1. Saide Yehofa bigin meke sani?

WAN hii pisiten a Yehofa wawan be de. Ma tokuso a á be e fuufeli. A libi be e switi gi en, a á be e mankei nawan sani. Ma fu di Gadu a lobi meke a be wani paati den bun sani di a abi anga taawan, neen meke a bigin meke sani.​—Ps. 36:9; 1 Yoh. 4:19.

2. Fa Yesesi anga den engel be e fii di Yehofa bigin meke sani?

² A fosi sani di Yehofa meke, neen Manpikin. Neen na ‘a sama di Gadu koboloiki fu meke ala taa sani’. Neen yeepi Gadu meke ala den taa engel tu (Kol. 1:16). Yesesi be e piisii fu wooko makandaa anga en Dda (Odo 8:30). Den engel be e piisii tu, di Yehofa anga Yesesi meke hemel anga goontapu. Fa den engel ya soi taki den be e piisii? Beibel taki den ‘gafa’ Gadu di a meke a goontapu. Den gafa en tu di a meke ala den taa sani, moomoo di a meke libisama (Yopu 38:7; Odo 8:31). Ala den sani di Yehofa meke e soi a lobi fi en, den e soi tu taki a koni.​—Ps. 104:24; Rom. 1:20.

3. Enke fa 1 Korentesama 15:21, 22 e soi, da sowtu wini wi o fende fu a dede fu Yesesi?

³ Di Yehofa meke libisama, a be wani den libi fu teego, sondee booko-ede aini a moin goontapu di a be meke gi den. Ma Adan anga Efa taangayesi Gadu neen meke den dede bakaten. Ala den bakapikin fu den toon sondu  sama tu neen meke denseefi e dede (Rom. 5:12). San Yehofa du? Faisi Adan anga Efa sondu, a so Yehofa taki fa a o seeka sani fu meke libisama fende a libi di a be paamisi den (Gen. 3:15). Yehofa meke en Manpikin kon dede gi u fu fii wi fu sondu anga dede. Ala sama di e libi enke fa a wani sa fende a libi di a be paamisi Adan anga Efa.​—Yoh. 3:16; Rom. 6:23; leisi 1 Korentesama 15:21, 22.

4. Sowtu akisi wi o luku aini a artikel ya?

⁴ A omen sani u sa akisi useefi te u luku a paamisi di Gadu paamisi taki a o weki dedesama baka. Kande wi e akisi useefi taki: ‘Fa sani o waka te Gadu o weki den sama di dede? Di den sama fu u di dede o weki baka wi o sabi den ete? Fa a weki di Gadu o weki dedesama o meke u piisii? Fa a weki di Yehofa o weki dedesama e soi taki a lobi u, taki a koni, anga taki a abi pasensi? Wi o luku den akisi ya aini a artikel ya.

5. Saide u sa biibi taki a ná ala sama o weki na a wan yuu?

⁵ A miliyunmiliyun sama Yehofa o meke en Manpikin weki baka. U sa biibi taki a ná a wan pasi a o weki ala den sama ya. Saide? Bika efu omen miliyun sama o weki baka na aseefi yuu, sani o waka buuyabuuya. U sabi taki Yehofa a wan Gadu di nai du sani buuyabuuya. A sabi taki efu sani e go buuyabuuya freide ná o poi de a goontapu (1 Kor. 14:33). Di Yehofa anga Yesesi be e meke a goontapu, a ná a wan dei den meke ala sani. A sani ya e soi taki Yehofa koni, a abi pasensi. A denseefi manii ya Yesesi o soi aini a Dunsu Yali Tii fi en. A o yeepi  den sama di pasa Alimakedon fu seeka a goontapu gi den sama di o weki baka.

