1. San a wantu fasi fa wi e wooko makandaa anga Yehofa?

DI YEHOFA meke libisama, a be wani den wooko makandaa anga en. Winsi fa libisama abi sondu aini a ten ya, tokuso den sama di e dini Yehofa abi a gaandi ete fu wooko makandaa anga en. Wan fasi fa wi e wooko „makandii anga Gadu” a te wi e paati a bun nyunsu fu a Kownukondee anga te wi e yeepi sama toon Yesesi bakaman (1 Korentesama 3:5-9). A wan gaandi tuutuu, taki a Gadu di abi ala makiti gi wi a okasi fu du a gaan wooko ya. Ma a ná te wi e du a peleikiwooko wawan da wi e wooko makandaa anga Yehofa. Aini a artikel ya wi o si fa wi e wooko makandaa anga Yehofa te wi e yeepi wi osufamii anga taawan aini a kemeente, te wi e soi switifasi gi taawan, te wi e yeepi a olikanisâsi anga son wooko anga te wi e du moo gi Yehofa.​—Kolosesama 3:23.

2. Saide wi á mu e maiki useefi anga taawan te wi e wooko gi Yehofa?

² Te wi e luku a artikel ya, u mu holi a pakisei taki a ná  ala sama na aseefi. U ná abi a wan yali. A gusontu fu wi á de aseefi. U libi anga den sani di u man du a ná aseefi tu. Neen meke wi á mu maiki san u man du gi Yehofa anga san taawan man du gi en. Apostel Pawlesi taki: „Meke ala sama ondoosuku enseefi. A sani de o meke a piisii anga san a poi du. A á mu maiki enseefi anga taawan.”​—Galasiyasama 6:4.

3. Saide u sa taki den sama di e solugu den osufamii e wooko makandaa anga Yehofa?

³ Yehofa wani u solugu wi osufamii. Wi abi fu wooko fu fende moni fu man yeepi osufamii anga san den abi fanowdu. A omen mma abi fu tan a osu luku den yonkuu pikin fu den. Son leisi wi abi fu yeepi u mma anga u dda te den á poi solugu denseefi moo. Den sani ya de taanga fanowdu. Beibel taki: „Efu wan sama nai solugu den sama fi en, moomoo en osufamii, da a daai baka gi a biibi. A ogii moo wan sama di nai biibi” (1 Timotiyesi 5:8). Kande yu á poi du ala san i wani du gi Yehofa, fu di i mu solugu yu osufamii. Ma a sani de á mu meke i fii booko-saka. Yehofa e piisii te yu e solugu yu osufamii.​—1 Korentesama 10:31.

4. Fa mma anga dda sa poti a Kownukondee a fesi? Fa sani e waka te den du a sani ya?

⁴ Wan fasi fa Kelesten mma anga dda e wooko makandaa anga Yehofa, a te den e yeepi den pikin fu du ala san den man gi Yehofa. A omen mma anga dda e du a sani ya. Neen meke a omen yonkuu baala anga sisa go aini a fuuten diniwooko. Taawan go yeepi a wan faawe peesi. Son wan fu den e du a zendeling wooko, taawan e yeepi a pe moo peleikiman de fanowdu. A omen e wooko a Betel tu. Te den pikin go wooko gi Yehofa a wan faawe peesi, den mma anga den dda nai poi si den efuso de makandaa anga den enke fa den wani. Ma tokuso den e gi den pikin fu den taanga-sikin fu tan du ala san den man gi Yehofa. Saide? Bika den e piisii taki den pikin e poti a dini fu Yehofa a fesi (3 Yohanisi 4). A omen fu den mma anga dda ya e fii enke Hana. Hana be taki a ’leni’ a leni Yehofa en manpikin Samuweli. Den mma anga dda ya e teke en fu bigi taki den e wooko makandii anga Yehofa na a fasi ya.​—1 Samuweli 1:28.

