1. Fa Yehofa e si ala den sama di de aini a kemeente?

ALA sama aini a kemeente pelensipali gi Yehofa. Winsi fa u ná abi denseefi faantiwowtu, toku a lobi ala u, wi abi useefi fanowdu tu. Apostel Pawlesi e yeepi u fu fusutan a toli ya moo bun. Fa a du a sani ya?

2. Enke fa Efeisesama 4:16 e soi, da saide u mu e lesipeki ala sama aini a kemeente? Saide u mu e wooko makandaa?

² Aini a tekisi di wi o taki fi en aini a artikel ya, Pawlesi soi taki nawan fu u sa taigi wan taa Kotoigi taki: ‘Mi ná abi i fanowdu’ (1 Kor. 12:21). Efu u wani sani waka bun aini a kemeente, u mu e wooko makandaa anga u baala anga sisa. U mu e lesipeki ala sama di de aini a kemeente tu. (Leisi Efeisesama 4:16.) Te ala sama aini a kemeente e wooko makandaa, wi o moo lobi useefi. A kemeente o moo taanga tu.

3. San wi o luku aini a artikel ya?

³ Fa u sa soi taki wi e lesipeki den baala anga sisa aini a kemeente? Aini a artikel ya wi o luku fa owluman sa soi taki den e lesipeki taa owluman. Baka dati wi o luku fa ala u sa soi taki wi e lesipeki den baala anga sisa di á toow. Wi o luku tu fa u sa soi taki wi e lesipeki den baala anga sisa di nai taki a tongo fu u bun.

4. Enke fa Pawlesi sikiifi a Romesama 12:10, da san owluman mu du?

⁴ Winsi fa na a santa yeye fu Yehofa e poti baala enke owluman aini a kemeente, toku a ná ala owluman poi du denseefi sani (1 Kor. 12:17, 18). Kande son wan fu den a taade ya den toon owluman, neen meke den ná abi ondoofeni enke taawan. Son wan fu den á poi du san den be gwenti du moo fu di den kon gaandi. Taawan a siki den siki. Tokuso nawan owluman mu taigi wan taa owluman taki: ‘Mi ná abi i fanowdu.’ Ala owluman mu du a sani di Pawlesi sikiifi a Romesama 12:10.​—Leisi en.

5. Fa owluman sa soi taki den e lesipeki den taa owluman aini a kemeente? Saide a sani ya pelensipali?

⁵ Owluman e soi taki den e lesipeki taa owluman te den e aliki den bun. A sani ya pelensipali, moomoo te den e holi owluman komakandaa. Saide? A Saanantongo Wakititolen fu 1 oktober 1988 be taki: ‘Owluman mu fusutan taki Yesesi sa koboloiki a santa yeye fu yeepi iniiwan fu den owluman fu fende wan tekisi di sa yeepi den fu sabi san den mu du (Toli 15:6-15). A santa yeye e yeepi ala den owluman aini a kemeente, a ná anga wan namo ai wooko.’

6. San e yeepi owluman fu wooko makandaa? Sowtu wini a kemeente e fende te owluman e wooko makandaa?

⁶ Wan owluman di e lesipeki taa owluman nai feti taki enke fosiwan ala yuu te den de a wan owluman komakandaa. Boiti taki a neen wawan e taki na a komakandaa, a nai si enke a sabi sani moo den taawan tu. A fasi fa a owluman ya e taki e soi taki a abi sakafasi, ai taki a wan switifasi tu. Ai aliki bun te den taa owluman e taki. Ma a moo pelensipali sani di a owluman ya e du, a taki ai wooko anga den sani di ‘a koni saafu di u sa fitoow’ taki (Mat. 24:45-47). Te owluman e soi taki den lobi denseefi, te den e lesipeki denseefi, da a santa yeye o de anga den te  den de a den owluman komakandaa. A o yeepi den fu du sani anga koni. A sani ya o meke a kemeente moo taanga.​—Yak. 3:17, 18.

