1. Sama be yeepi sete a kemeente a Filipi?

DI APOSTEL Pawlesi, Silas, Lukasi, anga Timotiyesi doo a Filipi, den miti omen sama di be wani yee a bun nyunsu fu a Kownukondee. A den fo baala ya di be e dini Yehofa fayafaya be yeepi sete a kemeente a Filipi. Kande na a osu fu Lidiya, wan sisa di be abi switifasi den nyun baala anga sisa be e holi komakandaa.​—Toli 16:40.

2. Sowtu tesi be miti a nyun kemeente a Filipi?

² A á langa fosi tesi bigin miti a nyun kemeente ya. Saatan meke den sama di be e buuse a tuu biibi bigin du ogii anga Pawlesi anga den taa baala, fu di den be wani den tapu anga a peleikiwooko. Den kisi Pawlesi anga Silas, den fon den anga tiki, neen den sooto den. Di den komoto a sitaafu-osu, neen den go gi den baala anga sisa fu a nyun kemeente taanga-sikin. Baka dati, Pawlesi, Silas anga Timotiyesi komoto aini a foto, ma a gei enke Lukasi be fika a baka. San den baala anga sisa fu a nyun kemeente ya be o du? Yehofa yeepi den anga en santa yeye fu tan dini en fayafaya (Filip. 2:12). A sani ya be musu meke Pawlesi piisii!

3. Enke fa Filipisama 1:9-11 e soi, da san Pawlesi be begi Yehofa?

³ Wan sani fu tin yali baka dati, Pawlesi sikiifi wan biifi gi a kemeente a Filipi. Te yu e leisi a biifi ya, yu e si taki Pawlesi be lobi den baala anga sisa ya tuutuu. A taki: „Mi e angii fu si ala u, bika mi lobi u tuutuu enke fa Kelestesi lobi u” (Filip. 1:8). A taigi den tu taki ai begi gi  den. A begi Yehofa fu a yeepi den fu moo lobi denseefi, fu sabi san a den moo pelensipali sani, fu de sondee fowtu, fu den á du sani di o meke taawan dyakata anga fu tyai denseefi a wan letifasi. Aini a ten ya useefi sa leli omen sani fu a biifi di Pawlesi be sikiifi gi den baala anga sisa fu Filipi. Wi o luku san Pawlesi be sikiifi gi den baala anga sisa ya. (Leisi Filipisama 1:9-11.) Baka dati wi o luku san a taigi den fu du anga fa useefi sa wooko anga den sani ya.

4. (a) Enke fa 1 Yohanisi 4:9, 10 e soi, da fa Yehofa soi taki a lobi u? (b) Fa u mu lobi Gadu?

⁴ Yehofa soi taki a lobi u tuutuu di a sende en Manpikin kon dede gi u, fu u sa fende paadon fu sondu. (Leisi 1 Yohanisi 4:9, 10.) Te u luku fa Gadu soi taki a lobi u, useefi wani soi en taki u lobi en tu (Rom. 5:8). Fa u mu lobi Gadu? Yesesi be piki a akisi ya di a be taigi wan Faliseiman taki: „I mu lobi i Gadu Yehofa anga i hii ati, i hii libi anga ala i fusutan” (Mat. 22:36, 37). U wani lobi Yehofa anga u hii ati. Pawlesi be taigi den Kelesten a Filipi taki a lobi fu den, be mu e goo „moo anga moo”. San o yeepi u fu lobi Gadu anga u hii ati?

5. San o yeepi u fu moo lobi Yehofa?

⁵ U mu sabi Gadu fosi wi o man lobi en. Beibel taki: „Wan sama di á lobi taawan á sabi Gadu, bika Gadu a lobi” (1 Yoh. 4:8). Apostel Pawlesi be taki, moo wi e leli sabi Gadu, moo wi o lobi en (Filip. 1:9). Di u bigin sutudeli Beibel, neen u bigin lobi Yehofa, winsi wi á be sabi tyaipi sani fi en. Baka di u kon sabi moo fu Yehofa, u kon moo lobi en. Neen meke u mu e leisi Beibel ala dei, da u teke ten pakisei den sani di u leli.​—Filip. 2:16.

