1. Sowtu gaandi ala wi abi?

AI BIGI gi u tuutuu taki u de aini a olikanisâsi fu Yehofa. Wi e poolo fu di u poi dini Yehofa makandaa anga u baala anga sisa. San i poi du aini a kemeente?

2. Sowtu ageisitoli Pawlesi gi aini wantu fu den biifi fi en?

² Wan fu den ageisitoli di Pawlesi be gi aini wantu fu den biifi fi en, e leli u wantu sani fu den gaandi di wi abi aini a kemeente. Aini den biifi ya, Pawlesi e maiki a kemeente anga wan libisama sikin. A maiki den sama di de aini a kemeente anga den pisi fu wan libisama sikin tu.​—Rom. 12:4-8; 1 Kor. 12:12-27; Efe. 4:16.

3. San a den dii sani di wi o luku aini a artikel ya?

³ Yehofa abi ala sama aini a kemeente fanowdu. Ala u sa gi taawan taanga-sikin. Winsi sowtu nasi, efuso lo u komoto, winsi u gudu efuso pooti, ala u pelensipali aini a kemeente. Aini a artikel ya wi o luku dii sani di u sa leli fu a ageisitoli fu Pawlesi. Wi o si taki ala Kelesten aini a kemeente pelensipali gi Yehofa. Baka dati wi o luku san u mu du efu wi e fii enke a fu soso u de aini a kemeente. Enke lasiti wi o luku saide u mu tan meke moiti fu gi taawan taanga-sikin aini a kemeente.

4. San Romesama 12:4, 5 e leli u?

⁴ A ageisitoli fu Pawlesi e leli u taki ala Kelesten pelensipali gi Yehofa. Pawlesi be taki: ‘U sikin abi omen pisi, ma a ná ala den na aseefi. A so wi anga Kelestesi de enke wan sikin tu, ma a omen sama u de. A so u de enke den pisi fu wan sikin tu, neen meke wi abi useefi fanowdu’ (Rom. 12:4, 5). San Pawlesi be wani taki anga a sani ya? Pawlesi be wani leli wi anga a sani ya taki ala wan sama aini a kemeente abi wan sani di a sa du. Ala u pelensipali.

5. Sama Yehofa poti fu luku a kemeente?

⁵ Kande wi e si enke a den baala di e teke fesi aini a kemeente wawan pelensipali gi Yehofa (1 Tes. 5:12; Heb. 13:17). A tuu taki a Yehofa meke Kelestesi poti den man ya fu teke fesi aini a kemeente (Efe. 4:8). Wantu fu den man ya a den baala di e tii a wooko a hii goontapu, den baala di e yeepi den anga a wooko, den baala fu den Beikantoo Komte, den kelen-owluman, den baala di e gi leli a den sikoo fu a olikanisâsi, den kemeente owluman, anga den dinali. Anga a santa yeye Yehofa poti ala den baala ya fu solugu den sikapu fi en. A poti den tu fu taanga a kemeente.​—1 Peit. 5:2, 3.

6. Enke fa 1 Tesalonikasama 2:6-8 e soi, da san den baala di e teke fesi aini a kemeente e meke moiti fu du?

⁶ Na a santa yeye e poti den baala di e teke fesi a wooko. Leti enke fa wi ana anga u futu e wooko makandaa, a so den baala ya e wooko makandaa fu meke sani waka bun aini a kemeente. Den baala ya nai du a wooko ya fu fende balinen, ma a yeepi den wani yeepi den baala anga sisa aini a kemeente fu taanga den biibi. (Leisi 1 Tesalonikasama 2:6-8.) Wi e gi Yehofa daa taki a gi u den baala ya di e du san den poi fu yeepi taawan.

7. Fa Yehofa e belesi den sama di e du a fuuten diniwooko?

⁷ Son sama aini a kemeente a zendeling, spesuutu pionili efuso kowownu pionili. A omen baala anga sisa a hii goontapu e du a pioniliwooko. A so den e yeepi omen sama fu toon bakaman fu Yesesi Kelestesi. Gaanse fu den baala anga sisa ya á gudu, ma toku Yehofa e belesi den anga san den abi fanowdu (Malik. 10:29, 30). U lobi den baala anga sisa ya. Ai bigi gi u taki den de aini a kemeente.

8. Saide ala peleikiman pelensipali gi Yehofa?

⁸ A den baala di e teke fesi, anga den baala anga sisa di e du a fuuten diniwooko wawan pelensipali aini a kemeente? Nono, a ná den wawan pelensipali. Ala baala anga sisa di e paati a bun nyunsu pelensipali gi Gadu. Den pelensipali gi a kemeente tu (Rom. 10:15; 1 Kor. 3:6-9). Bika a moo pelensipali wooko di a kemeente mu du, a fu paati a bun nyunsu anga fu yeepi sama fu toon bakaman fu Masaa Yesesi Kelestesi (Mat. 28:19, 20; 1 Tim. 2:4). Ala peleikiman aini a kemeente e poti a wooko ya a fesi, winsi son wan fu den á dopu ete.​—Mat. 24:14.

