1. San ala sama di e dini Yehofa wani?

WAN sisa den e kai Pauline * taki: „Fanafu di mi kon sabi a tuu, mi be wani ala den sama fu mi kon sabi en tu, fu den be sa de anga mi aini a paladeisi. Mi be wani Wayne, a man fu mi anga a boi fu u kon dini Yehofa makandii anga mi.” Yu abi famii di nai dini Yehofa ete efuso di á sabi Yehofa? Leti enke Pauline kande iseefi e angii fu den kon dini Yehofa anga i.

2. Sowtu akisi wi o luku aini a artikel ya?

² Wi á poi dwengi den famii fu u fu kon a waaleiti, ma u sa gi den taanga-sikin fu poti pakisei a den sani di Beibel e leli, anga fu luku sowtu wini den sa fende fu den sani ya (2 Tim. 3:14, 15). Saide u mu peleiki gi den famii fu u? Saide u mu meke moiti fu fusutan fa den e fii? Fa u sa yeepi den famii fu u fu kon lobi Yehofa enke u? Fa den baala anga sisa aini a kemeente pe u de sa yeepi u?

3. Enke fa 2 Peitilisi 3:9 e soi, da saide u mu peleiki gi den famii fu u?

³ Dyonson Yehofa o poli a goontapu ya. A den sama di „ati bun fu fende a teego libi” wawan o tan a libi (Toli 13:48). Wi e peleiki gi sama di wi á sabi, ma u mu peleiki gi den famii fu u tu fu denseefi sa kon dini Yehofa anga u. U Dda Yehofa lobi ala sama. „A á wani nawan sama dede.  A wani ala sama fende a okasi fu tapu anga den sondu fu den.”​—Leisi 2 Peitilisi 3:9.

4. San e pasa son leisi te wi e peleiki gi den famii fu u?

⁴ U mu holi a pakisei taki a fasi fa wi e peleiki gi wan sama sa meke a aliki u, ma a sa meke a ná aliki u tu. Wi e taki switi anga den sama di wi e miti aini a peleikiwooko, ma kande u nai holi den fii fu den famii fu wi a pakisei te wi e peleiki gi den.

5. San u mu holi a pakisei te wi e peleiki gi u famii?

⁵ Kande di u peleiki a fosi leisi gi den famii fu u, sani á waka enke fa u be wani. Wi e winsi taki u be du sani taa fasi. Apostel Pawlesi be taigi den Kelesten taki: „Taki switi anga taawan ala yuu. Den sani di wi e taki mu abi sawtu. Te wi e taki so, da wi o sabi fa u mu piki iniiwan sama” (Kol. 4:5, 6). Te wi e peleiki gi den famii fu u, u mu holi a sani ya a pakisei, efuso a fasi fa wi o taki anga den o meke den á wani aliki u moo.

6-7. Gi wan ondoofenitoli di e soi saide a pelensipali fu holi den fii fu u toowpaa di nai dini Yehofa, a pakisei.

⁶ Meke moiti fu fusutan fa den e fii. Pauline taki: „Biginbigin a soso sani fu Beibel anga Gadu mi be e taki anga a man fu mi. Mi á be e gi taa toli anga en.” Ma a man fu Pauline á be sabi sani fu Beibel, neen meke a á be e fusutan den toli di Pauline be e gi en. A be e fii enke na a keliki wawan en uman be e denki. A be si enke a keliki di Pauline be e go be daai en ede.

⁷ Pauline taki enseefi be si taki wan pisiten a be e de anga den baala anga sisa ala yuu. A taki gaanse fu den bakadina a  be e de makandaa anga taa baala anga sisa aini a peleikiwooko, a den komakandaa anga te den be kon makandaa fu piisii. Sataa anga sonde seefi a be e de anga den. Pauline taki: „Son leisi te Wayne be doo osu, sama á be e de a osu. A sani ya be e meke a fii enke neen wawan de.” Wayne be e angii fi en uman anga en pikin. A á be sabi den sama di en uman be e de makandii anga den. A be e fii enke Pauline be e moo booko en ede anga den nyun mati fi en. Neen meke a taigi Pauline taki a o booko a toow. San a wantu fasi fa Pauline be sa soi taki ai holi en man a pakisei?