7. Fa Yesesi be e si den sama di á be toow?

⁷ Son baala anga sisa aini a kemeente toow, kande den abi pikin tu. Ma a omen baala anga sisa á toow. Fa u mu si den baala anga sisa di á toow? U mu si den enke fa Yesesi be e si den sama di á be toow. Di Yesesi be e du en wooko a goontapu a á be toow. Ala en pakisei anga en ten be de na a wooko di a be mu du. Noiti Yesesi leli sama taki a namonamo wan Kelesten mu toow, efuso taki wan Kelesten á mu toow. Ma a be taki son Kelesten á be o toow (Mat. 19:11, 12). Yesesi be e lesipeki den sama di á be toow. A á be e si enke den sama di toow be bun moo den sama di á toow. Boiti dati, a á be e si enke den sama di á toow e mankei wan sani.

8. Sowtu taanga-sikin Pawlesi be gi den Kelesten aini 1 Korentesama 7:7-9?

⁸ Leti enke Yesesi Pawlesi á be toow. Ma Pawlesi á taki Kelesten á mu toow tu. A be sabi taki a wan sama seefi mu luku efu a wani toow. Toku Pawlesi be gi Kelesten taanga-sikin fu luku efu den sa dini Yehofa sondee fu toow. (Leisi 1 Korentesama 7:7-9.) Pawlesi á be e si enke sama di toow bun moo den sama di á toow. Timotiyesi a be wan yonkuman di á be toow, toku Pawlesi be gi en gaan faantiwowtu aini a kemeente (Filip. 2:19-22). * A sani ya e soi taki efu den baala wani gi wan taa baala faantiwowtu aini a kemeente, den á mu luku efu a baala toow.​—1 Kor. 7:32-35, 38.

9. Fa u mu si sama di toow anga sama di á toow?

⁹ Noiti Yesesi anga Pawlesi be leli sama taki Kelesten mu toow efuso taki den á mu toow. Fa u mu e si den sama di toow anga den sama di á toow? A Saanantongo Wakititolen fu oktober 2012 be taki wan moin sani fu a toli ya. A taki: ‘Efu wan sama toow u sa si a sani ya enke wan belesi fu Gadu, ma efu wan sama á toow tu, u sa si a sani ya enke wan belesi fu Gadu tu. . . . Yehofa nai si en enke wan sen sani te wan sama á toow.’ Neen meke  u mu lesipeki den baala anga sisa aini a kemeente di á toow.

10. Fa u sa soi taki wi e lesipeki den baala anga sisa di á toow?

¹⁰ Fa u sa soi taki wi e lesipeki den baala anga sisa di á toow? A bun fu e holi den fii fu den a pakisei. Son wan fu den a denseefi á wani toow. Taawan wani toow, ma den á fende wan sama ete. Taawan a dede den toowpaa dede. Winsi san meke wan sama á toow, i si enke a be o bun efu taa sama aini a kemeente e akisi den saide den á toow? A be o bun fu akisi den efu u mu yeepi den suku wan sama fu toow? Son leisi wan Kelesten di á toow e akisi taawan fu yeepi en suku wan sama fu toow. Ma efu a sama ná akisi i, fa i si enke a be o fii efi i komoto go akisi en fu yeepi en suku wan sama fu toow? (1 Tes. 4:11; 1 Tim. 5:13) Meke u luku san wantu baala anga sisa di á toow taki fu a toli ya.

11-12. San sa meke baala anga sisa di á toow fii booko-saka?

¹¹ Wan kelen-owluman di á toow e du a wooko fi en bun. A baala ya taki a poi du son sani di a á be o poi du efu a be toow. Ma a taki ai fii booko-saka te baala anga sisa e akisi en taki: ‘Saide yu á toow?’ Wan baala di á toow di e wooko a Betel taki: ‘Son leisi baala anga sisa e du efuso taki sani di e soi taki tyali e kisi den gi den sama di á toow. A sani ya sa meke a gei enke a wan gaan hebi yu e tyai fu di yu á toow.’