9. Saide u lobi den sisa fu u?

⁹ Yehofa gi Kelesten sisa pelensipali wooko tu. Son sisa aini a kemeente e holibaka gi den man, taawan a mma,  son wan fu den man dede kaba, son wan á toow. Ala den sisa ya e dini Yehofa anga den hii ati. Beibel e taki fu omen umansama di be e dini Yehofa anga den hii ati. Gadu e gafa den fu di den be e du sani anga koni, den biibi be taanga, den be e dini en fayafaya tu. Den uman ya be abi deki-ati tu, den be lobi gi sama sani. Boiti dati, den be e wooko taanga (Luk. 8:2, 3; Toli 16:14, 15; Rom. 16:3, 6; Filip. 4:3; Heb. 11:11, 31, 35). Wi e gi Yehofa daa taki den sisa fu wi aini a kemeente abi denseefi bun manii fu den uman ya.

10. Saide u lobi den gaandi baala anga sisa?

¹⁰ Ai bigi gi u taki wi abi gaandi baala anga sisa aini a kemeente. Son kemeente abi gaandi baala anga sisa di e dini Yehofa senten di den be yonkuu. Taawan be gaandi kaba di den kon a waaleiti. A omen fu den abi son polobelema fu di den e gaandi namo. Neen meke den nai poi du ala san den be sa wani du aini a kemeente anga a peleikiwooko. Tokuso den e du san den poi. Den e koboloiki den ten fu gi taawan taanga-sikin anga fu leli taawan son wooko. A omen wini wi e fende fu den sani di den e leli u. Ná pikin lobi Yehofa lobi den. Useefi lobi den.​—Odo 16:31.

11-12. Fa den yonkuuwan aini i kemeente e gi i taanga-sikin?

¹¹ Ai bigi gi u taki wi abi yonkuuwan aini a kemeente tu. A á makiliki gi den yonkuuwan ya fu dini Yehofa, bika a Saatan e tii a goontapu. Gaanse sama aini a ten ya, e denki enke fa Saatan e denki (1 Yoh. 5:19). Neen meke ai bigi gi u te wi e yee fa den yonkuuwan e gi piki, fa den e paati a bun nyunsu, anga fa den e opo taki gi Yehofa. Yonkuuwan, u wani u sabi taki useefi pelensipali gi Yehofa anga a kemeente.​—Ps. 8:2.

¹² Ma a tyali taki son baala anga sisa e fii enke a fu soso den de aini a kemeente.  San o yeepi den baala anga sisa ya te den e fii so? Meke u luku san sa yeepi den.

13-14. Saide son sama e fii enke a fu soso den de aini a kemeente?

¹³ Meke u luku du fu tu sani di u sa leli fu a ageisitoli fu Pawlesi. A sani di Pawlesi taki e meke u pakisei a polobelema di son baala anga sisa abi. Den e fii enke den á pelensipali gi a kemeente. Pawlesi be sikiifi taki: ‘Winsi a futu be o taki: “Mi a ná wan pisi fu a sikin, bika mi a ná ana, toku a sani ya á wani taki en a ná wan pisi fu a sikin. Winsi a yesi be o taki: “Mi a ná wan pisi fu a sikin, bika mi a ná ain”, toku a sani de á wani taki en a ná wan pisi fu a sikin’ (1 Kor. 12:15, 16). San Pawlesi be wani leli wi anga a sani ya?

¹⁴ Efi yu e maiki iseefi anga taawan, a sani ya sa meke i fii enke yu á pelensipali aini a kemeente. Kande son baala efuso sisa sabi gi leli, kande son wan sabi seeka sani bun, a kan tu taki son wan a bun sikapuman. Kande yu e fii enke yu á poi du den sani ya bun enke den. A sani ya e soi taki yu abi sakafasi (Filip. 2:3). Ma i mu luku bun, bika efi yu e maiki iseefi naamo anga sama di poi du son sani bun moo yu, a sani de o meke i fii booko-saka. A sani ya sa meke i fii enke i ná abi nawan yeepi aini a kemeente, leti enke fa Pawlesi be taki. San o yeepi i fi yu á fii so?

15. Enke fa 1 Korentesama 12:4-11 e soi, da fa u mu si den sani di u poi du aini a kemeente?

¹⁵ Pakisei a sani ya: A santa yeye fu Yehofa be meke son Kelesten aini a ten fu Pawlesi du wonduu, ma a ná ala den be poi du denseefi sani. (Leisi 1 Korentesama 12:4-11.) Winsi fa den á be poi du denseefi sani, toku ibiiwan fu den be pelensipali gi Yehofa. Aini a ten ya wi á poi du wonduu. Toku u sa leli  wan sani fu a toli ya. Ai soi u taki winsi fa wi á poi du denseefi sani aini a kemeente toku ibiiwan fu u pelensipali gi Yehofa.

16. San apostel Pawlesi taki u mu du?

¹⁶ Wi á mu e maiki useefi anga taawan. Ma u mu du a sani di Pawlesi be taki a Galasiyasama 6:4. A be taki: ‘Meke ala sama ondoosuku enseefi. A sani de o meke a piisii anga san a poi du. A á mu maiki enseefi anga taawan.’