8. Enke fa 1 Peitilisi 3:1, 2 e soi, da san sa meke den famii fu u wani sabi moo fu Yehofa?

⁸ Luku bun fa yu e tyai iseefi. Gaanse leisi a ná den sani di wi e taki e meke den famii fu u wani sabi moo fu Yehofa, ma a den sani di wi e du. (Leisi 1 Peitilisi 3:1, 2.) Bakaten, Pauline be kon fusutan a sani ya. A taki: „Mi be sabi taki Wayne be lobi u, a á be wani booko a toow tuutuu. Ma a di a taigi mi taki a o booko a toow fosi mi fusutan taki mi mu meke moiti fu du sani enke fa Yehofa wani. Pe fu mi e peleiki gi en ala yuu, a moo bun fu mi meke moiti fu moo libi bun anga en.” Pauline á be e dwengi Wayne moo fu taki fu Beibel, ma a bigin gi taa toli anga en. Bakaten Wayne si taki en uman á be e kwali anga en so moo. A boi fu den á be e taangayesi so moo tu. A be moo abi lesipeki (Odo 31:18, 27, 28). Di Wayne si fa Beibel yeepi a osufamii fi en, a be wani kon sabi moo fu a Wowtu fu Gadu.​—1 Kor. 7:12-14, 16.

9. Saide wi á mu weli fu yeepi den famii fu u?

 ⁹ Yu á mu weli fu yeepi den famii fi i. U sa waka a Yehofa baka. „Ala yuu” ai gi sama a okasi fu yee a bun nyunsu fu den sa fende a libi (Yel. 44:4). Boiti dati, apostel Pawlesi be taigi Timotiyesi taki a mu tan poti pakisei na a fasi fa ai leli sama. Saide? Bika te a be o du a sani ya, da en anga den sama di e aliki en be o man fende a libi (1 Tim. 4:16). U lobi den famii fu u, neen meke u wani yeepi den fu sabi san sikiifi aini a Wowtu fu Gadu. Den sani di Pauline be e taki anga a fasi fa a be e tyai enseefi yeepi a osufamii fi en. Nownow ai piisii fu dini Yehofa makandaa anga a man fi en. Den e pionili makandaa, a man toon owluman.

10. Saide u mu pasensi anga den famii fu u?

¹⁰ U mu pasensi anga den famii fu u. Di u kon sabi Yehofa, u kengi omen sani aini u libi. Kande a taanga gi den famii fu u fu biibi taki u nai du den sani di u be gwenti du moo. Gaanse leisi, a fosi sani di den e si na a fii di u nai fii son fesa anga den moo. Den e si tu taki u nai gi politiki toli anga den moo. Biginbigin kande son wan fu den ati o boon a u (Mat. 10:35, 36). Ma wi á mu si enke den ná o kengi noiti. Efu u nai yeepi den moo fu fusutan san wi e biibi, da a leti enke u kuutu den kaba taki den á fiti fu fende teego libi. Yehofa á gi wi a faantiwowtu fu kuutu sama, a Yesesi a gi a wooko de (Yoh. 5:22). Efu wi e pasensi anga den famii fu u, kande den o wani aliki u bakaten.​—Luku a faki di den e kai „ Koboloiki a Website fu u fu leli sama”.

11-13. San wi e leli fu a fasi fa Alice libi anga en mma anga en dda?

¹¹ Soi switifasi, ma yu á mu gwe fika Yehofa fi i famii ede (Odo 15:2). Luku a toli fu Alice. Di a uman ya leli sabi Yehofa, a be e tan faawe fi en mma anga en dda. Den á be e biibi taki wan Gadu de. Boiti dati, den be lobi sani fu politiki. Alice be fusutan taki a be mu taigi den sowtu moin sani a be e leli. A taki: „Efi i daaidaai fu taigi i famii san yu e biibi, anga saide yu bigin du sani taa fasi, den ati o moo boon a yu.” A be e meke moiti fu suku toli aini Beibel di a si enke en mma anga en dda o lobi, da ai sikiifi biifi gi den fu den toli de. Wan fu den toli ya na a lobi di sama mu lobi taawan. Ai akisi den fa den e denki, baka dati ai soi den san Beibel e taki fu a toli (1 Kor. 13:1-13). Ai gi en mma anga en dda daa taki den solugu en te a toon gaansama. Ai sende kado gi den tu. Te a go luku den, ai yeepi en mma anga den wooko fi en. Biginbigin en mma anga en dda ati be boon di a taigi den taki ai sutudeli anga Kotoigi.

