi baka?’​—Leisi 1 Peitilisi 2:21.

6. San Yesesi leli wi anga a toli fu a Samaliyaman? (Luku a fowtow na a bigin.)

⁶ Efu wi e meke moiti fu e gi taawan sani enke Yehofa anga en Manpikin Yesesi, Yehofa o piisii. Wan fasi fa u sa du a sani ya, a te wi e soi taawan taki wi e booko wi ede anga den. U mu e pakisei fa u sa yeepi den tu. Di Yesesi gi a toli fu a Samaliyaman, a soi taki a sani ya de taanga fanowdu. (Leisi Lukasi 10:29-37.) A leli den bakaman fi en anga a toli ya taki den mu lobi yeepi taawan. Den á mu e paati bee te den e yeepi sama fu taa nasi. I sabi ete saide Yesesi be gi a toli ya? A di wan Dyu be akisi en taki: „Sama a den taa sama di mi mu lobi?” Yesesi soi wi anga a sani di a piki a man taki efu u wani Yehofa lobi u, da u mu e du bun gi taawan enke a Samaliyaman.

7. Fa wi e soi taki wi e biibi taki a san Yehofa taki e tyai wini gi u?

⁷ Te u luku san be pasa aini Eden, da wi e si wan taa sani di mu meke u lobi gi sama sani. Saatan be taki Adan anga Efa be o moo de koloku te den be taangayesi Yehofa. A taki sani be o go bun anga den te den be e du san den wani. Efa be abi takuudu, neen meke a be wani de enke Gadu. Adan seefi be abi takuudu, bika a poti a weiti fu Gadu a wan se, neen a du san en uman be wani (Genesesi 3:4-6). A sani di den du tyai ogii gi den. A sani ya e soi kiin taki wan sama á poi de koloku te a nai booko en ede anga taawan. Ma te wi e booko wi ede anga taawan anga te u lobi gi taawan sani, da wi e soi taki wi e biibi taki a fasi fa Yehofa e du sani moo bun.

8. Saide Adan anga Efa be mu booko den ede anga taawan?

⁸ Winsi fa a Adan anga Efa wawan be de aini Eden, tokuso den be mu booko den ede anga taawan. Saide? Yehofa be gi den wooko fu du. A be taigi den taki den be mu meke pikin fuu goontapu ya. Boiti dati den be mu meke a goontapu toon wan paladeisi (Genesesi 1:28). Yehofa wani sani waka bun gi ala sama. A wani u de koloku. A den sani ya Adan anga Efa be mu wani gi den pikin fu den tu. Yehofa be wani den anga den pikin fu den wooko makandaa fu meke a goontapu toon wan paladeisi. A wan gaan wooko a be gi den.

9. Fa u du sabi taki libisama be o de koloku te den be e meke goontapu toon wan paladeisi?

⁹ Libisama be abi fu wooko makandaa anga Yehofa tu efu den be wani meke a goontapu toon wan paladeisi enke fa Yehofa be taigi den. A wooko ya be o gi den piisii tuutuu. Yehofa be o belesi den efu den á be denki denseefi wawan anga efu den be e booko den ede anga taawan.

10, 11. San o yeepi u fu du a peleikiwooko anga fu yeepi sama toon Yesesi bakaman?

¹⁰ Aini a ten ya, Yehofa gi u wan gaan wooko fu du. A wani u paati a bun  nyunsu, da u meke sama toon Yesesi bakaman. Fu man du a wooko ya, u mu e booko wi ede anga taawan. Fu taki en kiin, efu wi á lobi Yehofa anga taa sama, u ná o man du a wooko ya.

¹¹ Pawlesi taki en anga den taa Kelesten be „e wooko makandii anga Gadu”, bika den be e paati a bun nyunsu fu a Kownukondee. Den be e leli sama tu (1 Korentesama 3:6, 9). Aini a ten ya, useefi e „wooko makandii anga Gadu” te wi e gi u ten, u kaakiti anga den gudu fu u, fu holibaka gi a peleikiwooko. A Gadu gi wi a wooko ya. A sani ya a wan gaandi tuutuu.

12, 13. Sowtu wini wan sama e fende te ai yeepi taawan fu toon Yesesi bakaman?

¹² Efu wi e koboloiki u ten anga u kaakiti fu peleiki anga fu yeepi sama fu toon Yesesi bakaman, wi o piisii. Na a sani ya omen baala anga sisa di be e sutudeli anga sama taki. Wi e fii bun te u si fa den Beibelsutudi fu wi e piisii te den e fusutan den sani di den e leli. Wi e poolo tu te den biibi e kon moo taanga, te den e kengi den libi anga te den e bigin paati san den leli anga taawan. Yesesi seefi be poolo di den 70 bakaman di a be sende go peleiki be e piisii di den daai kon baka, bika sani be go bun di den go peleiki.​—Lukasi 10:17-21.

¹³ Den baala anga den sisa fu wi a hii goontapu e piisii te den si fa Beibel e yeepi sama fu kengi den libi. Wan yonkuu sisa den e kai Anna be wani du moo gi Yehofa. * (Luku a maiki a ondoo.) Neen meke a foloisi go a Europa a pe moo peleikiman de fanowdu. A sisa ya sikiifi taki: „Mi e piisii te mi si fa somen sama wani sutudeli Beibel yaaso. A peleikiwooko e meke mi piisii. Te mi go a osu, mi nai abi ten fu poti pakisei a miseefi. A den Beibelsutudi mi e pakisei. Mi e pakisei den polobelema anga den booko-ede fu den, da mi e luku fa mi sa yeepi den anga fa mi sa gi den taanga-sikin. Nownow mi e si kiin taki Beibel á lei, ’te wan sama e gi taawan sani, ai piisii moo te taawan e gi en sani’.”​—Toli 20:35.