¹² Wan sisa di á toow di e wooko a Betel taki: ‘Son peleikiman e si enke na ala sama di á toow e suku wan sama fu toow. Son yuu den e si enke solanga wan sama di á toow e go koi anga taawan, da a wan sama den e suku fu toow. Wan leisi Betel be sende mi go du wan wooko a wan taa foto. A dei di mi doo den be abi komakandaa. A sisa di be abi a osu pe mi be o siibi, taigi mi taki tu baala di mi anga den a supee de aini a kemeente de. Anga ala ai taigi mi taki a ná yeepi ai yeepi mi suku wan toowpaa. Ma faisi u doo a Kownukondee zaal a tyai mi langalanga go a den tu baala ya. Ná pikin sen kisi mi. Sen kisi den baala tu.’

13. Fa a libi fu wantu pionili gi wan sisa di á toow taanga-sikin?

¹³ Wan taa sisa di á toow di e wooko a Betel taki: ‘Mi sabi pionili di gaandi moo mi di á toow. Den pionili ya e du sani anga koni, den sabi san den wani du anga den libi, den lobi yeepi sama, den e piisii tu. Den nai si enke den bun moo taawan fu di den á toow. Den nai si enke den á poi de koloku fu di den á toow efuso fu di den ná abi pikin.’ Ala wi e fii bun te u de aini wan kemeente pe taawan e lesipeki u, anga te den e soi u taki u pelensipali aini a kemeente. Yu e fii bun te i sabi taki taawan nai si i wan fasi fu di yu á toow, anga te den nai dyalusu anga i. Yu e fii bun tu te den nai du enke yu á de aini a kemeente fu di yu á toow, anga te den nai si enke i bun moo den. Efu den e libi so anga yu aini a kemeente, yu o fii taki den lobi i tuutuu.

14. Fa u sa soi taki wi e lesipeki den baala anga sisa di á toow?

¹⁴ Den baala anga sisa di á toow o teke en fu bigi te wi e poti pakisei a den bun manii fu den, pe fu wi e si den enke sama di á poi de koloku solanga den á toow. Pe fu tyali kisi u gi den, u mu poolo taki den e tan dini Yehofa anga den hii ati. Te wi e du a sani ya, da den baala anga sisa di á  toow ná o fii enke wi e taigi den taki ‘u ná abi den fanowdu’ (1 Kor. 12:21). Ma den o fii taki wi e lesipeki den. Den o si tu taki wi e teke en fu bigi taki den de aini a kemeente.

15. San son baala anga sisa du fu di den be wani du moo gi Yehofa?

¹⁵ Aini den yali di pasa, a omen peleikiman meke moiti fu leli wan taa tongo fu di den be wani peleiki gi den sama di e taki den tongo ya. Den be abi fu kengi son sani aini den libi fu man du a sani ya. Den baala anga sisa ya gwe fika a kemeente di e taki den mamabee tongo, neen den go a wan kemeente pe moo peleikiman de fanowdu (Toli 16:9). Den du a sani ya fu di den wani du moo gi Yehofa. Kande a omen yali a o teke den fu leli a tongo fu a kemeente pe den go, ma toku den sa yeepi anga omen sani. Den sa taanga a kemeente anga den moin manii fu den, anga a ondoofeni di den abi. Ná pikin lobi u lobi den baala anga sisa ya di e du san den poi fu yeepi taawan.

16. San den owluman mu luku te den wani poti wan baala enke dinali efuso owluman?

¹⁶ Winsi wan baala á poi taki a tongo fu a kemeente bun, toku a sani de á mu meke den owluman á poti en enke dinali efuso owluman. Te den owluman o luku efu wan baala sa fende son gaandi, da den mu luku efu ai tyai enseefi enke fa Beibel taki. A ná a fasi fa ai taki a tongo den mu luku.​—1 Tim. 3:1-10, 12, 13; Tit. 1:5-9.