6. Enke fa 1 Yohanisi 4:11, 20, 21 e soi, da san o yeepi u fu lobi u baala anga sisa?

⁶ Te u luku fa Gadu lobi u, da a sani ya e gi u taanga-sikin fu lobi u baala anga sisa. (Leisi 1 Yohanisi 4:11, 20, 21.) Kande wi e si enke a ná o taanga gi u fu lobi u baala anga sisa, bika wi e dini Yehofa anga u hii ati. Wi e meke moiti fu de enke en. Wi e meke moiti fu waka a Yesesi baka tu. A lobi u te neen a kon dede gi u. Ma winsi fa, son leisi ai taanga gi u fu lobi u baala anga sisa. Meke u luku san be pasa aini a kemeente a Filipi.

7. San wi e leli fu a sani di Pawlesi taigi Eyodiya anga Sentike?

⁷ Eyodiya anga Sentike be e dini Yehofa anga den hii ati makandaa anga apostel Pawlesi. Ma a gei enke wan sani be pasa di be meke den tu sisa ya á be de mati moo. Aini a biifi di Pawlesi be sikiifi gi a kemeente fu den, a be gi den tu sisa ya taanga-sikin „fu den denki go na a wan se” (Filip. 4:2, 3). Pawlesi be gi a hii kemeente taanga-sikin di a taki: „Du ala sani sondee fu kuutu. Wi á mu e sitee anga taawan” (Filip. 2:14). Pawlesi be soi den kiin fa den mu tyai denseefi. A ná Eyodiya anga Sentike wawan a sani ya be yeepi, ma a be yeepi a hii kemeente tu fu moo lobi denseefi.

8. San sa meke a taanga gi u fu lobi u baala? San o yeepi u fu lobi u baala?

⁸ Son leisi aseefi sani di be miti Eyodiya anga Sentike sa miti u tu. Kande ai taanga gi u fu lobi u baala anga sisa, fu di wi e moo poti pakisei a den fowtu di  den e meke, peesi fu u poti pakisei a den bun manii fu den. Ala wi e meke fowtu ala dei. Efu wi e tan poti pakisei a den fowtu di taawan e meke, u ná o poi lobi den anga u hii ati. Kande wan leisi wan baala feegete fu yeepi kiin a zaal. A sani ya sa meke wi ati boon neen. Efu u be o sidon teli ala den fowtu di a baala e meke, wi ati o moo boon neen. U ná o poi lobi en anga u hii ati moo. Efi i si enke wan sama aini a kemeente e du sani di e meke yu ati boon, a be o bun fu pakisei fa Yehofa e si a toli. Yehofa e si den fowtu di u baala e meke, ma ai si den fowtu di wi e meke tu, toku a lobi u. Neen meke u mu meke moiti fu waka a Yehofa baka, da u poti pakisei a den bun sani di u baala e du. Te wi e du ala san u man fu lobi u baala, wi anga den o libi na a wan.​—Filip. 2:1, 2.

9. San a wantu fu den moo „pelensipali sani” di Pawlesi be kai aini a biifi di a be sikiifi gi den Kelesten a Filipi?

⁹ Yehofa be meke Pawlesi taigi den Kelesten aini Filipi taki den mu „sabi san a den moo pelensipali sani”. Na ala Kelesten mu wooko anga a sani ya (Filip. 1:10). Wantu fu den pelensipali sani na a santa di a nen fu Yehofa mu santa, den sani di a paamisi u mu kon tuu. Boiti dati den sama di e dini en mu e libi na a wan (Mat. 6:9, 10; Yoh. 13:35). Efu wi e si den sani ya enke den moo pelensipali sani aini u libi, wi e soi taki u lobi Yehofa.