5. Fa i sa yeepi den baala anga sisa aini i kemeente? (Luku a fowtow na a bigin.)

⁵ Efi i ná abi gaan osufamii faantiwowtu, i si enke i sa yeepi baala anga sisa, di siki, di gaandi efuso di abi taa yeepi fanowdu? I si enke i sa holibaka gi den sama di e yeepi den? Meke moiti fu sabi den sama aini i kemeente di abi yeepi fanowdu. Kande wan sisa mu solugu en gaandi mma anga en dda. I si enke i sa luku en mma efuso en dda gi en, fu a sisa sa du den taa sani di a mu du? Kande i sa e tyai wan fu den sama ya go a komakandaa. I sa tyai den go bai sani efuso tyai den go luku wan sama na ati osu. A kan taki te yu e du den sani ya anga Yehofa yu e wooko makandaa fu piki a begi fu den sama ya.​—Leisi 1 Korentesama 10:24.

6. Fa u sa soi switifasi gi taawan?

⁶ Den sama di e wooko makandaa anga Gadu lobi soi switifasi gi taawan. A Giiki wowtu „bali wadaa” gi taawan, wani taki „soi switifasi gi sama di yu á sabi” (Hebrewsama 13:2). Beibel e taki fu wantu toli di e leli u fa u sa soi switifasi gi taawan (Genesesi 18:1-5). U mu meke moiti fu yeepi taawan solanga wi abi a okasi, ’winsi wi anga den á de na aseefi biibi’.​—Galasiyasama 6:10.

7. Sowtu wini yu o fende te yu e kai den sama di de aini a fuuten diniwooko kon a yu osu?

⁷ Te yu e yeepi den sama di e du a fuuten diniwooko te den abi wan peesi fanowdu fu siibi, a wooko yu e wooko makandaa anga Yehofa tu. (Leisi 3 Yohanisi 5, 8.) A wi anga den e fende wini te wi e yeepi den. Beibel taki wi e gi ’useefi taanga-sikin’ (Romesama 1:11, 12). Luku a ondoofenitoli fu Olaf. Di a be yonkuu, wan kelen-owluman di á be toow be abi wan peesi fanowdu fu siibi di a be go na a kemeente. Ma nawan sama aini a kemeente be poi yeepi en. Olaf akisi en mma anga en dda di á be de Kotoigi, efu a kelen-owluman be sa tan a den osu. Den taigi en taki a kelen-owluman sa tan a den osu, ma Olaf be o abi fu siibi na a sutuu. A á hati Olaf taki a du a sani ya. A be lobi a wiki di a kelen-owluman be de neen osu. Ala mamanten den be e opo fuuku, da den be e taki fu Beibel te den be e nyan. Di Olaf taki anga a kelen-owluman a fende taanga-sikin te neen enseefi bigin du a fuuten diniwooko. Aini den 40 yali di pasa, Olaf du a zendeling wooko aini omen kondee.

8. Saide u mu soi switifasi gi taawan winsi den nai teke san u du gi den fu bigi? Gi wan ondoofenitoli.

⁸ A omen fasi u sa soi sama di wi á sabi, taki u lobi den, winsi den á gi u daa te u du den wan bun. Wan sisa aini Sipanyookondee be e sutudeli Beibel anga wan uman fu Ekwador di den e kai Yesica. Wan leisi di den e sutudeli neen Yesica e kee. Neen a sisa akisi en saide ai kee. Yesica taigi a sisa taki fosi a kon a Sipanyookondee a be pooti. Wan dei a á be abi nawan nyanyan fu gi a beibi fi en. A wataa wawan a be abi. Di a be e koi a beibi fi en fu a siibi, a begi Gadu fu yeepi en. A á teke langa neen tu Kotoigi kon a Yesica osu, neen den gi en wan fu den buku fu u. Ma Yesica ati be boon te a piiti a buku di den gi en. A taigi den taki: „Na a nyanyan ya u wani mi gi a beibi fu mi?” Den sisa meke moiti fu toosutu en, ma Yesica á be wani aliki. Bakaten neen den sisa fika wan bakisi anga nyanyan gi en neen doomofu. Na a toli ya Yesica be pakisei, meke a be e kee. A be fusutan taki a á be poti pakisei di Yehofa be piki a begi fi en. Ma nownow Yesica de kabakaba fu dini Yehofa. A sani ya e soi taki di den tu sisa soi switifasi gi a uman ya sani waka bun.​—Peleikiman 11:1, 6.