17. San osufamii mu akisi denseefi te den foloisi go a wan taa kondee?

¹⁷ Son osufamii foloisi go tan a wan taa kondee fu suku wooko, efuso fu di sani nai go bun aini a kondee fu den. Kande den pikin fu den Kelesten ya sabi a tongo fu a kondee bun, bika den e leli en a sikoo. Kande dda anga mma mu leli a tongo fu den sa fende wan wooko. San den osufamii ya mu du efu wan kemeente efuso kulu di e taki a tongo fu den de koosube? Sowtu kemeente den mu go? Den mu go a wan kemeente pe den e taki den mamabee tongo? Efuso den mu go a wan kemeente pe den e taki a tongo fu a kondee pe den e tan?

18. Enke fa Galasiyasama 6:5 e soi, da fa u sa soi lesipeki gi a edeman fu wan osufamii te a taki sowtu kemeente en osufamii o go?

¹⁸ Na a edeman fu a osufamii mu luku sowtu kemeente den o go. A mu luku san o moo bun gi en osufamii. (Leisi Galasiyasama 6:5.) Winsi sowtu kemeente den go, wi e soi taki wi e lesipeki a bosoloiti fu den te wi e bali wadaa gi den, anga te wi e soi den taki u lobi den.​—Rom. 15:7.

19. San osufamii edeman mu holi a pakisei te den e luku sowtu kemeente a osufamii o go?

 ¹⁹ Son osufamii de aini wan kemeente pe den e taki a mamabee tongo fu a dda anga a mma. Ma kande den pikin e taki a tongo fu a kondee bun moo den mamabee tongo. A sani ya sa meke a taanga gi den fu fusutan den sani di den e leli a den komakandaa. A sa taanga gi den tu fu go a fesi. Efu a so, da a osufamii edeman mu begi Yehofa fu a yeepi en fu sabi san a mu du. Baka dati, a mu luku fa den sa yeepi den pikin fu sabi Yehofa moo bun, anga fu lobi a olikanisâsi fi en. Kande dda anga mma o abi fu leli den pikin den mamabee tongo moo bun. Ma den sa foloisi go a wan kemeente tu di e taki a tongo di den pikin e moo fusutan. Winsi san a osufamii o du, a kemeente di den o go mu lesipeki a bosoloiti fu den. Den mu bali wadaa gi den te den kon aini a kemeente.

20. Fa u sa soi taki wi e lesipeki den baala anga sisa di e leli wan taa tongo?

²⁰ Enke fa u luku, da aini omen kemeente wi abi baala anga sisa di e leli a tongo fu a kemeente ete. Kande ai taanga gi den fu taki fa den e denki. Ma wi á mu luku na a fasi fa den e taki a tongo fu u. U mu meke moiti fu si fa den e soi taki den lobi Yehofa, anga a moiti di den e meke fu dini en. Efu wi e poti pakisei a den moin manii fu den, wi o lobi den, wi o lesipeki den tu. U ná o taigi den baala anga sisa ya taki ‘u ná abi den fanowdu’ fu di den á poi taki a tongo fu u bun.

21-22. Sowtu gaandi ala wi abi?

²¹ Ai bigi gi u taki Yehofa gi ibiiwan fu u pelensipali wooko aini a kemeente. Winsi yu a wan mannengee efuso umanpikin, winsi i toow efuso yu á toow, winsi i gaandi efuso yonkuu, winsi i sabi taki wan tongo bun efuso yu á sabi taki wan tongo bun, i pelensipali gi Yehofa. I pelensipali gi den baala anga sisa aini a kemeente tu.​—Rom. 12:4, 5; Kol. 3:10, 11.

²² U mu tan meke moiti fu du den sani di a ageisitoli fu Pawlesi e leli u. Te wi e du den sani ya, da wi o tan suku fasi fu gi u baala anga sisa taanga-sikin. Wi o tan meke moiti fu lobi den. Wi o lesipeki den tu.