6. Enke fa Toli fu den apostel 24:15 e soi, da sama a den sama di o weki baka?

⁶ A moo bun fasi fa den sama di pasa Alimakedon sa yeepi den sama di o weki baka, na a leli di den o leli den san na a Kownukondee fu Gadu, anga fa Gadu wani den libi. Saide? Bika gaanse fu den sama di o weki baka a ‘sama di á be libi a wan letifasi’. (Leisi Toli fu den apostel 24:15.) Efu den wani fende wini fu a dede di Yesesi kon dede gi libisama fu den sa libi fu teego, den o abi fu kengi a fasi fa den be e libi. Pakisei a gaan wooko di wi o abi fu yeepi miliyunmiliyun sama fu kon sabi Yehofa. Gaanse fu den sama ya á be yee fu Yehofa ete. A fa wi e sutudeli Beibel anga sama nownow wi o leli den aini a ten de? Den o poti den sama ya aini kemeente fu soi den fa denseefi sa yeepi taa sama di mu weki ete? We, wi á sabi fa sani o waka. Ma u sabi taki na a kaba fu a Dunsu Yali Tii fu Kelestesi ‘a leli fu Yehofa o fuu goontapu’ (Yes. 11:9). Ná pikin wooko o de fu du aini a dunsu yali de, ma u sa biibi taki wi o piisii te wi e du den wooko ya.

7. Saide a foluku fu Gadu o poi pasensi anga den sama di o weki baka?

⁷ Aini a Dunsu Yali Tii fu Kelestesi ala den sama di e dini Yehofa kaba o abi fu tan meke moiti fu du sani enke fa a wani. A sani ya o yeepi den fu pasensi anga den sama di o weki baka, bika den o fusutan fa den e fii. Den o yeepi den fu feti anga den sondu fii fu den fu den sa libi enke fa Yehofa wani (1 Peit. 3:8). Den sama di o weki baka o si taki a foluku fu Yehofa abi sakafasi. Den o si tu taki den ‘e feti naamo fu den sa fende a libi’ di Gadu paamisi den.​—Filip. 2:12.

8. Saide u sa biibi taki wi o sabi den famii fu u di dede te den o weki baka?

⁸ U sa biibi taki wi o sabi den sama fu u di o weki baka. Saide u sa biibi a sani ya? Den toli fu sama aini Beibel di be weki baka e soi taki den sama di o weki baka o abi aseefi fesi di den be abi fosi den dede. Na aseefi siten den o abi tu. A denseefi sani di den be sabi fosi den dede den o membee baka. Holi a pakisei taki Yesesi be taki te wan sama dede, da a leti enke ai siibi. Te den sama di dede o weki baka, a o de enke den be e siibi neen den weki baka (Mat. 9:18, 24; Yoh. 11:11-13). Te i weki wan sama di be e siibi, en fesi anga a fasi fa ai taki nai kengi. A nai feegete den sani di a be sabi fosi a go siibi tu. Luku a toli fu Lasalesi. A fo dei Lasalesi be dede fosi Yesesi weki en baka, neen meke en sikin be bigin poli kaba. Toku di Yesesi weki en, den sisa fi en be sabi taki neen de ape, enseefi be sabi den sisa fi en tu.​—Yoh. 11:38-44; 12:1, 2.

9. Saide den sama di o weki baka o abi sondu ete?

⁹ Yehofa paamisi u taki nawan sama di de aini a paladeisi, o taki ‘mi siki’ (Yes. 33:24; Rom. 6:7). Dati wani taki den sama di o weki baka o gusontu. Ma den o abi sondu ete. Efu den sama ya be o weki baka enke sama di ná abi sondu, da den famii anga mati fu den á be o sabi den, bika den á be o abi denseefi manii moo. A gei enke aini a Dunsu Yali Tii fu Kelestesi sama o kon fii fu sondu saafisaafi. Na a kaba fu den dunsu yali ya Yesesi o gi en Dda a Kownukondee baka.  A pisiten de a Kownukondee o du ala den sani di Yehofa be wani kaba. Libisama ná o abi sondu moo.​—1 Kor. 15:24-28; Openb. 20:1-3.

10. Fa yu o fii te den sama fi i di dede o weki baka?

¹⁰ Pakisei fa a o de te den sama fi i di be dede o weki baka. Yu o lafu efuso yu o kee fu di yu e piisii taki i si den baka? Yu o poolo te da i bali singi fu gafa Yehofa? Te a sani ya o pasa, wi o moo lobi Yehofa anga en Manpikin di gi wi a gaan kado ya.

