YU E angii fu du wan sani aini a olikanisâsi di yu á poi du nownow? Kande i wani wan gaandi di wan taa sama abi. Kande a wan gaandi efuso wan wooko di i be du aini a ten di pasa. Ma kande yu á poi du den sani ya moo fu di i gusontu go a baka, fu di i kon gaandi, fu di a libi taanga efuso fu di yu abi taa faantiwowtu aini yu osufamii. Kande i be mu tapu anga wan wooko di i du omen yali fu di sani kengi aini a olikanisâsi. Efu wan fu den sani ya miti i, kande yu e fii enke i nai du ala san i be sa wani du gi Yehofa. Kande a sani ya e meke yu e fii booko-saka son leisi. Ma san sa yeepi i fi yu á lasi-ati, fi yu ati á boon efuso dyalusu anga taawan te den sani ya pasa? San i mu du fi yu á lasi i piisii?

U sa leli wan sani fu a toli fu Yohanisi a Dopuman. Yohanisi be abi wan moin gaandi. Kande noiti a be denki taki a so sani be o waka aini en libi. Kande a á be denki taki a be o de a sitaafu-osu langa moo enke san a be peleiki. Toku Yohanisi be de anga piisii ala yuu te enke a dede. San be yeepi en fu a á lasi en piisii? Fa u sa de anga piisii winsi sani nai go enke fa u be denki?

Aini april fu a yali 29, Yohanisi bigin anga a wooko di Yehofa be gi en fu seeka a pasi gi a Mesiyas. A be e taigi den sama taki: „U mu soi taki den sondu fu u e hati u, bika a Kownukondee fu hemel koosube” (Mat. 3:2; Luk. 1:12-17). A omen sama aliki. Gaan kulu sama be e komoto te a faawe fu kon yee a nyunsu di a be e paati. A omen fu den sama ya daai den libi, neen den dopu. Yohanisi á be e feele fu taigi den keliki fesiman san be o miti den tu efu den á be daai den libi (Mat. 3:5-12). Na a pisiten fu oktober fu a yali 29, a be du a moo pelensipali pisi fu a wooko fi en di a dopu Yesesi. Baka di a dopu Yesesi, a bigin gi taawan taanga-sikin fu waka a Yesesi, a Mesiyas baka.​—Yoh. 1:32-37.

Di Yesesi taki fu a gaandi di Yohanisi be abi a taki: „Fu ala den sama di mama meke, nawan bigi moo Yohanisi a Dopuman” (Mat. 11:11). A ná abi misi, Yohanisi be lobi den belesi di a fende. Leti enke Yohanisi, a so Gadu belesi omen sama aini a ten ya tu. Luku a toli fu wan baala den e kai Terry. En anga  en uman Sandra, e du a fuuten diniwooko moo enke 50 yali kaba. Terry taki: „A omen moin gaandi mi fende aini a olikanisâsi. Mi du a kowownu pioniliwooko, a spesuutu pioniliwooko, mi wooko a Betel, mi wooko enke kelen owluman anga distrikt owluman, nownow mi e du a spesuutu pioniliwooko baka.” Wi e piisii te u fende gaandi aini a olikanisâsi. Ma a toli fu Yohanisi o leli u taki son leisi wi abi fu meke moiti fu wi á lasi u piisii te sani kengi.

Wan sani di be e yeepi Yohanisi a Dopuman fu de anga piisii ala yuu, na a teke di a be e teke den gaandi di a be abi fu bigi, winsi sani be kengi. Baka di Yesesi dopu, omen fu den sama di be e waka a Yohanisi baka bigin waka a Yesesi baka. Den disipel fu Yohanisi be e booko den ede anga a sani ya, neen meke den taigi en taki: „A man de e dopu sama tu, ala den sama e go neen” (Yoh. 3:26). Yohanisi piki den taki: „Na a man di e toow abi a uman. Ma te a mati fu a man di e toow yee a siten fu a man di o toow, da ai piisii. A letiso miseefi e piisii” (Yoh. 3:29). Yohanisi á be e sitee anga Yesesi. A á be e si enke a wooko fi en á bun moo fu di Yesesi be abi gaan faantiwowtu moo en. Yohanisi be man de anga piisii ala yuu, bika a be e teke a wooko fi en enke „a mati fu a man di e toow” fu bigi.

A fasi fa Yohanisi be e denki be yeepi en fu de anga piisii, winsi fa a wooko fi en á be makiliki. Fanafu di Yohanisi meke, en a be wan Nasireisama, neen meke a á be e diingi win (Luk. 1:15). Yesesi be taki: „Di Yohanisi kon a á be e nyan, a á be e diingi.” Ma Yesesi anga den disipel fi en a ná be Nasireisama, neen meke den be e nyan, den be e diingi (Mat. 11:18, 19). Yohanisi á be poi du wonduu, ma a be sabi taki den disipel fu Yesesi be e du wonduu. Son wan fu den disipel ya be e waka a Yohanisi baka fosi den go waka a Yesesi baka (Mat. 10:1; Yoh. 10:41). Tokuso Yohanisi á be e booko en ede anga den sani ya tumisi. A be e tan du a wooko di Yehofa be gi en fayafaya.