10. San u mu du efu u wani Yehofa si wi enke sama di ná abi fowtu?

¹⁰ Pawlesi taki sama á mu „fende fowtu” a wi. A sani ya á wani taki u ná o meke fowtu. Wi á poi de sondee fowtu enke Gadu. Ma efu wi e du ala san u poi fu lobi taawan anga fu sabi san a den moo pelensipali sani, Yehofa o si wi enke sama di ná abi fowtu. Wan fasi fa u sa soi taki u lobi taawan, a te u nai du sani di sa meke den dyakata.

11. Saide u mu luku bun fu wi á meke taawan dyakata?

¹¹ Di Pawlesi taki wi á mu „meke taawan dyakata”, a wan pelensipali sani a taki. Fa u be sa meke taawan dyakata? Den sani di wi e aliki efuso luku, sa meke taawan dyakata. Den koosi di wi e wei efuso a wooko di wi e du sa meke taawan dyakata tu. Kande a sani di wi e du á fowtu, ma efu a o fooseli a kosensi fu wan taawan te da a dyakata, da u mu luku bun. Yesesi taki pe fu wan sama meke wan taawan dyakata, a moo bun fu den tei wan gaan mii-siton neen neki, da den fiingi en go aini a se!​—Mat. 18:6.

12. San a ondoofenitoli fu a pionili toowpaa e leli u?

¹² Meke u luku fa wan pionili toowpaa wooko anga san Yesesi taki. Den be de aini wan kemeente makandaa anga wan toowpaa di á be dopu langa ete. A toowpaa ya be kiya aini wan osufamii pe den gaansama fu den be poti omen weiti gi den. Den be e si enke a á fiti fu Kelesten pai go luku felon, winsi a wan bun felon. Den be dyombo di den yee taki a pionili toowpaa be pai go luku wan felon. Di a pionili toowpaa fusutan a sani ya, den á go luku felon moo te enke a taa toowpaa fusutan moo bun san bun anga san á bun (Heb. 5:14). A pionili toowpaa soi kiin taki den e holi taawan a pakisei.  A sani di den du e soi taki den lobi den baala anga sisa.​—Rom. 14:19-21; 1 Yoh. 3:18.

13. Fa u sa meke wan baala efuso sisa du wan sani di sa meke a sondu?

¹³ Wan taa fasi fa u sa meke u baala efuso sisa dyakata, a te u meke den du sani di sa meke den sondu. Fa a sani ya sa pasa? Meke u luku wan ageisitoli. Meke u taki wan baala a be wan sopiman fosi a kon a waaleiti. Ma bakaten Beibel yeepi en fu a tapu anga a takuu gwenti ya. A fusutan taki efu a wani holi enseefi, a á mu diingi sopi moo seefiseefi. A meke moiti kengi a fasi fa a be e libi, neen a dopu. Bakaten wan baala kai en go a wan fesa, neen a gi en sopi fu diingi. A taigi en taki: „Yu a wan Kelesten nownow. A yeye fu Yehofa de anga i. Dwengi iseefi a wan fu den manii di a yeye fu Yehofa e meke sama abi. Efi i poi dwengi iseefi, i mu man diingi pikinso sopi.” A be o de wan tyali sani efu a baala ya aliki a taa baala, da a kai go neen haw olo baka.

14. Fa den komakandaa e yeepi u fu du san sikiifi a Filipisama 1:10?

¹⁴ A omen fasi den komakandaa e yeepi u fu du den sani di sikiifi a Filipisama 1:10. A fosiwan, den komakandaa e yeepi u fu sabi san Yehofa e si enke den moo pelensipali sani. Du fu tu, den e soi u fa u sa wooko anga den sani di u leli fu u sa de sondee fowtu. Du  fu dii, wi e fende taanga-sikin „fu soi lobi anga fu du bun wooko” (Heb. 10:24, 25). A taanga-sikin di wi e fende a den komakandaa e yeepi u fu moo lobi Yehofa anga fu moo lobi u baala anga sisa. Te u lobi u baala anga sisa anga u hii ati, a sani ya o yeepi u fu wi á du sani di o meke den dyakata.