9, 10. (a) Sowtu okasi den Islayelisama be abi? (b) Fa baala sa yeepi aini a kemeente aini a ten ya?

⁹ Aini a ten di pasa den Islayelisama be abi omen okasi fu holibaka gi a wooko fu Yehofa (Ekisodesi 36:2; 1 Koloniki 29:5; Nehemiya 11:2). Aini a ten ya iseefi abi omen okasi fu koboloiki i ten, i gudu anga i koni fu yeepi i baala anga i sisa. Efu yu e du a sani ya yu o piisii. Yehofa o belesi i tu.

¹⁰ A Wowtu fu Gadu e gi mannengee taanga-sikin fu toon dinali efuso owluman. A sani ya e gi den a okasi fu yeepi taawan anga fu wooko makandaa anga Yehofa (1 Timotiyesi 3:1, 8, 9; 1 Peitilisi 5:2, 3). Den baala di abi den faantiwowtu ya wani yeepi den baala anga sisa fu dini Yehofa. Den wani yeepi den tu anga taa sani di den abi fanowdu (Toli 6:1-4). Den owluman akisi i fu yeepi na a buku tafaa efuso fu seeka den peleikiwooko kaita? Den akisi i kaba fu yeepi seeka sani na a kemeente efuso fu du wan taa sani? Den baala di e du den sowtu sani ya taki den lobi den wooko ya.

11. Fa wan sisa fende wini di a go yeepi meke komakandaa peesi?

¹¹ Den baala anga sisa di e yeepi meke komakandaa peesi e meke omen nyun mati. A 18 yali kaba wan sisa den e kai Margie e yeepi meke Kownukondee zaal. Te a be e go yeepi anga a wooko ya, a be lobi poti pakisei a den yonkuu sisa. A lobi leli den a wooko tu. A sisa ya taki den sama di e go yeepi anga den wooko ya e fende a okasi fu gi makandaa taanga-sikin (Romesama 1:12). A taki di sani miti en, a den mati di a meke a den peesi pe a be go yeepi meke Kownukondee zaal gi en taanga-sikin.  I fende a okasi kaba fu yeepi meke wan Kownukondee zaal? I sa go yeepi winsi yu á sabi du bow wooko.

12. Fa i sa gi wan ana te wan gaan ogii pasa a wan peesi?

¹² U sa wooko makandaa anga Yehofa tu te wi e yeepi u baala anga sisa te wan gaan ogii pasa na a pisi pe den e tan. Kande u sa gi moni fu yeepi den (Yohanisi 13:34, 35; Toli 11:27-30). Boiti dati u sa yeepi kiin efuso seeka den sani di booko a pe wan gaan ogii pasa. Wan sisa fu Polen den e kai Gabriela osu be booko di wan gaan wataa sungu a pisi pe ai tan. A be poolo di a si fa den baala anga sisa fu a kemeente di be de koosube kon yeepi en. Gabriela taki te a pakisei a sani ya, a nai booko en ede anga den sani di a lasi, ma ai poti pakisei a san a fende. A taki: „A sani di miti mi membee mi taki a wan gaandi mi abi fu de aini a Kelesten kemeente. A sani ya e meke mi piisii tuutuu.” A omen baala anga sisa di a olikanisâsi yeepi, taki aseefi sani ya tu. Den sama di e wooko makandaa anga Yehofa fu yeepi den baala anga sisa ya seefi e piisii.​—Leisi Toli 20:35; 2 Korentesama 9:6, 7.

13. Saide wi o moo lobi Yehofa te wi e yeepi u baala anga sisa? Gi wan ondoofenitoli.

¹³ Stephanie anga wantu taa Kotoigi wooko makandaa anga Yehofa, di wantu Kotoigi lowe go na Ameekankondee fu di sama be e feti aini den kondee. Den yeepi den Kotoigi ya fu fende osu anga sani fu poti aini den osu. A sisa ya taki: „A be doo wi ati tuutuu di u si taki den baala anga sisa ya be teke en fu bigi taki u yeepi den. A be doo wi ati fu si fa den be e piisii di u soi den taki u lobi den. Den baala anga sisa ya be e si enke a wi yeepi den, ma fu taki en kiin a den yeepi wi a omen fasi. A lobi fu den, a libi di den e libi na a wan, den biibi anga a fitoow di den e fitoow Yehofa, gi u taanga-sikin fu moo lobi Yehofa. A sani ya yeepi u tu fu teke den sani di a olikanisâsi e du fu bigi.”