11. Te i luku den sani di Yesesi taki a Yohanisi 5:28, 29, da san o pasa anga den sama di e aliki Gadu?

¹¹ Pakisei fa den sama di o weki baka o piisii te den o kengi den manii fu den fu du sani enke fa Yehofa wani. Den sama di o libi enke fa Yehofa wani, o libi fu teego aini a paladeisi. Ma Yehofa ná o fika den sama di á wani saka denseefi neen ondoo fu poli sani gi den taawan.​—Yes. 65:20; leisi Yohanisi 5:28, 29.

12. Fa Yehofa o belesi ala sama a goontapu?

¹² Te a Kownukondee fu Gadu o tii, da ala den sama di e dini en o si fa a sani di sikiifi a Odo 10:22 e kon tuu. A tekisi ya e taki: ‘Na a belesi fu Yehofa e meke sama gudu. A nai meke den tyali.’ A santa yeye fu Yehofa o yeepi a foluku fi en fu abi denseefi manii fu Yesesi. A o yeepi den tu fu toon sama di ná abi sondu moo (Yoh. 13:15-17; Efe. 4:23, 24). Dei fu dei wi o kon moo gusontu, wi o toon moo bun sama tu. Ná pikin switi a libi o switi na a ten de (Yopu 33:25). Sowtu wini wi e fende nownow kaba te wi e teke ten pakisei fu a weki di Gadu o weki dedesama baka?

13. Fa Psalm 139:1-4 e soi taki Yehofa sabi u tuutuu? Fa a fasi fa Yehofa o weki sama baka e soi taki a sabi u tuutuu?

¹³ Enke fa u be luku kaba, da den sama di o weki baka o man membee fa a libi fu den be de fosi den dede, den o abi denseefi manii ete tu. San a sani ya e leli u? Ai soi taki ná pikin lobi Yehofa lobi u. A sabi ala den sani di wi e pakisei, den sani di wi e fii, den sani di wi e taki, anga ala den sani di wi e du. Neen meke te a o weki den sama di dede baka, a ná o taanga gi en fu meke den membee ala den sani di den be sabi fosi den dede. A o meke den anga denseefi manii baka. Kownu David be sabi taki Yehofa sabi ala sani fu u. (Leisi Psalm 139:1-4.) Fa a sabi di i sabi taki Yehofa sabi ala sani fi yu e meke i fii?

14. Fa u mu fii te u pakisei taki Yehofa sabi ala san wi e du?

¹⁴ Winsi fa Yehofa sabi ala sani fu u, toku u ná abi fu booko wi ede taki a den fowtu di wi e meke namo ai si. Saide? Bika Yehofa lobi u. Ai booko en ede anga ibiiwan fu u. A nai feegete den sani di miti wi aini u libi, neen meke ai fusutan saide wi e du, pakisei, efuso taki son sani. A sani ya e gi u taanga-sikin tuutuu. Noiti u mu si enke a u wawan de. Ala yuu fu a dei Yehofa e de leti a u se fu luku fa a sa yeepi u.​—2 Kolon. 16:9.

15. Fa a paamisi di Yehofa paamisi taki a o weki dedesama e soi taki a koni tuutuu?

¹⁵ Te wan sama e feele fu dede, da sama sa dwengi en fu du sani di a á be o du noiti. Na a sani ya den sama di de na a tii fu  Saatan ondoo e du. Den e meke sama konkuu den mati efuso den e meke den du sani di den sabi taki á bun fu di den e feele taki sama o kii den. Ma u sabi taki winsi den feyanti fu u kii wi, Yehofa o weki u baka, neen meke den á poi dwengi u fu du sani di á bun (Openb. 2:10). U sabi taki winsi san den e du, den á poi poli wi anga Yehofa (Rom. 8:35-39). A paamisi di Yehofa paamisi taki a o weki dedesama baka e soi taki a koni tuu. Fu di wi abi a howpu ya meke den bakaman fu Saatan á poi dwengi u fu du san Yehofa á lobi.