Efu u lobi a wooko di wi e du gi Yehofa nownow, wi o man de anga piisii ala yuu. Terry di u be taki fi en kaba taki: „Mi be e poti ala mi pakisei a iniiwan fu den wooko di mi be e du.” Di a pakisei ala den sani di a be abi a gaandi fu du gi Yehofa, a taki: „Te mi e denki ala den wooko di mi be du, da a soso piisii mi e piisii.”

Wi o moo lobi a wooko di wi e du te wi e teke ten pakisei san moo pelensipali. Dati na a gaandi di wi abi fu „wooko makandii anga Gadu” (1 Kor. 3:9). Te wan sama gi i wan moin dii sani, a te yu e solugu en bun fosi a o tan moin. A letiso wi o de anga piisii ala yuu, te wi e teke ten pakisei a gaandi di wi abi fu wooko makandii anga Gadu. U ná o go e maiki san wi e du anga san taawan e du. U ná o si enke a wooko di Yehofa gi wan taa sama pelensipali moo di a gi u tu.​—Gal. 6:4.

Kande Yohanisi be sabi taki a á be o du a wooko fi en langa moo, ma kande a á be denki taki a wanboowanboo a be o abi fu tapu anga a wooko ya (Yoh. 3:30). Aini a yali 30, wan sani fu sigisi mun baka di Yohanisi dopu Yesesi, neen Kownu Herodes sooto en. Tokuso Yohanisi be tan peleiki aini sitaafu-osu (Malik. 6:17-20). San be yeepi en fu de anga piisii aini den taanga ten ya? A be tan poti pakisei a den sani di be pelensipali gi Yehofa.

Di Yohanisi be de a sitaafu-osu a be e yee fa a wooko fu Yesesi be e go a fesi (Mat. 11:2; Luk. 7:18). Yohanisi be sabi taki a Yesesi a be a Mesiyas di be mu kon. Ma kande a be e akisi enseefi fa Yesesi be o meke ala den polofeititoli di Gadu Wowtu be taki a Mesiyas be o du kon tuu. A be sabi tu taki a Mesiyas be o toon kownu. Kande a be e akisi enseefi efu a á be fika langa moo fu Yesesi be toon kownu. Kande a be e akisi enseefi tu efu Yesesi be  o puu en a sitaafu-osu. Fu di Yohanisi be wani sabi san Yesesi o du, meke a sende tu fu den disipel fi en go akisi Yesesi taki: „A yu na a sama di be mu kon, efuso wan taawan sama mu kon ete?” (Luk. 7:19). Di den disipel daai kon a Yohanisi baka, a be musu e aliki anga ala en pakisei di den taigi en den wonduu di Yesesi be e du. Yesesi be sende den fu taigi Yohanisi taki: „Den sama di beendi e si baka, den wan di malengii e waka, den kokobeman e betee, den dofuman e yee, den dedesama e weki baka. Boiti dati, pootiman e yee a bun nyunsu.”​—Luk. 7:20-22.

Den sani di den disipel fu Yohanisi taigi en be musu gi en taanga-sikin. Den sani ya be e soi taki a Yesesi a be a Mesiyas tuu, bika a be e du den sani di den polofeititoli be taki. Winsi fa Yesesi á puu Yohanisi a sitaafu-osu, tokuso Yohanisi be sabi taki a á be wooko fu soso. Neen meke winsi san be e miti en, a be e piisii.

Efu wi e poti ala u pakisei na a dini di wi e dini Yehofa, da leti enke Yohanisi wi o man holidoo anga pasensi anga piisii winsi san e pasa (Kol. 1:9-11). Wi o man holidoo tu te wi e leisi Beibel ala dei, da u teke ten pakisei den sani di u leisi. A sani ya o yeepi u fu wi á feegete taki Gadu e teke ala san wi e du gi en fu bigi (1 Kor. 15:58). Sandra taki: „A leisi di mi e leisi Beibel ala dei yeepi mi fu kon moo koosube a Yehofa. Ai yeepi mi fu moo poti pakisei a den sani di pelensipali gi Yehofa, peesi fu e poti pakisei a miseefi.” Te wi e poti pakisei na a wooko di taa baala anga sisa e du gi Yehofa a hii goontapu, da a sani ya o yeepi u tu fu wi á denki useefi namo. Sandra taki: „A JW Broadcasting^® di e kon ala mun e meke u fii taki aini Yehofa olikanisâsi u de tuutuu. Ai yeepi u tu fu de anga piisii winsi san e pasa.”

Aini a satu pisiten di Yohanisi a Dopuman be peleiki, a be peleiki anga „aseefi kaakiti fu Eliya”, a be de „fayafaya enke en” tu. Leti enke Eliya en a „be libisama enke mi anga yu di be abi denseefi fii di wi abi” (Luk. 1:17; Yak. 5:17). Efu wi e teke a wooko di wi e du gi Yehofa fu bigi, da u poti ala u pakisei na a dini di wi e dini en, da leti enke Yohanisi wi o piisii ala yuu winsi san e pasa.