17. Sowtu wini wi o fende te wi e wooko anga a sani di Pawlesi be taki?

¹⁷ Efu wi e meke moiti fu du a sani di Pawlesi be taki, da u poti pakisei a san u poi du, wi o si taki u poi du son sani di taawan á poi. Kande wan owluman á sabi holi lezing enke taa owluman, ma a sabi fa fu yeepi sama fu kon dini Yehofa. Efuso kande a á sabi seeka sani enke den taa owluman, ma a abi switifasi. A sani ya meke den baala anga sisa lobi en, den ná o feele fu go taki anga en te den abi wan polobelema. Efuso kande a lobi kai sama kon neen osu (Heb. 13:2, 16). Te wi e poti pakisei a san u poi du, wi o moo piisii. Wi o si tu taki u pelensipali gi a kemeente. Boiti dati, u ná o go e dyalusu anga taawan fu di den sabi du son sani di wi á poi du.

18. Fa u sa toon wan moo bun leliman?

¹⁸ Winsi san u poi du nownow kaba, ibiiwan fu u mu e tan meke moiti fu du sani moo bun. A olikanisâsi fu Yehofa e yeepi u fu du a sani ya. Wan fu den fasi fa ai yeepi wi a den komakandaa. Te u de a den mindiiwiki komakandaa wi e leli fa u sa toon wan moo bun peleikiman. Yu e wooko anga den sani di wi e leli a den komakandaa ya?

19. San i mu du efi i wani go na a Kownukondee Peleikiman Sikoo?

¹⁹ A Kownukondee Peleikiman Sikoo, a wan taa okasi di wi abi fu teke leli fu Yehofa. Baala anga sisa di e pionili, di abi 23 yali te anga 65 yali sa go na a sikoo ya. Kande yu e si enke i ná o poi go na a sikoo ya. Ma pe fi i sidon e booko yu ede taki i ná o poi go, a moo bun fu luku sowtu wini yu o fende te i go na a sikoo ya. Baka dati, meke moiti fu du den sani di i mu du fu man go na a sikoo ya. Efi i meke moiti, Yehofa o yeepi i fu doo den maiki fu go na a sikoo.

20. San u sa leli fu a sani di sikiifi a Romesama 12:6-8?

²⁰ Du fu dii sani di u sa leli fu a ageisitoli fu Pawlesi, sikiifi a Romesama 12:6-8. (Leisi en.) Pawlesi soi aini a tekisi ya baka taki ala sama aini a kemeente abi en sani di a poi du. A gi u taanga-sikin fu koboloiki den koni di wi abi, fu taanga a kemeente.

21-22. San a toli fu Robert anga Felice e leli u?

²¹ Luku a toli fu wan baala den e kai Robert *. Baka di a yeepi aini wan taa kondee fu wan pisiten, den baala sende kai en fu go wooko a Betel aini en kondee. Winsi fa den baala soi en kiin taki a ná wan sani a du meke den sende kai en, toku a baala taki: ‘A omen mun langa mi be e fii enke a di mi á be du mi wooko bun aini a taa kondee meke den gi mi wooko aini mi eigi kondee. Son leisi mi be e fii fu komoto a Betel.’  San yeepi en fu piisii baka? Te u fende wan wooko fu du, da Yehofa e koboloiki a okasi de fu leli u gi den taa wooko di a o gi u bakaten. Robert be fusutan taki a be mu puu en pakisei na a wooko di a be e du fosi, da a du a wooko di a abi nownow anga en hii ati.

²² Na aseefi sani ya be miti Baala Felice Episcopo. Aini a yali 1956 en anga en uman be go a Gileyad, neen den sende den go a Bolifiya fu du a kelen wooko. Ma aini a yali 1964 den meke wan pikin. Felice taki: ‘A be hati u te di u be mu fika a kelen wooko, bika u be lobi a wooko ya. A wan hii yali mi kusumi fu a sani ya. Ma Yehofa yeepi mi fu kengi a fasi fa mi be e denki. A yeepi mi tu fu tyai a nyun faantiwowtu di mi be abi enke dda.’ Yu e fii enke Baala Robert efuso Felice? Yu e fii booko-saka fu di i ná abi aseefi gaandi di i be abi fosi? Efu a so yu e fii, da a be o bun fu poti pakisei na a faantiwowtu di yu abi nownow. A sani de o yeepi i fu dini Yehofa anga piisii makandaa anga den baala anga sisa fi i. Du ala san i poi fu yeepi taawan. A sani ya o yeepi i fu piisii. Yu o de wan yeepi gi a kemeente tu.

23. San u mu holi a pakisei? San wi o luku aini a taa artikel?

²³ Ibiiwan fu u pelensipali gi Yehofa. A wani ala u fii taki u pelensipali gi a kemeente. Efu u poti pakisei a den sani di u sa du fu yeepi u baala anga sisa, a sani ya o yeepi u fu wi á fii enke a fu soso u de aini a kemeente. Fa u mu si den baala anga sisa aini a kemeente? Fa u sa soi den taki u lobi den? Fa u sa soi den taki wi e lesipeki den? Wi o luku a toli ya aini a taa artikel.