TE U biibi taanga u nai feele fu du sani. Saatan e meke moiti fu poli wi anga Yehofa, ma biibi e yeepi u fu „kii a faya fu den ga di a ogiiwan e sutu kon a u” (Efe. 6:16). Efu u biibi taanga, wi o man pasa tesi di de enke gaan bigi mongo. Yesesi be taigi den disipel fi en taki: „Efu a biibi fu u be bigi enke wan mosterd sii namo, u be o man taigi a mongo ya taki: ’Opo komoto ya go ape.’ Da a mongo be o du san u taki” (Mat. 17:20). Biibi sa yeepi u fu wi anga Yehofa toon moo bun mati, neen meke a bun fu poti pakisei a den akisi ya: San a biibi? Fu saide u mu lobi den leli fu Beibel efu u wani u biibi taanga? Fa u sa taanga u biibi? Sama u mu e biibi?​—Rom. 4:3.

A ná te wan sama e biibi den sani di Beibel e taki namo da a abi tuutuu biibi, bika ’den ogii yeye seefi e biibi taki Gadu de, neen meke den e feele te neen den sikin e dansi’ (Yak. 2:19). Da san a biibi?

A biibi di kai aini Beibel wani taki tu sani. A fosiwan: Beibel taki „biibi a te wan sama abi a fitoow taki den sani di ai howpu, o kon tuu” (Heb. 11:1a). Wan sama di e biibi Yehofa, sabi taki ala san a taki a tuu. Ai biibi tu taki den sani ya o pasa enke fa a taki. Luku san Yehofa be taigi den Islayelisama. A be taki: „Efu u poi booko a paamisi di mi meke anga dei, anga a paamisi di mi meke anga neti, da u meke dei anga neti á kon moo na a yuu di den mu kon, da a paamisi di mi meke anga mi futuboi David o poi booko tu” (Yel. 33:20, 21). Yu e feele taki a san ná o opo efuso taki a san ná o saka wan dei? Efi i nai feele taki a sani ya o pasa, i si enke i mu feele taki a Sama di meke den sani ya ná o du san a paamisi? Nono!​—Yes. 55:10, 11; Mat. 5:18.

Du fu tu: Biibi „a te wan sama abi buweisi taki den sani di á nai si, de tuutuu” (Heb. 11:1b). Fa wan sama sa biibi wan sani di a nai si? Meke u taki wan pikin akisi i taki: „Fa i du sabi taki winta de tuutuu?” Winsi yu á si winta wan dei, toku i sa soi a pikin sani di e soi taki winta de tuutuu. Sani enke a hali wi e hali boo anga a fasi fa den uwii fu den bon e seke. Den sani ya sa yeepi a pikin fu si taki winsi fa a nai si a winta, toku den sani di a winta e du e soi taki winta de tuu. A letiso wi abi kiin buweisi fu den sani di wi e biibi.​—Rom. 1:20

Fu abi biibi, wan sama „mu sabi a waaleiti soifili” fosi (1 Tim. 2:4). Ma dati wawan á sai. Pawlesi be taki: „Anga a ati wan sama e biibi” (Rom. 10:10). Wan sama á mu e biibi taki a disi na a tuu namo, ma a mu lobi a tuu. Te a lobi den sani di a leli, a o wani du den (Yak. 2:20). Efu wan sama á lobi a tuu,  a ná o wani kengi a fasi fa ai du sani, winsi ai si sani di e soi en taki a fende a waaleiti (2 Peit. 3:3, 4; Yud. 18). Neen meke a ná ala den sama fu fositen di be e si wonduu be abi tuutuu biibi (Num. 14:11; Yoh. 12:37). A den sama di lobi san tuu, a santa yeye fu Gadu e yeepi fu abi tuutuu biibi.​—Gal. 5:22; 2 Tes. 2:10, 11

Kownu David a be wan man di biibi be taanga (Heb. 11:32, 33). Ma a ná ala sama aini David osufamii biibi be taanga. Eliyab, a moo gaan baala fu David, be soi taki en biibi swaki, di a be bali David di David ati be boon di Goliyat be e soso a foluku fu Gadu (1 Sam. 17:26-28). Nawan sama nai meke anga biibi. Nawan sama biibi nai taanga fu di en mma efuso en dda biibi taanga tu. David biibi be taanga fu di en anga Yehofa a be mati.

Aini Psalm 27, David e taki fa en biibi du kon taanga (vers. 1). David be e teke ten pakisei fa Yehofa be yeepi en aini a ten di pasa di sani be miti en (vers. 2, 3). A be e si en enke wan gaan sani fu dini Yehofa (vers. 4). David be e dini Gadu makandaa anga taa sama di be lobi Yehofa aini a tabernakel (vers. 6). A be e begi Yehofa anga en hii ati (vers. 7, 8). David be wani Yehofa soi en fa a mu libi (vers. 11). David be e fusutan taki biibi a wan pelensipali sani. Neen meke a be e akisi enseefi taki: „Fa mi libi be o de efu mi á be e biibi?”​—Vers. 13.