14. San o yeepi i fu du a peleikiwooko anga piisii, winsi sama nai aliki?

¹⁴ Winsi sama nai aliki a bosikopu di wi e paati tokuso u poi du a wooko ya anga piisii, bika wi e gi den a okasi fu yee a bun nyunsu. Yehofa wani u du aseefi sani di a be sende Eseikiyeli. A be taigi en taki: „I mu taigi den san mi taigi i, winsi den aliki efuso ná aliki” (Eseikiyeli 2:7; Yesaya 43:10). Winsi sama ná aliki u, tokuso Yehofa e si a moiti di u meke. (Leisi Hebrewsama 6:10.) Wan baala be taki fu a peleikiwooko taki: „Wi e paandi, wi e nati, da wi e begi Yehofa fu a yeepi a sama fu go a fesi.”​—1 Korentesama 3:6.

15. A den sama di e gi u daa wawan u mu e gi sani?

¹⁵ Yesesi wani wi abi a gwenti fu e gi taawan sani, bika a sani ya e meke u piisii. Te u lobi gi sama sani, taawan o lobi gi u sani tu. Neen meke Yesesi taigi u taki: „I mu gwenti gi sama sani, da sama o gi i sani tu. Den o lai wan bakisi te a lai, den o pampan en te a á poi moo, da den kandi en go aini a saka fu u koosi. Bika a fa yu e libi anga taawan, a so sama o libi anga i” (Lukasi 6:38). Te i lobi gi sama sani, a ná ala sama o gi i daa. Ma winsi sama nai gi i daa, yu á mu weli fu gi taawan sani. A omen wini taa sama sa fende fu a bun di i du.

16. Sama u mu lobi gi sani? Saide u mu lobi gi den sani?

¹⁶ Wan sama di lobi gi taawan sani, nai du a sani ya fu sama gi en sani baka. Yesesi taki: „Te yu o holi wan fesa, i mu kai den pootiman, den malengii man, den sama di lan anga den sama di beendi, da yu o de koloku, bika den ná o abi sani fu pai i baka” (Lukasi 14:13, 14). Beibel taki: „A sama di lobi gi taawan sani o fende belesi.” Beibel taki tu taki: „A sama di e yeepi den pootiman o de koloku” (Odo 22:9; Psalm 41:1). U mu lobi gi taawan sani, bika a sani ya e meke u piisii.

17. San a wantu fasi fa u sa gi taawan sani di sa meke u piisii?

¹⁷ Yesesi be taki „te wan sama e gi taawan sani, a o de koloku moo te taawan e gi en sani”. Di Pawlesi be taki den wowtu fu Yesesi ya, a á taki a moni anga nyanyan namo u mu e gi taawan. Wantu fasi fa u sa gi taawan sani tu, a  te wi e gi den taanga-sikin, te wi e soi den aini Beibel fa den mu tyai denseefi anga te wi e yeepi den anga taa sani (Toli 20:31-35). Pawlesi soi wi anga en taki anga en du, taki a de taanga fanowdu fu koboloiki u ten anga u kaakiti fu yeepi taawan. A soi u tu taki u mu e booko wi ede anga taawan. U mu soi den tu taki u lobi den.

18. San koniman taki fu a gi di u mu e gi taawan sani?

¹⁸ Den koniman di e ondoosuku fa libisama e tyai denseefi taki te wan sama lobi gi taawan sani ai fii bun. Wan artikel e soi taki wantu sama taki te den du bun gi taawan, den e moo fii bun. Ondoosukuman taki te wi e yeepi taawan a libi e moo switi gi u. Neen meke son koniman e gi sama taanga-sikin fu yeepi taawan. Ma a sani di den koniman taki ya nai foondoo wi, bika ná a tide Yehofa, a Gadu di meke u taigi u taki wi o de koloku te wi e gi taawan sani.​—2 Timotiyesi 3:16, 17.

19, 20. Saide i wani abi a gwenti fu e gi taawan sani?

¹⁹ Efu gaanse fu den sama di u sabi á lobi gi taawan sani, a o moo taanga gi u fu e gi sama sani. Ma tokuso Yesesi be membee u taki den tu moo gaan weiti na a lobi di u mu lobi Yehofa anga u hii ati, u hii libi, u hii fusutan, anga ala u kaakiti. Du fu tu na a lobi di u mu lobi taa sama enke fa u lobi useefi (Malikisi 12:28-31). U leli aini a artikel ya taki den sama di lobi Yehofa e meke moiti fu waka neen baka. Yehofa anga Yesesi lobi gi sama sani. Den e gi u taanga-sikin fu waka a den baka, bika a sani de o meke u piisii. Te wi e wooko gi Yehofa anga u hii ati anga te u lobi gi taawan sani, da wi e gi Yehofa gaandi. A sani ya o tyai wini gi wi anga taawan.

²⁰ Kande yu e du ala san i man fu gi taawan sani anga fu yeepi den, moomoo i baala anga i sisa (Galasiyasama 6:10). Efu yu e meke moiti fu yeepi taawan ala yuu, den o go e teke san yu e du gi den fu bigi. Den o lobi i tu. A sani ya o meke i piisii. Beibel taki: „Sani o waka bun gi wan sama di lobi gi taawan sani. A sama di e gi taawan wataa, o fende wataa tu” (Odo 11:25). Te wi e peleiki anga te wi e du taa sani ala dei, wi e fende omen okasi fu gi taawan sani. Wi o taki fu wantu okasi di wi abi fu du a sani ya aini a taa artikel.