15. San a wani taki fu „du sani a wan letifasi”?

¹⁵ Pawlesi be begi Yehofa fu a yeepi den Kelesten fu Filipi fu „du sani a wan letifasi” (Filip. 1:11). Efu den be e „du sani a wan letifasi”, den be o lobi Yehofa anga den baala anga sisa fu den. Den be o leli taa sama sani fu Yesesi anga fu a howpu fu den. Filipisama 2:15 taki u de enke, „faya di e kiin peesi aini a goontapu”. A sani di Pawlesi be taki ya a tuu, bika Yesesi be kai den bakaman fi en „a faya di e kiin a goontapu” (Mat. 5:14-16). A be sende den bakaman fi en tu fu ’meke sama toon en bakaman’. Yesesi be taki den be o de ’en kotoigi te a den moo faawe peesi a goontapu’ (Mat. 28:18-20; Toli 1:8). Wi e soi taki wi e „du sani a wan letifasi” te wi e du a wooko ya fayafaya.

16. Fa Filipisama 1:12-14 e soi taki u poi de enke wan faya di e kiin peesi gi a goontapu winsi ogii e miti u? (Luku a fowtow a fesise fu A Wakititolen.)

¹⁶ Winsi san e miti u, u poi de enke wan faya di e kiin peesi gi a goontapu. Son leisi wan sani di be sa tapu u fu peleiki, e opo pasi gi u fu paati a bun nyunsu. A sitaafu apostel Pawlesi be de a Rome di a sikiifi biifi gi den Kelesten a Filipi. Den bui á be poi tapu en fu peleiki gi den suudati di be e holi wakiti gi en anga den sama di be e go luku en. Pawlesi peleiki fayafaya winsi a á be makiliki.  Na a sani ya gi den baala anga sisa „deki-ati fu taki fu a wowtu fu Gadu”.​—Leisi Filipisama 1:12-14; 4:22.

17. Fa den baala anga sisa aini a ten ya e holidoo aini a peleikiwooko winsi a á makiliki?

¹⁷ A omen baala anga sisa fende a okasi fu soi deki-ati leti enke Pawlesi. Den baala anga sisa ya e tan aini kondee pe den á poi peleiki osu fu osu, neen meke den e paati a bun nyunsu a wan taa fasi (Mat. 10:16-20). Aini wan fu den kondee ya, wan kelen owluman gi den peleikiman taanga-sikin fu peleiki gi den famii, den sama di e tan koosube fu den, sama a wookope, sikoo anga taa sama di den sabi. Aini wan sani fu tu yali, den be kon abi moo kemeente na a pisi pe a kelen owluman ya be e luku. Kande lanti á tapu a peleikiwooko na a pisi pe wi e tan. Toku u sa leli wan sani fu den baala anga sisa ya. Efu wi e suku fasi ala yuu fu paati a bun nyunsu, u sa biibi taki Yehofa o gi wi a kaakiti di wi abi fanowdu fu tan peleiki, winsi a á makiliki.​—Filip. 2:13.

18. San u mu de kabakaba fu du?

¹⁸ Aini a ten ya, u mu meke moiti fu wooko anga a sani di Yehofa be meke Pawlesi sikiifi aini a biifi di a be sende gi den Kelesten a Filipi. U mu sabi san a den moo pelensipali sani, u mu de sondee fowtu, u mu meke moiti fu wi á du sani di o meke taawan dyakata. Boiti dati, u mu e tyai useefi a wan letifasi. Te wi e du den sani ya, wi o moo lobi u baala anga sisa. A so wi o gi u Dda Yehofa di lobi u, gaandi.