¹² Te Alice be de a osu anga en mma anga en dda, a be e leisi Beibel ala dei enke fa a be gwenti. Alice taki: „A sani ya yeepi mma fu si taki mi be lobi Beibel tuutuu.” Bakaten Alice dda be wani leisi a Beibel, fu di a be wani fusutan saide a umanpikin fi en be kengi. A be wani fende fowtu aini a Beibel tu. Alice taki: „Mi gi en wan Beibel. Mi sikiifi wantu sani aini gi en tu.” San a be a bakapisi? Alice dda á fende fowtu aini a Wowtu fu Gadu. Den sani di a leisi aini be doo en ati.

¹³ Winsi tesi e miti u, u mu taki switi anga den famii fu u. Wi á mu gwe fika Yehofa tu (1 Kor. 4:12b). Alice mma be wani tapu en fu dini Yehofa. A taki: „Di mi dopu, mma taigi mi taki mi á bun.” San a du di en mma taigi en a sani ya? Alice taki: „Mi á fika a taki, mi soi mma  kiin a wan lesipeki fasi taki mi ná o kengi pakisei. Mi o tan wan Yehofa Kotoigi. Mi meke moiti fu meke mma si taki mi lobi en tuutuu. U tu man kee, baka dati neen mi boli gi en. Fanafu a ten de, mma kon si taki a Beibel yeepi mi fu toon wan moo bun sama.”

14. Saide wi á mu fika wan sani di u wani du gi Yehofa fu u famii ede?

¹⁴ Son leisi ai teke ten fosi den famii fu u fusutan taki a dini di wi e dini Yehofa a wan pelensipali sani gi u. Pe fu Alice du a wooko di en mma anga en dda be wani a du, a bigin pionili. A sani ya meke en mma kee baka. Ma Alice á kengi pakisei. A taki: „Efi i du san den wani wan leisi, taa leisi den o puubei fu meke i kengi pakisei baka te i mu du wan sani gi Yehofa. Ma efi i taki anga den a wan lesipeki fasi, kande son wan fu den aliki i.” A so a toli fu Alice waka tu. Nownow en mma anga en dda e pionili. En dda toon owluman.

15. Enke fa Mateyesi 5:14-16 anga 1 Peitilisi 2:12 e soi, da fa den bun sani di taawan e du sa yeepi den famii fu u?

¹⁵ Yehofa e koboloiki den „bun sani di wi e du” fu meke sama kon dini en. (Leisi Mateyesi 5:14-16; 1 Peitilisi 2:12.) Efi i toowpaa a ná wan Kotoigi, a sabi den sama fu a kemeente pe i de? Pauline, di u be taki fi en aini den paragraaf a fesi, be bigin kai baala anga sisa fu a kemeente kon neen osu, fi en man be sa sabi den mati fi en. Wayne e membee ete fa wan baala yeepi en fu fusutan fa Kotoigi de  tuutuu. A taki: „A baala teke wan wooko dei fi en fu kon luku futubali anga mi. A sani ya meke mi kon si taki den Kotoigi de enke ala taa sama.”

16. Saide u mu e kai den famii fu u fu kon a den komakandaa anga u?

¹⁶ Wan fasi fa u sa yeepi den famii fu u, a te wi e kai den fu kon a komakandaa anga u (1 Kor. 14:24, 25). A fosi komakandaa di Wayne go na a Membeefesa. A be go na a komakandaa ya, bika a baka wooko a be holi, a á be langa tu. A taki: „Mi á be fusutan a lezing, ma mi be lobi a fasi fa den sama be de. Den bali wadaa gi mi, den seke mi ana. Mi be fusutan taki den Kotoigi a bunbun sama.” Wan baala anga en uman be lobi yeepi Pauline luku a boi fi en te den be de a komakandaa anga peleikiwooko. Neen meke di Wayne be wani sabi moo fu a keliki fi en uman, a akisi a baala ya fu sutudeli anga en.

17. Saide wi á mu fii wan fasi efu den famii fu wi á wani dini Yehofa? Saide wi á mu weli fu yeepi den?

¹⁷ U wani ala den famii fu u kon dini Yehofa makandii anga u. Ma son leisi wi e du ala san u poi fu yeepi den fu toon Gadu mati, ma toku a ná ala den e teke a waaleiti. Efu den famii fi yu á wani dini Yehofa, yu á mu fii wan fasi. Wi á poi dwengi sama fu kon dini Yehofa. Ma te den famii fi i si fa i libi e waka fu di yu e dini Yehofa, a sani ya sa yeepi den fu kon dini en. Begi gi den, taki switi anga den, yu á mu weli fu yeepi den (Toli 20:20). I mu e biibi taki Yehofa o belesi a moiti di yu e meke. Efu den famii fi yu aliki i, da denseefi o fende a libi.