16. San i mu akisi iseefi? Fa a fasi fa yu o piki den akisi ya o soi efu yu e fitoow Yehofa tuutuu?

¹⁶ Yu e biibi taki Yehofa o weki i baka efu den feyanti fi en taki den o kii yu? Fa yu o du sabi efi yu o fitoow Yehofa efu a sani ya miti i? Akisi iseefi a sani ya: ‘Den sani di mi e du ala dei e soi taki mi e fitoow Yehofa?’ (Luk. 16:10) I sa akisi iseefi tu taki: ‘A fasi fa mi e libi e soi taki mi e biibi taki Yehofa o gi mi den sani di mi abi fanowdu efu mi poti a Kownukondee fi en a fesi?’ (Mat. 6:31-33) Efi i poi piki ‘eeye’ na ala den tu akisi ya, da yu e soi taki yu e fitoow Yehofa. Yu e soi tu taki i de seekaseeka gi iniiwan tesi di sa miti i.​—Odo 3:5, 6.

17. (a) Yehofa poti wan yuu di a o weki dedesama baka. Fa a sani ya e soi taki a abi pasensi? (b) Fa u sa soi taki wi e teke en fu bigi taki Yehofa abi pasensi?

¹⁷ Yehofa poti a dei anga a yuu kaba di a o poli a goontapu ya (Mat. 24:36). Yehofa ná o poli a goontapu ya fosi a yuu di a poti doo. Winsi fa ai angii fu weki den sama di dede baka, tokuso a abi pasensi (Yopu 14:14, 15). Ai wakiti a yuu di a poti fu weki den baka (Yoh. 5:28). U mu teke en fu bigi taki Yehofa abi pasensi, bika na a sani ya meke wi anga omen taa sama ‘fende a okasi fu tapu anga den sondu fu u’ (2 Peit. 3:9). Yehofa wani ala sama tan a libi. Neen meke u mu soi taki ai bigi gi u taki Yehofa abi pasensi. Fa u sa soi taki a sani ya e bigi gi u? U mu du ala san u poi fu suku ‘ala den sama di ati bun fu fende a teego libi’. U mu yeepi den tu fu lobi Yehofa, da den o dini en anga den hii ati (Toli 13:48). Te  wi o du a sani ya, denseefi o fende wini fu a pasensi fu Yehofa.

18. Saide u mu e pasensi anga taawan?

¹⁸ Na a pisiten fu a dunsu yali Yehofa o wakiti anga pasensi te enke u ná abi sondu moo. Solanga den dunsu yali ya á pasa, Yehofa o tan gi u paadon fu den sondu fu wi ete. Neen meke u mu e pasensi anga taawan leti enke Yehofa. U mu e meke moiti fu si den bun manii fu den. Luku a toli fu wan sisa. A man fi en abi wan siki di e meke ai booko ede pasa peesi anga sani. A siki ya be meke a man fi en á be e go a komakandaa moo. A sisa ya taki: ‘A sani ya á be makiliki gi mi, u hii libi be kengi. Wi á be poi du den sani di u be wani du moo.’ Toku a sisa ya tan soi a man fi en taki a lobi en, a be abi pasensi anga en tu. A be e fitoow Yehofa, a be e yeepi a man fi en ala yuu. Leti enke Yehofa a be tan poti pakisei a den bun manii fu a man fi en. A sisa taki: ‘A man fu mi abi bun manii, ai du ala san a poi fu kon betee baka.’ U mu e pasensi anga den sama fu wi osufamii anga den sama fu u kemeente di abi polobelema.

19. San u mu de kabakaba fu du?

¹⁹ Yesesi anga den engel be e piisii di Gadu meke goontapu. Den o moo piisii te goontapu o fuu anga sama di ná abi nawan sondu, di e dini Yehofa anga den hii ati. Pakisei fa den sama di o tii makandii anga Yesesi a hemel o piisii te den e si fa libisama e fende wini fu a wooko di den e du (Openb. 4:4, 9-11; 5:9, 10). Ná pikin switi a libi o switi. U ná go e kee moo fu pen, fu siki, fu di wi e tyali, efuso fu di wan sama fu u dede (Openb. 21:4). Ma solanga a ten de á doo, u mu tan waka a u Dda di lobi u, di koni anga di abi pasensi baka. Efi i du den sani ya, yu o piisii ala yuu winsi sowtu tesi e miti i (Yak. 1:2-4). Ai bigi gi u tuutuu taki Yehofa paamisi u taki a ‘o weki den dedesama baka’.​—Toli 24:15.