I biibi sa taanga enke David te yu e du den sani di sikiifi a Psalm 27. Efu wan sama wani en biibi taanga, a mu sabi a waaleiti soifili. Neen meke efu wi e leisi Beibel anga den taa buku fu a olikanisâsi ala yuu, a o moo makiliki gi u fu abi a manii ya di a santa yeye fu Gadu e meke sama abi (Ps. 1:2, 3). Teke ten pakisei san i leli te yu e sutudeli. Te wi e teke ten pakisei den sani di u leli, wi o moo teke den sani di Yehofa du gi u fu bigi. A sani ya o meke u wani dini en anga u hii ati. U ná o go e misi komakandaa, wi o wani e taigi taawan fu a howpu di wi abi tu (Heb. 10:23-25). Wi e soi taki wi e biibi Yehofa tu te wi e ’begi en ala yuu’ (Luk. 18:1-8). Neen meke yu á mu „weli fu begi” Yehofa, bika ai „booko en ede anga i” (1 Tes. 5:17; 1 Peit. 5:7). Biibi e gi u kaakiti fu du san bun. Moo wi e du bun sani moo u biibi e taanga.​—Yak. 2:22.

A neti fosi Yesesi dede, a taigi den disipel fi en taki: „U mu biibi Gadu. U mu biibi mi  tu” (Yoh. 14:1). Wi á mu biibi Gadu namo, ma u mu biibi Yesesi tu. Fa i sa soi taki yu e biibi Yesesi? Wi o luku dii fasi fa i sa du a sani ya.

A fosiwan: I mu si a dede fu Yesesi enke wan kado di Gadu gi i. Apostel Pawlesi be taki: „A libi di mi e libi nownow, a fu di mi e biibi aini a Manpikin fu Gadu. A lobi mi. A dede fu mi ede” (Gal. 2:20). Efi yu e biibi Yesesi, da yu e biibi taki iseefi sa fende wini fu a dede di a kon dede gi libisama fu u sa fende paadon fu sondu. Yu e biibi tu taki a paiman ya o yeepi i fu fende a teego libi. Na a moo gaan sani di Gadu be sa du fu soi taki a lobi i (Rom. 8:32, 38, 39; Efe. 1:7). Efi yu e biibi taki Yesesi dede gi i, a sani ya o yeepi i fi yu á fii enke yu á bun.​—2 Tes. 2:16, 17.

Du fu tu: Begi Yehofa ala yuu. Fu di Yesesi dede gi u meke u sa taki anga Yehofa aini begi. U ná abi fu ’feele fu begi Yehofa fu a soi tyali-ati gi u. A o soi bun-ati gi u tu, fu di a o yeepi u na a moo bun yuu’ (Heb. 4:15, 16; 10:19-22). Begi e yeepi u tu fu wi á sondu te tesi miti u.​—Luk. 22:40.

Du fu dii: Aliki Yesesi. Apostel Yohanisi be sikiifi taki: „A sama di e biibi a Manpikin fu Gadu, o libi fu teego. A sama di nai aliki a Manpikin ná o fende a libi, ma Gadu o puu boon ati neen” (Yoh 3:36). Yohanisi taki efu u nai biibi a Manpikin fu Gadu, u ná o poi aliki en. Neen meke a te wi e aliki Yesesi fosi wi e soi taki wi e biibi en. Wi e soi taki wi e aliki Yesesi te wi e du san „a weiti fu Kelestesi” e taki. Dati na ala den sani di Yesesi be leli sama (Gal. 6:2). Wan taa fasi fa wi e soi taki wi e aliki Yesesi, a te wi e wooko anga den sani di „a koni saafu di u sa fitoow” e leli u (Mat. 24:45). Te wi e aliki Yesesi wi o poi pasa omen tesi.​—Luk. 6:47, 48.

Wan leisi wan man taigi Yesesi taki: „Mi e biibi! Yeepi mi efu mi abi moo biibi fanowdu!” (Malik 9:24) A man ya be e biibi, ma fu di a be abi sakafasi meke a begi Yesesi fu yeepi en fi en biibi moo taanga. Leti enke a man ya, sani sa miti u di o meke wi abi moo biibi fanowdu. Ala u sa taanga u biibi nownow. Enke fa u be si a fesi kaba, u sa taanga u biibi te wi e sutudeli a Wowtu fu Gadu da u teke ten pakisei den sani di u leisi. A sani ya o meke u moo lobi Yehofa. U biibi o moo taanga tu te wi e dini Yehofa makandaa anga den baala anga sisa fu u, te wi e paati a bun nyunsu anga taawan anga te wi e begi Yehofa fayafaya. Te wi e meke moiti fu taanga u biibi wi o fende wan moin gaandi. A Wowtu fu Gadu taki: „Lobiwan, meke u taanga useefi anga a moo santa biibi, . . . fu Gadu sa tan lobi u.”​—Yud. 20, 21.