14, 15. (a) Fa a polofeiti Yesaya be e denki? (b) Fa Kelesten sa waka a Yesaya baka?

¹⁴ I be sa wani du moo gi Yehofa? I be sa wani go yeepi a pe moo peleikiman de fanowdu? A tuu, a á de fu u foloisi go a wan taa peesi fu du moo gi Yehofa. Ma toku wantu baala anga sisa e du a sani ya. Den baala anga sisa ya e denki enke fa polofeiti Yesaya be e denki. Di Yehofa akisi en taki: „Sama mi o sende?  Sama o tyai a bosikopu ya gi u?” Neen Yesaya piki Yehofa taki: „Luku mi ya! Sende mi!” (Yesaya 6:8). I de kabakaba fu yeepi a olikanisâsi fu Yehofa? San a wantu fasi fa i sa yeepi?

¹⁵ Di Yesesi be taki fu a peleikiwooko anga a yeepi di u mu yeepi sama toon en bakaman, a be taki: „A nyanyan di lepi na a goon ipi, ma sama ná ipi sai fu koti en. Neen ede meke u mu begi a Masaa fu a wooko fu a sende moo wookoman fu go yeepi puu nyanyan na a goon” (Mateyesi 9:37, 38). I si enke i sa pionili a pe moo peleikiman de fanowdu? I si enke i sa gi wan taawan taanga-sikin fu du a sani ya? A omen baala anga sisa taki a moo bun fasi fu soi Yehofa anga taawan taki u lobi den, a fu go pionili a wan peesi di abi peleikiman fanowdu. Pakisei fa i sa du moo gi Yehofa. Yu o piisii tuutuu efi i du moo gi en.

16, 17. San a wantu taa fasi fa i sa du moo gi Yehofa?

¹⁶ I be sa wani wooko a Betel efuso yeepi meke komakandaa peesi wan efuso moo dei aini a wiki? I be sa wani wooko a den peesi ya wan pisiten? Na ala yuu a olikanisâsi fu Yehofa abi sama fanowdu di de kabakaba fu yeepi a pe den abi wookoman fanowdu. Den sama di wani yeepi a den peesi ya mu de kabakaba fu du son wooko, winsi den á be sabi du den wooko ya. Yehofa lobi den sama di de kabakaba fu fika son sani di den be gwenti, fu gi wan ana a peesi pe abi yeepi fanowdu.​—Psalm 110:3.

¹⁷ I be sa wani go a wan sikoo di o yeepi i fu du moo gi Yehofa? Kande i sa poti i nen fu go na a Sikoo gi Kownukondee Peleikiman. A sikoo ya e yeepi baala anga sisa di abi ondoofeni aini a fuuten diniwooko, fu du moo aini a olikanisâsi fu Yehofa. Den sama di e go na a sikoo ya, mu de kabakaba fu go yeepi a pe a olikanisâsi o sende den go. Yu á be sa wani go na a sikoo ya fi i sa du moo gi Yehofa noh?​—1 Korentesama 9:23.

18. Sowtu wini wi o fende te wi e wooko makandaa anga Yehofa ala dei?

¹⁸ Wi na a foluku fu Yehofa, neen meke u lobi gi sama sani. U lobi taawan tu. Boiti dati wi abi bun-ati anga switifasi. Wi e booko wi ede anga taawan ala yuu. Na a sani ya e yeepi u fu libi na a wan. Ai meke u piisii tuutuu (Galasiyasama 5:22, 23). A ná abi san e miti i, efi i lobi gi taawan sani enke Yehofa, yu o de koloku. Yu o de koloku tu fu di yu e wooko makandaa anga Yehofa.​—Odo 3:9, 10.